給食膠會計的信

阿膠小姐,
我對左你年半,大家只係君子之交.
最近阿膠小姐你0既反常, 我就當係你結婚在即,荷爾蒙失調加埋腎上腺激增. 所以我唔再同你講野.
我即將唔再同你做同事, 有D野都要點醒下你,唔好話一場同事唔過番D料比你.
1. 你自以為好理直氣壯0既野, 通常都會係無理人生死. 所以令到對方都唔會比面你.最終你會自食其果.
2. 你老闆做0既野係唔0岩,但佢請你返黎唔係去抽稱佢.你抽稱佢只可以話你夠膽,但唔係叻.
3. 你老闆心態係捉到賊就係好狗. 不過唔代表比飯你食係應份.所以佢唔會有好說話比你聽.
4. 呢個老闆唔受擦鞋仔,我亦從來都唔會擦佢鞋,因為唔會有收獲或著數. 誠實同承擔至可以令老闆對你改觀.(你衰邊瓣,自己知自己事喇 ~ 你老闆都知你係一個唔敢/肯承擔0既人. )
5. 對乜野人都好,唔該你為對方諗一諗至好講. 講出黎0既話,係撥出去0既水.呢一樣野,同樣適用於你同你奶奶身上. 事情有黑白之餘, 仲會有其他因素.唔係話道理響你0個度, 就可以乜都講得.
6. 我D野易唔易做,你自己都好清楚.我走左呢D野你都走唔甩.你千祈唔好出錯,錯一次,好多說話係會聽足十年.
7. 唔好學人炒股票喇,死左都未知咩事呀你.改左呢D心態, 好過你做神婆喇 ~

我同你之間0既野,我同肥佬講得清清楚楚,你地平時響度做乜, 我都講埋. 所以,如果你仲係想響呢度開開心心咁返工 ,唔該你自己檢討一下. 拎左人地人工,就比番足功課人地.