新鮮日本柚子

今日四點剛落機 ,我八點去拎 , 十一點至得閒批2個黎食.
好 ~ 好 ~ 食 ~ 呀 !!!!!!!!!!!!!

四月要做乜

1. 做運動至少45分鐘
2. 跟羊太學煮野
3. 每日都著好dd
4. 要執執個樣畫番d眼耳口鼻
5. 每日有八小時睡眠
6. 每日飲足十杯水
7. 每日都要煮住家飯
8. 次次收左衫都要即刻熨
9. 每日都要執屋清潔
10.每日去格價

想到再寫

今年好多鼠 BB

ERIC & KAREN
JOE & WINNIE
JENNY
車車

願佢地都凡事平安.^^

第一位鼠BB

SIMON 同 DORIS 0既 BB 出左世喇~ 好開心^^
新媽媽折騰了好一天, 最後要開刀. BB以後要鍚媽咪 , 陳SIR以後都要更錫老婆更錫BB呀~
我呢幾日,祈禱時都"順便"向聖母祈求 ,希望作為新媽媽的DORIS萬事都平安.昨夜慕道班後,經過聖母山,我突然想向聖母講多謝. 過左無耐, 就收到準爸爸的 SMS 好消息.




響呢度再向陳SIR弓起多一次,祝 BB快高長大,健康活潑,DORIS身體快D復元,好好享受家庭樂. ^^

我應該要去懺悔

根據天主教網頁指引 :
http://cathedral.catholic.org.hk/formation/memo/lent2007_01.htm

2月份我們除了慶祝農曆新年，也不要忘記今年的四旬期由2月21日星期三開始。 在慶祝新春之餘，讓我們仍不忘悔改和克己。按照傳統，四旬期開始當日舉行聖灰禮儀，當天教友須守大小齋。但根據《香港天主教手冊》，已故胡振中樞機決定，如果聖灰禮儀日適逢農曆新年節期，當天的大小齋可獲寬免。 不過即使當天不用守大小齋，教友仍須自行採用其他適當的悔罪方式，或捐款濟貧。

什麼是守大小齋？「守小齋」的規定適用於所有十四歲以上的人士，而「守大齋」的規定則適用於十八歲以上而未達六十歲的人士。「守小齋」即是放棄食用熱血動物的肉；「守大齋」是指除了不吃熱血動物的肉之外，全日只可有一餐吃飽，在早上及晚間只可吃少量食物，其餘時間不可進食，但可取用流質飲品，包括奶類和果汁。還有，守大小齋的精神是強調克己, 所以不要「蠱惑地」安排吃海鮮大餐。

睇黎我要為左守大齋當日一隻爆糕軟殼蟹而懺悔 .-_____-"""

　

生鐵鑊 - 開鑊程序

按梁添刀廠送0既開鑊指示 :
1. 用鋼絲擦加一殼生米, 少許水洗擦15分鐘
(問過老人家,加生米係想米0既天然澱粉質"填補"鑊表面的小孔. 而米加鋼絲擦,亦可以加快將已氧化的鐵/金屬物質/生產時的什質/表面保護物質清除)
2. 抹乾後燒紅鑊 , 放入肥豬肉轉慢火煎至出油,大約10分鐘 .
3. 放入韭菜,蓋上鑊蓋煮10分鐘
4. 丟棄油+豬肉+韭菜 , 用水沖淨,塗上生油保護.

我在第四個步驟更改左d. 就係再重做多一次2-3步, 然後加一鑊水 , 煮至附在鑊面的黑色油浮起 ... 倒去水, 再塗生油保護.
開鑊後的鐵鑊 ,明顯地油潤好多.

