我都曾有過的好奇- 聖體 ( 餅仔)

以前我讀的是聖公會學校,上帝耶蘇呢d唔係陌生;舅公舅婆是某教會中堅人物 ,經常被拉去上主日學/聽佈道會亦是家常便飯 ; 亦有唔少不知好歹0既人,認為靠友情牌可以使得郁我,奈何唔 buy 就係唔 buy , 有d我最留後仲會反面不認人.
好多野要響 right time do a right thing 喇 ~
我第一次參與的天主教儀式,係 lulu 的追思彌撒,除了lulu好友的心意外同對 lulu 的懷念外,無其他原因會令我去呢d場合.
當日我老公去領完聖體後,我的確對呢一塊餅仔非常有興趣,當年未係教徒的我, 問老公可唔可以比少少我試.答案當然係唔可以喇.因為原來呢一塊餅在教徒,以及整個源遠流長的天主教歷史入面,係一個核心. 在教會的七件聖事之中, "聖體聖事" 是獨立的一環,整個信仰的核心 , 整個彌撒的聖祭禮儀的中心就在呢塊餅仔上面.
我曾響以前0既 blog 度提及點解我會選擇天主教,其中一個原因係此教會如此多世紀以來,都努力去悍衛及保持整個宗教組織的統一性及制度性. 我覺得一個有原則的教會,總不會讓衪的信徒左搖右擺吧.
我曾有一個經驗, 就係去鹽田仔0既主保瞻禮彌撒,成為教友之初,加上禮儀與大堂有點不同,而"遲左"將塊餅放入口度. 好友尤太太就馬上被身為原居民的教友質疑她是否教友,把在後面同樣未放入口的我嚇個半死,死命馬上把餅塞入口中.

我自己覺得,如果黎小姐對於呢一塊餅仔真係咁好奇0既,倒不如去上下慕道班,去了解一下滿足自己0既好奇心,總好過不明不白食左塊餅落肚無味道又唔知點解又要比人鬧. 慕道班中有一課,導師會比大量未祝聖0既餅你試 ~ 如要滿足好奇心,上課就可以喇,無謂去打擾人地的彌撒 ~ 又,如果連堂都唔想上,都可以去睇下聖經,你自然會知道呢一塊餅0既意義係響邊度.

是日大工程 - 天台大執位

整新花架 ~ 草草搬新家 ~ XDDDDDDDDDDD
一個放室內 , 另一隻等出面整好時放響出面. 而家就暫時放住花盤先 ~



將香草搬左出去出面個架度 ~~
上面2層至係 ~~ 有 ROSEMARY , 紫蘇,薄荷,九層塔 , 甜椒 , 臭草 .



舊物再用 :
灰色膠鞋架係舊野,八年前 IKEA 買 ~ 而家用黎放花盤,下面有窿可以流走D水 / 放水盤載水.
重新安置哂重生/就死0既植物.



今日同老爺及大夫去左花墟 , 買左幾盤植物: 紫蘇,百里香,長春籐
其實自己都種左百里香,但因為無信心種得好,所以買定一盤黎鼓勵下自己~

不吐不快

對宗教我並不狂熱, 一星期只去一日主日祟拜. 教徒責任自問亦未有做得好. 但宗教對於我 ,是另一種意義.
今日望彌撒後取了一份公教報 , 報中有一讀者來函 , 提及有一"由寫blog 去到寫專欄" 的女子, 某次在教堂的 "新體驗" .
內容大約是, 女子不是教徒, 卻去領聖體 .
不知者不罪,吃了一塊餅的問題不大( 或許真的是教堂指引不清楚,但我相信神父一定察覺女子不是教徒).
我反而覺得最大的問題是 , 女子的態度問題.
女子過後在自己的 blog 中提及, 他在領聖體之後才知道不是教徒不可領 .....
其實 ..... 有無人會無喇喇在殯儀館的祭台上取水果吃, 又或者在廟宇中的神檯上搣一隻雞腿黎扯呢?
說真的,我之前一直有睇呢一位小姐的blog ( 而且仲幾有好感的說 ) ,在她寫專欄後,blog明顯地變得黯然無光. 是江郎才盡,才把無知少年的行為公諸同好 ? 又抑或希望 made some noise ,令編輯/報章老闆對她刮目相看大加稿費 ?
縱觀女子事前事後的反應,她仍覺得是好好玩的一回事. 卻完全沒有尊重過宗教/教友/所有神職人員. 人家有投訴,就被她標籤為宗教"狂熱份子". 其實她有否想過自己的所作所為,是如何的幼稚? 事後仍要 "曉以大義" 地去為自己的文字去辯護, 說天上父親不會計較云云 , 嘿~ 若說教徒是人為思想才去批判你, 那你何不是有自我妄想症去自說自話 ?
*註 :
我以前自稱為無神論者,但因家人的緣故需要出席天主教的追思彌撒 , 我亦曾對那一塊餅有好奇,老是央老公領回來以後分一點給我品嘗.....
好奇不是罪, 態度才是令人/道德沉淪的主要原因 .

