自我放逐 之 終結篇

就咁過左三星期,訓夠陪夠想夠,就要返工喇 ~
心態已經唔同左,壓力無左一大截,工作能力回復八成,又可能有"通菜"幫我, 我擔子輕左好多. 最緊要係,而家唔再唔開心,對於d閒言閒語都無咁上心,反而有d可憐佢地,返工已經辛苦,仲要千方百計去要人難受, 好話唔好聽, 佢地都要好挖空心思至可以令我有反應,對於呢d人,我只有同情.
我想黎緊0既日子,我都係順其自然,累就請一下假,唔好咁投入,做個會令老闆珍惜的員工,好過盲目地做一隻牛搏老闆青睞.
聽著梅艷芳的 "般若波羅密多心經" 人好靜,好鬆弛.
生活本應如此.

自我放逐 @ 21*4*2008 - MON

響 LAURA ASHLEY 買0既鐘終於用得上喇 ~~
今日約左師傅上太子道執一執漏,同鑽孔裝野,然後夾左師傅入去西貢睇埋2間屋0既問題.
如果唔係呢場大雨, 真係唔知D屋咁大鑊.
下午約左肥佬飲茶,然後上番公司. 班人見到我面色都變埋. 嘿 !!
通菜最開心,同肥佬傾左一陣之後,出黎同通菜傾左一陣就走,第二日見喇 ~~

自我放逐 @ 20*4*2008 - SUN

尋日0既壞天氣,所以我地無去提早彌撒,今日一早就去左將軍澳0既聖安德肋堂,好巧合地碰上婚紗店的杜小姐 !!! 跟她寒暄一輪,約定了去婚展為年底的結婚周年感恩祭找婚紗~~~
今天都是輕輕鬆鬆地過 , 晚上老爺及小叔來吃飯,我又把一大堆好東西都送給阿思.
假期都快完了, 要好好收拾心情.

自我放逐 @ 19*4*2008 - SAT

今日犀利喇 ......
我地一晚跑三場 :
太子道窗滲水
#57 去唔切水
#59 牆及窗滲水

由6:30 到 10:00 呢段時間, 我地未停過手, 大夫唔聲唔聲仲一個人攪掂#59 房仔入面D野,真係要比十個叻佢 !!!!
我地都叫做OK喇,因為風向問題, 村屋漏水問題反而無乜 , 我又好襯呢個機會洗地~~ 太子道, 就因為係裝修後第一次下大雨,所以正好襯機會去睇下有乜野問題出現.
隔離屋就大件事喇 ~~~ 由九點幾到十二點幾, 都聽到佢地響度搬傢俱0既聲.我地點幾鐘上床訓喇, 佢地仲響度搬緊野. 原來佢地隔離個設計好有問題 :
1. 門口無擋水
2. 天台無斜水
3. 樓梯 + 屋後斜坡有大量水沖落黎
4. 屋地範圍無明渠去水,倒湧哂入屋
最緊要係 , 住客無住呢D地方經驗,雨褸仔都無件.

煮乜Q - 肉碎煮青瓜

青瓜2條 (去皮斜切片)
攪碎豬肉 ( 買左廿蚊,加入醃料醃好備用)
蒜茸
唐芹碎 / 芫茜碎
雞湯 /上湯 半碗
醃料 : 醬油生粉黑胡椒碎

做法 :
1. 燒紅鑊加油爆香豬肉碎至八成熟撈起
2. 燒紅鑊爆香蒜茸, 加入青瓜炒一會.
3. 加入上湯煮,蓋上鑊蓋中火煮3-4分鐘
4. 加入豬肉碎及唐芹碎及芫茜碎兜勻即成

