返工同放假一樣咁慘

係咪好節墜呢 .......

唔係唔夠訓 , 唔係多野做, 亦唔係放假都要對住老細.

而係放假同返工都要對住自大+自以為是的老頑固 ~

返工 , 當然老頑固就係我老細 . 人家都說 , 老人家就像小孩, 要人讚 / tum . 我呢個腦細 , 無時無刻都要表現自己 "I'm the best of the best"當然 , 係唔係 the best , 大家心中有數. 所謂 the best , 只係佢比我地勤力返工而已 . 佢做0既就係天下間最難的事 ( 將數張影印0既 catalogue 黐黐埋埋做成一份) , 我地做0既 , 就只係幼稚園生都會做0既事 ( 要用 photoshop 改背景 / 刪字 / 什至改埋件貨個樣) . 佢黐野都黐到, 無理由我地有電腦做唔到 ( 係呀~ 我認我做唔到, 我見工時只係做 shipping 架咋喎 ~~)
呢一輪放假都要同老爺出去 / 食飯 , 為左裝修D野, 不停要同佢見面( 唔係唔想見,而係同佢傾野/商量野, 簡直係對我0既忍耐力同EQ0既最大挑戰 ) . 呢個星期 , 老爺0既新點子非常澎湃 , 簡直係蜂湧而出 :
1. 廁所要有鏡箱 , 無理由無0既 , 係廁所都會有鏡箱 ( ....... 我極討厭鏡箱 . 而且檯面深度不足, 放鏡箱等於有半個洗面盤用不著.)
2. 浴缸頂要有吊櫃 , 好多酒店都有( ....... 邊度0既酒店呀?)
3. 浴缸頂要有燈 , 好多酒店都有 ( .........邊度0既酒店0者 ??)
4. 浴缸頂要有抽氣扇 ( ......... 又有櫃又要燈又有抽氣扇 .... 得8尺樓底咋喎阿老爺 ....)
5. 浴缸度牆度要黐鏡 , 好過癮 架 ~ ( 有幾過癮呀老爺 ? 架步咩.......)
6. 呢度呢度同呢度 , 要做吊櫃 ( 阿老爺...... 我地就黎要爬入去廁所.....捐入去浴缸....攪一大輪之後得番六尺幾樓底咋喎 ~~)
可能佢唔敢郁 "我" 個廚房 , 於是阿老爺將佢無窮無盡澎湃又峰湧而出0既 idea 入哂廁所度 .

網上仇口

無乜, 真係無乜 ,可能有 , 不過我又唔覺 .
見過面好 ,未見過面好 , 唔0岩傾就唔好傾 , 大家當唔識算數 . 千萬不要回帶 ~ 好老套 + 屎忽鬼的 ~ ( 每一次見某回帶君大聲疾呼遭網友迫害 , 我就覺得佢好可憐 )
又 , 千萬唔好以為 , 自己的影響力有咁利害 , 仇家們無時無刻會掂念著你 , 以你為依歸, 你去的地方我都不去 , 我不是春虫虫 ~~ 我只會當唔想見0既人透明 , 犯不著自閉.
所以 , 如果看官當中 , 有不喜我的人 , 我唔介意 , 我無叫你地黎 , 係你地堅持咬住我唔放 ~
我搬 BLOG , 並唔係要避左D咩囉 ~~~ 只係想將自己0既日誌好好地分下類 , 又覺得 XANGA 唔夠好咁簡單0者 ~~~
唔好再上 GOOGLE / YAHOO 度 SEARCH "OLDQ" 喇唔該 ~~

阿Q之最 的 十件事

我呢世人 , 暫時做得最XX0既野如下 :
1. 食左舊同雙黃蓮容月餅放響一齊0既榴槤月餅
2. 響優之良品試食, 食錯左榴槤乾 , 之後極速2分鐘之內食左4隻 KFC 辣雞翼去麻醉味覺及辟味
3. 由養三隻龍貓 , 變左 18 隻 ....
4. 與同一個男人拍左 1X年拖
5. 高峰期一年去左4次米國 , 之後還左 2 年咭數
6. 二千年起 CUT 哂所有信用咭 , 一張都唔用 , 直到而家.
7. 響十級樓梯碌落黎 , 見識到咩叫海天一色 , 不分上下 ~
8. 比人暗戀 , 但條粉皮係有老婆0既 .
9. 朋友請去食極貴法國大餐, 有鵝肝鴨胸羊扒 , 我乜都無食 ....
10.結婚

就要這樣去過下半生嗎 ?