後記 :
香港天主教社會傳播處所發出的文件,類似內容亦刊登於本星期的公教報內.
http://www.hkdavc.com/responsetoapple.pdf

風球過後

滿目瘡痍~~ 呢度就係我地省城屋企樓下.
其實真係好好彩, 大樹倒下方向是向外街. 根據地勢,有99% 是倒進屋苑內.

過大禮 - 潮州人篇

潮州人嫁女同娶新抱, 方式及態度都係要面子,什至無面比(尤以守舊派潮州人為甚).

潮州人有佢地自己0既禮餅 ,嫁女餅 , 喜餅等等,著名商舖 "和記隆" 在九龍城無人不知.冷門一點的如黑豆球,"和尚帽" 都有制作. 但早前一家幾兄弟吵分家, 我們街坊只會去城南道裝修最平實的一間分店, 因為只有這店才真正有造餅師傅駐店, 所賣的餅亦最新鮮 !

潮州人極喜意頭,如我阿叔娶妻,大大小小硬幣都一大堆, 取其意頭 :有聲有氣,金銀滿地

意頭也會跟水果拉上關係~ 潮州人婚嫁中,一定會有柑(金) 及蕉 (潮語諧音為 "敬"),蕉, 仲係原梳連花的蕉(-__-"") 但呢一樣野都係極其傳統的潮州人才會有 (如我阿爺) .萬一唔好彩真係要有,就只好去山草藥店/水果店留貨, 大約預早一星期. 九龍城街市近 7-11 入口,有一間山草藥店有提供呢樣野 及 其他傳統婚嫁用品. 但極不便宜.

一開始籌備婚嫁,大家的EQ都會驟降. 所以其實無論是潮人與否,做父母都是替子女高興. 其他的,都別想得太多 ~~

過大禮

呢一篇網誌並唔係寫過大禮要有d乜野 / 禮金公價, 而係響處理呢一件事上,有好多死點 + 爆破位. 處理得唔好, 籌備婚事就會變成苦差 (我係人辦).
所以, 當我細佬結婚時,我就用我0既經驗響細佬/弟婦/我阿娘之間周旋,希望將成件事簡化之餘,仲可以化解某d"老土"位.
頭段籌備
先去金都商場打個轉(除左過大禮事宜,我極討厭此商場),向店家取2份過大禮名單,然後分比2家父母.等佢地自己去掦佢地要0既野.(逐樣同佢地傾,未傾到一半,分分鐘火爆收場)然後,保留雙方父母0既 "手稿" , 再拎份副本比店家辦大禮.
然後搵一日約出黎見個面食餐飯,話就話商量2小口婚事 / 傾禮金,其實只係比個機會雙方父母見面 (有幾可真係講"數"架... 而且現今大部份準新人,都係自己去預備禮金/婚禮開支.)
男家父母可能會開口問:阿未來襯家,你心目中有無想過大約要幾多禮金 .....
女家父母可能會答 : 唔緊要,多少唔係問題, 我地唔係賣女........
(以上係大部份比較得體0既對答,唔得體0既,你想得出都有)
轉入中場
籌備過大禮時,大部份新人/其父母,都會搵師傅擇個好日子 / 響日曆揀一日吉日去進行過大禮. 傳統來說 ,過大禮 就等同 雙方父母承認呢一頭親事, 等同"落訂",所以, 有好多"理所當然"的事,都會響過大禮之後才進行, 以及"現形".
過大禮在傳統上,重視程度僅次於出門/入門. 所以過大禮當日父母都會極度興奮 , 廣邀親朋戚友來參與(三姑六婆一定會有份):一來為高興,二來為公告天下小兒/小女會進入人生另一階段 ,另極少數會係晒命.
籌備 / 搜購過大禮物品期間,最好係新人自行去做,唔係唔比父母去參與,而係佢地同你一齊去攪,變數極多!切記!
大直路
有說過大禮當日,準新娘/郎係唔可以露面,此傳統源自古代,若露面的,新娘比比人話恨嫁,新郎會比人話嫌棄未來老婆 , 更甚者係新娘新郎現身比對方見到真面目而怕被退婚(以前盲婚啞嫁極普遍) 現今社會,就胡里胡塗的變成不吉利. 所以 當日準新人出唔出現,真係好睇大家雙方同對方家庭0既關係如何, 以及待人處事成熟程度如何.
(我自己經驗 : 小叔及男家工人把大禮拿上女家,在所有 "交收"程序都做好了,在樓下呆等的大夫才現身.在我父母來說,未來女婿極有"規舉" ,極尊重女家.我 ? 返左工囉~唔想無左勤工獎+請假嘛~)