煮乜Q - 鹹菜絲炒牛肉

牛肉 (叫牛肉佬代切,我買左20蚊肥牛,醃好備用)
潮州鹹菜半個 ( 切絲後浸清水稀釋鹽份 )
薑絲
唐芹1棵
醃料 : 醬油,生粉,胡椒
調味料 :
糖
雞粉
做法 :
1. 燒紅鑊爆香牛肉至八成熟 ,撈起備用
2. 爆香唐芹撈起備用
3. 爆香薑絲,加入鹹菜絲兜勻,加入少許糖
4. 加入牛肉繼續炒至有香味,洒少許雞粉
5. 加入唐芹兜勻後即成

自我放逐 @ 18*4*2008 - FRI

今日送左大夫返工之後,折返西貢執屋.
足足丟左2大車垃圾.又搵到好多以前買左未開未用0既日用品,清潔一番之後就拎出去太子道用.
執左三粒鐘,十一點出左去同阿娘及佢D雀友飲茶,拎左D野上去阿娘屋企之後就番太子道,幫老爺D花轉新花盤.又搵定D狗臂架等等出黎,等師傅上開黎時順便鑽孔安裝.
今晚約左阿娘上黎食飯 ~ 於是又走去買菜.今晚又係三菜一湯. 又造左一個果子包比阿娘拎番去~~
今晚食左 :
鹹菜絲炒牛肉
肉碎煮青瓜
洋蔥豬扒
紫菜肉碎湯 ( 2個人就係咁,乜都要食2餐)

煮乜Q - 紫菜肉碎湯

攪碎豬肉 (買左廿蚊,用生粉醬油及黑椒略醃)
紫菜一塊 (放白鑊 / 爐火略烘令雜物/沙粒等等跌出,撕成小片待用)
魚蛋10粒
魚片數片
芹菜一棵去葉切碎
冬菜
調味 :
鹽,醬油,胡椒粉

做法 :
1. 放水4-5碗煮滾
2. 用匙將碎豬肉弄成小球狀放入大滾水內煮
3. 豬肉湯滾後放入魚蛋及魚片轉小火煮15分鐘
4. 加入冬菜及調味
5. 關火後放入紫菜及芹菜碎,拌勻就可食用
備註 :
1. 紫菜最後才加入
2. 此湯底部比較多沙,請小心

煮乜Q - 鹹菜酸梅煮魚尾

魚尾一條 ,洗淨抹乾水待用
潮州鹹菜半斤
酸梅2-3粒
薑絲少量
紹酒
滾水

做法 :
1.燒紅鑊至冒煙,落油
2.油滾後放魚尾落鑊,轉中火
3.煎3-4分鐘後後轉另一邊再煎 2-3分鐘至金黃色
4.轉大火後馬上贊酒
5.將魚轉到小鍋內,加入滾水2-3碗
6.加入薑絲,鹹菜及酸梅
7.慢火煮5-10分鐘後關火,留鍋內焗5-10分鐘後可食用
備註 :
1.我用的是生鐵鑊,所以煎魚一定要燒紅鑊才可加油,油滾才可落魚.此法不適用於有易潔塗層的鍋子
2.此道菜不用加任何調味,因潮州鹹菜已有鹽份,酸梅會令魚湯及魚肉更鮮甜.

煮乜Q - 洋蔥豬扒

鮮豬扒數塊,用刀背輕力拍數下後用醃料醃半小時
洋蔥2個切半再切片
豬扒醃料 :
生粉
醬油
胡椒粉
薑汁及薑茸
調味料 :
味醂
紹酒
芫茜碎
做法 :
1. 豬扒先煎至2邊金黃
2. 洗鑊後落油,鑊紅時放入洋蔥炒香,加入味醂轉中火慢煮
3. 洋蔥煮軟後加入豬扒,轉大火,贊酒
4. 加鑊蓋轉慢火稍煮2-3分鐘後,洒入芫茜碎後即可上碟

自我放逐 @ 17*4*2008 - THUR

今日約左滿小姐到鴨利州海怡工貿閒逛.
好高興地行行行,由27樓行到落地下,行哂好想行0既地方店舖 ~ 主要睇下D戶外傢俱,園藝用品等等.好多店都轉左, 但我0既心水店仍兀立不倒 :
TEQUILA KOLA
SHAMBALA
RIMBA RHYME
INDIGO
INSIDE
ALOHA OUTDOOR FURNITURE
GARDEN GALLERY
SUNITURE SUNBRELLA
行完之後過番海,返屋企煮飯~~當然邀請滿小姐到寒舍作客喇~~煮左三菜一湯,亦落手造左個提子麵包比滿拎返屋企食~

