Q花園 - 後遺症

頸酸酸 - 長期頭岳岳
右手虎口極累 - 長期肉緊地鑽螺絲
右手腕瘀左 - 唔知點解

阿Q忠告 :
1. 日光日白至好做木工野
2. 電批係必備之物
3. 做DIY 之前要計數,多件野組合更加要整 DEMO
4. 唔好貪大件貪平 ,要合用至得. (唔係街市買豬肉,大舊D抵D)

Q花園 - 工程完結篇

好好好開心 ~~~ 係阿Q 自己一手一腳整出黎 ~~~ ^^

松木柵極好/抵用 !!!! @$50 , 不過用左好多碼仔 ~~~
2邊上死松木柵 , 格仔片放上面 , 再用 4" 螺絲上死佢 ~~


是次 DIY 用左大量碼仔,大部份係響五金店買0既銀色不銹鋼碼仔.


另外我極力推介繽紛有售0既日本焗漆碼仔,大隻而且美觀,成個架最弱就係中間呢塊格仔片,因為得一塊又單薄,未上呢4隻碼時,成度架搖搖下.... 上左之後, 成個架郁都唔郁 ! 勁呀 ~~~~~ 唯一不足0既係,佢附埋0既螺絲好短,我改用左2寸0既不銹鋼螺絲.



呢個結構係我左攝右攝咁攝出黎!!!! 有乜剩就用乜喇,唔想再買,又想今晚完工,摷摷下摷到餘下未用0既木腳出黎 !!!!! 放左上去架頂,再移好平放0既2片木格仔片,FIT 到漏 !!!! 呢d T字碼都好好用 !!!! 今勻一定中三T呀 ~~~~~



架頂出奇咁平穩,響呢一刻我只係想到晒菜甫,菜乾,蘿蔔乾 .....

是日大project

本來應該係尋日做0既,但時機未到,所以今早至做.
(唔係Q花園喇~)
在我黎講,以前係唔會做呢D野,因為呢D野未必關我事.
我 :
1.頂唔住頸,串左老細一輪
2.未問當事人,就私自講左人家0既私人事比第三者聽. (實在難忍)
3.為同事向老細提出最後要求.

"耳聽3分假,眼看未為真." 呢2句野真係3歲細路都知點解,我呢件咁老練0既腦細,原來睇人睇事,敷淺成咁,真係意想不到 :
結左婚0既女人,返工 = 唔志在,因為有老公養
成日笑口笑面0既人 = 無煩惱
返工 = 因為無錢
好喇 ,將以上3點夾埋一齊講 , 矛盾到呀 .....佢自己都頂唔順.
語塞之時,我一輪咀就係咁串佢 :
你睇人好 , 人睇你好0者~
如果返工要為錢,人地都唔會黎你度返工喇.
返工除左搵錢 , 仲係想確認自己存在價值 .
你話人地結左婚就等於有男人養 , 你有無問過人地食緊啖飯係唔係男人塞入佢把口度 ?
笑口笑面就無煩惱 , 唔關你事費事比面色你睇0者. 人地敬業樂業,唔會帶負面情緒返工,係唔係咁樣就要比你標籤一大堆野 ?

身為老闆要做乜野,無人可以阻你,但咁敷淺, 係唔係真係有點兒那個?
我地成屋女職員都結左婚, 嘩 ~~~ 你咁諗野,真係要去睇下醫生喎 ~

鱔

今晚同家人到將軍澳某店食晚飯打邊爐 , 回家後想找一下有關此店的資料.
一去"開飯", 唔 .... 真係唔該哂.
大抵呢一d網站真係可以慳番唔使去.

是日感想

人地唔一定會對自己好 ;
對自己好0既 , 就要得人恩果千年記 .
人地唔一定會認同自己 ;
得人家認同 , 就更加要知道乜野叫感恩.
世事無絕對 , 無事會應份 ;
要人地點樣對你 , 你就要先知道點樣對人.
對人如種花,要花心思,要知道乜野環境做乜野事.
呢幾個月得著好多,只因為有您當我係朋友, 您令我可以拎個心出黎對人, 好多事大家都好無奈,但大家0既得著,係點都買唔到,求唔到.
我以有您呢一個朋友為榮. 日後有需要 ,阿Q事必赴湯蹈火.

是日天氣 - 難受

任何一方面都係.
放工返到太子道,天台d花死左一半.

食乜Q - 牛奶布甸

我真係好中意食 !!!!!

買乜Q - LAURA ASHELY 座檯鐘

自從有一次錯過買到心頭好時機後, 以後在LAURA ASHELY 見到漂亮的家品,都會"把握時機"
是日入手 :



糧尾都係咁講 .....

Q花園 - 工程進度 @ 27-7-2008

今日,將所有木架腳及地板都固定好了.


2片木格仔架的組合亦完工了 ~


所有不合尺寸的碼仔,都用到架腳及地板上.
明日,要買一大堆1或1.5寸碼仔,開始加固木格仔架及開始做架頂.
樣本參考 :

架頂尺寸出錯問題想到解決方法了 ~~ 待明日到五金店問一下,就可以繼續埋尾工程 !!!

