小羊最近新攪作

呢袋係乜野黎呢 ? 響小羊間房度出現 ......



!!!!!!!! 老鼠籠 !!!!!!!

即刻去同阿娘問個究竟~如果屋企有老鼠就真係麻煩喇!!
原來,又係小羊為佢架愛妻號籌措 ~
小羊0既愛妻號係放響某大廈0既出租車位,有人0既地方就梗有老鼠,小羊發現有老鼠拎埋d薯條 (!!!!!!) 去佢架車0既引擎度開餐 ....愛妻被鼠輩"侵犯",call-lau-yeah 喇 ~~~ 根據羊太所講,呢輪小羊經常在廚房"整野食" /煨魷魚,為求早日將侵犯其愛妻號的鼠輩擒獲. 早兩日已經捉到一隻鼠輩,但小羊仲係唔放心,一日走去及幾次 ....

逃避 / 面對

有好多野,愈逃避愈泥足深陷, 不能自救.
選擇面對,反而可以看見一片天.
面對現實 / 看清事實之後,凡事都可得來一個解決, 路才可再走下去.
要承擔, 首先要肯去面對,去反省,去檢討,去改變.
所以現在的我,比上一年的今日開心.

大清倉

最近執屋,實在感概非常~
一大堆化妝袋 :
因為喜歡個化妝袋,所以就算未用過某品牌都會買一堆野,為的就是個化妝袋
(熟門路都知,呢d gift with purchase 都要買滿頗高價錢至可以送,極敗家~)
快餐店玩具 :
總唔知點解平時都唔買/睇/玩呢d野,一輪廣告宣傳洗腦之後,櫃入面床下底儲物箱等等都塞滿左呢d玩具.
(一想起要放響邊/放出黎會封塵/經常要清潔/比貓踢左唔知去邊度,就無意欲去處理呢d野)
夜冷店 / 表姨丈公司的貨辦 :
又係d唔等使野,竹籃(通常係阿娘0既傑作,以為我無籃用...)家品,木制裝飾,同樣的花樽都有六七隻.
(拎 / 買0既時候覺得 : 好靚 / 平呀~~~ 出面無架~~~~~~~, 拎到返屋企....都唔知用黎做乜)
毛公仔 :
又一極度頭痕野,我又唔十八廿二,放出黎又唔係,丟左去又唔捨得.大夫狂喜 teddy bear ,小羊以前去日本夾公仔收獲,大大話話淨係熊人都有成十幾隻.
(隻隻都要用膠袋包好以防黏塵,一包二包咁...乏味 ~)
大量吉盒/罐/樽 :
大部份都係覺得個容器靚,就買番黎~(係~我認膚淺~)放到d野過哂期,至發現得個容器"原來"係唔靚0既,樽入面一定要有野響度 ....於是 ... 又一大堆~

的起心肝,將無用 / 唔用0既野,用膠袋包好後,捐去作慈善, 總好過放在家中神傷~

考核禮的一天

24/2/2008 是考核禮的日子, 在七喜吃過早餐後, 就跟大夫乘巴士到聖保碌醫院旁的基督君王小堂去.
場內很擠~今天主持考核禮的是陳樞機及湯漢主教,陳樞機. 伍執事及 CECILIA 因為有要事在身,所以出來跟我們打過招呼之後又隠沒了在人群之中.
我已開始熟習彌撒的流程,整個考核禮都沒有打瞌睡 (XDDDDD),陳樞機很幽默,令這個考核禮上增添不少笑聲. 這與我以前在浸信會的感覺截然不同. 我留意到的是,場內教友會用各自的方式去感受每一個過程,去默想,去聆聽,去感受, 而並不是千篇一律的去做同一個動作.
近尾聲時,主教會為準教友作傅油祝福,給我傅油的是湯漢主教,油很香~代母萍果說應是甘菊油.
考核禮之後,我們到了對面的酒樓吃下午茶. 然後坐巴士到旺角去,大夫跟ALAN逛腦場, 我跟萍果就先回家,因為萍果穿不夠衣服又抱恙,所以我把她留在新竇口後就到市場買菜準備是夜邊邊 ~
是夜邊邊,很不容易才買到牛肉,因為天氣驟冷牛肉佬都清倉了,可幸老闆認得我個衰樣,把最後一磅多一點的牛肉都賣給我, 再加一點點鮮牛肉及牛丸.然後又買了八隻大連鮑魚,一斤大花甲,又在大昌買了白螺片(極力推介!才$12.90/包有十二三片) 響螺片( 貴了點,要$32.00/包)一大堆菜才打道回府.