有好多時,一場婚事融不融洽,就睇過大禮進行成點.
上一輩0既人,過大禮係 "嫁 / 娶得好唔好"0既指標.
現今一輩 , 過大禮就係準新人響踏入人生另一階段0既第一個考驗. 因為涉及2個人0既事,2個家庭0既事.

有好多事,過左就返唔到轉頭.大禮無 take two 呀~

轉護膚品

用左 SHISEIDO REVITAL 系列一年 , 唔知係慣性左定係點 ( 老左!!!) 皮膚適應唔到轉天氣問題.
剛好又用哂某D野,所以就拎左之前買比阿娘用0既 BENEFIANCE 系列返來用 ( 阿娘用 LA MER 呀 ,我D CHEAP 野看不上眼了 ~~~XDDDDDDDDD)
因為之前做過皮膚TEST , 話我缺油,所以面好乾. 加上早前試用左佢新出0既 NIGHT CREAM , 效果不錯.於是就買番個 NIGHT CREAM 黎用 ( 人老係咁架喇 ~ 咩都要用多D )


而家轉成套黎用,轉左一星期,面無咁乾亦無咁易起紅點.
最緊要係, 呢一系列比 REVITAL 平好多耶 ~~~
XDDDDDDDDDDDDDDDDDDD

裝修Q - 膠地板

一直以黎好中意 MOLLY 店入面0既裝潢,感覺好寧靜+優雅.
我睇中左佢地0既地板 , 係木紋膠地板黎 ~ 行上去感覺一D都唔膠 ~ 膠地板有紋有坑有木眼, 仲想點 ?

裝修 Q - 又係磁磚

再次同通菜去睇磁磚.
計過個成本唔平,所以愈睇愈平. 但唯一不變0既係,地下唔可以貪平用國貨,一定要意大利/西班牙磚, 因為日後維修牆身天花問題不大 , 但地下就好大工程 , 所以唯有將 BUDGET 放落地磚度. 牆身另外再想.

睇左好多間,尋日響最後睇0既一間磁磚店睇到一隻仿古磚,意大利磚,@$12.80/ 1ftx1ft , 係暫時睇到最平0既入口地磚 ! 以間屋0既尺數黎講,不足$6000 就可以買哂地磚料 ( 尚未計 discount )

意大利仿古地磚@友暉有限公司 @$12.80/塊 (13"X13")

另外廚房廚所0既磚, 除左地磚可能要貴少少之外,牆身可能係紙皮石瓦仔.不見光0既廚房櫃後瓦仔,幾蚊一塊就 ok .
心目中的廁所,會係水藍色



心目中的廚房, 會係黃+ 鴨蛋綠


上面呢兩隻紙皮石,真係一念天堂一念地獄~~ 一隻係$5/SQ.FT , 另一隻係 $32/SQ.FT


上面呢一隻磚 , 我本來已經好中意,但奈何搵唔到其他磚去襯 .......

至於閣仔,都已敲定係工字鐵架(支撐)+石膏板(防蛀)+膠地板(輕身). 喜愛木紋磚0既我,終於一圓心願,可以用到代用品 :
木 紋 膠 地 板 !!!!(XDDDDDDDDDD)
因為閣仔承重量問題,所以唔可以用太重0既料. 我響 MOLLY 店入面睇到0既地板 , 我以為係木地板, 原來係膠地板來的 !!! 像真度好高呀!!! 有不規則木紋,有坑紋有手感 ,仲有木眼(!!!!) 佢比木地板好0既地方就係 : 唔會有木板地咁嘈 + 有木板互相磨擦的支支聲.
木紋膠地板尺寸就如木地板, 6"X36" , 一平方尺約 $15 ~ $22.5 ( 資料 FROM 盈都裝飾牆紙公司),因為閣仔地方有限,所以材料花費都是$3000以內.