領洗後感想

由星期四早走左半日去做公司野開始, 我一共放左4日半假期.
呢個假期其實幾忙,由一個月前開始已經要參與領洗前0既課程/避靜/彌撒. 所以一直幾個星期都無同阿娘 / 老爺飲茶/食晚飯.
朋友都關心咁問:係唔係好緊張 ?
我都答 : 唔緊張 , 比d水淋一淋0者,有幾緊張?
朋友都問 : 有無叫朋友/屋企人黎睇?
我都答 : 無喇,半夜三更,又要過海又上山,唔喇~
本來老爺同小電叔仔要黎,最後都係得小電黎,因為實在唔想老爺咁頻撲,要佢老人家走上走落,分分鐘仲要無位坐.阿娘本來都想黎,一聽到過海,就縮沙了~~好友D都話想黎,但佢大肚臨 DUM, 27/3就係預產期,實在又係唔想佢操勞.
一句到尾,都是自己的事,唔想麻煩人家.而且,宗教上的事,唔係人人都同一睇法.家人朋友有心,我都收到哂.
領洗後見到導師,同導師傾起對自己有乜野期望,我只係想做好自己,在教義內我們都是罪人, 領洗後等於重生/重新"學"做人,睇過好多所謂領洗後"重生" 但又依然故我 / 自以為審批者的反面教材,我要無時無刻去提醒自己,唔可以好似佢地一樣.
宗教信仰,係作為自己心靈修養的其中一環,而不是批判他人他事的利刀.

與友一席話

仆左入去翠華 , 咬住舊鮮奶油焗豬包,談及大家對宗教的睇法.
好的 presentation 絕對好緊要,否則會適得其反,目標會愈走愈遠.
再下來,尊重對方思想好緊要,否則對方唔會同你講落去.(我 lai 過野,真係朋友都無得做)我同佢提及我老豆同牧師講五餅二魚0既故仔, 大家笑翻了肚.同樣,響上堂0既初期我用呢一樣野去問伍執事,得番黎0既結果正面及有深度好多.如果大家去著眼響係唔係真係食飽咁多人 / 係唔係作野,一定係反面收場.(正如我老豆同牧師事件一樣) 以人文科學 / 經濟學角度去睇呢一件事,大家的得著仲多.

今年復活節的節目

有教堂

有聖洗 "盤" XDDDDDDDDDDDDDDDDD

更有殺人於無形0既肥爆鮮奶油豬仔包!!!!

食乜Q - 日本柚子

2-4月又係日本柚子當造時間 ~~~
第一次接觸呢樣野係前年,2006年初比佢個名吸引左,叫日向夏. 檸檬般大小,鮮黃色外皮, 整個柚子都是寶 :
黃色外皮 - 薄薄地削出黃色外皮,可作糖漬果皮乾 , 加蜜糖沖水作柚子茶,加入麵粉雞蛋作柚子蛋糕,加入日本豉油制成柚子醬油.
白色衣跟米色果肉 - 切成一塊塊就咁食.


今年已跟水果店訂貨~$480/5公斤/約26-30隻,單計一隻要16塊錢,在我來說是屬貴價東西.但比起在祟光超市 $488 /6隻便宜得多. 而且,當造期都只有2個月, 要都是食一次半次,價錢都可以接受呀~

與日本柚子 "日向夏" 有關的商業連結:
http://hmaru.jp ( 一開呢一個網頁,口水洶湧而出)
http://hmaru.jp/hyu.html ( 不同品種的柚子,另有食用方法解說)http://www.miyazakiya.jp/webshop/hyuganatsu/hyuganatsu.html (大量柚子產品,部份於CITY'SUPER有售)

阿娘有微言

因為家族中都是信奉某教,我就要一樣?
阿娘有微言.
我笑笑口答一句 : 都係同一個老細,無緊要~
要信要入,一早就入左喇,我唔信我唔入,係因為我覺得某些教義同我做人原則相迴異.加上看到/接觸到其他反面教材,我對自己說 : I can't be one of them !
最緊要係:不是我杯茶, 不是我自願 ,我極度抗拒.看官可以認為我硬頸,但人各有志,為甚麼要他人按你自己意願行事 ?
我信天主教,就係因為無人迫我,無人比壓力我.天主教堂,係我自願行入去.
做人,心甘命抵係好緊要的~

成功左一小步

與朋友W提及我的問題 , 今晚總算行左一步.



革命尚未成功, 同志仍需努力 ~~



下一步,就係呢三隻櫃桶.