新竇口交通方便很多,朋友們盡興後回家都很方便 ~

肥肥離世有感

肥肥由患病至離世,都係好多香港人關心0既話題. 離世之後,佢0既生平/介紹更加係轟炸式咁出籠.多年僱主的電視台更加係整個星期合家歡時間之後重播肥肥經典節目,比一眾喜愛肥姐的觀眾懷緬一番 ~
平時我都唔係點八卦0既人,肥肥患病當然都會關心一點,離世消息一出,心當然酸. 晚上在家中的收音機,傳來肥肥生前不少經典金句及招牌笑聲,電視節目中肥肥跳芭蕾舞/踏雞蛋/忍唔到笑要交叉腳,我對眼雖然好紅好慶,但每次睇到d片段都覺得好開心.
肥肥就有如斯令人開心的本事, 觀眾開心,是因為肥肥可以豁出去令他人開心.
當然,有正亦有反,不少舊聞/小道消息, 都會呢個時間走番出黎: 肥係社團人士,有背景,與某女星去世有關 ....但,重要嘛?
在我黎講,肥肥係從事演藝事業,我在電視節目上睇到佢敬業樂業0既精神,睇到佢對自己家庭0既付出,對自己女兒0既呵護, 夠哂喇. 尤其對欣宜,呢位單親媽媽可說是無話可說,廣交人緣之下欣宜日後亦不愁無人照顧. 遺願之一是 : 希望人人都喜歡欣宜,喜歡欣宜唱歌.
黑社會,白社會,重要嘛?
如撇走人家一切功德,放大一d未經查証/無影響性的閒言閒語,是不是會有獎?
有人說 : 藝人= 偽人. 當然喇,藝人,就係做戲的人,自己0既戲都做唔好,觀眾亦唔會睇你. 問題是,看的人並不是以欣賞的眼光去看演者 . 香港傳媒文化, 就將讀者的方向扯向藝人的私生活/私穩去. 拍了什麼戲/做了什麼善事 都不是目標主題. 反而有與趣在演者家的垃圾桶,病容,以至遺容,什至以 "公眾有知情權" 作歪理去逃避責任,把一切不道德的行為都推在觀眾身上.
近十年,一顆顆巨星的殞落,令人唏噓不已.不少人會覺得 :梗係喇,成日劈酒溝仔/女,生活唔正常,食無定時,日夜去蒲,邊會長命呀....
有無想過,有頭髮0既邊想做"喇哩" ? 如果演藝人士可以有得揀,佢地唔想正正常常咁生活咩? 知名度帶來的壓力,令佢地只可以用行內特有的方式去減壓.
響佢地在公仔箱內帶比觀眾歡笑0既同時,真心希望作為觀眾0既,比番一份尊重佢地.演藝者的責任,只係推行演藝事業,並唔係將自己/家人什至條命拎出黎比觀眾公開批判.
亦衷心祝福欣宜可以堅強成長,做一個會承擔0既女人.

開始見功了

工作上的轉移,令好多問題都開始表面化.
唔專心唔留意細節,事事要人家為佢解決,加重人地0既負擔 , 呢D就係我公司同事0既問題.
當我0既工作量開始轉移時,呢D問題更加緊要.
當日口爽爽時同我講:你做唔切我可以幫你做架.
一殺到埋身,千百萬個問題走出黎.掉番轉要黎問三問四,變相增加左我負擔.你要幫我忙我實在感激,我極明白你幫我係人情唔幫我係道理.但做不來,你可以唔幫.
打印機接唔到,咪用另一部囉,犯不著要FORWARD 比我去幫你印出黎.我部機都係上左SERVER 架.
我唔會收埋D阿公野架~收左又如何 ? server 有特定地方去存放報價單,自己唔睇清楚就響度嘩嘩叫,認為人地收埋d野令你難做.呢d心態係唔係 team work入面應有架呢 ?
每一次我都發現我唔幫你時,你會不停擰頭+不滿.唔該你每一次做呢d動作時反省一下,自己有無盡力去做好件事.