呢個星期日,可能會同阿娘去行一次,確定下D料. 再下來,就係睇潔具 + 磁盤 + 浴缸

是日收獲

又係 le creuset , 另一套日本限量版.



早前買0既另一套,原來係日本0既春季柚子色限量版!



另外響 sogo 買左無糖紫蘇梅酒 , 仲有小食酸梅.

2008 父親節

今日我地一早就同老爺出左去,先去會所同契姨媽飲茶,然後就去行崇光超市,新華書城,delifrance 飲下午茶,自由活動之後,就去左聲哥度食晚飯.
今晚我地係羅漢請觀音,仲有 mimi gary 2公婆同波比,仲有2家父母一行十一人. 今次係第一次幫襯聲哥新場,地方當然無60樓咁好,但我地係去食野,唔係食環境,所以都無咩問題.
是晚我地點左 : 沙參玉竹龍骨湯,麒麟龍疐皮,一帆風順,龍蝦依麵,咕嚕肉,父慈子孝, 順德米線同八寶湯.本地龍蝦係聲哥代購($600) 加加埋埋3100埋單.又係又食又拎.
以人頭計,與新王朝時代無乜分別.但因為無左出名皮蛋酸薑,同埋桂花糕 , 所以真係好唔夠皮 ! 席間與聲哥傾開,原來佢地響上面搬落黎時,好多野比人偷左,海味如江瑤柱及罐頭鮑等等,無左一大堆. 我想,舅公佢地早幾日去食覺得貴左,可能係因為海味來貨貴左.
祝聲哥響新場仍晚晚旺場,步步高陞 !

有關花園用品價錢比較

我去過 B&Q ,花墟 , 海怡工貿 及 做帳篷用品公司夾過貨. 當然係花墟溫馨無限係最平喇~ 其他地方都有,但價錢較貴 .
B&Q :
有大量建材+戶外傢俬賣 , 但傢俬方面質數不及海怡工貿0既入口貨(MADE IN ITALY / SPAIN ). 戶外木用品亦有,但無折頭,溫馨無限0既六五折就殺哂喇 ~ 噱頭都有0既 : 代客鋸切木材, $5 / 塊, 中意 DIY 0既會方便好多.

海怡工貿 :
入口野多,雖然可能都係 MADE IN CHINA ( 如 RUBBERMAID) 但質數真係有辦你睇.戶外傢俬質數好,硬淨不易變形,價錢係紅A / 新海洋0既2-3倍.
有一間賣牛頭燒烤爐0既店, 佢0既地方係水晶膠石春地, 正到呢.....

帳篷公司 :
戶外傢俬係新海洋/紅A, BBQ 爐亦比出面貴.

有一荀盤就係西貢0既什貨店,店名唔記得喇...位置響普通道屈銀紙對面馬路口,一睇就見. 佢有好多野賣,燒烤爐真係唔貴 !! 我已有心水~~~ ^^

花墟另一收獲

落左單, 未有貨.
得網友笨哥指點, 今日去左訂貨, 準備下個月開工,建設我地0既天台小花園~~~
用料都係響花墟0既 "溫馨無限" 購入 :
1. 碳化杉木格仔網 ( 180 x 90cm) @$398.00 , 一共要九塊
2. 碳化杉木花架 ( 59 x 47 x 110cm) @$368.00 , 要左兩隻
3. 3尺長花盤 ( 90 x 34 x 27cm ) @$128.00 , 要左四隻 (呢一隻盤係全花墟最平 !!! 店員話賣埋呢d貨就唔會再入貨 )

總數過左 $3000 可以有六五折,折左之後$31xx , 我地訂左七月初送貨. 響呢個期間我地仲要做定準備工夫 :
1. 雖說木格網係戶外用,但底部不能長期座立於地面上,風吹雨打之後無得幾多年貨仔. 所以睇左書之後,我地決定要做定 "腳座" . 用英泥+磚 / 英泥倒模 做定腳座, 將木格網架高,離開地面.
2. 到五金店購買 1" ~ 1.5"碼仔 , 作用拚合格仔網的主角 ; 另一樣就係狗臂架,將高聳的花棚固定及拉緊 ( 根據 ikea 傢俬的指引,凡高過一米的傢俱都要有防塌裝置)
3. 到夜冷店尋寶,尋找合花園用的裝飾品 ( 大埔係首選 !!)