我得閒無事就會反問自己呢一句話 .
我又唔係要轟轟烈烈咁去救家救國為人民捐驅 ( 咪玩喇 ....) , 亦唔係要委屈自己唔開心唔中意都唔出聲. 我只係想人生少D遺憾 , 唔好太多怨懟 . 所以有好多野,都要學習接受 , 抑或一開始就拒絕 .

人人都有自己故事, 唔係話 : 你0既就好嚴重 , 人地0既就一d都唔緊要. 每個人都有艱難時候 . 當你要同人地訴苦, 同人地呻 , 都要想想, 人地都有唔開心時候, 好多時 , 人家只係用自己經驗去扶你一把, 而唔係輕視左你0既感受 . 如果你覺得人地輕視左你0既感受, 相反 , 你只係無考慮過人家自己0既感受而已 , 所以 , 你再無資格去散播自己0既低落情緒 .
因為 ,好大原因低落情緒係自招的.

咁樣 , 同下半生有乜野關係 ?

除左財富之外, 好多野都會積少成多 , 包括仇恨, 不快及遺憾. 有好多人 , 都會自我催眠 : " 唉, 個個都係咁話我 , 我都係無得改 . " 又或者 , 自己呃自己 : " 無辦法 ...... 天生的" 於是, 不快仇恨及遺憾日復日年復年一直堆積 , 心結不能解 , 眨眼就過了半生 ........ 到一日要走了 , 回望過去 , 真係乜都唔值得回首 .........

我就唔想咁喇 ~~~

FACE BOOK - 自己送自己的禮物

開花了 ~~~

以前, 我曾比過"每一個" ( 口氣真的大 ~~ ) 追我0既男友一個難題, 就係送我一支藍玫瑰 , 乜野花都唔要, 只要藍玫瑰. 要真的不要假的, 要天然不要染色的 .

最後 , 都係無人送過比我 , 因為佢地當我玩野.

而家 , 我自己送自己一棵 ~~

其實有好多野未寫

星期五 - 快樂假期
星期六 - 2007 中秋 BBQ 大食會 , 大食會後記 ( 欠 相 )
星期日 - 老爺家中秋做節
黎緊有 :
25-9-2007 與舅公到聲哥處做節
26-9-2007 又快樂假期

仲有 , 大量不定時無定向發 UP 風 ~~

2007 中秋大食會

今年, 多番2個好朋友一齊慶祝 , 一個係壞人,另一個, 係唔誠實的杯麵 ......嚇死我咩 !!
因為之前一日請左假,多左少少時間去準備, 所以星期六放工後都唔係太多野做. 係去整左一盤潮州麵線, 買左潮州滷 .

仲買左好好食0既海鮮 ~~
得海鮮檔老闆介紹 , 買左 @$20.00/斤0既花蜆,同埋 @$7.00/隻帶子, 帶子細隻左少少, 但花蜆真係好食, 無沙多肉鮮甜. 我今次用左半支廣東米酒去浸佢個零兩個鐘 , 至拎去燒, 蜆吸左d酒之後 , 響個蓋彈開之後 , 仍有大量水份 + 酒響度 "滾"熟

另外得好友A先生全力推介, 買左黑豚黎燒, 果然無介紹錯 !!!好食+JUICY ~~~ 一D都唔似急凍貨 !!

今年響星期六攪, 第二日唔需要返工, 所以大家好放肆 ,又食又飲 ~~ 又少左幾支酒 ,多左幾支吉樽 ....... 最後仲未止, 多左兩個靚仔響我地度過夜 !!! 因為而家響小巴度嘔 , 要比人罰300-500蚊架 ~~

陳雞包處貓第一播

其實佢個樣真係靚過積積好多. 某d鏡頭下仲好大頭貓 ~~~

陳積積短片第一擊

第一次同陳積積影0既短片 ~ 又想佢多d野講又想佢多d動作 , 梗係用魚仔乾同佢玩喇~~




希望各位陳積積粉絲都喜歡 ~~

FACEBOOK

好友傳來 invitation , 於是又開個 facebook 研究一輪 .