又買到心頭好 - 生鐵鑊

自小就見/跟阿娘用生鐵鑊,大個之後亦理所當然地用番生 鐵 鑊.
今日在深水步就買左一隻生鐵鑊,價值45大圓 ~ 而家用緊的太細隻, 老爺叔仔來食飯就會唔夠用.

左邊的是用左五年的生鐵鑊 , $28/隻
右邊的是今日買的,大隻一點, $45/隻

盲從

盲從 , 即盲目地跟從.
我覺得身為中國人,好多機會去盲從,因為傳統 / 家規係咁,不理原因何在,一味死跟.
引伸到全世界, 盲從事例亦多不勝數 , 盲從亦非中國人專利.
細個曾聽長輩訓誨 : 要咁咁咁咁, 唔可以咁咁咁咁 . 為怕挨打挨鬧,就跟到十足.出左問題,就話屋企咁教我.長大以後,就識自己想想 : 點解要跟? 本意係乜野? 有無一d兩全其美方法 ?
日常生活,工作上,學業上,對人對事,都有不少機會比自己去想去反省,如果可以站在中間反省一下,人都會變得轄達. 因為,不再專注於牛角尖內,人自然開朗,省下來的時間,可以細心加工雕琢一下自己的生活,何樂而不為?
不少盲從的真實例子 ,令我見到一個人如何"淍謝", 變得頹廢沮喪.
前文提及,神父給與教友的意見,是非常實在及進取,非常 "人性化及生活化". 並非如一般:
"祈禱喇,求天主指引"
"平常心喇,天意如此"

神父問及教友,認為對方的工作態度怎麼? 可以擔此重任嘛 ?
如果係可以+擔重任, 就大家公平競爭, 最後結果會大家都高興.因為可以與旗鼓相當的人競爭才可以有進步.
但如果是不可以的, 就不可以讓賽. 因為最後的結果牽連太大, 好心變成壞事.一整間公司,就給你一位 "天主教徒愛人如己" 而拖垮了 ,是壞事亦屬不幸. 要緊的是,天主教要你愛人如己,唔係咁愛法.
教會要求我們愛人,並不等於接受所有不合理的事.
教會要求我們分享,並不等於要你分哂D錢比人之後去訓街.
教會要求我們寬恕,並不等於要我們容許不愉快事件日復日年復年地發生.

所以,對於盲從的人,日復日年復年地發生不愉快的事,令自己激心,我實在是無可奈何.再下來的, 就是曲解宗教教義 , 把人生推入牛角尖內.

神父答客問

一名天主教教友就工作上問題,與神父傾談希望取得意見.
教友在工作上的崗位, 將有晉升機會. 而此職位又將會與另一同事一齊 "爭奪".
同事向他說 : 我有老婆仔女要供養父母又要供樓 , 你又無負擔, 不如就讓比我升喇 . 你係天主教徒, 天主教唔係叫你要愛人如己咩?
神父即時比左意見佢.
我聽到個意見之後,更加確定我信呢個教係無錯0既.
係乜野 , 答案遲D講.

避靜日

星期日的避靜,係教會為候洗者準備的其一中個"節目".
今年有八十多人候洗, 與開始時提及的一百多人減少了.
其實也不足為奇,教會認為有資格/可領洗,但個人認為未到時候,未有準備而拒絕,教會也會順從"民意"(慕道班中曾有同學已慕道七年仍未領洗) . 因為由收錄後至領洗日,當中有差不多半年至九個月的時間. 期間,人的思想/角度會有不同程度/形式的變化; 而當中數次的考核禮,"面試", 更加會令人的思路及心境有所轉變, 以我個人感覺來說,是有多次機會,去令自己想清楚,自己所追求的是甚麼的一種生活,以後要走的是一條甚麼的路. 走不走下去,決定權仍在自己手.
星期日的避靜歷時兩個半小時,主題是 : 召叫
當中放映了德蘭修女生平的一段動畫,我們要就動畫中內容去做小組討論. 而當中我的看法是 :
德蘭修女都是人,亦有人的恐懼,有心理關口. 與我們所不同的, 是他有豁出去及無私的心胸,無時無刻記著世上仍有比自己更辛苦更飢餓更貧困的人. 於是,恐懼都阻礙不了他想要走的路.
教會不是要求我們要跟德蘭修女一樣連自己著住的鞋都要送埋比人(當然要送教會都唔會阻止XDDDDDD)而係希望我們在不停找借口為自己所作的事去辯護的時候,想一想到底自己盡了多少力,為甚麼逃不開心理關口. 相對於德蘭修女,我們的生活是180度轉,但我們真真正正所擁有的 ,卻是負資產.
是次避靜亦有個人時間,在20分鐘內,我們去反思不少由導師所提供的問題,去確定自己對皈依的決心有多大.亦有小組交流大家皈依的前因;我就因為已經說得太多次了,所以亦不多言.
在數次小組討論後,每一組都有不同結果/想法. 其中坐在我們後面的一組,認為皈依之後仍擁有個人的自由是最可貴的. 我們組就交給尤先生去發言( 他坦言係因為怕死才皈依).
2個半小時後我們就到總堂內綵排. 五點半就可以散水 ~~

