上蛋糕課有感

尋日去上蛋糕班時, 大家都喜孜孜地為自己的卷蛋作最後修飾: 糖粉呀,綠茶粉呀洒個不亦樂乎.
我無乜藝術細胞, 心想有人肯比面食入口都偷笑, 唔好話將條卷蛋攪到成件高級藝術品咁喇......
因為手腳慢 , 久久都未等到有多出的 shaker , 響我在呆等時, 突然聽到導師長嘆:
唉 ~~~~~ 你做乜拎D綠茶粉咁攪呀?
我跟阿導師眼神0既方向望過去, 有一位哥哥仔,佢用個裝住綠茶粉0既SHAKER,用刀身作間隔, 將綠色的綠茶粉, 拚左老命咁洒響綠色0既綠茶卷蛋上面..... 黑色的雲石檯面, 滿佈綠色的粉末 .....
睇真D , 佢卷蛋上有一層小山一樣高的綠茶粉.
導師先行真情流露: 綠茶粉好貴架.... ( 此話不假,尤其呢位哥哥仔用左0既份量, 足夠再造多4-5條卷蛋...)
然後, 導師行埋去佢個位度, 睇一睇佢條卷蛋,同佢講: 你呢條卷蛋,會好澀口. 你下得太多茶粉.

一直以來,我好少會將D食物攪好多裝飾. 一來覺得自己工夫唔好,再來畫蛇添足,更加四不像.
自從響一間餅店,見到極少裝飾的餅食, 我都會好奇 :你乜都唔做,點解要買你 ?
忍唔住買左一件來食 ..... 真係好好食 ! 一件好平凡0既餅食,令人有平地一響雷的感覺, 我覺得呢一D就係成功.
而家見到太多裝飾/修飾的餅, 反而令我納悶..... 放入口,接觸到都係糖份,杏仁皮,gum paste0既甜,全部都係甜味, 食物本身0既味道, 都被全部淹沒了....
我想, 人都係一樣,刻意做好多野去美化自己,有可能有反效果. 真情流露, 反而令人容易接受,樂於親近.
Less is Best ~ Simple is the Best ~

Q 花園 - 轉營

Q花園將會轉營Q菜園.
種花,都係得個睇字. 種菜就唔同, 又有得食,做得辛苦D都值得.
其實一直都有種瓜菜,但數量唔多,好多時種左出來, 淥個麵就OK,想食到一斤菜,都無得幾多次.
響園藝館溜了一段時間,好多農友教我好多知識,種出來成績愈來愈好. 至少,我唔需要響花墟買現成野返來,都可以自己用種子種得似模似樣.
早上個月起,我丟左好多花(種到半生不死 ) ,將D花架送比朋友 (花架只可放小盤栽,我種菜就變成無用之物)
成個天台即時吉左好多~
尋晚就用角鐵砌左一隻菜架.

類似菜架我已經有一隻,一直用緊好好用. 最緊要係,呢種檯面式種植, 對腰骨0既負擔同損害係最低0既.

而家砌多一隻,就會種多好多菜, 咁以後就可以長食長有喇 ~
下星期希望可以有時間,去到元朗買多3隻菜盤.

煮乜Q - 卷蛋

其實好多朋友知我去學卷蛋,都會同一個反應:
有無攪錯 ? 好易咋喎 ?
阿Q 響呢度答下你地: 無攪錯, 我唔識, 所以要去學.
好久之前,響學校家政課曾學過, 但當年我呢D正一化屍斷骨掌來,掂親D乜都一定會死梗, 所以一直以來同組同學為免我累街坊, 都唔會比我插手... 所以, 我係無親手整過卷蛋的~
我亦好深信,整蛋糕呢家野,無話難與易,只有識同唔識. 當然 ,手勢呢樣都係一個問題.
一理通,百理明,上次學左一次MACAROON ,發現原來去上堂,係會學到好多野 ~ 當然喇,人人都響書/網度睇RECIPE 就識,D烹飪學校執梗笠.....
言歸正傳, 今日去學0既, 係栗子卷蛋,同紅豆綠茶卷蛋.