自我放逐 @ 16*4*2008 - WED

又係愜意的一天 ~~ 一早去同阿娘飲茶,飲完同佢去街市買完野上番屋企同佢整定D"食送",接到細 WIN 電話, 就出去同佢 LUNCH~~
細 WIN 上左黎左我度坐,我做左個麵包比佢拎返去,好開心~~~
多左個節目, 就係黃昏去接小羊機 ~~ 阿姨搭佢拎左好多手信比我!!!

但最中意,都係小羊送我0既 GODIVA DARK CHOCOLATE PEARL WITH MINT !!!!

自我放逐 @ 15*4*2008 - TUE

今日買左食送,整左紅酒牛腩同清補涼煲豬骨..........
最後成家出左街食.
=___="""

自我放逐 @ 14*4*2008 - MON

全日空 ~
訓~訓~訓

煮乜Q - 潮州沙鹹菜

材料 :
潮州鹹菜一斤($8),切粒浸冷開水稀釋鹹味
南薑粉 ( $3 /4兩,九龍城潮發有售,可分多次用)
麻油少許
糖少許
雞粉少許


做法 :
1.鹹菜浸完水後渣乾水,再用毛巾索乾水份 ( 水份多會令南薑味道大減 )


2.洒入麻油雞粉及糖後,拌入南薑粉
3.放入容器存雪櫃.勿放密封樽 / 擠壓以免水份大量釋出影響味道

煮乜Q - 鹹菜粒牛菘炒飯

材料 :
鹹菜切粒 / 絲後浸水稀釋鹽份,渣乾水備用 (我用鹹菜葉做,厚身多肉部份作了潮州沙鹹菜)
攪碎牛肉,用少許醬油生粉胡椒醃好
唐芹一棵切粒,近根部份用刀背略拍後分開切粒
芫茜適量 切粒 ( 我極喜故用大量)
蔥一棵切粒,蔥白部份分開切粒
薑米適量
雞蛋一隻打勻
冷飯3碗
做法 :
1.燒紅鑊加油,放入薑米,唐芹頭及蔥白爆香
2.加入碎牛肉炒至半熟及用鑊鏟壓成碎粒
3.加入冷飯後將所有材料拌勻,利用鑊鏟將冷飯壓成一粒粒
4.徐徐加入雞蛋快炒,盡量將雞蛋都沾勻在飯粒上
5.放入鹹菜粒,芫茜及蔥粒炒至均勻,加入少許鹽調味即成

因我家用日本米拌糙米,黏度較高並非是炒飯的上佳材料,所以成品都沒有照片喇 ~

自我放逐 @ 13*4*2008 - SUN

今日好得閒~~阿娘突然甩底所以同大夫滋滋陰咁出門~成日都響太子道屋企無出街 ~
我又響廚房度執野,不停咁轉新LAYOUT,務求盡情利用空間.轉一轉之後,出面0既櫃又多左位出黎.而廚房0既櫃都仲未用得哂 ( 因為好怕吊櫃裝重物,所以好多吊櫃都未放野入去)
晏晝食左炒飯,我第一次做炒飯 ~ 因為用日本米比較黏緣故,所以效果唔係太好,但味道就好好~^^
然後又做左潮州沙鹹菜,大夫極喜~
食完飯飯氣攻心,睇睇下TERMINATOR 2 就訓著左,醒左之後就同大夫出去茶記食飯~

有關炒飯及潮州沙鹹菜另文介紹.

