上海之旅 20/10/2010 – 五觀堂素食

早在盤算上海行程時, 杯麵就話要同我去食呢一間素菜 ~ “上海式”的素菜, 我只食過香港的功德林…-__-“ 印象麻麻, 所有菜式都係一樣玻璃獻+雞粉味 / 油“益” 味, 攪到我只識狂食油麵撈醋,
呢一頓素菜, 令我對上海的飲食有了一個好的開始+印象.
響素食館的對街玻璃窗上, 寫住:
無仿葷食品 ( 即係無五柳仙斑呀, 海參鮑魚大蝦碌呀呢D齋口唔齋心嘅野 …)
無碳酸飲料 ( 呢度食飯一定無可樂囉…..)
無煎炒炸 ( 講明素菜, 煎炒炸完仲有乜野剩? 咩營養都無哂喇…. )
無味精 ( 配合番佢第二項, 無借口帶可樂入來飲? )


我此行目的為左去HEA , 所以乜都唔諗唔睇, 極不負責任咁丟哂比杯麵~( 嘩 ~ 真係幾生修到~~ ) 阿杯點左數樣, 佢記得我想試下食桃樹膠, 所以都特別點左2款有桃樹膠的菜式試一下.
桃樹膠即係桃樹樹身分泌出來的膠質, 有其特有的營養價值 , 本身係無味道, 要用其他食材 / 調味去配搭.
我地一人叫左一杯養生茶, 阿杯叫0既係唔知咩羅漢果+XXX , 我杯就係唔知咩好面色又紅棗南北杏咁… (XDDDD) 養生茶都可以不斷添飲, 不另收費 ( 好就好在佢沖極都仲好好味~~~ )

是次旅程我仲拎埋我隻新玩具上來: RICOH GXR+A12 專登用來影食物. 另一部DC仔CX3 就用來SNAP 同影風景.
此店的菜譜係手寫+線裝書, 一面點菜一面看著老闆手寫的詩句,好古雅~



我一直忙緊放/轉相機, 無暇睇D乜野菜端上來. 但突然聞到一陣好香好順(即係唔嗆鼻/喉) 0既醋味, (冷盤,仲可以有香味, 我真係甚少接觸到….. (唉, 有乜出奇….. 我唔係食家喇…只係個師奶~)
冷盤 - 山藥泡桃膠
山藥即係淮山, 淮山去皮切條用冷水浸過, 再放香醋裡泡, 就成了健康無油又開胃的冷盤~ 上面再洒上晶瑩剔透的桃樹膠, 好漂亮~




欖菜龍豆口袋餅
欖茶成日食,龍豆就見過無食過,後來回港問過農友們, 原來都有人種~發達了~
龍豆口感好清甜爽口, 鹹香的欖菜一齊放在口袋餅裡食,絕配 ~~



新鮮龍豆


什菌面疙瘩
鮮甜的什菌配上面疙瘩 ,面疙瘩就是將麵粉放水或湯煮. 加了什菌,煮出來都的麵糰都可以吸收了湯汁, 食起來更鮮味及飽肚.

豆腐鍋
呢個係另一個菜未到味先到的素菜, 濃濃的豆腐味攻入我個狗鼻度….
我拍了微距照片,細心看時才見原來豆腐塊中有2隻顏色 :
灰灰的豆腐, 混了白色的豆腐碎. 原來有兩種不同的豆腐混合來做, 怪不得豆味濃成咁 …… 豆腐好香好滑, 配了雪裡紅, 鮮蠶豆及鮮冬菇, 好味~




桃膠蜜
呢個無乜特別, 不過因為係用原糖來煮,好清香,食完喉嚨唔會有酸味.

呢一餐, 2條友食左170幾蚊人仔,我覺得值~ 因為食到0既係用心做出來的食物,食材亦新鮮. 所有菜式0既香味都係來自食材而唔係調味料, 我想響香港真係無可能食到喇.