經驗一樁 - 與大酒店交手(三)

以阿Q響全程處理老豆0既事上面,發現"唔清醒"係大部份人被殯儀館砍到一頸血的原因之一.
在最初3-4天,未有落實任何細節時, 我地幾仔也母都會響出門口前談一次,明白今日出去做乜,底線係乜野,要問D乜, 邊個做醜人邊個做好人, 然後至出去.
夜晚返到屋企,就會將今日睇到聽到收到0既野,拎出黎睇一次,夾一夾人家口述同白紙黑字文件有無分別. 再商量一下 ,務求響大家都同意同接受0既情況之下, 至去決定所有事.
在清醒細心分析時, 不難知道所委託的經紀有沒有欺騙成份.
前言不對後語
開始時我地本來為老豆安排土葬,因為當中有某D原因及變數, 所以轉為安排火葬.
響之前我地同經紀問過0既資料入面,得知火葬係比土葬平宜一點, 因為棺木要求不同,後往處理方式亦不同,所以價錢一定會有出入.
但當我們轉用火葬時, 經紀跟我們談的價錢,明顯跟他早前的說話有出入 :
前 : 人地火葬副壽要3萬5咪比人搵左笨囉 ~~~ 萬幾銀就有副好似樣架喇 ~ 土葬又點同呢 ......
(此話出自當日我地查詢土葬棺木價錢時,因開價的棺木與我們之前問朋友的有很大出入,經紀就說出此話)
後 : 火葬0既壽有要求架 , 至少都要3萬.
態度
家中有白事,家屬心情當然不好,與他們溝通時通常都會有多一點包容. 但如果經紀仍是呼呼喝喝,把家屬點到頭昏眼花,好明顯係想令家屬嫌麻煩而"放手(錢)"讓佢去自作主張. 報價就會報上一個大數,似是而非, 埋單時0既銀碼同當日報上的差左成條街,佢地都可以話 : 你家人走左, 你都想做得好好睇睇喇 , 呢D野一次架咋 , 做得寒酸我都覺得無面喇 ~ 然後家屬就會乖乖奉上銀兩,不作追究.
處處提醒家屬要拎定支票/錢去落訂
通常因為為先人處理後事的文件及程序會比較煩覆, 所以由離世到完事,都會有一段時間. 殯儀館一般都會體諒家屬心情, 鑑面辨色後才在家屬情緒比較穩定時 , 才會談及銀錢支付問題,所以通常都不會在第一次商討時,要求家屬付訂金.
在家屬確定/敲定後事處理後,殯儀館方面會預留時間比家屬去付訂金.而阿Q老豆就因為係親戚關係,訂金都無需要付,大酒店方面就已經派車去把老豆接回酒店安放 (其實老豆本身就係訂金來喇 ....) 設靈那一天, 因為所要做的事比較多,錢銀交收 / 墊支 / 代付 / 花牌安排方面亦未及時統計, 所以一般都不會在設靈當日處理 . 在出殯當日早上,大酒店才會與家屬核對單據, 加上事情都完成了一大半,所以家屬亦會在此時清付帳單.
所以, 遇上一開始就要家屬帶支票/錢去付訂的經紀, 就要小心.
所有殯儀用品要睇實物
而家0既大酒店, 一定會有實物比家屬參考,看過比較過再去決定D錢用響乜野上面.
辦白事唔係隔山買牛,加上呢一行業無理由無生意,現成物品一定會有 ( 花牌 / 紙扎用品 / 棺木 / 骨灰盅等等) , 所以在決定用任何實物時,先要求看看,再行決定.
坊間有一D專營白事用品的店舖 , 在旺角砵蘭街 及港島荷里活道都有,如果時間許可,可以自行購買而不需勞煩大酒店代辦. 阿Q接觸過的,店員都比較客氣,而且會按家屬的錢銀預算,去介紹合用 / 預算以內的用品給家屬.

經驗一樁 - 與大酒店交手(二)