Q花園 - 工程進度@黃金星期六26-7-2008

怕中暑而英年早逝,所以都係黃昏至開工.
今日只係用索帶固定哂所有直立0既架,上左 1/3 碼仔.因為貪心, 買大左尺寸.聽日要再買過.....v_v"""

另外 :
1. 計錯數,要想想點樣連埋架頂2片格仔架.
2. 有某幾塊木地板容易移位,唔死得人, 但想做得好d

不過都叫幾開心,因為d架整好哂,天台屋仔即時多左好多地方出黎 .

Q花園 - 工序備忘

材料 :
B&Q - 長黑索帶 , 木腳架3對
花墟繽紛 - 五金接合件 2 款各一包

工序 :
1. 用磚頭間開木地板及牆身,預留去水位及防積水,再將木地板向外伸展多 20CM
2. 用黑索帶將格仔架及腳固定在木地板上
3. 由下至上,用碼仔加固; 架頂用日本制的五金接合件(繽紛)
4. 做兩邊格仔架
5. 重覆 2及3 工序,加固兩邊格仔架
6. 開始做架頂,用黑索帶固定架頂2片格仔架
7. 用碼仔加固
8. 完工
考慮 :
1. 是否加松木架頂
2. 澆水系統
3. 黑網裝置
4. 日照時間
下一步 :
1. 花園LAYOUT
2. 掛牆半圓架

Q花園 - 原料篇 (4)

花園仔真係開工喇 ~ 進度比想像中快及順利 ! 真係好 !
戶外木腳 :




今日放工後到 B&Q ,買左四對共八隻戶外木腳,去座高燒杉木架. 一對木腳 @$38.00,係經處理的戶外木.尺寸0岩0岩好 ! 我想呢D戶外木架都有固定尺寸吧(厚35MM,高180 / 240MM , 闊90MM) 有戶外木坑紋地板墊底,加木腳座高,我一直擔心的水浸木問題就解決了.
見到B&Q都有杉木地板賣,尺寸是 45MM / 60MM ,比起我用50MM木地板,有少許出入.但B&Q地板底部去水比較差,差不多是貼著地面 .... 45MM 4塊只售 208.00 , 比起我在裝修街買的平了一大截,但底部去水就真的是差勁. 如果只是裝飾用,沒有去水問題,就真的是買得過.
五金接合件 :



在台灣書中看到的接合五金件,在花墟繽紛有售. 但很貴 :

L 碼,約3-4寸長,焗漆表面,2隻要 $30 (我在五金店買銀色不銹鋼的2寸L碼 , @$5.70 連4 粒不銹鋼螺絲.)


接合五金條 , 約6寸長 焗漆表面 ,3.5CM 闊,要 $63/2隻.( 呢一隻出面無見過)


但因為要用數量唔多,所以$93 都值得投資.
半圓椰衣吊盤 :
本來10蚊店都有,但近來實在少見. 昨日在花墟見到大大的一隻,@$28.00 ,在雅緻有售.

Q花園 - 有野睇喇 ~~~

先比少少睇住先 ~~ 已成功將四塊格仔板豎起及固定.


聽日會 :
1. 再改善一下去水(斜水)0既問題
2. 再到 B&Q 購買木腳三對 共6件, (每對@$38.00) ,完成接合兩側的格仔板.


3. 到花墟購買連結五金件 , 固定2組/4件的木格仔板
4. 將頂部2片格仔板接合.
5. 固定地下戶外木板塊

聽日有半日可以做野,如果解決到幾個技術性問題, 個花架成品應該可以面世喇 ~

裝修Q - tailor made 自家廚房 ( 收納篇)

櫃桶 :
要問師傅櫃桶承重量如何.通常都可以裝得幾重,問題在於師傅比一條乜野路軌你. 另外亦有很多人中意加上開關油壓裝置,減低聲浪及意外機會.我就覺得係個人喜好. 櫃桶大小都會有參考尺寸,所以之後到坊間的家品店,買到的小配件 / 收納分類膠盤,大部份都會合用. 我幾個廚櫃櫃桶裝的是 :
1. 餐具 ,廚具 ,利器
2. 保鮮袋,環保盒
3. 烘焙用品
4. 處理食材的金屬碟,金屬蒸架
5. 新買碗布,抹布,垃圾袋
6. 另有兩組長達兩尺半(75CM) 的大型半封閉櫃桶,放置所有不銹鋼煲及其他煮食器皿. 作半封閉是方便食具上的水氣得以散掉.
地櫃 :
分層對門櫃 :
1. 乾燥脫水食品,5kgs 膠米箱,麵食,罐頭,茶葉,飲品沖濟
<此櫃後方為向北的牆壁,溫差不大,可放食物>
2. 水槽下放置生鐵鑊 (其實是不太合適,奈何只有此櫃才有地方可安置大黑鑊) ,清潔用品,大型筲箕 ,膠制品
<水槽下櫃位比較潮濕,又接近去水渠有異味,故不宜放其他物品>
吊櫃 (我對吊櫃有恐懼,放的都是不太重的東西.) :
1. 廚房處理機及零件
<比較少用>
2. 湯包,脫水食材,季節性物品 (全盒/聖誕曲奇罐等等)
<廚櫃後是室內牆壁,溫差不大食材不易變壞,另有比較深入的櫃位,所以放置一些不常用的季節性物品>


3. 麵包機及用品,麵粉,工具等等
<常用,食材處理區及水槽就正正在下方>
4. 食具,酒杯,容器
<此櫃後面是向東的牆壁,有溫差故不宜放置食材>
5. 小電器如: 電磁爐/邊爐鍋/飛碟機/咖啡機/其他新買未開的小電器或用品
6. 方便即棄餐具,派對用品
<以上兩項久不久都會用,易找卻不易存取>

另設座地碗櫥一個,將杯碟碗都存在此櫃內.亦因為一早聲明是存重物之用,師傅用最好的木料,整個櫃未載物時重達百多磅. 因大量碗碟都會有咁上下重量,所以我一定唔會放吊櫃,亦省得爬高爬低取物時容易發生意外.