點解

人生在世,無時無刻都有好多問題,好多 "點解"
點解陶大宇十年前烚熟狗頭師奶殺手咀臉無變過 ? (做賊同做差人都係咁0既表情舉止+表達 ....)
點解車子在路上拋錨 , 司機一定會開左車頭蓋 ? ( 開左但又唔識修理 ...)
點解情人節時D店家都會一窩蜂推出簡易蛋糕 DIY 套裝 ? ( 平時無人造蛋糕喇?)
點解永遠都係到事情不可收拾時至去想點解決?

又來人生交叉點

早前作出的決定,令我整個人放鬆不少.
但老闆接二連三咁同我傾,又搵馮生同我傾,頭疊尾都有四次.
我成日都叫自己 : 唔好咁執著, 會死好多細胞.
但氣實在難下.
昨日,老闆又同我傾,可能係心水清的馮生同我傾完之後,比意見老闆再同我傾. 因為好多問題都好到肉,可說係有一個交待.
交待只係其中一樣, 我感覺上係, 身為個老闆,佢可以唔同我傾,請過個都仲得. 當然,信唔信得過另加教唔教得掂係另一個問題. 以我呢個臭檔老闆黎講,佢對我都算係比番十足誠意.咁,我係唔係都要再考慮 ?
羊太得知情況 ,雙眼發光,反應就同我之前話佢知 "我唔做喇" 一樣, 一樣咁開心,一樣咁雀躍 .
咁即係點呀你羊太 ?

傳統與創新

任何地方0既傳統婚禮,總有佢地0既理由/作用. 可以日後用黎算帳,亦可能可以安下人家的心.
世界愈進步,人就愈多騎呢野.
以前,大家好歡天喜地咁去參加人家婚禮,喜氣洋洋; 現在?可能只係比面派對.
以前,新娘子一套褂一套旗袍一套婚紗,就可以令人留有深深印象; 現在?新娘子七套八套所謂晚裝,短短數小時,不停換衫,變成一場時裝秀.
以前,敬酒及與賓客寒暄就足以令新人忙得東西都未有時間吃;現在?會有合家歡遊戲,bingo,抽獎,什至要賓客除了人情之外,再大方捐錢,給大會作抽獎之用.
最近 , 婚禮變成了另類遊戲,再找不到莊嚴,新娘子再不大方得體,好像是她自編自導自演的一場秀 ;新郎哥疲於奔命,什至將自尊都要賣掉給一大串姊妹安排的變態遊戲 .......
最要命的,是做了警訊案件重演的其中一場主題.
創新唔係唔好,始終人生大事,一生一次,誰不想好好睇睇?只係,除左自己高興,都有好多野要顧及.
傳統,始終是要人去尊重,人可以不盲從,但要知底蘊及其用意. 婚禮意義都未攪清楚,無資格去結婚喇.

新竇口最頭痛問題

就係乜乜應該放邊度. 而家,都仲係賊佬試砂煲階段. 放下放下,多得滯 / 重得滯 !要轉位 ~
一個廚房,我都頭痕到爆,然後.....
飯廳櫃,客廳櫃,衣櫃分配 , 主人房櫃 ......
因為有好多野,一放左入去,可能好日都唔會拎出黎 ; 又可能要方便日後取物, 要睇以後,唔係而家......
於是, 另一個問題又黎喇 .....
放下放下 ....唔知放左去邊.
@_@!

又 DIY - 梳化

又買錯野,檯布唔0岩SIZE,用黎做乜好?
舖唔到檯舖梳化囉 ~~
舖前 :

舖後 :

又來網上禮儀 - 轉載人家 blog

以前曾在 xanga 有一個 blog, 後來因為某d 原因,不再用xanga ,轉用 blogspot.
當中一個原因,某blog主未有問過我同意,就將我0既網誌路徑公諸於世. 然後有一日,此blog主大言不慚地公開宣示 : 因為我唔妥你,所以我已經將你網誌連結在我網誌中移除.
嘩 ~ 咩事呀? 我都未問你憑乜野去公開我網誌所在,而家仲要比野我聽? 雖知此人不分好歹不識輕重,但我仍馬上將網誌搬走.
又有另一新結識的朋友,第三者問及她有關我的網誌,她很禮貌地回絕了,將公開與否的權利留回給我. 我很多謝此朋友的貼心.
取人家大門鑰匙, 都要先問一下吧 ?