整件事之中, 我有以下心得 :
任何事未有定案 / 談攏 , 不能將先人遺體交給任何人,寧願留在醫院殮房中.
殯儀館 / 經紀 / 駁腳, 會第一時間游說你 , 馬上領走遺體 , 幫你安排 "放好先人". 稍有猶疑 , 佢會話做子女無孝心 / 丈夫妻子無良心, 死左都要先人躺醫院. 務求馬上 "搶灘".
遺體去左大酒店,就唔可以拎番出來, 就算堅持要拎出黎 , "存倉費" 都會係天價.
盡量令自己及家人清醒,唔可以被人擺佈
遺體未被人領走,有機會0既經紀會不停打電話比你, 務求你忙到唔得閒去想 / 搵其他人幫忙, 所以最好就係唔好聽.
通常家屬響第一二日係最唔穩定 / 唔清醒, 最易比人有機可乘都係呢幾日. 所以如果可以的話,等大家都平靜下來才去商討先人後事. 如果真係平靜唔到, 就搵一個比較信得過0既親人幫忙,適當時候出黎擋駕.
一定要比較,要報價,要白紙黑字
其實同辦紅事一樣,要清楚均真. 尤其係白事,唔單止真係一世一次,仲要小心人言可畏.
大酒店 / 經紀,會用難聽說話去令家屬覺得自己想法對先人好不敬+寒酸 , 而再對佢地0既說話言聽計從. 所以,響同佢地傾野之前,一家人要有共識,清楚知道方向係乜, 支票信用咭等等都唔好帶去.
今日只係傾價錢就傾價錢 , 唔好因為比人話你地小家寒酸就喇喇林比錢扮大方. 無用的,呢D係無底深潭.
真係做生意的,會詳列價錢, 包乜野唔包乜野, 乜野要自備乜野可以墊支.
唔係做生意的,會UP一個大數比你,似是而非;
紙扎用品可以係十倍價錢 ( 名牌大酒店扎一架車可以收你 $8000, 我老豆有一架車+電器+傢俱大約只用了 1800)
子孫被襯家被等等可以上萬元一張 (襯家被外面賣一模一樣的只是$140/張 , 名牌大酒店收費係$4800 , 子孫被一張可以去到9000幾蚊.)
宗教儀式
無宗教信仰0既先人,係唔需要專登去揀一項儀式出殯. 但因為在生的人感受更緊要,所以好多時都係安撫家人的心,而加插打齋一項. 務求令家屬覺得響先人最後一程上,為先人做過一些安排,大家都會好過一點.
打齋牽涉0既金錢亦不少,而且大部份都係 "無價" 的, 喃無師傅話10000就10000, 話8000就8000, 最緊要係家屬可以負擔, 就可以了. 我老豆0既打齋, 係 $8900. 名牌大酒店開出來的價, 是$17000 , 經紀聲稱可以找 "金牌打齋" ,加多一千就可以了,拎個意頭1晚發 -__-""" ( 講真,除左同行,我想無人知道打齋時0既道士做得好唔好卦 )

整件事上面,我地無同任何大酒店講過任何價,白事唔係買菜,有時價有定價. 負擔得到就 OK , 負擔唔到我想大概我地響醫院下面0既小靈堂就此完事. 我地只係認為, 只要佢列出每一項收費,我地都會幫襯呢一間所謂的"名牌大酒店", 錢我地就預左響度, 不要說什麼待客之道, 但連最基本的都不做(報價), 怎樣都說不來吧 ? 大花筒花錢 , 都要知道花在啥吧 ?

經驗一樁 - 與大酒店交手 (一)

無論係一早有心理準備, 抑或係突然發生意外,都會有同樣問題發生, 阿Q百無禁忌, 希望將呢D經驗寫出黎幫到有需要0既朋友.
當老豆走左之後,我地係六神無主,唔知做邊一樣野先.於是就搵左一位做經紀駁腳0既親戚,去幫忙打點老豆0既後事.本來想著係一場親戚, 好多事都好商量, 我地唔要求平貴,只要係合理及我地負擔得起, 我地都會比. 我地初步傾過之後,土葬費用,直至入土為安+做好墓碑 ,大約需要 10 萬.
後來因為事情有變化,我地亦對土葬地點不滿意,所以就將方向轉去火葬方面. 而根據其他有經驗0既親戚 / 老豆0既堂兄弟經驗 , 我地預算大約要7萬左右. 於是就同經紀駁腳講要循呢個方向去安排.
點知大酒店經理及經紀一知道要轉用火葬就變了面.
想取報價 ? 唔報
想問棺材價錢 ? 至少都要五萬
想睇禮堂 ? 安排唔到
土葬總共用幾多錢 ? 睇你中意囉
火葬又要用幾多錢 ? 你地中意囉
然後就一輪咀,用激將法什至難聽說話 , 去希望我地覺得無面/怕比人講閒話而改變主意. 最後當然佢地唔會成功. 因為我地做乜野都唔係要對他人交待, 而要對自己同老豆交代.

後來,我地去左另一間大酒店睇,亦係親戚介紹. 此間態度截然不同.佢0既經理先問我地有無決定,係用土葬定火葬, 咁我地決定係火葬 , 於是佢就拎一本簿出來,由接送服務去到取骨灰為止,所牽涉的費用,一一列出來 .
邊一項係比大酒店, 邊一項係代墊支,邊一項係政府收取,都列得明明白白,清清楚楚. 最後要花多少銀兩,一加起來就係.最後報出來的價, 係 $32800 全包.

最後我地後加左一大撮野 : 骨灰盅,紙扎作,齋菜食品,潮州專用紙扎用品,連同之後的纓紅宴, 所有費用總共用了少於四萬元.

事情未辦好,我不敢妄言事實是否與經理所言一樣非虛. 但所有事都辦好之後,大酒店方面一一做足, 沒有絲毫欺騙及不符.

