正確使用煮食鍋

星期六的烹飪交流會, 最主要是給一眾敗哂身家比孖人牌0既客人,睇下何為之正確使用鍋具及廚具.
如我黎講,最近至夠膽用直火用響孖人鍋上,以前一直都係用電磁爐,獨沽一味係煲湯 ,蒸野. 炒野 / 煎野,唔敢呀~~ 千幾銀0既野,用到噹噹聲兼花面貓,好肉赤 !
睇完示範之後,明白左幾個道理 :
1. 火候
鍋具品質,同火候絕對有好大關係. 鍋具品質好存熱好,用的火路就不用太大.通常是中火,什至是小火已足夠.所以鍋底什少會燒焦 / 出現彩虹紋

2. 下油時間
示範0既哥哥仔,用左個好好0既方法去話比我地知,鍋具點為之 "夠熱".
開爐,燒中火30-40秒. 滴數滴水到鍋表面, 如:
A. "咋" 一聲燒乾水/起泡, 即係話未夠熱
B. 水滴落到鍋具表面,成走珠形態在鍋面滑行,即代表夠熱,可以下油.

3. 食物溫度
食物溫度亦有影響,在冰箱取出來的食材,要放上一段時間才可下鍋,以免因突然鍋子減低溫度而造成黐鑊.
在油下鍋後,見出現紋理及白煙, 就可以轉小火,下食材.

明白左呢3點,就可以大大減低煎爛野0既機會.

至於冷油冷鑊炒菜 ,程序如下:
1.不用開爐,下油
2.下菜, 帶有少許水份更佳
3.下蒜茸 (用李錦記)
4.開爐 , 蓋上鑊蓋,中小火煮.
5. 見蓋邊出現白煙+水蒸氣,嗅到蒜香味即可以打開鑊蓋,兜數下就可以上碟.

哥哥仔話,呢種試熱及落油方法 ,適用於所有不銹鋼及生鐵鍋具.