茶客吹水數則

星期日同大夫又去花墟飲早茶,貪其十一點前埋單有折頭 ( 唉~果真係老夫老妻了....).
隔離檯有三位阿伯, 對話如下 :
阿伯甲 : d 人都係自己拎黎0既 ..... (繼續咬佢0既叉燒包)
阿伯乙 : 咪係囉 ,都黐x線0既 , 賠比佢喎 ....哼 ~ (拎起杯茶飲)
阿伯丙 : 嘻嘻 ......( 繼續睇報紙 )
阿伯乙 : 咁d人自己揀架嘛 , 輸左就要賠比佢喎 , 嘿 ! 贏左又點呀 ? 拎出黎分呀 ??? 挑 ~~~~
阿伯甲 : d 人就諗得好喇 ..... ( 拎起第二個叉燒包黎食 )
阿伯丙 : 咪係囉 ~ 嘻嘻 ~ ( 摺埋睇緊份報紙,原來佢睇緊風月版!!!!!!)

不遠處有2公婆響度食野,老公拎住報紙響度睇:
失 明 妻 滾 粥 淋 夫 下 體
疑 有 外 遇 　 施 毒 手 後 再 追 斬
老婆拎住壺茶, 都掛住睇段新聞唔記得自己拎住壺茶 ...
老公叫佢 : 放低再睇喇 .....( 眼神係死實實咁及實壺茶0既....)

同檯有慈祥老伯(我地係搭檯0既) , 我地叫左個碗仔翅,才八蚊雞,阿伯問 : 呢個係乜野黎?
我話 : 碗仔翅呀~
大夫加多句 : 八蚊碗咋 ~
阿伯 : 咁大碗 , 仲叫碗仔翅?? 我下次都試下.....