裝修Q - tailor made 自家廚房 (阿Q推介裝修街材料店)

裝修前,先到不同的廚櫃中心/傢俬店參考人家的做法/裝置.
廚房色調,用料 :
廚房空間通常都不會太大,所以色調都會偏向淺色,令感覺上光猛開揚闊落一點. 牆身及天花多用磁磚方便清理,天花亦有人會裝上鋁天花.因為清潔油垢不是易事,所以磁磚多為平滑表面. 若屬"無飯之家" ,不用考慮油垢清潔問題, 都可以考慮小花磚/立體裝飾磚/裝飾腰線.
但近來都有不少資料顯示,用小方磚去砌圖案愈來愈流行.因為花磚愈來愈貴,腰線又不太合潮流.
地面方面,要選擇防滑磚.防滑是有級數的,數字愈高,防滑能力愈高.但點防滑都好,表面一定要密度高/有COATING ,否則油鹽醬料掉到地上,會留下痕跡除不掉. 我廚房用的是鴛鴦磚(不平均色調), 防滑度忘記了(差不多最高),但因為密度不高/沒有COATING, 所以都有幾多污痕,但又因為是鴛鴦色,不細看都是看不出來.
裝修街入面有不同磁磚店,因為我的廚房並無重舖磚牆,所以無得提供資料,唯獨係廁所磁磚及廚房地磚,在 "高志時尚" 購入. 但師傅覺得此店會偏貴.近來我再去行裝修街為娘家裝修找磁磚, 發現一間叫"和昌"的店,有平亦有貴,比較多選擇.此兩間店都在旺角快富街地鐵站出口附近.

爐灶位置,抽氣設施 :
爐頭位置會偏離窗口,但不能太遠,以免抽油煙機氣喉佔用太多/長空間, 影響吊櫃收納容量.
好多時廚房都會同時設有抽油煙機及抽氣扇,但師傅提醒我 ,兩者不能同時開動,因為氣流太大/多,會打散油煙粒子,廚房好易+快會積聚油垢.
抽油煙機個人偏好"太平洋", 抽氣扇則覺得 KDK / PANASONIC 比較襟用及在市面流通.

廚櫃門選擇
有圓邊有方邊,圓邊會減低受傷機會,方邊因為有角,如吊櫃比較低又經常開關,都幾易中招"起樓".
另外開門把手都要預先跟師傅聲明,用"明抽"/"暗抽" / 把手/門底坑 都要預早聲明,因為不同把手在廚櫃門制作時,都要預留位置.地櫃把手可以選擇簡單的金屬明抽,平時可以作為掠乾毛巾的橫桿,毛巾有地方掛,就不用堆在一旁發臭發毛.
有經驗的師傅,多會為你考慮門開位方向 ,左右的櫃門開關時,會不會碰花/壞表面門板等等.如真的避免不了,可利用墊椅腳的軟身纖維貼作保護.
我的廚櫃是用暗抽,而角位需要師傅在安裝好後再用金屬銼修一修,因為角位是機器切割的,比較鋒利及界手.
在上海街的"設計易"五金店(小公園對面),有大量把手及五金配件.不只是廚房用,廁所浴室用品一應俱全.另外亦有比較西式/英式化的金屬+陶瓷手抽,生/熟鐵櫃把手,大門把手等等,我覺得是裝修街入面比較 FANCY 一點的店. 當然,價錢也會比出面的店貴少許.

五金組件,濾水器內芯及星盤
在上海街的偉發(小公園對面),有大量五金組件"小怪物組" 及星盤 (@$998 ~ @$2388) 選擇.此店取價公道,分店亦多 . 店員有禮貌及經常介紹平靚正產品給客人.店內貨品流動量大,返貨亦快 , 我在此店亦購入浴室五金用品(@$28 ~ @$138) / 玻璃儲物櫃 (@$288). 店內五金產品多為台灣出品,價格合理.
另有一間 '順利建材"亦屬大公司,多分店.家中使用的濾水器就在此店看到.

廚櫃收納
無論是櫃桶或層板櫃,我都會用一些小配件去增加存放空間,如 :
1. 可疊高的小膠盤 (存放陶瓷匙羹,小碟子,筷子架)
2. 升高了的腳架 (可盡情利用高空及展的空間而又不會阻礙存取.)
3. 小膠籃 ( 存放不易排列的包裝食材如湯包,海味等等)
以上物品可到宜家傢俬,萬豐家品,吉之島十蚊店等等搜購

裝修Q - tailor made 自家廚房 (三) 個人化廚房

選好料之後,就要規劃一下廚房的收納/煮食/電制位/垃圾桶的位置.
通常做開廚櫃的師傅都會有一貫的經驗尺寸跟從 , 如我用開的師傅會認為:
1. 地櫃檯面深度至少14寸
2. 地櫃高度要因人而異.吊櫃會比地櫃淺一點以防碰頭
3. 廚櫃後不建議密封,以免積聚濕氣
4. 廚櫃底部可充份利用空間,用作儲存罐裝飲品 / 罐頭食品之用,騰出空間及減低廚櫃的載重量.
5. 盡量減少角位/L位間格,以免得物無所用,放入去0既野十年都唔會拎番出黎.