收左朋友禮物 !! 我又送佢禮物 , 好好玩 ~~

最後 , 我又送左野比自己 .

因為買唔好食0既西瓜, 所以送自己一片~ 起沙0既~~~

另外睇到一盤好中意0既花, 又送左一盤比自己 !! 未開架 ~~ 遲d就知係乜野黎.

人家的 BLOG

好多朋友都有寫 BLOG 習慣 , 亦有 FORWARD 比我通知佢地開左BLOG, 得閒可以去留個言咁.
但 , 有好多我真係少去. 一來可能大家成日見 / 通電話 / 約食飯 , 二來 , 因為佢地0既 BLOG 係設定左比某D朋友睇 , 咁呢D朋友要 LOG-IN / 新登記之後至可以入去睇 , 於是....... 一大堆我無用0既 BLOG, 就會用我0既電郵地址登記哂 : YAHOO呀 , LIVE SPACE 呀 , XANGA 呀咁 ...... 唔登記? 就無得睇 ~ 登記了一大堆 ,只登入過一次 , 下一次就忘了 ......

我而家0既 BLOG , 有2個, 就好似萍果小姐咁 , 一個係客廳 , 好 OPEN 的 , 真係來者不拒. 另一個係睡房 , 平時係閂埋 . 我選擇左0既好友至會睇到 , 其他不請自來者, 只會睇到空白一片. 因為 , 我唔中意比唔關事0既人知道我0既煩惱.

答客問之 (2) : 點解得咁少朋友0既 LINK

1. 我未問準人家 , 可唔可以落連結 .
2. 人家可能只係比我睇 , 唔係開放式 .
3. 諗到藉口再答 ~~

答客問之 (1) : 書簽同推介 有乜野分別

書簽 , 係我中意去睇 , 但可能人地唔會中意 / 無興趣 / 唔關事
推介 , 係我覺得好睇 , 亦想朋友去睇下

一年到此又中秋 - 月餅

今年托朋友用特惠價買左幾盒月餅 , 都係迷你裝的 . 太大 , 吃不消 ~
做人家老婆之後 , 每年都要在大時大節為一眾親朋戚友張羅送禮 , 有小孩的, 都送月餅 ; 老人家及長輩們 , 則會送上水果籃 或 海味 .
月餅我偏好奶皇月餅 ~~ 自第一次食東海奶皇月餅之後 , 驚為天人 , 年年不吃過就等於無過到中秋. 之後 , 又試過九龍酒店的小什餅 , 八個一盒 , 像大什會 : 蓮蓉 , 棗蓉 , 豆沙 , 奶皇什麼都有 ; 然後 , 好友杯麵曾送我半島奶皇月餅 , 吃後不能自拔 ~~ 每年都要買一盒才心息 .......

九龍酒店的小什餅

至於最深印象的月餅 , 當然是嘉頓月餅喇 ~~ 當年生活物資並不充裕 , 中秋時家中見到有月餅就開心到不得了 ~~~ 鐵盒包裝 , 大大隻字 " 用純葡萄糖制造 " ( 即係講到明高糖份喇 ) . 我常想 : 要吃蛋黃幹嗎要吃月餅 ? 煮個鹹蛋不是成了嗎 ? 又便宜 ~~ 見著四黃蓮蓉月餅才叫人抓狂!!!! 我常跟阿娘說 :" 買這餅真是笨!!! 十六隻鹹蛋那用這麼貴 , 真是笨!!!! " 於是 , 又換來頭上一記爆栗 ~~~ 阿娘不是不認同 , 只是.......偏偏四黃月餅才是上價貨 , 是送禮人地位象徵呀 ..........要緊的是 :
送禮人就在面前呀 ......
公公婆婆知道我不愛蛋黃 , 都會把蛋黃拿掉才給我吃 ; 有時 , 見到沒有蛋黃的月餅 , 馬上就忍不住要吃...... 有一次 , 獨自在家中想找吃的 , 翻到雪櫃內有一盒"雙黃蓮蓉月餅" , 馬上就取出要吃 . "剛好" 有兩 "角" (1/4) 沒有蛋黃 , 我馬上就吃 .......... 吃著吃著 , 總覺得有怪味 ....愈吃愈不安 .....最後全吐出來再把餅都丟到垃圾桶去 , 因為我覺得月餅變壞了. 晚上跟阿娘在看電視 , 口痕痕的娘要吃月餅 , 但在雪櫃內就找不到她心愛的餅 , 我跟她說 : 餅都變壞了, 好臭唷 ~~ 都丟了 ~~
阿娘睜大眼拉高聲線跟我說 : 什麼變什麼臭 ??!!! 是榴槤月餅啊 !!!!
..........幹嗎榴槤也可作月餅 ....
......... 幹嗎榴槤月餅跟普通月餅要放在一起 ......

