不再番脹系列 - 減磅樽頸篇

我大約瘦左十磅, 就會出現一次樽頸.
維持得最久的一次 , 有3個月, 呢3個月, 磅數無變化, 我的飲食運動習慣都無變化.
午餐是沙律菜+烤雞扒 , 又或者是水果 smoothie + Chia seed
後來, 將午餐飲食轉為杏仁奶麥片熱食, 終於突破樽頸, 再次回落.

我覺得女性在吸收食物營養方面, 與男性是不一樣的. 男人得, 女人未必得.
其他人得, 我未必得.

我並非專家, 但食物食左落肚, 舒服與否, 感覺如何, 我自己一定係最清楚0個位.

轉左飲食,我學懂去品嘗唔同的味道 :
無調味的杏仁奶原麥片 , 原來好似好棉的白粥一樣.
真正有機的沙律菜, 是有香味的, 入口那一刻就已食出甜味.
Chia Seed , 亦有獨有的味道, 應該是源自鼠尾草的芳香吧?

而我的飲食習慣 , 只改左少少 :
早餐無變, 仍是檸茶加一個麵包 / 兩片提子飽 / 麥芝蛋走醬走茄汁. 星期六一早會去聯發食個 full breakfast , 餐肉丁麵+熱奶茶+多士+半份炒蛋+一隻煎蛋. 星期日同羊太去飲茶, 乜都食.

午餐, 轉為水果 smoothie / 沙律菜+烤雞扒+無油沙律汁 / 杏仁奶原麥片熱食.

晚餐, 食湯粉/ 湯麵. 自己煮會係泰式酸辣肉碎肉丸湯河, 出街食就食牛腩麵,  另加炸兩.

經歷樽頸位, 我並不在意, 因為已盡左力, 試左都係唔得, 即係可能我已瘦到一個點, 唔需要再瘦. 轉一轉飲食, 又瘦到, 當係一份 bonus 吧.

昨晚, 我搵左一D以前買落嘅衫, 好多都未著過. ( 咁都買..... 都唔知當時我個腦諗乜) 而家已經可以著得番哂. 試衫試左成晚, 推動力又番哂黎.

其實, 距離目標尚餘 5-6磅 , 我要好好咁同呢五六磅 farewell  !!

不再番脹系列 : 跑步篇

一直以來我都少做運動, 以前曾經入過physical 做gym , 跳舞, 但每次都係整傷左腳之後就停左落黎. ( 係高跟鞋惹的禍, 唔係運動整親) .
結左婚, 有人認頭, 更加唔使講~~~

當自己下定決心做運動, 首選跑步, 因為成本最低. 上到公園, 才驚覺自己原來連100米都跑唔到.
嗰一刻真係灰哂.
但唔繼續堅持, 日後點去面對不知所謂嘅自己 ? 於是, 跑唔到, 都要郁;  晚晚走上公園, 操兵咁行到身水身汗, 扯哂蝦至番屋企.
行得嗰兩個星期, 磅數已開始回落 , 開始有番D推動力, 於是響黑孖孖的運動場緩跑徑上, 開始踏出第一步.
半跑半行左幾日, 感覺良好, 始終係不求上進的Q , 所以都一直沾沾自喜.
後來有一晚 , 個天對我好好, 給我碰上在公園的一群跑步訓練班, 我跟響佢地後面, 跟住佢地0既節奏步速, 成功慢跑三個圈而唔需要停落黎.
於是, 我每晚就係按番0個種速度, 成為緩跑徑的一隻倉鼠.
期間都遇上不少問題 :
腳底痛 - 係鞋嘅問題, 去 Launge8 搵楊sir買左對鞋, 問題即時解決.
氣喘 - 係 Bra 嘅問題, 都唔好話唔關事, 束住個身同護住條腰, 原來真係好唔同的. 再經資深跑步好朋友教識我深層呼吸 , 肚痛氣喘問題完全影響唔到我.
流鼻水 - 我有鼻敏感, 流鼻水少不了. 但響跑之前的拉筋動作做耐D , 出到汗, 到跑時我就唔會流鼻水, 萬試萬靈.
到十個月後的今日, 我盡量都會隔晚去跑番 4-5K , 星期二及六因為要去跳舞, 加上天氣經常不穩定, 所以比之前都跑少左. 但只要天氣唔落雨, 我一定會去跑. 舊年年底, 細姨出左事, 我亦係靠跑步去調節自己的情緒.
戶外跑步的爆汗感 , 是跳舞感受唔到嘅. 我亦已經過左做完運動翌日會周身痛嘅階段.
最近, 我亦由倉鼠MODE , 開始轉去跑出街. 我會選車少的地方去跑, 為免有意外, 亦會選擇與車輛反方向的路段去跑.
至於 Pacing / 速度, 我唔太介意, 一來我無意欲去跑馬拉松, 二來我是隨心所欲嘅人, 開心, 就跑快D , 狀態麻麻, 就慢慢來.
我始終認為, 我只需要對自己, 對父母, 對細姨, 有一個交待就好了.