雖說廚房是個人化地方,但對於師傅一大堆建議,我一樣照單全收.每次師傅問我 : 好唔好咁咁咁 / 得唔得咁咁咁改 ? 我都會話 : 你中意喇師傅~我唔識架~
除左 "用人莫疑,疑人莫用" 呢個概念之外,因為師傅做櫃經驗一定比我多,而且比師傅發揮,總好過多多制抓.作為客人,我會提出我想要0既野,要求師傅比意見,可唔可以做到, 有無不足地方,缺點會係乜野等等. 大家溝通之後,至會有結論, 至會有一個共識. 就算日後工程出現問題,師傅都會馬上同我溝通.
另一樣野係,我覺得唔好因為自己係老細,係比錢0既人,就要師傅100%依從自己0既做法. 通常有設計才華0既師傅都有點點藝術家脾氣 , 遇到不尊重自己才華的客人,好多師傅係唔會響客人/用家0既角度出發,只求快快趣完成工程就走人 ;如斯下來,得出的結果,一定不如人意.

裝修Q - tailor made 自家廚房 (二) 用料篇

在用料方面,廚櫃多用防火板飾面.檯面(COUNTERTOP),五金組件亦有多種選擇.
廚櫃防火板
有多種選擇,比較出名的有西德板,德利板,富美家等等.師傅會把一本本的防火膠板樣本拿給你參考,有分面板及封條膠邊.廚櫃用的防火板多數會比較平面無坑紋,以便容易清潔及不易藏油垢. 如果心急一點/想多一點選擇,可以到旺角砵蘭街的 "益大" 木行打個轉,有大量的防火膠板樣本可以拿,記得取用後,向店家取咭片,以便知道自己在那裡取得的樣本.
阿Q點子: 有時只是一片小小的樣本,看不出效果來.可以到不同的廚櫃中心 (如中英廚櫃,用的是西德板)看過效果再去決定都未遲. 顏色方面都是見人見智,我比較喜歡簡單及清淡自然一點的顏色(米 / 白 / 黃 / 粉色), 阿Q的廚房就是COPY CAT 中英廚櫃的DEMO ~ :p


檯面 ( COUNTERTOP)
有多種選擇:
石面 :
雲石 , 麻石等等.比較平宜,麻石由$30 - $50/直尺,雲石由$68 - $88/直尺.比較硬及可受熱,但容易入色,配合英泥底+櫃框,可以在檯面斬野都無問題.因為是天然石的原因,顏色選擇不多.
合成石面 :
在合成料入面加入石英粒,尤如以前的水磨石般.硬度比合成料高,價錢亦比合成料低.旺角裝修街一帶石店,都是 $138 - $238/直尺. 顏色比較多+大膽. 比較漂亮的有富美家出品.
合成料 :
如 CORIAN (美國杜邦), STARON(韓國三星) , 下一等的有米蘭石,BITTO等等,因為是合成料,比較貴 @$498 - $XXXX 不等.因CORIAN是第一隻註冊專利的合成料,所以最貴,特價貨都要@$695/直尺 (聽說近年都無呢個價位). 硬度方面不如想像中硬,不受熱,會留痕.保養期內翻修打磨,都會好煩,打磨一次微粒會成星期都唔散.檯面愈長,愈易裂開 / 有裂痕.(簡單形容一下合成料的制造方法,就是把磨成粒狀的膠粉混合如白膠漿狀態的黏合劑,乾燥後就變成硬的一塊檯面)
阿Q點子 : 阿Q用的是"大花綠"雲石面(@$78/直尺),在所有檯面下都舖滿了水泥作打底,所以檯面可以斬雞斬骨都無問題.另一個用雲石的原因是,阿Q比較大心肝+騰雞,有時無用布就去拎爐頭上加熱中的煲,太熱就會即刻放低響檯面,用石面就比較 "安全",至少唔會有焦痕.

五金組件
裝修街的店有多種選擇,台灣/德國/馬來西亞/中國制造都有.德國貨好貴喇....台灣會屬中價貨,國貨呢就...愛國唔係而家黎愛囉.
廚櫃入面裝五金組件,其實唔會放多D野,相反係裝少左.只係有一D位裝左之後會比較易存取 (L 位,較深位置等等)簡單D講,其實我覺得唔係必需囉.
阿Q點子 : 阿Q只裝左一組五金件,就係裝響爐灶旁的小櫃內,存放醬料/油/調味品,將檯面空間用作處理食材之用.亦不會令調味品樽身/容器黏上油垢. 五金架係台灣貨"小怪物組", 約$700 (偉發五金潔具), 上下兩層,行雙軌,比較靜及穩定.



其他 :
磁磚阿Q都係用平價野/前業主0既磚,不見天位置,更加係用大陸平價磚.因為磁磚作用係阻擋濕氣,所以一定要用.
照明方面,吊櫃下可以裝T5小光管,在晚間處理食材 / 作夜燈都是好的選擇.廚房天花燈,就用了 PANASONIC 大餅燈 (@$495) 貪其方便清理及換光管.
爐頭前的牆壁,加裝了一塊沙鋼板,可抵受爐頭的高溫,亦方便清理. 不會因為日子久了磁磚受熱老化而出現龜裂.