是次係學一個分蛋法~以前都試過, 用分蛋法去做一個香蕉蛋糕,味道是對了(大佬成堆香蕉埋入去...點會唔0岩味...) 但蛋糕TEXTURE 就奇怪到不得了.....
今次去學,學到手勢係好重要,中間FOLD起, 同側邊FOLD 起,係2回事來.
本來我去上堂,係想知道打發雞蛋, 個TEXTURE係點至0岩,而家發現,打掂左個蛋,手勢唔0岩,一樣千年道行XXX .....
我以為自己會中意栗子卷, 點知原來綠茶更加合我胃口~~ :)


做好0既卷蛋, 1/3比左老爺,1/3比左我阿娘, 1/3留番自己食.
呢份係阿娘的 ~~

26.8.2010 0800

您們提醒了一眾活在幸福中的香港人,要愛得及時, 永遠都忘不了這黑色的一天.
一路上好走.

對特區政府改觀

終於都回到家了....
盡忠職守的領隊, 跟團友一起回到家了....
風笛手吹起哀樂, 我再也忍不了淚 ...
數天以來,一直留意事態發展,令我窩心的是,香港人比菲律賓人好運, 至少有一個盡責的政府, 有一個像樣的國家支持, 當市民發生事時,官員/外交部等傾巢而出 , 外訪官員馬上取消行程回港. 在人質獲救後,馬上就見到香港來的官員,醫生,令本來一無所有的港人緊緊地抓住了浮泡,把心都先定下來.
一直以來,特區政府的處事方式都一直為人垢病,不少次港人在外地出現問題, 特區政府的慢三拍+僵化處事方式, 經常令人質疑, 到底自己老家的政府是什麼一回事? 完全沒有安全感可言....
但是次的人質事件,令我對特區政府改觀,對於他們,我覺是真是沒話說,他們終於做到市民希望他們做到的事.

迷思

人質事件熱哄哄, 大家都為死傷者祈禱及祝福外,呢個出左事0既地方政要,佢地由始至終, 比左D乜野態度出來?
我感覺係當地政府當作一件普通挾持事件.
無政府官員回應槍手訴求
無政府高層出來交待事件進展/將會如何營救
無計劃
無步署
整件事就一如在公園散步,漫無目的一般.....
中意就敲打車身, 中意就拉下度門......
未知車內情況, 就拿槍狂掃. 我相信中槍送命的港人, 不少是警察發的彈.

好啦, 總統先生出來了~大家期望佢可以比番一個"老掉牙"的交待時, 響佢口中流出來的, 原來又是一堆歪理 ......
總統先生堅持本國處理無錯,我絕對理解 :
唔檢討,唔反省,堅持己見, 係造成一個國家不能成長不能進步的主要原因.

我雖理解, 但唔代表我接受.
香港人生命並非特別矜貴,而係世上每一條生命都應該需要尊重及珍惜. 當有10多條人命操控在手時, 是否要多一點智慧, 多一點理性?

一段話

COPY from FB :

一個人的妄念惡行，製造十個家庭的悲哀，再引發千百萬人的怨恨。恐怖可由一念成，慈悲能化億兆惡。戒一餐肉，令六道輪迴速度慢一點，我們可以幫助的就是這麼多。 - 粱柏堅

沉痛哀悼 2010 盂蘭

從開始發生挾持人質事件, 我都不太在意..... 感覺槍手並非大奸大惡之人,至少肯放走老弱婦孺.
傍晚時份跟大夫在將軍澳食飯,睇到FB 好友們的STATUS ,心情一直向下沉..... 形勢好像僵著了.
走到商場中的大電視, 圍觀的人們面如死灰.... 螢光幕上打著:
新華社-全部人質死亡
唉 .... 我睇到全身發抖.... 咩事呢? 做乜野會死哂架? 明明好容易有轉機0既事,做乜一定要流哂血?
由將軍澳到回家的路上,新聞都會有不同的"未經証實消息"發出.... 一時說死哂, 一時說未死 ... 對於人質在香港的親屬, 真係一個心理虐待來.
返到屋企, 一路睇住新聞台, 畫面上0既人, 美其名係特警,果真睇到我眼都突:
用大鐵槌係咁打個車身.... =__=""
( 大佬,好人好姐都比你嘈到癲喇,唔好話攪左成十幾個鐘0既槍手....卜卜下成支斧頭跌埋入車....)
用繩綁住度門響度拉扯.....@_@""
( .......拉乜春呀? 走得咁埋就爆埋度門佢喇.....)
響車窗度爬出爬入.... V___V""
( 由此睇到佢地絕對係貪生怕死之輩)
佢地響度做乜呀?? 完全唔係做緊專業0既野....比起人地打野戰遊戲更兒嬉 : 無計劃, 無準備, 完全睇唔到佢地有危機處理0既常識.
但講乜都無用... 幾十條人命,就咁放響一班對人命不屑一顧0既菲律賓人手上, 我睇到車入面有人開左槍,彈孔在車身,玻璃窗一粒粒咁顯示出來時.... 再都看不下去.....

