學藝之路 - Rachel's Kitchen 烹飪班

在我學甜品蛋糕學得差不多的時候, 因偶然機會,好友Yvette帶我到Rachel's Kitchen上課. Rachel's Kitchen 由 資深烹飪導師 Rachel Yau 所創立, workshop好古典好漂亮, 牆上裝飾著帶點Vintage感覺的廚具杯碟, 令人感受到workshop主人對英式文化的喜愛及堅持.

起初只是跟Yvette一起去, 後來Yvette猝逝.... 在為她收拾東西時,我保留了她所有學藝的筆記. 然後, 也開始自己去報班,感受一下Yvette上課時的心情...... 我通常都會以自己感覺為準, 好的東西我會絕不放手, 最近剛在Rachel's Kitchen完成了四課的中菜基本班, 在Rachel 及 廖教賢師傅身上學到的實在獲益良多. 黎緊我仍會繼續報班, 為自己繼續增值!! 廖師傅教我的 , 夠擺一圍酒了 ......

慶幸

婚前真係唔多覺, 結婚後就好慶幸有好多基本野自己都識得.
我在婚前3年, 是自己一個人在村屋住, 本來原意係同前男友散左, 諗住要孤獨終老,早一點習慣未嘗唔係好事, 所以一個人搬到村屋去住. 以前同屋企人住, 起居飲食有娘親照顧, 我係幫忙做家務, 洗洗抹抹之類的工作. 到自己一個人住, 就乜都要靠自己 :
水電野, 先要攪清楚電箱同水錶總制響邊, 然後就係準備電筒及蠟燭火機以備不時之需. 然後,就係抄低水務署及中電緊急維修的電話.....
荒山野嶺,蛇虫鼠蟻總會有, 人地係原居民, 我就係outsider , 所以,避得就要避..... 硫磺粉大鐵鏟等等少不了. 最緊要, 係準備隨時見到面要冷靜面對.
屋企一定要有急救箱, 同埋有關比蛇虫鼠蟻咬到點樣處理.... 電召的士電話不能少. 其他的, 就真係要自己執生:
 試過黑雨晚上天花入水, 煲落熱水後就即刻爬上天台睇下發生乜野事, 屋內要有大量水盤接水, 亦要長期有雨褸用,我唔會蠢到拎把遮上天台扮避雷針的~~ 煲落熱水,係要在淋雨後馬上用熱水加薑洗澡, 否則會病倒.
停雨後,馬上到五金店買漏補王, 向店員查詢用法, 然後自己上天台修補.
 門口大樹長得太狠,要自己鋸樹,A字長梯及手鋸不能少. 否則打大風時好容易塌樹, 平時樹葉/ 花果掉下都會好麻煩. 其他的, 都不提了..... 人總要靠自己.

 我好慶幸,我屋企人將我訓練得好好, 以前會好唔開心,因為覺得佢地太偏心細佬,佢乜都唔使做, 我就做到PK.而家? 我好多謝佢地. 就因為有父母及長輩們的教誨,我可以一個人處理好多生活上的問題, 而且仲可以照顧埋我老公,令老爺奶奶放心. 我亦可以為自己平反左好多野,時間証明我唔係他人的負擔,而且更可以幫輕其他人及屋企人. 有時我見到而家好多人乜都唔識, 我有時真係想,如果我好似佢地咁,我而家會點.......

Q 的 LE CREUSET

我的第一件 Le Creuset 生鐵炊具,在2005年購入, 是一只GRILL PAN ~ 為了煎牛扒而買. 然後,陸陸續續地大大小小的鍋子就魚貫入屋.... (2009年開倉入手,我亦只有去過呢一次的開倉. 以後都唔會再去. 見識到一眾自私精批睜搶貨, 有目標地霸佔貨架不讓其他人埋身, 甚至推開嘗試埋貨架的人....... )

當年仍未有太多的人買呢種煲, 原因係重身, 而且唔平.以中式煮食來講, 實在用途有限. 打從早2年起, 因一眾 BLOGGER 狂煲, 人們都被佢0既顏色吸引,於是就開始癲了. 人癲....所以價錢亦一拚地癲了~ 年初, 在日本樂天見到最喜愛的 COASTAL BLUE 系列出了小小SACUE PAN, 連運費大約13xx , 貴嗎? 貴~ 但香港無得賣,所以敗了.