又 : 承擔

又係閃咭事件0既引伸.
眾多阿媽(點解係阿媽??阿爸呢咁?)話枉佢地比仔女封阿嬌做偶像,做埋d咁0既野, 以後都唔會比仔女中意佢云云....
細路有偶像都係好普通0既事,乜野人"可以"做偶像 ,無定論架喎~大傻哥都係好多人0既偶像喇~又如何?
影d咁0既相唔得? 乜野唔得?為人父母者夠唔夠謄話自己唔會激過相中兩主角?
相中人都有番咁上下年紀,男0既又無衰十一,成年人為自己做0既野負責番,又要比你地鬧呀?
又要睇又要鬧 , 嘿 !
再者,人地係做演藝事業,你以為真係搬自己條命上黎比你睇呀 ? 諸如外國節目建一間玻璃屋比個二三線小明星響入面生活比你睇真人show, 都係順從民意咋~~~ 做人老母喇,有d腦好無 ?
我見過唔少為人父母,連自己都唔肯承認自己0既錯誤, 所以一眾細路都唔想搵自己父母做偶像, 好多父母自己知自己事,所以亦樂的有個偶像去分散注意力.
講起承擔, 我老豆以前曾向我講過 : 我同媽咪,都有好多野做錯過,不過因為你地係我地0既仔女,所以你地唔可以話我地唔0岩,我地亦唔會向你地認錯.不過你要記得,我地做過0既錯事,你以後都唔可以犯.
佢講完之後,我條氣順哂, 十幾廿年0既氣一次過順哂.佢無認錯,但肯承擔, ok ,我受 ~
真係唔該為人父母0既想一下,自己係唔係真係無做錯過野.再者,偶像0既形象突變,你估d小朋友好好受咩?你地唔同自己0既小朋友一齊過渡,反而響度扮假道學 , 枉為人父母呀 ~

執屋

現居, 新居同娘家 , 都係亂糟糟 ,都唔知執邊度先.
現居 : 一屋都係野,舊報紙,雜誌,一袋袋垃圾,懶環保地分到一袋袋0既鐵罐/膠樽/紙 .... 大量唔知裝左D乜0既環保袋 .....
最過份0既係 : 聖誕樹仲響度,乜都未拆.
是日最大工程係 :
1. 拆左聖誕樹,PACK 好所有裝飾品
2. 執好茶几面.

新居 : 周圍都係野,每一個櫃,都有大夫0既野 : 插蘇,拖板,CABLE,工具,一盒二盒0既電腦野 , 唔係講笑, 係每一隻櫃都有,廚櫃除外.
我想將櫃分類放野,完全無處入手.
是日最大工程係 :
1. 天台上面一隻二隻紙皮箱收藏好,
2. 填好大量保用証,
3. 將說明書同發票及保用証一齊PACK好,
4. 貼左部份衣櫃內牆紙

娘家 : 睇到出面好好咁,入到廚房就真係頭痕.廚櫃係大呀,空間感十足,不過唔可以盡情利用,變到D野立立亂,放得唔好又易跌.
是日最大工程係 :
1. 用IKEA 櫃內金屬架將物品升高安放好.
2. 換走壞左0既微波爐

明日再(繼)續 .....

最熱話題

當然係閃咭喇.
我有睇過,十張八張左右喇,出於好奇.近呢2日,我無興趣再去睇. 同我睇東周壹周感覺一樣: 與我何干 ? 不看也罷.
因為自己都係女人,如果自己比人咁擺上檯,真係唔知點算.
身邊好友,親朋戚友,都好 "好奇" ,前2日開始來電比大夫查詢不同的問題 :
download 犯法嘛 ?
download 左打乜野 file名 ? 會唔會比人知架?
rar 點開 ?

最要命0既係,一d自以為正氣0既道德重整會主席/會員,都一窩蜂去追八卦,睇下閃咭數字有無上升, 響邊度有最 update 資料云云...天主知道會點 ? 心淡喇 ~~
我睇唔順眼,係0個d平時成個道德重整專員咁,係又數唔係又數0既人.一去到呢d位,咪又係x人一個?
我從來都唔覺得自己係個好人,而且我從唔(敢)去批評人. 當然,響呢件事上面,我無權管人地,但又係一個好課題,比我知道 : 假道學的人多的是.
對於呢d假道學0既人,我只會睇佢地唔起. whatever 佢地之前有無同我有過節,我只係愈黎愈覺得佢地係條可憐虫.係佢地利用左宗教, 定係宗教利用左佢地 ? I don't care ~