Q 推介 - 家是什麼一回事

家是怎麼一回事？ (粵) 2CD
分 類 : CD
作 者 : 關俊棠神父
出 版 社 : 塔冷通心靈書舍、信仰生活互動坊
價 錢 : $50.00

http://www.catholiccentre.org.hk/cbook.asp?lKey=2637&bSearchResult=true

今日上堂時聽到呢一隻CD,用極其生活化,通俗化的閒談形式,一針見血地指出現今夫婦間相處的問題 ,從婚姻生活再引伸到父母子女, 同事 , 朋友間的相處, "修道" 並非為教友專利, 面對不公平對待 / 恩將仇報 / 壓力 , 人應該如何自處 / 他處 ? 人與人之間 ,並非一面倒是黑 / 白.在灰色地帶中應如何面對他人他事. 站在對方立場想/考慮,是很重要的一環. 家庭成員,朋友之間,同事共處,呢一樣野都唔可以忽略.

我聽左之後,真係叮左幾聲.因為神父所表達的,都是極現實極到肉的解決方法.在我來講,真係即時開竅,最緊要係,內容中宗教意識並不濃厚. 我甚至覺得 : 神父你好鬼馬呀0下~~~ 內容真係抵死咄核~~
徐錦堯神父 "立體人生觀" 之外 , 阿Q 另一誠意推介.

Q 的非滋剋星

一星期打左2次邊爐加上自我放逐,換來一粒大非滋~
我由起非滋到復元,大約要5-7日, 最痛就會係第四- 五日,即係今日.
因為非滋生響口唇邊,所以成日都好似合唔埋口咁,食野飲野都好痛. 今晚響屋企執執下野,發現有盒余仁生0既龜苓膏 !!!
救~星~到~ !!!!!!!!!!!!!!
呢隻野係表姨介紹,食左之後非滋會極速好番,至少都唔會痛!!最緊要對我呢D體質0既人好有效, 所以我成日都會買一兩盒睇下門口~~今晚一見到,仲唔即刻拎黎食???!!
我響十二點左右開黎食. 而家係兩點,非滋已經唔痛!!!
我好怕西瓜霜 (都無西瓜味 !!) 搽鹽我又頂唔順 (會死架我 ~~) 我多數都係濕熱引起0既虛火,所以多數係舌尖 / 唇邊,食野都會痛到飛起.加上我體質不能寒又不能燥,呢隻龜苓膏亦比較溫和,所以我會幾推介比各位好友~~
余仁生精制龜苓膏 @$28.00 ,各大余仁生分店有售.
我買呢一隻係無加其他材料,尚有其他如 : 人參 / 靈芝 等等,價錢當然會有別喇
如果有朋友都有飛滋問題,都可以一試~

自我放逐 @ 12*4*2008 - SAT

今日訓到自然醒 ~
熨哂D衫,執左屋,FILING (銀行月結單呀,水電費單呀,糧單呀...)然後就出去. 去左翠華食好好味0既奶油豬+凍鴛鴦,然後去新竇口度執野.
今日真係要感恩喇,大夫轉性執櫃桶呀~~3個執左2個. 仲比我攪佢個書架D野.
五點幾就出門去大堂望彌撤,然後去東方度食粥同炒米粉.八點就返上大堂上堂.今日我地聽左另一位關俊棠神父0既錄音.內容係 "家", 呢隻CD好有意思,要去公教社度買 ~
落左堂返屋企途中知道 DORIS 有 SMS 比我. BB改左名,情況都叫可以,至少可以出院,衷心祝福西門一家三口平安,一切都順心順意 ~ DORIS 亦唔需要再同 BB 分開. ^^