星盤方面阿Q經好友提點後選用了孖星盤,但因為無考慮要洗中式大鐵鑊 , 所以而家洗鑊都唔係太方便.但都叫勉強可以喇 .
大夫亦在水盤位加裝了濾水器,家中所用的濾水器是金屬制品,美國制造, 大約要 $1100,替換芯都是廿多元,有活性碳成份的過濾芯就要 $45,2-3個月換一次. 近來發現坊間有台灣制造的金屬濾水器, 只要 $500-600左右. 我們都加裝在西貢村屋中試一下.

裝修Q - tailor made 自家廚房 (一) 概念

好友B家中會裝修,B亦是愛好煮食的人,所以自然會對廚房要求高一點.問及Q當日裝修時廚房間格的種種,我都有少少心得可以分享一下 :
1.煮食習慣
要知自己煮食習慣係點,中式大火侯 , 定係西式清簡小食.呢樣會影響廚房用料及抽氣系統裝置.
2.廚房收納
要留意廚房座向,西斜及東南,對於櫃內物品/食物的存放絕對有影響. 另外衡量一下自己廚房有多少什物,從而去決定廚櫃的間格及位置 (如碗櫥,清潔用品,小電器等等,可選擇在非廚房範圍,騰出地方去編排廚房用品/食品的存放區.
3.留有餘地
有時某些大型家電(雪櫃/座地式焗爐)不要做到個位0岩0岩好,要預留多一點位置作散熱 ,或日後轉用較大一點的新品時,不會被固定了的位置而局限了選擇. 時下比較新的"陷"入式電器,需要留意散熱問題,在櫃中要做/預留散熱口.
4.一條龍
通常生熟食物處理地方會有異.所以,食材存放區/處理區 > 水盤位 > 爐頭 > 熟食處理區 就會順序而設立. 而此等區域所在位置的收納, 亦會順勢而安排,方便存取物品,節省時間.
5.巧用窗口位
通常窗口位會在水盤附近/前方.可利用流通空氣 / 陽光,把水盤附近濕氣/黴菌清除,減低濕氣對櫥櫃造成的損害. 在窗前處理食材 / 洗碗,不失為樂事. 曾有人在窗前安裝爐頭....結果是...唉 ~

在考慮一大堆問題之後,應該可以大約規劃到大約7成的廚房間格. 再下來,就可以考慮用料問題.

又 : 藝人衝突

今日食晚飯時睇到一段片段 : 某息影女歌星的丈夫與記者發生衝突, 身為丈夫出手不輕,明知被拍到照片都照打不誤.
看官有否想過為何公眾人物會如此囂張,如此大膽妄為 ?
在鏡頭影著男人叉著記者頸,目露凶光之後,看官有否留意其他人及事?
我見到記者追著一個女人拍照,女人抱著一個小孩 .
女人要抱小孩又被追 ,小孩在懷中東歪西倒, 險象環生.
男人叉著記者頸時,女人乘亂把小孩帶離現場, 乘電梯離開了.
知道女人及小孩安全離開後,男人也不再與記者糾纏.
男人叫李亞鵬,是王菲的丈夫
抱著小孩的女人是保母,懷中的小孩是李王的小女兒李嫣.
如果因為父母是公眾人物,身為下一代就要被拍照公開樣子,給一眾八公八婆對一個做過裂顎手術的小孩評頭品足 , 是不是太過份了 ?
身為公眾人物動手固然是不對,但一眾在旁叫囂扇風點火的八公八婆更不要得.

食乜Q - 日本北海道牛奶布甸

好味 !
好味 !
真係好味 !
我本身唔係好中意食奶類制品,不過見到呢個布甸0既外形好可愛,所以敷淺0既我就買左一支黎試.
早2日咳嗽剛痊癒,好想食凍食物,二話不說就開左呢個小布甸黎食.
如果我知道係咁好食0既話, 我會 :
響最舒服最放鬆最享受0既時候開住冷氣撓起腳 / 坐完按摩椅至去開黎食 ~
而唔係行到一身汗 ,求求其響雪櫃就拎出黎企響度食囉 ....
講左咁耐 , 都係無相睇~ 所以 , 去好友萍果度睇住先喇 ~

近日出沒最多地方

1. 花墟
仲要次次都有進貢. 近來幾次番屋企都係響後門入.... 先上天台放低"贓物" ....
只係上星期,已經入左蟹蘭,毯蘭,招財草,長春籐,銀線芒,花碧榕.....
2. 將軍澳十蚊店
呢間野有大量園藝用品,掛勾,花盤,小工具賣,次次唔知去邊好時,就自然會叫大夫車我去呢度.
3.裝修街
想一就想得二 ,個花架未整,就想定要整個乜乜裝置響邊度邊度 ...

其實我想最開心係大夫,無人管佢又無人理佢,阿老婆響天台攪攪攪,也不會買花買草買到破產要他還債 , 佢亦樂得清閒響私竇入面攪機.

