玩乜Q - BROTHER 衣車 XL2120

上星期,大夫見到豐澤有衣車減價,BROTHER 最平$1299入門版.
考慮左幾日, 都係決定買~ 都想左好耐,一來自己真係手腳麻麻,二來我D家政又唔合格, 有D 陰影.... 我記得以前考家政用衣車,學左好耐都學唔識. 架衣車幾廿萬個窿,學左幾星期都學唔識. 穿得掂d窿,又整斷針,最後落得紅筆字收場.
呢隻紅字,比我阿娘鬧左廿年,直至結到婚為止....
有時響街度見到d布藝野好靚,但心想自己連衣車都唔識用,呢d野都係得個想字. 有時明知d野貴,都要比錢買,要比錢人賺.
早前好友小寶幫我整菜盤0既防虫網, 見到而家d衣車,得5個窿! XDDD 操作都唔難,睇睇下又心郁郁...
於是響星期六,同大夫去左太古城,響豐澤買左阿Q生平第一部衣車: BROTHER XL2120
小寶教左我好基本0既穿線方向同要留意0既野, 再睇下說明書,終於成功咁打左一個線芯 .
再睇下睇下, 終於成功穿到線 ! XDDDDDD 然後成功咁用到架衣車, 車到一行線~ 再睇下個鐘 :
用左一粒鐘時間~ XDDDDD 不過我好滿足架喇~ 我真係識用衣車呀嘛~
所謂一闊三大,有架衣車,就要有工具.我去左10蚊店執左D小工具,較剪,拆線刀,尺,粉筆呢D. 然後用隻過年食完0既曲奇禮盒裝住做針黹盒.




黎緊想做0既第一件手作仔,會係圍裙, 用左10蚊店現成圍裙來做樣辦, 再響十蚊店買左塊25蚊布來做.