雖然話, 呢單係個別事件, 但好老實,去一個連你人身安全都保障唔到0既國家,去黎做乜?
唔使抵制/ 出黑色警示, 我相信都無人會肯去.

煮乜Q - 實戰馬卡龍

上星期學完之後, 返到屋企試做兩次, 都失敗左:
第一次- 餅入面唔熟
第二次- 餅熟左但起唔到條裙.
其實以上2次, 係自己大頭蝦 (人地落糖霜我記錯左落了糖粉) 同埋無耐性 (無等佢結皮)

想清想楚後,再做第三次.
終於起到條迷你裙~~~~呢條裙要起出來,係要靠蛋白入面0既空氣張力,將底部及已結皮0既頂部 ,"夾硬" 谷開佢,至可以起到呢條裙仔出來.



只係起到迷你裙, 我估係佢表面結左皮,但近底+邊緣位仲有未夠時間所致.
黎緊會再試~~ 吹夠45分鐘再入爐 !
是次我落左wilton 的色膏, 顏色幾討好下~~
用左二記0既榛子醬 (大家千祈唔好咁整,會食死人的, 甜到爆 ! )
咁甜0既野,睇下就好 ~ 真係要整,都要自己造中間個PASTE , 因為至少可以控制個甜度.
用果味/ 酸酸地0既PASTE , 係最可以中和個甜味~ ( 只係中和味覺咋,查實一樣係咁甜....)

炒什碎

年初參與好友哥喇領洗活動 , 響基督君王小堂門口睇到呢一段野:
Dear children, let us not love with words or tongue but with actions and in truth.

大約意思係,愛人唔好只係用文字/口講, 要有行動及出於真誠.
我唔中意/ 唔識說教, 尤其是係宗教 (當大家理解都會好唔同0既時候,呢樣野就有交嗌喇.) 但如果將呢幾句說話套入去生活中, 其實都係老生常談0既野:
唔好得把口, 做野最實際~~~

我記得我去上慕道班時,導師好著重"宗教要融入生活",光用口講無用,要去實踐 ,要去執行.
記哂成本聖經唔係叻,可以按照佢入面既意思去生活去學習,咁至係正路.
共勉之~~~~

煮乜Q -馬卡龍 MACAROON

一直都覺得呢家野好睇唔好食, 就係咁衰架喇, 明知好甜自己唔太中意, 都死係要去學.... 因為真係想知,呢隻餅仔如果做得好食0既,會有幾好食 ?
響網上睇左唔少食譜, 無個得~ (可能我天資低~唔關人事~~ ) 想想下,咁又唔怪得人,個個響網上嘔心瀝血寫哂所有竅門出來,所有WORKSHOP都會關門大吉~~~
今日去上一上堂,終於知道竅門響邊度, 原來仲有好多細眉細眼野,唔學係唔識0既~ 之前響屋企跟網上食譜做, 錯到爆 :
以為打到企身係正路, 原來瀉瀉地至係皇道~
以為室溫打蛋白 , 原來係要雪凍仲要隔夜.
以為糖0既多少無影響蛋白 , 原來係成功關鍵之一
導師 ALFRED 好好人, 講解得好清楚~~~ 佢仲好好咁示範左心形MACAROON0既做法~~ 不過我仲係新手,都係做好左圓形先算 ~~~
阿SIR示箱左2隻心形馬卡龍~~


今次去學, 係做檸檬同埋RASBERRY 馬卡龍



坐我旁邊0既同學仔好好人,見我手震震,好好心咁教番0岩我手勢,大家一路傾一路做,我又識多個朋友仔喇~大家仲交換左FB~~
同學仔已經係第二次上堂,佢今次主攻心形馬卡龍~