病癒

2星期之後,病差不多好了.
咳好難斷尾,尤其是寒咳.我本身是寒底,若是寒咳, 非一頭半個月不可.
好在, 今次是熱咳, 連氣管敏感,把大夫都惹病了. 大夫也是熱咳,還有大非滋呢 ~~~
每次在咳嗽差不多好的時候,我會煲龍利葉湯飲,然後,把凍飲,汽水都灌到肚裡去.
在大咳多一輪 ( 1-2天吧),把痰都咳出來之後,就"正正式式" 地痊癒了.
於是,昨日 .....
冰咖啡 , 美心的荔枝西瓜冰,家中紅莓汁+有汽礦泉水,星期六在吉之島買的北海道牛奶布甸..... 通通都吃過飲過 !!!!!
哼 !!! 好在趕得及在大暑前可飲凍飲 !!!

藝人大婚

近日城中鬧得熱哄哄的,莫過於影帝影后大婚之喜.
然後出來的,是一眾小報尖酸刻薄的報導.
近年名人喜事,愈來愈保密,是有原因的.
我自己覺得,2人走在一起廿年,在婚姻制度幾近崩潰的今日,他們仍選擇結婚,給與對方一個名份,了結老人家心中一件事,不是一件可喜可賀的事嘛 ? 如果硬要在人家年紀樣貌身型笑容身家財產中挑話題, 除了說是酸葡萄之外, 想不出其他理由.
另 , 據說不丹國王下令, 擅闖婚禮者要斬頭 傳媒會不會因此而收歛一點 ?

Q花園 - Q 的新歡

除左長春籐 , Q都有其他喜愛的花草~
花同草比例來說, 係十比一, 十盤草至會有一盤花 ~

各種芒類 , 圖中係黑骨芒 , 銀線芒



毯蘭


花碧榕

其他的blog

想不到一個月之內,會在自己的書簽內刪去兩個網誌路徑.
一個是本來很欣賞的女孩,因為涉及尊重及態度問題,刪走了.
另一個是好友的公司BLOG .一間公司不珍惜自己的員工,沒有把心肝拿出來,我覺得無需要開條路比他人去睇.
慶幸早前沒有在網上付費看這公司的雜誌.
我就係咁0既一個人.

走與留

有人話我硬頸, 亦有人話我無原則.
硬係要斬頭斬尾黎針對0既, 我無辦法.
值得0既人,我會用我方法去推塌圍牆,亦 appreciate 他人作嫁衣裳
不值得的人,佢唔同我講野,我求之不得. 我並不會為他們而動氣,因為,早已當此等人透明,無人會對住空氣咆哮 , 除非是瘋子啦~ 不停作小動作的人,自有其報應,我亦樂得看戲.

曾有人講過 :
要同聰明人做朋友,因為佢會令你進步.
不要與蠢人為伍, 因為佢地會令你失敗一世.

人人自有不同的厘訂準則; 我唔去主動示好,係因為唔值,而唔係我硬頸/無原則.

熱到熔

而家至係七月.....
仲有成個八月......
仲要無假放 .....
嗚 ~

無限祝福

今晚與好友A夫婦晚飯,得知A太太工作上將會有新方向.
得知A太太的新方向,著實是戥她高興,開心. 一個人可以按自己的旨意行事,另一半又極度支持的 ,是幸福到不得了的一回事.
自數年前轉到現今的公司, A太太都有解決不了的上班問題,工作跟夫家相距太遠加上工作不定時 / 追稿,直接影響她休息時間及起居生活,健康更加是大打折扣. 當初知道她健康上有問題,我急到不得了,拿書及資料給她時,更加是說不出話來...... 但, 工作上的滿足感可以把一切問題都補償到的話, 我也替好友高興.
一直以來,都極喜歡A太太的工作風格,雖然身為某雜誌編輯,但所推介的產品及商品,絕對是很持平,很公道.並不會偏袒某品牌 / 某公司. 而且風格很貼近公眾,不會像Haute Couture般得個睇字. 有十多廿塊的上架貨推介,亦有殿堂級價位產品的介紹,看官適隨尊便去挑自己喜歡的東西.
今日,如她自己在 BLOG 中所說 : 脫去美容編輯的光環,我仍是我.
APPLE , 我永遠都咁支持你, 走一條自己喜歡的路, 等待你打開明日的一片天 ~~~

煮乜Q - 病左食乜好 ?

最好係無油無鹽無糖 .... 但又要好好味0既野 ~
所以今日煮左香茜蕃茄牛肉湯烏冬 !!
材料 ( 二人前 )
日本急凍烏冬 - 2 大塊 ( 用凍水浸開 , 用冷開水沖淨 ,用湯碗裝好 )
中形蕃茄 - 3隻 (去蒂去皮切小粒/片)
碎牛肉 - $15-20 ( 用少許豉油及生粉略醃 )
芫茜蔥 - 4-5棵洗淨切碎
做法 :
1. 小鍋放水(一飯碗)煮滾
2. 水滾後放牛肉,用湯匙弄碎煮至滾
3. 撈走血水造成的泡
4. 放入蕃茄 , 大火煮至滾轉小火慢煮5-8分鐘
5. 轉大火, 加入芫茜蔥 , 加蓋關火,焗2-3分鐘後倒在烏冬上即可食
備註 :
1. 呢個烏冬無多餘調味,所有味道都係食物鮮味而來,所以最好買新鮮材料
2. 烏冬做法純粹個人喜好,怕分心把烏冬煮糊了.
3. 除左一碗水在開始時煮滾, 其餘水份都由蕃茄而來,所以蕃茄份量少了,就要加多點水.
4. 牛肉湯剛滾起時會有點 "蘇" 味 / 腥燥味, 在湯面的泡撈走以後就會沒有了,最後加入芫茜蔥,會令蕃茄牛肉湯更加香.