是日迷思 - $30煮一餐飯

睇到廣告,我又想試下 ..... 如 :
DAY 1
$10魚尾 煮 酸梅
$10豬肉碎 + $5娃娃菜滾湯 + $5魚蛋
共用 : $30

DAY 2
$10 豬扒煮 $3(1隻)薯仔
$3蕃茄(2隻)+ $10肉碎煮湯
$4 半斤菜心
共用 : $30

DAY 3
$4蕃茄 + $10牛肉
$5佛手瓜煮$5肉絲
$5.5粟米湯+ $1蛋
共用 : $30.50

DAY 4
$3節瓜 滾 $10魚尾連湯
$6 炒通菜
共用 : $19

DAY 5
$8肉碎 煮 $8靈芝菇
$5 蒜茸炒大白菜
$5粟米仔鬚煲$15豬骨
共用 : $41

DAY 6
$8 燒豬骨 + $5花生 煲豬骨粥
$10 油炸鬼
共用 : $23

DAY 7
比我去阿娘度黐下餐喇 陰功 ~~

6日下來,共用左 $173.50 , 平均一日用 $29 左右 .
實際真係得唔得呢 ? 又無生果又無甜品.....
米又貴左咁多 .....

PS. 第二日訓醒覺,有新點子:
炒飯,雞翼......

自我放逐 @ 11*4*2008 - FRI

今日去左拜山, 果真係貴人出門招風雨, 落雨斯濕......
今日出門前又造左麵包,今次係柚子+小紅莓+提子 ~拜完山飲完茶送完大小陳去應去0既地方我同大夫就返歸~ 返到去麵包就造好左~~ 好香呀~~~
之後去左樂富買"食送", 買左條魚,斤半菜,15蚊豬肉,10蚊蕉(我的早餐) 一堆芫茜蔥同蒜頭,就係咁,一條紅衫魚就無哂 .....-__-"""
今晚老爺小電來食飯.....好失敗地....我唔記得煲飯@_@""

自我放逐 @ 10*4*2008 - THUR

今日同阿娘過左成日.
響太子道訓到10點半, 阿娘就打黎搵我. 落左粉焗麵包比阿姨之後,就出去富臨同阿娘飲茶. 2個人飲左70蚊. 然後返左太子道睇下個包.
又醃埋罐酸梅 .



之後再阿娘出去 旺角, 行花墟 , 我又買左幾盤仔 IVY 苗,買左第二日去拜山0既花,一大扎紅玫瑰就返歸喇 ~~
夜晚去左同阿娘食飯 ~人少少又無要求,阿娘中意煮乜就煮乜,大家都無壓力~~XDDDDDDDDDDDDDDD

自我放逐 @ 9*4*2008 - WED

今日出左太子道之後,食左隻蕉又去訓過~ 訓醒就食隻橙,呢幾日都係咁,又唔覺肚餓喎~~ 我已經連續十日無飲奶茶多奶喇 ~~ 自上星期腸胃炎之後, 每日我都食好少野,呢幾日一早就食隻蕉,又食橙,所以都會定時定候去開大 ~ 感覺好健康 ~~~
今日出左去3次,第一次去買野整麵包,第二次係去買牛肉 + 接阿姨黎我度坐, 第三次係去買野打邊爐+接大夫.
今日又第一次做麵包 ,好成功 ~~ 好開心, 仲同阿姨一齊食 ~~~ 之後再造多左一個比老爺 ~阿娘好有興趣用呢部機 ~~



行過街市見到D青梅真係好靚, 忍唔到又買多2斤番去醃酸梅.
是晚阿娘同慳妹黎打邊邊 ~ 有蟹+牛肉+魚腐+菜+烏冬+冬菇+螺片.好開心~~~^^

自我放逐 @ 8*4*2008 - TUE

今日過左半日阿太生活, 去左朗廷酒店飲茶, 行左 DUTYFREE (成幾年無去過!!!); 然後因為阿姨想去拜佢奶奶 , 所以我同媽子就同佢去左寶福山; 拜完山之後就去左 IKEA 飲野,行左一陣就走喇 ~~
返左屋企 , 訓左一粒鐘, 就去左阿娘度 . 阿娘買左青梅比我浸梅酒, 我用左唔同0既酒去浸左幾樽試效果,左一大輪野.好滿足 ~~

自我放逐 @ 7*4*2008 - MON

今日至有番D放假MOOD ,大夫又一齊放假
一早起身,去左食早餐, 然後入去東涌,行左一大堆 OUTLET,響 LAURA ASHLEY 買左一隻鐘~
出番九龍,就去左搵羊太~整梅酒,醃酸梅,食埋飯至走,去左吉豬島行街~~
好他條咁過左一日.