我 , 又名 Audrey

Audrey , 係我0既聖名.
今早我同大夫到左天主總堂 ,參加左甄選禮 . 整個禮儀有一個半小時 ; 大夫同我,好友Alan及萍果都一齊參與. 因為,大夫係 Alan 的代父,萍果係我的代母.
說起來,萍果與我是次皈依,絕對有淵源 .在我的決志書內,亦提及我為何會自願踏入教堂門檻.
一直以來,希望我信某d宗教的人有好多,亦比我睇清左好多野,洗腦不成反轉豬肚者比比皆是. 在2年前某日某件事, 好友出於關心,提點我們為故人做一點事,而造就了今日的皈依.我從不是喜歡與人唱反調的人,亦希望談話之間大家雙方都會為對方著想,避免不安. 奈何世事無完美, 最後我都會接受現實,接受自己看到感受到的所有事. 我在決志書內提及,我最高興的是,我是自願走進教堂門檻,而非被人影響,非自願地入教.
早前與副主教對話中,明白作為一個教徒,並非是以"身為教徒"而沾沾自喜,是要自己身體力行,去實踐出聖言啟示,做一個有用的人.
宗教,絕對係個人感受的一樣野,並唔係三言兩語就可以講得明白的事. 所以,認識我的一眾朋友,絕對唔需要擔心我會夾住你地去信教.我仍是阿Q ,中意蟹樹 IKEA 同孖人, 又為食又粗口0既阿Q.

大年初一

眨下眼又年初一,時間過得好快呀.....
同往時一樣,一早就鼠去羊太度同佢地一齊去舅公度拜年,然後去阿姨度.今年阿姨更準備左開年飯同我地一齊食.有好好食0既陳皮瘦肉粥(呢個粥真係天下美味!!!又學到野 !! 有時,煮野食唔一定要貴料0既~~)鹹雞一隻,脆皮燒肉一大件,阿姨私房齋 (嘩呢個齋,未食過真係囉囉攣呀~)
食左八成飽, 就去老爺度又食開年飯....好彩響阿姨度打左底0者 ~~
之後就去姨婆度拜年,同以前一樣,好開心好好玩呀~~~ 表舅父表姨丈等等笑到嘩嘩聲,過年應該係咁開心架嘛 ~~
可惜0既就係芳表姨抱恙,未能親口多謝又食又拎0既紅豆糕 !!! 在此希望表姨快D好番~~身體健康就是財富呀~~

入伙及過年前準備

多謝羊太幫我買雞及整鮮竹卷,作為入伙招呼朋友之用~~
今日爭取每一分鐘,去做大大小小事情.
一早去左剪頭髮,修眉修甲,要執執個樣至得.
期間窗廉公司打電話黎, 話可以上竇口度安裝, 好準時呀~~ ^^
返左公司做左一輪野,然後出左去九龍灣入埋單.
再出花墟買花,心水係日本海棠. 另外終於見番日本雪柳,買左兩扎,另加三支鮮紅朱頂蘭. 響另一間新店睇中左一盤日本海棠,陰功個盤仲貴過花 .... 今年一共用左400蚊響年花度.
坐左的士返新竇口,然後又趕去九龍城搵羊太,同佢一齊買野拎野返屋企.
然後又去街市潮發買入伙/團年用0既野,買全盒0既糖,買桔仔,買沐浴露洗頭水等等.再比羊生羊太各一個電話,點到我響九龍城度行左三個圈.....
拎哂d野上去之後,見到大夫黎左,我又拎番d野上車度,順便去十蚊店換野及買野.
再落去樓下0既奇華,要求姐姐用車仔為我地推十幾盒0既禮盒上去停車場.
上番羊太度,可以食飯喇~~ 咋咋林食完, 老陳去 megabox 拎番d野,我就留響屋企同羊太整隻雞同鮮竹卷.然後一齊去新竇口度執野.今日pccw及窗簾公司黎安裝,唔多唔少會鑽孔/剪電線,所以又要清理一下.
響潮發買0既野,又要處理左至可以入雪櫃,當然以我d身手,好快攪掂 ~~ 再將所有紙箱搬上天台房仔. 老陳安裝埋個電視, d野就差唔多大功告成 ( 如果唔開d櫃,係無問題0既 ~~)
聽日,要一早要出去,去惠康買埋野,再上去執野.希望2點幾可以好好地招呼好友喇 ~~

雙糧收獲 - 床上用品

床上用品可以說是沒要求,但訓過一次好野之後,一定返唔到轉頭.
所以現在我只會買 CASABLANCA 或 AIRLAND 雅蘭 .此兩牌子床上用品針數高+密,洗多次都不會起毛頭.最緊要係 價錢合理 / 經濟.
是次我買了雅蘭的長春籐寢具.永安有減價, 75折至半價.
另床笠是在將軍澳君傲灣商場 "今好店" 購入, 店員友善有禮.而且耐性可嘉. 此張白底夾棉繡紅綠玫瑰花, @$498.00有九折.