互動

人與人之間, 都是互動的.
你比左乜野人地, 人地就會比番乜野你.
有時並唔係奇唔奇蹟 ,報唔報應, 而係你做過d乜, 人地回敬番比你而已.
其實係好實實在在的東西 , 並不希奇.
喉頭咽不下的一口氣 ,終歸要吞下去;否則, 不吃不喝,死硬~

與友一夕飯(話),勝讀萬卷書. 可以在人家身上討教, 是福氣. 可以為朋友做點事,更加是積福. 因為你做,人家都不一定要受. 人家受了, 大家都開心, 何樂而不為 ?

新不如舊

我比較唔上進 , 好多時覺得古老0既野好過而家0既野, 老歌如是,電器如是,化妝品亦一樣.
近日愈黎愈頂唔順0既係,老麥所謂0既大改進.
由前人開始的明星效應,已經覺得老麥偏離了當年走小朋友的路線 (廣告歌變成so call 歌星谷新歌的另一途徑)
廣告亦變得乏味 (以前可愛小朋友都不復見)
而家燒到埋身0既,就係去買野都要等餐死.
唔知邊個傻人想出黎0既好野,而家買完野要即叫即制,買完要行去另一邊等拎.
以前在美加幫襯老麥時,人家都已經行緊呢一套制度,真係好快,呢頭買完,0個頭拎得,分分鐘追得上以前55秒一個柯打的年代, 而理應這一套是很成熟才是. 但 .....
香港地少人多,才6米長的收銀櫃檯,有3台收銀機,塞了6個人,地方又唔係大 ......
如果佢打著 fine food 旗號,我真係無所謂.想食好野,係要多少少時間.
但.... 老麥係 fast food 呀~
fast food ,唔平,要等,又多人,又迫 ,排隊排到亂哂(唔少未比錢0既人排左去拎野0既隊,發現之後又重新再排.....於是counter前面0既人愈積愈多)
我做乜仲要咁浪費時間 ? 講真,rush hour 時食物流動性大, 與即叫即制無分別. 最緊要係 : 唔使等.
果真係新不如舊.
ps. 如果看官有去過老麥網頁,會發現佢竟然係無customer service 0既聯絡電郵. 可能真係怕比d投訴email炸到爆 server.

Q花園 - 原料篇 (3)

經過不停0既資料搜集,考慮成本效益同安全程度之後,最後決定在天台舖設戶外木地板, 代替紅磚腳座 / 木腳座.
走了裝修街一轉,在東達木業尋得坤甸戶外木地板,價錢是 @$110.00/塊 (50x50cm) , 一共需要 16 塊. 此等木地板可獨立移動,不需裝工,底部以木架升高方便去水.
坤甸木耐腐喜水,多用作龍舟船體,棚屋大樑,希望我無揀錯喇 .
上星期在五金店購入不銹鋼碼仔及螺絲 , 如果木地板趕及在星期尾送來,星期六日就可以開工喇 ~~^^

大休數天

星期五夜晚開始訓....
星期六....
星期日....
星期一....

幾日都係訓到成身汗,開冷氣又凍, 唔開又熱 ....於是我就知道 ,又係八年一遇0既流感 ~
對上一次,係2000年4月. 當年阿娘真係好辛苦,要照顧做緊化療0既老豆 , 我最愛0既婆婆又過左身,我又大病一星期. 我阿娘都唔知理邊個好. 當年我收到婆婆過身消息 , 個人差唔多塌哂,燒到 102 度,返屋企食乜嘔乜. 病足成個星期.

今次,算好好囉 ......

訓左幾日,個人好番好多. 星期一睇多一次醫生,要食多一個療程0既抗生素.

病

可能呢一排去得太多醫院,所以中招了.尋晚已經出左小小問題,今日更加利害, 咳到肺都甩咁滯 ,心口好痛, 今日放工要去睇醫生喇 .......

當排毒喇唯有.....

阿Q講化妝

阿Q 除左結婚時,好認真地對待過"化妝"呢一回事之外,其他時候, 真係霎眼嬌,睇下就好開心...... 買左一堆野之後,就放響度"以備不時之需"
粉底 :買十次,有九次係錯哂色,唔係做左賓妹,就係做左日本能劇0既女角
眼影: 都係藍色:孔雀藍(@@""), 粉藍,深藍,寶藍,天藍 ......
胭脂: 都係買到錯哂,螢光粉紅都買過,問你死未~~
眼線: 單眼皮的Q , 畫起上黎都幾得下~ 對眼大隻好多架~~
睫毛液 : 唔好講喇 , 根本我就唔可以用,偏偏就買左一大堆.