第一次去呢度學野,感覺良好~~~ 黎緊下星期日會去學日式卷蛋~~

黎緊0既新玩具 : RICOH GXR+P10 KIT

以前用開PANASONIC FX唔知乜,用到火都黎埋~~
然後轉用RICOH CX-1 , 感覺由地獄上左天堂
而家轉用CX-3 , 樂此不疲係咁影.....
***** 以上各項鄭重鳴謝老陳 (即係我老公 ~~ ) *****
最後比老友毒害, 黎緊會轉用RICOH GXR + P10KIT
http://www.ricoh.com.hk/common/func/popup.asp?page=http://www.laikok.com.hk/eng

我影相,通常會影花/ 景 , 再下來係影貓,甚少影人.
喜好係影MARCO微距 , 於是朋友介紹試下GXR ~
RICOH機感覺係幾冷門,好多人問我: 你用乜野相機呀?
我: 我用緊RICOH呀~
人地: ......
我: UUrrr ...即係R-I-C-O-H 呢.... 麗確呀~~
人地: 哦 ~~~~~~ ( 但佢個樣話我知,佢都唔知係乜野來....佢可能以為我同佢講緊影印機....)
再睇埋個樣呀~~ 嘩~~~ 土到爆~~~ 同一眾靚仔又多色0既DC, 完全係2回事.
( 0岩我喇~~~~ 襯哂呀~~~~ )

其他有關GXR系列及鏡頭的網頁介紹 :
Ricoh GXR
http://www.ricoh.co.jp/dc/gxr/

GR Lens A12 50mm F2.5 Macro
http://www.ricoh.co.jp/dc/gxr/unit.html

Ricoh Lens S10 24-72mm F2.5-4.4 VC
http://www.ricoh.co.jp/dc/gxr/unit2.html

Ricoh Lens P10 28-300mm F3.5-5.6 VC
http://www.ricoh.co.jp/dc/gxr/unit3.html

重新寫番BLOG

響FB度好多朋友比"LIKE"呀~
唉 , 阿Q真係要檢討下喇.... 唔好響度寫廢話, 寫D開心事, 比一眾關心我0既朋友睇.
過去呢段時間,都有寫D野,不過係放左響第二度,呢度試一試,0個度放一放.... 始終無BLOG 0既感覺.
曾經響FB 入面drop notes, 好快又DELETE左, 太公開亦太多野唔識控制,本身好怕煩0既我,用左一分鐘就DELETE 哂所有NOTES ....
最後都係返來呢度.
希望日後你地睇得開心 ~~ 不喜勿插~~~

送黎睇我發蹹風0既各位一朵花~~

天台菜園動工中

話說我屋企個天台, 比我舞到天花龍鳳.....
做人同做事一樣,未有明確目標,於是立立什什都堆響一齊,響入面尋方向, 尋出路.
期間有花開富貴的風光日子,亦有打風一地都係0既悲壯情景 ~~ 有報社來電話想採訪 , 嚇到我差唔多要響某FORUM取消戶口 .... 因為實在見唔得人( 大佬我影親相,都係MARCO咋... 幾時見過我成棵野正正經經影比你睇呀.....又無葉又禿又瘦..睇到都唔開胃)
終於攪左2年,乜都試過 , 最後定左方向 : 只做菜園.
立下心腸,響天台殺戮連連,騰出空間迎接新貨抵港 (正統來講,無新貨,只有一大堆買左未用過0既野.)
早2日,響天台動工,為左腰骨著想,準備做檯面式種植, 減低腰背負擔.
用料只係角鐵~~預期會做2個,若再有位置,會造多一隻. 花盤係農友們介紹0既,好好用+可以種到好多菜.


呢個藍色0既桶, 係農友送我0既堆肥桶,當時我知道有位農友要送我,真係好受寵若驚,因為好老實,我同呢位農友實在只見過數面,我響論壇上又唔係咩人,又無貢獻, 得人地送我呢D禮物,真係嚇左一跳. 於是拎左一盤風雨蘭同一大撮鷹爪蕃薯苗作交換~~