自我放逐 @ 6*4*2008 - SUN

今日同大夫舅公等等去拜山,一大班親戚嘩嘩叫咁又過左一個開心早上.
席間提及表姨原來係生膽石,搵到病因都係好事. 希望表姨早日康復,健健康康 ~~
下午返左過九龍,大夫要沖個涼,我就無所謂~然後同小針開車過海,為左我地婚配補禮又過多次海~
是次補禮,又找來了好友阿倫及萍果夫婦作見証人, 期間伍執事都有黎觀禮.響十幾分鐘簡單又感受至深0既儀式之後, 我地又再次結婚了~ 以後又可以多一日結婚周年紀念日 ~ 正 ~
晚上到左MK 小肥羊食火鍋,雖然我唔食羊,但仍有好多野可以食~~為多謝為我倆走出走入的各位,是晚我作東~呵呵
後記 :
今日0既補禮,我著得比較....隨便~當年結婚時,好友曾提及 :
結婚是一天半天的事情
婚姻,卻是一生一世的大事
當日結婚,我一肚子不開心不如意,心想:衣服花球甚至所有安排都不是我想要的,當中更連累一眾好友為我倆張羅關心+擔心,是我最過意不去的事.
今日"再婚" , 我可以"自把自為",愛穿什麼就穿什麼,短短數十分鐘,十個人不足的"婚禮",卻令我滿心歡喜~
更開心的是,當證婚人的阿倫及萍果,跟我及大夫極有淵源.萍果是我的代母,大夫是阿倫的代父.我倆都是2003年結婚,礙於傳統及習俗,當年我倆都沒有出席對方的婚禮.大夫跟阿倫,更是一早已認識.....
今天他們當上了我們的證婚人,年尾我們亦可以一起在教堂穿起婚紗參加結婚周年感恩祭.
世事就是如此奇妙,如此多fun ~

自我放逐 @ 5*4*2008 - SAT

今日係出街食野大日子~~約左滿版好友去食聲哥 ~
因為星期日早上無乜時間,所以我地去左主日提早彌撒.彌撒前,我同大夫都去左告解.
是日係VG主持彌撒, 我無眼訓~~
完左之後,我同大夫分道揚鑣. 是晚食得好開心~~今次,又燒左大大堆桂花糕 ~~

自我放逐 @ 4*4*2008 - FRI

今日做煮婦~~
買菜煮飯 ~ 帶埋老爺個工人出去, 四菜一湯水果甜品 .....

自我放逐 @ 3*4*2008 - THUR

一早去左總堂見嘉神父, 大夫比嘉神父訓左有十幾分鐘.我呢 ?不知者不罪 ~ 呵 ~
最後,嘉神父要大夫響補禮之前一定要去告解,我,就當係領洗之後去學習告解 ~
之後去左太古城,拎柚子送比朋友, 自己無福消受,所以送多少少比朋友~
因為大夫又做錯野 , 無訂票, 所以拿主意睇左"舞出真我2", 又係一套大美國主義電影~但配樂極正~呢個要買 ~~
開始唔介口, 偷飲2啖可樂, 飲咖啡 ,食POPCORN

自我放逐 @ 2*4*2008 - WED

輪到大夫病, 又十十下咁過左一日 .
抗生素療程第二天
唔可以食其他野, 又要介口
灰 ~

自我放逐之始 @ 1*4*2008 - TUE

DATE : 1-APRIL-2008
TIME : 5am - 5pm
LOCATION : ER AT T.K.O. HOSPITAL
COST : HKD100.00
吊左四包鹽水
打左2支止痛針
訓左 10 小時
食左碗肉碎粥
比醫生奚落左一次
最緊要係 , 成世女第一次著睡衣+波鞋響醫院呢D公眾地方度招搖過市 .