今日約左SHISEIDO 的 BA DEBBIE , 做化妝諮詢,開始試用第二D色,同埋用番一D"正常顏色" (唔要螢光都好好喇 ....).
終於買左一隻唔係藍色0既眼影 :MAQUILLAGE CLEAN CONTRAST EYES BR741
一盒有哂 HIGHLIGHT / EYE LINER / EYE SHADOW等等 共四隻色 , 方便0岩哂我.
另外買左一盒蜜粉, 眉筆 及 TINT MOISTURIZER ......拎左份禮物,有小手袋及試用品共五件,另外又取了另一系列的小試用裝 .
又睇下點喇 ~~~ XDDDDDDDDDDDDDD

食乜Q - 又係聲哥

飯堂嘛 ~~ 無論聲哥響邊 , 我都會跟到底 !
今晚同依莉姨餞行,於是又去聲哥度食 ~其他野,都係食開0既無變 ~ 係加多左樣 :上湯雞粒煎粉果
阿Q誠意推介 ~



之後邀聲哥一齊影相 , 聲哥仲專登取出佢0既高帽同我地一齊影相 !!
XDDDDDDDDDDDDDDDDDDDDDD

向世界出發 - 東印度篇

由星期一的第一集開始,就已經體會了與香港不一樣的印度生活文化.然後,是恆河, 是第三性人,德蘭修女,佛祖和他的菩提樹......
節目中也提及, 世界上最有錢和最窮的人,都身在印度.
今晚看到的是,德蘭修女和仁愛之家.
我覺得心靈最富足的人,也在印度.仁愛之家內的每一個人, 義工們和修女, 病人,小孩等等, 每個人的臉上都閃著光芒,在他們手中, 盡是無窮無盡的愛心,日復日 ,月復月, 年復年去為他人付出.
為著他人得到平安,義工及修女們都無私地去獻出自己的一切.
為著德蘭修女的信條 "為我們之中最小的兄弟而做" ,仁愛之家令到印度低下階層的一群人,得到了平安,尊重及溫暖, 令我好生感動.換轉過來, 我們日常生活中,不停地耍性子,任性,抱怨,經常覺得人家為自己做的不夠,卻沒有想過, 自己又為他人做了些什麼事.
看到Deatina修女擁著 Sudili 時,你想到了什麼 ?
每一天的感恩, 可以令自己察覺到,原來自己所掌握所擁有的,竟是多得令人咋舌. 相比起世界的某一角,我們根本就是貪得太多.
明天起床, 是不是還要抱怨 ?
有關此節目的介紹 : http://jade.tvb.com/special/ontheroad3/video/03.html

突然入院事件

係我阿娘,阿羊太 ,唔係我~(掂木 !!)
通常每個星期五夜晚 ,大家都各有節目,細佬唔返去食飯同老婆去拍拖,我亦唔想我同大夫返去娘家食飯要阿娘專登去煮,所以,星期五好少會搵阿娘.
星期五我響天台整緊野時,阿娘打黎,音春聲咁話 : 我要留院呀...
留院 ?
留咩院 ?
入左院咩 ?
你響邊呀 ????
原來佢自己一個靜雞雞入左去睇急症 .
又 .... 醫生照到佢個肺有一個疤 (佢後生時曾有肺病,響葛量洪住左成9個月, 好衰咁佢又唔同醫生講),佢又咳到血絲 (其實係之前一日食荔枝食得太狼,熱氣) , 加上佢上星期去左大陸 ( 外地回港呀....) 所以醫生唔比佢走,要佢入院觀察.

就係咁,到今日仲未比佢出院.

Q 花園 - 花墟及十蚊店收獲

出左糧 , 又去進貢~
先去左花墟, 響繽紛買左2盤小盤栽斑碧榕(對~~又係得葉,無花0既~).本來係想買黎放公司檯面,但真係好靚, 都係留番自己響屋企睇好D ~~

再落黎係去萬春園.呢間店由網友阿笨介紹,係蘭花專門店.店員好好禮貌,我係初哥問好多問題,姐姐都照答. 仲同我拎走左好多唔等使野,慳番好多$$.此行最主要去買花盤,我最中意素燒花盤,好自然不造作,萬春園0既素燒盤無打磨無上釉無顏色,重心低又穩陣, 正合我意.我先買左一大一小返去試效果, 另墊料一堆.

夜d去左將軍澳10蚊店,呢間店有大量園藝用品,我買左一堆小花盤,大部份係外面素燒入面上釉,只有2隻係上釉花盤.


其中有2隻係貓仔花盤,好可愛!!唔種野做裝飾都好得意 !!



因為天雨關係,花架遲遲未能開工. 唉 ~~

Q花園 - 原料篇

我選用左碳化燒杉木 , 唔知好唔好.但以第一次DIY黎講,成本叫做可以接受.
全部主要材料在花墟溫馨無限購買 :
180(H)X90(W)mm 格仔網架 @$398.00
原木籬笆 @$60.00



碳化杉連蓋木箱 @$168 ( 用作堆肥外箱之用)


3尺花盤 @$128.00

燒杉木花架 @$398/隻


憑COUPON購滿$2000 可以有65折. 如無 COUPON 則滿 $3000 可有65折.第一次購物後可參加會員計劃,憑咭惠顧滿一定金額可享指定折扣. 所以我買以上野,全部打左 65 折
另響 B&Q 購買小零件
小鐵釘($8.00 / 包)
膠轆2對 ( 有鎖 @$22.00/隻 , 無鎖 @$16.00/隻 )
呢個係裝堆肥桶0既木箱, 我會響箱底加裝滾輪,方便推出推入.



在所有野未齊全前,我要準備以下各樣預備工夫先 :
1. 先用釘將花架 / 格仔網架加固
2. 購買防腐木油,將格仔架及各種戶外木都塗一遍
3. 設計不同的紅磚腳座. 將木格仔架升高離開地面.
4. 搜購不銹鋼五金件作組裝之用.