人生百態

與其話我結婚時,睇到好多人0既真面目; 不如話我老豆走時,我被迫接受左好多奇人奇事.
出殯前幾日,阿姨的竭斯底里令我同阿娘陣腳大亂;所謂親朋戚友的表現令我地汗顏;不過, 話哂唔係開心事,好多野我地都唔可以對他人有要求, 只係大吉利是日後有同樣場合 / 事件,大家都心中有數就好了.
老豆走左,我百感交雜, 本來係應該乜都唔知/唔記得/唔理, 但我偏偏睇到好多令我窩心場面,令我對唔少人改觀.
在處理老豆後事上,曾接觸一位我本來好尊敬0既長輩,但事情發展下來, 並不如想像中順利及合理. 在顧及各方面的感受下,我婉轉地拒絕長輩的 "幫忙" . 幸好老爺理解及明理, 無怪罪下來.
可能在此位長輩心目中,我係斤斤計較的人, 我亦唔否認, 尤其係紅白二事上面,唔計較0既話,就唔係阿Q.呢類大事上,無得再 TAKE TWO, 我同家人唔考慮清楚, 就等於對唔住走左0既人.響態度,做生意手法上,我無辦法說服自己去接受唔合理0既事, 唔合理比唔要面更嚴重, 所以,我寧願選擇比人話我無面, 我都唔會迫家人受自己去幫襯一D所謂 "名牌" 0既殯儀館.( 此事我會另出網誌再談,因為實在大部份人都會經歷呢一種事,我0既經驗可以作為大家參考)

再下來,因為失預算及阿娘要求下,我冒昧出 POST 請朋友幫忙,仲要怕大家無下台階,而請朋友都唔使覆文. 對呢班臨時打擾左佢地生活0既一班朋友, 阿Q真係唔識點還呢一個人情債. 有朋友遲左知道而同我講對唔住, 我更內疚, 響呢度我只可以同呢D朋友講 : 呢D野無話好唔好意思 ,唔係你內疚就係我內疚, 大家都唔想. 所以唔好再講對唔住.

響唔同人唔同事唔同反應上, 我學識點樣去自娛, 去自嘲, 將唔開心,失望同無助轉移左方向. 好多事係唔可以避免 , 作為普通人我地只可以接受及包容.響最唔開心0既時候, 想遠一點,鑽少一點牛角,盡量用自己方法坎出陰霾 , 呢d就係我終生學習0既其中一個課題.

回來了

糾纏了好幾個月,老豆終於都走了.
所有事就好似係昨日才發生一樣, 我記性太好,所以也比其他人想得更多,呆得更久. 所以我無對朋友講太多 , 也唔想朋友問 / 安慰太多 , 因為我到而家仍會眼眶慶+喉頭哽 .
老豆跟家人的緣份好奇怪 , 他愛家人,卻從來不會放開去愛, 於是造就了大家有好多的遺憾. 當大家都明白是什麼一回事時 , 都不禁想罵佢一輪.
家人尚且如此, 外人又如何 ? 我仲記得一直要佢信教的妗婆 , 就因為10年前,老豆以為癌症死梗時, 在病榻上賣人情向佢決志一事 ( 妗婆每一日都去探佢,希望佢信主,老豆覺得唔好意思, 就答應佢決志) 佢一直都怪責老豆不守承諾. 響今年年頭一次晚飯中,當著一眾親戚 , 怪責沒有到場0既老豆,仲要係響謝飯0既時候 , 要人人都聽佢去怪責我老豆. 更謂老豆0既病, 係因為佢不守承諾而受到耶穌的懲罰.
但佢並不知道,老豆一直以來,都有響唔同途徑去認識基督, 了解宗教.
佢亦無去攪清楚, 老豆唔係一個不守承諾0既人.
佢更無去了解, 老豆對宗教信仰, 係極其尊重及嚴肅.決志唔係買菜 / 食飯. 要對一個宗教奉行佢0既教義, 就必須要理解, 去實行.
老豆入院時,我曾找過徐神父,可能徐神父實在太忙,並未有探訪過老豆.入院前2 年, 老豆經常都聽徐神父響收音機節目講道,對徐神父極為尊敬,老豆曾經提及,人生觀要係立體0既 (徐神父名言) 宗教就要係宏觀而又入世0既, 響不同方向去解釋聖經0既道理, 就係我老豆喜歡及尊重徐神父的原因. 空汎咁去講五餅二魚, 總不及去理解五個餅二條魚背後道理咁令人雀躍及鼓舞.

老豆走時,妗婆在外國,好有心咁打電話來找阿娘,叫阿娘為老豆辦一個基督教送別儀式,謂費用及墳地方面可以安排及多一d選擇.
我同細佬即時反對,老豆並非教徒,唔應該去討人家便宜; 老豆個人比較轄達,唔喜歡繁文縟節,簡單的送別儀式就可以.如果要信,老豆一早就信 , 而唔係響走左之後,就隨意地比人家擺佈.最後 , 老豆0既送別儀式簡單又溫馨,靈堂上面無大量花牌花籃,無人頭湧湧, 但愛佢及佢愛0既人都響哂度送佢一程.