有新進展,阿Q會再 UPDATE ~~ ^^

花墟收獲 @ 14-6-2008

兩樣都係響繽紛買0既 ( 講真,好貴 ! 比起網友 ok san 昨夜提供0既荀野,實在無得比!! 奈何呢2樣野只有佢有得賣..... )

草莓罐 ( @$165.00):
想用黎種香草 !!!!
不過未摸清各種香草0既種植環境之前,都係唔好種住 ~~~ ^^
呢種素燒陶砵仲有1/2半邊大0既平背掛牆款式,但....好重喎 ! 仲掛牆 ? 多一半都係 $165 !


花架 (@$480.00) :
本來之前都睇左幾次, 睇唔上眼嫌佢唔穩陣冗冗貢.



佢而家後面加左個大交叉,成個扎實哂 !!! 真係不得不佩服日本仔0既心思,用左力學原理,係咁以2條鐵 ,修一邊螺絲就令隻花架穩穩陣陣 !
呢一邊修左蝴蝶螺絲

另一邊只係一個勾, 另一邊0既螺絲修實左,呢一邊自然會碼實 !


原來牌子係 日本仔0既 IRIS , 佢D塑膠櫃桶好硬淨唔變形,出名襟用~ 希望花架都一樣喇 ~


買滿 $500 有九折.
但我都係響度肉痛緊 ........

新 PROJECT - 天台花園仔

而家就係咁喇,一D美感都無, 加上天台出面乜野都無,又向東南,所以大部份植物都入左室內.


我而家要爭取響老爺郁手之前, 做左我地想做0既野先.
1. 去溫馨無限買格仔網做花棚,將2隻醜到無倫0既窗遮住先


2. 添置3尺花盤,用作種值有機瓜菜
3. 向花墟0既華景購買大型植物,因為比較過佢0既植物種類多及便宜,而且有送貨服務.
4. 添置合適花架 , 室內用碳化杉木 , 室外用塑膠 , 將植物分類放好
5. 添置特色花盤 ( 如草莓陶罐 ) , 開始裝飾天台小花園

裝修Q - 磁磚

好同事通菜小姐家中有水浸意外,所以要裝修,於是兩條友放工之後走左去旺角裝修街 (砵蘭街) 走左一轉.
是次我地先睇磁磚類 ~ 自上次睇左 $1500一塊0既磚之後,我唔敢再入去 CASA88 睇野,但有通菜壯膽,所以又走左入去.
今次, 睇中左地磚 (-__-""")
好似唔係好貴咁, 但只可以用響面積唔大0既廚房 (一響大地方就好貴喇 ...)
地磚@CASA88 , $28-168 ,鴛鴦色 + 4種尺碼


另外就睇中左平價少少0既石仔地,想做企缸之用.
黑白石春地@恆華號 @65.00 / 平方尺


呢個花好想做響飯廳做一個裝飾牆.令間屋更有 COUNTRY FEEL
不規則石仔花仿古磚@恆華號 $13.00/ 13X13"

書中自有黃金屋

每次出糧我都會買d書比自己睇 ~ 買乜野書個範圍好廣 : 食譜,園藝, 寵物,傳記 ....唯一唔會買0既,係小說 ~
今期糧買0既,係園藝 / 相機 0既書. 因為比網友阿ben啟發,所以的起心肝去整好個天台.打書釘打左一輪之後,買左幾本 :


好想學下影相,多得大夫借出D40愛妻號,當然要認真一D,於是買左本書黎睇~唔好因為乜都唔識,浪費一部好機~


呢本書好多花園裝飾 / DIY 工夫的點子. 睇完之後,好多疑團都解開左~~~ 加埋網友0既提點,我呢個星期尾會去訂材料.


我好奇怪, 唔愛種花只愛種草~~ 呢本書有好多我喜愛的草 : 黑骨芒,長春籐,菠蘿仔 ....

又 : 近況

萬事皆順 ~
無驚喜亦無驚嚇 ~~
又因為早前放工遇著大雨 , 著住對紅鞋兒,攪到成腳都紅哂~~所以的起心肝,去買左對落雨著0既膠鞋 ~~
千色店購入 @$269


另外買左幾粒小配件~~ 我覺得係貓爪黎~ (其實係鱷魚爪)

買乜Q - LE CREUSET 有蓋焗盅

其實早在上月初已心儀呢一套野,但因為太貴(要$288/套/2隻,平時都係 @$108.00/隻). 我搜遍網上資料都搵唔到呢一套野. 響包裝盒後面有少許玄機 :
1.日本制環保紙盒
2.被撕去的招紙寫著 : CITRUS YELLOW ,AS.....(睇唔到了)
我懷疑係唔係出口日本的限量版.


加埋之前買0既四隻 ~~ 好開心 ~~~