又有一次 , 阿娘說要吃月餅 , 於是就開了一盒 "名不經傳" ; 一切出來 , 不得了 ~~ 蛋黃油潤鬆化 , 金黃色蓮蓉軟軟的 , 吃下去 , 與一眾連鎖餅店的月餅, 簡直是比下去了 ...... 原來 , 坊間小餅店沒有大工場 , 都是自家制 , 報答街坊多年支持, 月餅都是二日前開始做, 新鮮包裝入盒 . 而這間名不經傳的小店 , 到今時今日都擴展了業務 , 店名就是 : 凱施餅店
我們身為潮州人 , 那可以不說說潮式月餅 ? 近年 "崛起" 的酥皮月餅 , 正確來說 , 不能算是月餅 , 我們管他作 "禮餅" , 真正的月餅 , 都是用綠豆蓉做的 , 一片大大平平的一塊圓餅 , 用糯米粉 ( 未確定 , 要問一下阿娘) 做成 , 煙煙韌韌的口感 . 而且價錢便宜 , 廿多三十塊錢就有一塊.





坊間所見 , 和記隆無處不在 . 但我們一眾潮州人 , 只會幫襯在城南道 , 裝修平平無奇的和記隆餅店 . 城南道有兩間 , 有說貴嶼才是正店 , 也有說平平無奇的才是皇道 . 其實 , 都是分家惹出來的禍 . 潮州人 , 都是念舊的人 , 我們只會幫襯附設餅房兼且有熊熊爐火 , 由老師傅一手一腳做出來的潮州餅. 有餅房而又冷清清的 , 餅都是內地生產 .
近年香港商機無限 , 月餅也愈來愈包裝精美 , 但我總想不透 , 月餅與吉蒂貓 , 小飛俠什至和路廸士尼可以拉上什麼關係...............
香港人現今大都注重健康 , 月餅不能多吃 ; 有心人可以把月餅捐出 , 給老弱無依在闔家團圓的節日中加點溫暖 , 將月餅禮盒 , 捐到聖雅各福群會 , 造福大眾.

比 ? 唔比 ?

起新0既 BLOG 前 , 想左好耐 , 比唔比其他人睇 ? OPEN TO PUBLIC ? PRIVATE ? 最後 , 都係由佢 . 因為我唔想我D朋友 , 為左入黎睇一睇我有無 UPDATE , 又要無喇喇 SIGN UP 多一個 BLOG ( 如是者, 我其實已經有成5-6個 BLOG 係吉0既 , 只為睇朋友的 BLOG 而登記 ....)
而家我仲好努力咁摸索緊呢個 BLOG 0既設定功能 . 有一度幾好0既就係 , 我仲未知響度睇到人流 , 我唔會知邊個黎過邊個無黎 . 其實我亦唔關心自己呢度有幾多人流 , 只係自己無乜本心 , 向來都唔會去主動搵朋友 , 互相問候一番 , 所以希望利用一下個 BLOG , 將自己0既近況比朋友知道 .
我見好多朋友用 BLOGGER.COM 用得好出神入化 , 我希望有一日我都可以做一個 靚 BLOG 見下人 ~~~

陳家積積

佢就係陳積積 ~~~

摸索中

努力 ~

決定搬黎呢一度

慢慢將舊 blog 轉黎呢一度.
寫 BLOG 差不多有兩年了. 開心不開心,頂心頂肺順風順水乜野都有發生過. 我曾對某些人投下全心全意, 最後傷重離場. 所以 , 都係時候另覓新天地 ~~
但我心態依舊 , 來看我我萬般歡迎感激 , 勿論是敵是友, 我花不上那麼多時間去查探究底.
我寫 , 只因我喜歡.