今日開始我的假期,我安排左所有野,響一早會做好哂家務,買定哂食物,然後去銀行保險箱取物及買外幣 ,去醫生度拎出門藥, 點知所有所有野, 比羊太一個電話打亂哂.
亦好彩羊太佢同我講真話,我馬上轉plan ( 轉乜春呀....只係做左緊要0既野先) 於是老陳一個人響屋企0既時候, 就食少左好多好野了....
同羊太睇完醫生,上樓睇完敏感發作0既豬頭B ANSON, 我就返屋企拎行李,開車去羊太度接佢,然後去接老陳放工, 一齊入機場. 因為ANSON敏感發作, 所以呢次飛去加國,羊太頭幾日又擔心又訓唔著, 燥底到不得了, 直至由他人口中知道BB 好番哂之後, 情況至有改善~~ 我 ? 咪瀨哂野,做左出氣袋囉~
上機當日,外面刮大風, 三號風球又風又雨, 響禁區入面同羊太食左翠華, 行左一輪. 飛機delay左有一個鐘. 最後起飛時,雨停了, THANK GOD ~
香港到溫哥華才12小時機,問題不大,唉~~今次坐加航,悶蛋到爆, 又無乜好戲睇.航程中段開始, 羊太開始來料.....
"你要報D關呀0下..."
"得喇, 我會喇...."
"聽唔聽到我講, 叫你報關呀."
"都話知囉, 成日講..."
"........."
(10分鐘後)
"有無報到呀??"
"得喇, 成日問, 而家報咩,起飛都無3粒鐘....."
"問下都唔得....你D態度衰到呀..."
(再10分鐘後)
"你唔報我自己報."
+____+ "你自己報,咪你自己過關囉~ 我又無話唔同你報"
"咁樣講野咪衰囉你"
"你唔好成日問, 我都話左你聽會報囉"
"咁你報乜呀? 你都無問我"
"問你做乜??? 唔通報我地2仔乸走私魚翅花膠冬菇海參呀?????" (反眼....)
".........."
如是者成程機就係咁過.... 生不如死.
好喇, 12粒鐘之後落地喇~~~好戲在後頭~~~~~ 每一次我同羊太出門,過入境署及海關,係一大難題來. 我本身無問題,走慣私XDDDDD 羊太呢D, 硬係要GET到人地ATTENTION , 非查佢不可咁. 過入境署時,羊太一如以往, 呱呱叫係咁問我個職員UP乜,攪到人地要比D不屑眼光我 / 佢,就算我響入counter前點remind佢叫佢唔好出聲都好, 佢都硬係要講一輪野的.
是次我報關,報左3條 Tiffany 頸鍊, 因為呢3條野一睇就知過左限額.我亦好老實咁同職員講要差唔多CAD120-150/條. 問多幾個問題,個入境署職員就將一張花碌碌0既報關單比番我,放我地去拎行李.
一路行去行李帶,羊太一路唔停口. 我叫佢靜D, 人地見佢咁,唔查佢就奇.佢仍係唔收聲. 拎完行李,最難一關在面前.
左手邊係出路,直出機場大堂 ; 右手邊係查行李0既地方,入面全部係黑頭髮黃皮膚東方人. 海關將佢地0既行李"倒"哂出來查, 係, 係"倒" 出來.
我若無其事行響前面,將張報關單交比閘口0既人,仲問佢要唔要查, 佢話唔使,當堂心中大喜, 心想甩難~ 點知......
後面響起一把男聲 : " Where are you come from??"
我別過頭, 見到有個海關響欄杆邊指實羊太, 而傻下傻下0既羊太有點兒呆..... 嚇到我呢, 喇喇林走番轉頭同個海關講佢係我阿媽,我地一齊0既. 佢即刻同閘口個人拎我地張報關單睇, 再望一望我,然後....
" You can go now. Have a nice day"
DLS .... 死左好多細胞.....我望一望羊太,佢而家至知驚,開始有點兒面青.... 我用潮州話同佢講快D行,唔係會比人捉入去倒行李....佢至如夢初醒喇喇林行人.....
一出個閘, typical 羊太回歸, 開始鬧我. =___="
"好在我叫你報關, 如果唔係就死喇,我成日講你就唔聽,係要多多野講....blahblahblah......"
女人.....唉~~~
出到LOBBY, 就見到舅父, 妗母及細姨,佢地見到我同羊太個樣,不期然咁笑出來~~ :)
沒有留言:
張貼留言