買乜Q - 宜家多用碟

本想買一隻漂亮的日本漆器全盒,看過後覺得太貴.每隻都要300塊以上.300多塊錢用一年15天實在買不下手.
於是,在宜家買了一隻大碟子 , 分成五格,線條簡單又多用途, 暫時想到 :
過年 - 全盒 ( 一定要有大量砂糖桔及金幣朱古力 !!)
宴客 - 可放小食 / 沙律
無野食-可放乾花 + 裝飾

雙糧收獲 - 心水地氈

年近歲晚,百貨公司都推出大量減價貨.
我中意去永安,吉之島及 APITA 逛,因為此數間公司性質都不同.
今日經過上環永安,就入去逛, 想看看有沒有心水的茶具.
茶具就看不見,一見這一張地氈, 馬上雙眼發光.馬上佔為己有 !!!
因為家中買來的茶几,店家夫婦建議在地上加一塊地氈, 會令全透明的茶几加上一分高貴. 於是數星期來一直在找想要的地氈.
在 IKEA 買了一張杏色的....感覺很小家.
在地氈店打價, 要 $800 -$1200,還要過年後才可以送貨.
其他店, 不是大小不合, 就是用料差,還要天價...
這一張,比利時入口,原價 $1000,現半價 $500 , 加上大小適中, 那有不買的道理 ???!!!

雙糧收獲 - 陳積積的米桶

早2個月前睇過, 好中意 !心想一出左雙糧就一定要買一隻~仲可以當椅坐 !
今日終於買左呢隻細0既~ $338.00

售賣地點 :
Aurom Home Deco
1. 奧海城一期 UG 層36號 D-F 舖 ( 大家樂側 )
TEL : 2880 9666
2. 將軍澳中心 G56號
TEL : 2267 8997

過年前備忘

超市
1. 買砂糖桔
2. 鹽糖生粉醬油冰糖香草
3. 紙杯/碟/碗
4. 賀年糖
5. 貓糧
6. 貓砂

吉之島 :
1. 禮盒(金沙,藍罐)
2. 水果

街市 :
潮發 - 麵線,生粉,清心丸 , 薑薯
牛肉檔 - 邊爐牛


另要去 :
ZARA
花墟
奧海城
奇華
SHISEIDO

久違了的冬天

寒冷警告出左成十日,真係好耐未試過喇.
天氣凍左,人都懶左 / 無心機.可能係落雨喇,個人變得好累 / 懶(天氣熱又係咁,凍又係咁,分明撒賴~)....
於是 .....
響新竇口整左0既 DIY 野,無影相
買左新床舖被袋, 無影相
大夫買左新孖人比我 , 無影相
無上 NSG
無執屋
仲好早訓,10:30上左床...訓到不醒人事...

過度期待假期症候群

病因 : Holiday Mood 太緊要,吽出病來 ~ XDDDDDDDDDDDDDDD
病癥 : 頭痛,嘔, 眼訓, 面腫, 及各種九唔搭八的"周身唔聚財"
何時病發 : 多在假期前48小時內病發,由好人好姐至病入膏肓只需四小時,蔓延速度驚人
病理分析 : 病人潛意識極想放假,於是盡量令自己作病,就算要返工都要比個病樣人地睇,搏同情.
康復指引 :
1. 盡量遠離寫字樓 / 工作地方.
2. 病人多會在假期開始前24小時內自行痊癒.想加速病情康復者,可到各大百貨公司或電影院.
3. 醫學報告証明,心情愉快可加速病情痊癒.

近況

繼續忙 ~ 忙返工, 忙做野 , 忙追貨追船, 忙新竇口.
今日忙 , 忙將牆紙貼落櫃內壁 , 忙買日用品 , 忙執拾地方.
今日吉之島好準時,將福祿壽套餐送到,6/2入伙當日應該可以見得下人.
明天會去太古城買埋少少野, 做好哂衣櫃內壁之後,就會著手攪入伙當日0既野.
星期二窗簾及其他布藝野會送到及安裝, 過年應該可以招呼下人地上黎坐.
真真正正入黎住 ? 未知呀.