九號波 - 鸚鵡

今次呢個九號風 , 實在恐怖 ~ 我諗如果當時我地仲響西貢度,老陳一定會上演生死時速-風眼餘生記~ 開車漏夜逃離西貢.
可能係打風前0既天色特別靚, 而且打風前一晚,屋企周遭安靜得嚇人.風聲狗吠虫叫通通都無.通常呢d就係打大風前0既" 訊號".


第二日一早, 我地就帶埋3貓,一大早未有風雨時,就出左去省城竇口.
出到去第一件事就梗係上天台收拾一下,根據上次八號波0既經驗 , 將所有會"飛"得郁0既野,搬左入屋仔先.因為早前2日已經將所有花+植物移入花架入面,所以都唔係太多野整.
大約十一時開始,d風就黎喇 ~ 係嘭嘭聲 , 唔係呼呼聲.... 然後眼尾立到左野飛過 .... 再望真d, 又睇唔到係乜;再睇真少少 .... 天台上面有一隻燈罩無左@@""""
街上面無乜人,風大雨少,好清楚咁睇到d風係由四方八面咁黎.
一直到下午2點,就掛左九號波喇 ~ 風聲依舊.
大約去到五點,出面靜左好多,我又好擔心西貢入面,所以就驅車入去睇一睇,因為睇個勢當晚都唔會再入番去.
開車去到安達臣道口,開始好大霧,然後有好多昆蟲響度飛,係好多 , 成個天都係 ! 睇真d原來係啡色的蜻蜓.愈入就愈大霧,返到入西貢屋企,一落車, 好翳焗,無風 ....就好似回南天咁.清一清渠口及拎左一d日用品之後,我就出番去,期間聽到原來風眼就在西貢登陸了.
出番去九龍城,想去街市買少少野....乜都唔開.去買d燒味喇,無開,咁去七仔買罐頭喇, 無得賣.
返到去竇口,老陳仍在訓,3貓亦在訓 (我真命苦...)
到晚上九點多,真正的黎料了~ 風大得嚇人,窗門都在動. (西貢還利害哩,另述)
整晚都在留意天文台的報導,最後都是失望了~星期六還得上班.