電腦傻了

所以幾日都無 update 網誌,影左相,都出唔到貼唔到.
都是好事一件,我可以死心早d去訓 ,雖則如此,但都係唔夠訓 .
期待著星期四,我可以提早半日放復活節假期.

阿Q 睇互聯網傻事

1. 無時無刻去check 下有乜野人去過自己個blog (又話要BLOCK人又話唔知有乜企圖....驚0既就 SET PRIVATE 喇 )
2. 非常強調/著意個人nsg有幾多post(如,星網時代0既XXX 有十九萬個舖屎,星網?我死都扮唔識喇....)
3. 想解決問題,但愈解就愈多問題, 成村人比佢拖哂落水 (電車男故仔 ,作出黎架咋....)
4. 上載自己 / 人地裸照 ( 無厘頭之最)
5. 新聞組罵戰 ( 都唔知對方係乜水, 有乜好鬧?)
6. cyber sex ( 對住部腦叫床 ? .......)

想到再寫 ~~

DIY - Side Table

因為屋0既當年建築條件問題, 窿窿隙隙特別多:其中響廳0既梳化位旁有一條8寸闊0既隙(=__="")
早前天氣驟寒,老爺叫大夫拎左部充油式暖爐返去新竇口, 而家天氣回暖, 部野用黎做乜好? 放響邊好?
塞過入去呢條 8寸闊0既隙,剛剛好 ~~~
於是, 搵布藝公司幫我車左個套,用一隻比較挺身及厚0既布.就黎將個暖爐加少少工做side table .
用料 :
充油式暖爐一部
$10店購入木板一塊
$10店購入黏貼式腳墊一包
布套 / 布一塊(**)
1. 先將黏貼式腳墊貼在木板上,用意防止木板刮花暖爐.
2. 將木板放在暖爐頂 ( 因為唔夠長,所以另外用左塊厚紙皮駁長左佢XDDDDDDDDDDD)





3. 用布套 / 布笠住佢.....


4. 禮成~~~~


備註 ( 布套 / 布 ) :
1. 布套好處是因為車左一條"骨", 骨位夠挺,外觀亦好好多, 唔好處係 ....貴
2. 用布好處係平,多選擇.但因為無車工無骨位, 用響暖爐頂0既木板要闊少少及固定位置.
2.1 建議可到訂造窗簾的店 (花園街大量) ,購買一些"碎料", 價錢相宜又多款式.
2.2 亦可到 SPOTLIGHT 找找看,該店的布款較多,窗簾布亦可以單買,價錢方面彈性一點.