不再是 希望工程

由踏出社會搵食開始, 已知外表外觀比內涵更緊要. 奈何我始終都立不下心腸, 所以一直都是偏肥.
曾經有瘦過 : 食藥, 節食 , 減食.... 最後番脹.
到發現健康開始每況愈下, 肌肉無力, 平衡力差, 久病不癒, 才深思"健康" 到我呢個年紀必須要下功夫 , 因為父母賦與的QUOTA已差不多耗盡.
由2016年9月開始, 改變飲食, 生活習慣 , 恢復運動. 身體已開始回復以往般健康.
由高峰期的 170磅, 已下跌至135磅.
所著0既衫, 已由加大碼, 回落到中碼, 甚至細碼.
去到葵涌廣場, 夠膽唔使試衫即買.
呢一刻, 我更愛我自己 .
所以, 我唔會比自己著番大碼衫.

著到細碼褸仲要拉得埋拉鍊的Q , 立此存照 ! 以此為鑑 !!

超級食品 - 奇亞籽 Chia seed

接觸呢種食物, 係阿姨在 Trader Joe's 度買左一小包送比我. 但我一直放在廚櫃內無理到.

今年去到美國, 阿姨開左一包叫我試下, 我將佢加入果汁度, 等左15分鐘, 就變成飽肚的甜品.

Chiaseed 接觸到水份, 就會漲大十至十二倍, 表面會有一層JELLO物質包裹著. 好多減肥人士會用佢來加入日常食物中, 增加飽肚感.

返到香港後, 我就搵番廚櫃入面呢包奇亞籽出來, 開始我的飲食計劃.

每日, 我會用 :
2-3種水果  ( 果糖 + 纖維)
一杯無糖乳酪 ( 增加益生菌及蛋白質 )
 兩茶匙奇亞籽 ( 攝取其他維生素, 蛋白質及脂肪酸等 , 但其實最主要係想有飽肚感 )

然後用果汁機打勻.

等30-45分鐘後, Chia seed 吸收夠水份後, 才開始飲用.
而飲用時間, 大約1-1.5小時. 因為雖然係果糖, 但都係糖, 所以慢慢飲可以令身體慢慢吸收, 而唔會忽然令血醣颷升.
飲用果汁後, 我會出外步行一小時, 讓糖份慢慢被消耗.

一個月下來, 我的食量大減, 配合運動,  身體活動也輕鬆了.

當然, 一開始轉飲食習慣 , 並不容易, 心魔太多, 情緒都會有上落. 磅數下滑, 是一個動力 , 食多左, 肥左, 就要引以為鑑, 以後就算食, 都唔可以太過火.

由九月中至今兩個月, 進展良好. 樽頸位亦出現, 但我懶理.

復耕

呢個 Blog , 就好似我個天台咁, 一片荒蕪~~
人愈來愈無精神, 唔想理嘢.
連最愛的烘焙 , 都提唔起勁.
今年暑假, 去左美加一躺, 想左好多嘢.
最後, 的起心肝, 真係要為自己做多DD , 再係咁落去, 之後唔知點過好......
返來香港之後, 開始去做運動, 改善飲食, 於是, 精神都回來了.