自此之後,不再甘心敗於香港癲價,衝出亞洲,去到美國.七月羅省之行,敗了兩隻煲返來.... ( 照片取自官網 )

另一不甘心在香港敗家的原因, 是因為在香港,買LC煲的女子已差不多是煩厭港女代名詞: 買一隻煲, 要驗屍咁驗, 甚麼黑點, 氣泡等等, 一律是 defect, 不能接受. 這股風氣, 一直漫延到世界各地去,我在美國逛店時就被先旨聲明 : 黑點不是defect~ FB有關LC煲的群組忽然多起來了, 我也有在此流連了一陣. 但後來見勢色不對,一來不想成為一眾有拎贊助的 blogger 造勢棋子外, 二來亦對佢地舖天蓋地為品牌"R"生意的雞汁post感到煩厭 : 一話乜野煲好, 就會去搶, 搶的人根本唔知自己合唔合用,最後就原價放出. 講煮食技巧, 感覺好.....新奇 (算我孤陋寡聞, 好多我都未聽過 ) 最後,我都全LEAVE GROUP了, 只留番一個交換, 明買明賣的群組. 也從網友中, 買來香港未有見過的橢圓buffet鍋子, 入貨地點是意大利 Amazon

在以為自己心如止水的同時,在美國時收到韓國代購朋友的短訊,問我有無聽過 Lilac Mist的心型煲, 剛好在美國給店員奚落了 (當我是去大量入貨的內地/香港人) .... 一見到佢咁講, 二話不說...又敗.....

煲呢, 其實真係買得差不多,喜愛的顏色都有了.加上已有一整套的孖人牌不銹鋼煲作日常粗用,其實都已經好夠用. 但硬唔知點解一見到靚煲, 個心又會狂跳不已.... 果真是敗家Q !

學藝之路 - 感想

由2009年起, 我就跟朋友一起出外學藝. 學的是糖藝, 烹飪,蛋糕甜品. 自少在家中, 跟太婆,外婆及娘親待在廚房中, 很羨慕她們對煮食的堅持, 甚麼人食甚麼菜,廿四氣節有甚麼特別的食療..... 可恨我卻連中學家政科都紅字收場. 出外學烹飪, 一來是不想浪費自己有煮食的良好遺傳因子.... 二來,我真心覺得女子點都要識整一D野(尤其係已為人婦者)才可以好好照顧家人. 一起初我是去學蛋糕甜品的, 原因是貪吃; 見到街外七彩繽紛的甜點蛋糕,未食都已經開心, 食左仲得了..... 於是一頭栽在麵粉忌廉雞蛋上, 學到不亦樂乎. 跟食譜書做的咖啡卷蛋

後來, 都學得差不多了 (學海本應無涯, 但發現自己開始可以跟街外食譜做到8成似的蛋糕....好開心) 就轉向西菜, 在賞味坊學了數堂西菜, 再到 Rachel's Kitchen 學中菜. 在出外學藝的期間, 除左豐富左自己的煮食技巧外,也對食材有多一重的了解. 每一次上堂, 我都當自己乜野都唔識咁去上.有好多野係知道存在的, 卻唔知點解要咁做. 可幸碰上好師傅,肯耐心傾囊相授. 最後回到家,自己再實習, 像樣了, 就拎去比羊太試食. 羊太都算唔話得了.... 乜都話好~~ 另一方面, 出外學藝令我接觸多了很多食材.以前對急凍食材非常抗拒,認為煮不出好東西. 但只要食材的急凍 / 儲存過程是嚴緊的,解凍後仍是一件好肉 !用急凍肉做的叉燒及燒雞, 就是一個好例子. 今時今日在外面要食得好食得安心, 實在不容易. 唯有自己再努力一D學野,為自己及家人的健康及味覺殺出一條生路喇~~ :)

又執起筆來.....

好耐無響網誌寫過野, 除左忙同懶之外, 無其他原因~~ 呢一年來, 生活主要都係學藝,在家種菜, 返工. 7月時與羊太到了羅省一行, 只因羊太一句: 都唔知可以去多幾多次, 搭多幾多次飛機 ..... 所以就同佢去玩. 另外, 好友ASKA 及 MIMI 在舊年年底結婚了, 我為佢地準備左candy corner, 回禮及場地的 decoration ,ASKA在我跟老陳結婚時, 幫左我地好多忙,所以佢結婚我點可以怠慢? 可以為好友解決問題及令佢地無後顧之憂, 我真係好開心.大抵我可以為佢地做0既都係呢D喇.... 咁0岩佢同我地都係同一日擺酒, 我地笑說日後可以一齊慶祝 ~~ 我結婚時, 好感觸地覺得, 紅事/白事最容易睇得出人的本性. 所以,每次經歷紅/白事,我都有好多得著. 漸漸地,個人都無咁執著; 我並非唔懂得珍惜,而係好多人及事要淡出的話,就由他吧. 我亦唔係一個強求的人,你地可以話我唔上進唔積極唔進取,如果只係我一個人0既事, 我會盡自己所能去做好佢. 但若牽涉到其他人的話, 總要顧及對方感受,對方要抽離,我無可能死命拉住人~~ 每次有朋友抽離,我都會知道,感覺到,只要是沒有欠對方任何野的,我都樂於接受. 時間在變, 人當然也在變. 當大家的價值觀相差太遠時,抽離是好事, 至少日後見到仍會打到招呼 , 在FB上仍是朋友; 勉強大家令雙方難受, 才是得不嘗失.