小羊的手信

手機袋一個 ~~
入面有舊 "餡",可獨立開關,用2粒3A電 接收到電波就會郁 , 條尾會發發下~~
如果個 ring tone 係貓叫就 perfect 喇 ~~~
多謝小羊同小羊太
^^

以前外婆在香港時,好喜歉打麻雀,咁女人之家,有d娛樂亦不為過. 偏偏舅公討厭到不得了,日日去掃場,響露台的天文台( 通常會係我 ) 一見舅公過緊馬路就會馬上通風報訊,一眾雀腳馬上連板帶牌,抬入去士多房度,然後響後門溜掉. 我們平時一見舅公,都會被教訓一輪 ( 無喇喇架~~) ,及要我們到禮拜堂去.有一年,整個暑假就被迫到禮拜堂去參加主日學 .......星期六的電話, 我們多數不會接聽, 因為大部份都是舅公來電要求我們星期天要上禮拜堂 .
時移世易,外婆已走,舅公卻迷上這玩意來,日日不打過一兩場就不開心.不過舅公打麻雀,只是玩玩而沒有賭本的. 一家大細聚在一起,吵吵鬧鬧地就過了一晚夜, 大家都開心. 最要緊的是,舅公愈來愈幽默,變成了大細路 ~
以前舅公反對打麻雀,因為佢係基督徒,認為打麻雀是賭博, 要不得.
今日舅公愛上打麻雀,因為佢覺得一家齊齊整整在家中鬧著玩,是很開心很有福氣的事.
家庭和睦, 始終是最重要的.
不過, 佢仍唔會比其他人知佢好中意打麻雀 .......
-___-""

是日迷思

最近執屋, 發現有一樣野係幾費解 : 人人都送我化妝品 / 化妝掃....
我唔係好差0者...
-_______-""


係阿姨送0既 ...

做番D女人做0既野

買化妝品 ~~ 重投植村秀彩色世界~~ 愛佢色彩多+實+起 ~~ 粉底顏色合東方人.
數年前單薄簡單的 "無印良品式" 包裝沒有了,轉成有份量+晶瑩剔透的容器,像冰粒一樣 ~
買了:

藍色e/s (#640)真品比較沉色少少, 帶銀底 .似孔雀藍 . 今日用過, 隻色好起, 無打白色底都好起. 我係單眼皮都好好睇 , 對眼有神好多 ~~~
綠色(#430)係我新嘗試 ,不過未用.
灰啡色 (#960) 可當眉粉 / 眼線/ es 多用.
胭脂 ( tranquil pink ) 真品係桃色,有少少修輪廓效果, 我皮膚較沉都可以用到. 好友皮膚白就要 blend少少粉紅至會起到色.
是次得好友萍果早日"通水", 購得超值化妝掃一套四支$285(胭脂掃+遮瑕掃+眼影掃+唇掃 連 薄+輕身掃套)

2位靚阿姨年年有今日

生日快樂呀 ~~ ^^
今年送比2位阿姨的生日禮物就係水晶心 ~~~
有孖生阿姨就係咁架喇,一買就要2件 ....
$_$

新一年新計劃

每個月都要去理髮 ~ 可以係焗油,可以係電髮,可能係修髮.
(唔係嚇你地,我平時一年只會去幫襯理髮師2-3次)
要打扮一下~~ 每個月用有限錢去買少量化妝品/香水.
想去跳舞減肥 .家下$3200/2個月咋 ~~
........
想到再寫 ~

立體人生觀

早在一年前聽過呢個話題.
表面好似好抽象 :點為之立體 ? 人生觀係立體同平面有乜野唔同 ?
其實人自出娘胎 ,已經係面對一個立體世界:除左係人地0既子女之外,仲可能係 :
人家的孫子
人家的弟妹
然後 , 長大了 ... 會係 :
人家的學生
人家的朋友
投身社會後,再多幾重身份 :
人家的僱員
人家的同事
人家的上司/下屬
過了大半生,多再多d :
人家的另一半
人家女婿/ 媳婦
人家的父母
當身份愈多時,方向更廣時,人所想所做所說, 就更要有立體感.
平面式 : 獨孤一味當自己是人家女兒/父母 於是 ....面對多重身份時,變成自私,變成不顧人家感受.
經常聽老人家說 : 不枉此生, 無悔今生.
人生愈立體,經歷/面對的就更多,有喜有悲,人生就愈精彩.
但當愈發自怨自艾, 代表人生愈加平面化 , 再看不到其他事/角度, 所以會鑽牛角. 所以,要有立體人生觀,自我檢討/反思少不了. 與其不停去批評控訴,倒不如想想控訴批評之外 , 還有什麼值得留在自己腦袋內.