由九月至今, 我已減左十五磅. 當然, 水份佔好大比例, 真正瘦左的位置, 在背脊 ( 薄左好多, 虎背沒有了) 大腿 幼左 (在膝頭哥位置對上開始瘦及收緊)
減重的方法, 是飲食配合運動 , 再利用APPS 的功能, 去計算食量 , 加強運動時的自律.

我好想在 LISA 結婚時, 著靚衫又貴氣地出席, 幫佢做一個五層的結婚蛋糕
2011 Michelle 結婚 , 塊面都叫呃到人
今年 Jennifer 結婚 , 已成大臉餅.....

為自己打打氣~~ 阿Q 要比心機 !!!

煮乜Q - 生鐵鍋煮飯

我屋企無用電飯煲的.
一來廚房地方唔夠, 二來, 電飯煲就好似開車開自動波一樣, 要佢快又快唔到, 慢又慢唔到, 轉數唔夠仲會響度糾纏斯磨, 夠膽死煲2碗飯要成粒幾鐘.
買左生鐵煲之後, 開始爬文學用佢來煮飯. D煲買左又唔用, 為乜呢? 所以一定要盡量用到佢盡.... 才值回票價.
上網搵料, 找到一大堆所謂密碼. 但係.....
大家用的煲大細唔同, 火候唔同, 用0既米又唔同...... 點可以用幾粒數字就去煮飯?
最後, 都係參考左火路的大小控制去煮一煲飯出來.
用生鐵鍋煮飯, 最怕, 就係流淚~~~
先睇睇呢一張相:

我無跟佢地嘅所謂密碼，因為唔同米/受水性/爐頭大家都唔同，無可能跟人地嘅方法去煮飯。
我會用中火煮滾米+水(左手邊第一張相)，我都會間中了一了佢(有人話唔好，但想放心,怕黐底，唔理喇~)滾到中間咁嘅樣，就轉小火；去到最後右手邊呢個樣，見米面了，就加蓋用小火煮10~12分鐘，通常都唔會流淚的~ 如果擔心煮燶, 期間可以開一開蓋, 聽到 zic zic zac zac 的聲音, 代表煲底水乾了, 要加水 ( 米未煮熟) 又或者要關火 ( 米已成炊)
關火後，我會再焗佢15分鐘 ~
關於煮飯流淚 , 關係到煲的大小, 火候控制.  我用的是20CM 圓生鐵煲 ( **MAX. 3 杯米 **) , 用的是金鳳絲苗+紅米+糙米混合, 通常我會煮2杯米, 下3杯半水. 按著上述程序去煮飯.
我覺得用生鐵鍋煮飯, 可以省時間 ( 全程開火約 20分鐘以內) , 可以保溫但又不用另外再置一隻電飯煲響度.  另外, 因為家用爐頭如果不太多時, 單單是兩餸一湯, 就要排隊來用. 所以生鐵鍋響呢個情形上, 長時間保溫就起了好大作用.
若要煮有味飯, 在見到米面冚蓋前, 就可以將要放落去0既佐料平均放在米面上. 冚蓋煮到尾就可以. 在加蓋後10分鐘, 可以打開煲蓋, 拌勻佐料及飯 / 加芫茜蔥 , 冚番蓋煮多一兩分鐘, 就可以關火焗住佢 , 咁D肉就一定會熟而又唔會過老.

2014 月餅初發佈

今年, 我斥巨資買左兩套模. 係, 巨資~~~ 我無想過自己會比咁0既錢出去買2隻模.
朋友問 : 買得過嘛?
我話 : 你唔係一年造幾百隻月餅, 你就唔好買了.
但到最後, 罪過~~~ 人人都買了~~
因為實在太美了~~~
一如以往, 我會繼續做我的奶黃柚子月餅 .
然後, 再造我的招牌紫蕃薯月餅~ ( 見到給賊偷去開班賺錢, 我不爽~)
最後, 會研究新的月餅餡~ ( 要保持神秘, 要知道, 這年頭, 賊多的是~~)
先看看我的月餅模~~

再看看半制成品?

成品又如何了?

 

我決定今年要自私一點, 甚麼都不管不理, 專心做我的月餅去~~~