阿Q第一次睇中醫

尋日同大夫去左睇中醫 ~
朋友一聽到睇中醫, 就好關心咁問我係唔係有事; 各位有心喇,我無事,只係想調理下咁解. 人老左,又易累又唔夠精神, 加上返工又忙甚少煮飯 / 食住家飯, 所以響無事無幹情況之下,去睇下中醫,調理下身體而已.
呢個中醫係舅父0既朋友,響坪州有一所中醫館,佢出開黎香港區我地就可以約佢睇下. 尋日佢同太太出黎飲喜宴, 所以阿娘早響一月初就同我地約左日子.
昨日我十二點就出左旺角 , 同大夫行左一陣,去左大角咀食個晏,就搭左東涌線出左中環, 行去萬邦行. 中醫響大家樂度約左病人覆診, 係呀, 大家樂呀~ 當然,唔係齋坐的, 一眾人等都有買野食. 但因為把脈前,不適合進食以免混淆視聽, 所以我同大夫2個,因為買左野食, 一眾早過我地黎0既太太們都讓比我地睇先,真係好客氣,我打左尖 , 認真唔好意思.
中醫為我把脈,先把右手,先輕而後重,謂我腰骨有事(舊患),有肝火;再下來是左手,就話我腸胃濕,另外要介辣野 (呢輪飲好多酸辣湯),其他問題就無乜.
大夫呢? 心虛囉 ~~ 即係心比較弱,另腰虛 (缺少運動所致) 平時食得太鹹,要介芽菜,白蘿蔔,西瓜. 問題比想像中少 (外母湯水應記一功呀 ~~) 取得兩張藥方之後,包左兩封利是比醫師我地就走喇 ~
因為尋晚約左朋友打邊爐, 所以就將煲中藥0既事延到今晚至做.我同大夫藥方不同,飲法不同,服用時間次數亦不同.因為中醫其實係好個人化0既野,唔係人人一樣.選擇正正常常咁去睇,亦係想知道真真正正身體狀況.如果有病至去睇中醫,以現今病理同細菌利害程度,中醫學實際是招架不來 ,復元時間比較長而亦會出現太多變數.
黎緊日子,希望可以認認真真咁調理好身體喇,"身體髮枯,受之父母" ,亦唔好浪費左我老豆阿娘一直以黎為我打好0既健康底子.