呢一箱,就係我吽左成3個月0既厭氧堆肥 ( 一開出來真係臭到冤....不過一陣就無左味了) 將會係秋播的大補帖~~~


種得不錯0既韮菜~~~ 準備大量種植呢~~


沖繩苦瓜, 我D泥處理得唔好,佢生得好削.已經再下種子,準備再種多一棵


生長中的節瓜, 有農友可以種到手臂咁長~~


希望可以響月底前完工~~

愛上手工皂

早前有好友送我一塊手工皂,老實講,本來都係放埋左一邊.
後來用開0既沐浴露用完左, 見到有塊野放響度, 咪拎黎用埋佢囉~
一直用開沐浴露,貪佢方便+衛生 ; 皂呢, 成日會濕水,好似溶溶爛爛咁 .....
好友用小網袋裝好比我, 有繩綁好,方便掛起, 於是長期浸水+溶溶爛爛問題解決了~~~
( 剛開始用smart phone 相片拍得不好... 請勿插 =__=" )



此手工皂以滋潤為主, 0岩哂我呢個乾人.
一濕左水,嘩~~~多泡到呢.... 完全唔係我地一貫用0既皂.
用完之後,本來蛇皮小腿光滑番哂,皮膚亦沒有拉扯的感覺, 真係一流 !
用完第二日喇喇林找朋友問個究竟 , 原來:
多泡-因為用左椰子油成份
滋潤-因為有乳木果脂( shea butter )
而一件皂都係用大約20日左右.
自此之後, 我再跟朋友打過2次皂, 感覺良好~~~ 程序就像做蛋糕,但因涉及化學品( 氫氧化鈉,亦即哥士的)所以每一步之間要好留心,唔可以掉以輕心 / 掉亂程序.
某程度上我覺得可以訓練耐性及組織力~係一樣幾好0既嗜好~~

震撼人心的琴音

講緊係中國達人節目入面0既無臂青年劉偉.
建議:先唔好睇畫面,淨係聽聲/ 劉偉講野 (如果你識聽普通話的話)
我第一次就係聽到琴音, 無睇畫面,但已開始流眼淚.


人生本來就有好多不如意事, 我見到好多人, 一日到黑就響度怨, 響度嘈, 響度投訴, 響度說人家不是. 但之後點呢? 咪又係乜都無做過, 繼續自怨自艾.
點解唔去想想, 要點樣解決問題?
點解唔去想想, 遇上困難0既路要點樣走落去?
點解唔去想想, 除左響度發嘮叨之外, 仲有好多野可以做?
我好憎D人遇到問題, 只會講 : 你叫我可以點0者??
唔好將自己要解決0既問題, 推去他人身上. 可以點做,係你自己0既個人決定, 而唔係讓他人去主宰你一生.
如劉偉話齋: 我決定要做的事, 就要做好佢 .
劉偉講得好現實 , 字字到肉, 現實係有D殘酷 , 無左手, 人地餵你食飯, 餵得一時唔餵得一世.
咁點呢?
自己學囉~~~ 唔學? 咪等死囉~~~
等死? 人地覺得你阻訂喎 ~~ 咪乾脆喇喇林死掉喇~
又唔想死? 好喇, LET'S BACK TO THE BEGINING : 自己學, 無手, 咪用腳囉~
始終有一個方法架.
劉偉輕描淡寫咁講, 我就愈心跳加速......
佢開始彈琴,我就開始流眼淚......
我開始明白咩野叫做 "震撼人心" .
ps. 告誡一眾直升機父母同眾港童, 大家有手有腳, 擁有的肯定比劉偉多. 但你地0既心理質素, 好明顯比失去雙臂的人低.

Q之生活

經過半年0既調節生活, 而家我可以:
返工
放工後一日至少有兩小時打理天台有機菜園 , 有一小時可以打理家務, 煮飯
(以前返娘家食飯反而無咁多時間剩出來, 真係奇怪.....)
一個月去參加2-3個cooking / cake course , 有一至兩次參加農友的活動
呢個月底,應該會有新相機入手,到時仲會去學攝影.
為左唔好變得太"宅" ,想保持心境年輕同身體健康, 黎緊仲會安排一星期去會所做2-3次GYM
邊度黎咁多時間?
我曾響某FORUM講:
無謂地方唔好去 (尖沙咀銅鑼灣商場 / 百貨公司呢D , 好耐無去了. )
無謂事情唔好做 (人活著就係為建造自己0既生活, 做D有價值0既野喇~ )
無謂野唔好去八 (人地0既野唔好理唔好操心 )
我0既生活可能係好平淡 , 但我好嚮往.