煮乜Q - 再講月餅 (自家小心得)

我做0既月餅,其實係2年前去二德惠學的~
餅皮好脆,話就話係"半島版本", 其實我覺得係2回事來. 我食過嘉麟樓同餅房2隻,D皮都係軟軟的~
餅皮份量如下:
牛油-50克 (室溫軟化,不可融化,否則焗好出來餅皮會易碎)
糖粉-30克 (不可用砂糖,打不勻會起黑斑,至少要用caster sugar,我就用icing sugar)
以上2樣,用打蛋機打成淡黃色霜狀

低筋粉- 72克
獅嘜吉士粉-8克
奶粉-12克
以上三種粉拌勻後過篩2次, 與牛油霜拌勻,

云呢拿油-1滴
蛋汁-12克
在拌勻粉+牛油霜時,加入蛋汁及云呢拿油.

當成粉糰後,檯面及雙手撒高筋粉,將粉糰分成8份.

餡料可包入任何味道, 當日學0既係奶黃餡. 240G 奶黃餡分8份,包入加酒焗過的蛋黃,搓成圓球狀.

用包湯圓手法將餅皮包實餡料,開口處向下

月餅模叉入去高筋粉中推幾下, 務求粉黐滿模片位置; 取出,在檯面上敲幾下,將多餘粉敲出來,以免影響餅面花紋.

將餅球用雙手修成高身,方便入模,然後將餅模把手向下按,聽到"得" 一聲,表示餅已離模.

將月餅模移向已舖紙的焗盤, 離盤面5-6CM (BASE ON 餅的高度, 我用5CM高的模), 垂直向下,推下手制,將餅推出.

掃上蛋汁及糖水,就可以入爐. 爐溫係220度上下火焗10分鐘,再轉170度上火焗8-10分鐘.

我就做左少少改動:
1. 唔掃面,咁個花會靚好多.
2. 轉170度時,順便響焗盤下加多個板隔火,以免太高溫餅皮急速膨脹而令月餅表面有裂痕
另一個作用係防止底部高溫令月餅又歪又塌 ( 底部太高溫會月餅底向外脹起變形)

一年咁快又中秋

今年朋友聚會約左響23/9, 因為夠時間去買野準備, 所以今年無叫外賣了,全部都係自己整~
早一晚先去買飲料,凍肉,沙律菜材料. 然後第二日去買鮮貨: 蟹,蝦,雞及普通菜蔬等等.
今次係我第一次整蟹, 無咁複雜, 清蒸而已 ~ 去街市檔口,買左8隻共重8斤的生猛肉蟹,因為已過中秋,所以價位都唔係太高, $80/斤,隻隻生猛多肉~

然後又去左另一檔買左2斤基圍蝦, @$48/斤.


雞檔D鮮雞都係合理價, $50/斤, 買左隻3斤重0既來做咖哩雞.
再去後面街買左D潮州鹵水小食 ~
返到屋企之後就一樣一樣咁整 :
洗蟹, 雪蟹, 蒸蟹


煮咖喱雞

備沙律料 ....

現成的火腿及風乾肉

尋晚焗左三底月餅,一底比阿姨, 另外2底比好友們食哂~XDDD 多謝比面~~

又到中秋 - 又係做月餅0既時候~

今年同以往一樣, 八月就去左二德惠訂左奶王餡,響九月做月餅用.
我一直都想學做呢隻餡,但坊間有好多唔同0既食譜,有蒸亦有炒0既方法,都唔知邊個得邊個唔得. 今年有好幾個朋友都比左食譜我,我一晚試一個,唉, 味道係0岩喇, 但未知入左爐之後效果如何呢.....
今年想試下新點子,將自家醃0既柚子皮糖加入奶王度.... 講真,唔知夾唔夾, 只係想試下如果唔用蛋黃,可以用D乜去豐富一下做得無咁甜膩0既奶王月餅, 等我有糖尿病0既阿姨都可以淺嘗一下月餅滋味~
好多謝各位好友0既分享, 我下年唔使心掛掛去訂餡喇~~ 又貴又唔健康~ ^.^
同阿杯傾完計,佢叫我試一下做綠茶皮奶黃餡.....
我自已就會試下做奶黃柚子月餅 .....
得唔得, 今晚就有結果了~~

食乜Q - 源吉兆庵兔鏝頭

其實呢隻免仔餅出左好多年.我2004年開始買來食,只因入面有好香0既柚子皮.
造形好可愛架~~


細細隻, 一盒有10隻兔~ 唔怕食過籠喇~



兔鏝頭係白豆沙餡,加入日本柚子皮. 唔太甜 (近年好似減左糖,加多左柚皮絲)
一盒10隻, 開封後五日要食完. 好似 $13X-16X 唔記得了......

我係八月中訂左,尋日去拎,送左一盒比好友阿杯, 以補償佢半島奶王月餅之恨.....(自己問佢喇,我乜都唔知架~~~ )

瘋狂大食會@25-12-2008

何謂瘋狂 ? 睇下食左幾多野咪知囉 ......19人食左 :
7磅肥牛
2斤蝦滑
4斤菜
4斤丸
3磅黑安格斯肉眼扒
1磅牛仔骨
4斤大花蛤
1KG 芝士腸
4磅日本極黑豚
4磅雞亦
3磅串燒大蔥雞柳
6-7磅有骨燒豬脾 (購自 TOWNGAS AVENUE )
ALAN 秘制火灼三文魚 ( 2磅)
大量酒 + 汽水 + 果汁
多謝 doris 同埋 apple 送我0既聖誕禮物呀~ 因為0個晚走出走入 , 都唔知你地送左野比我, 無當面道謝 , 真係唔好意思呀~~

邊個做好心比番d相我貼響度呀 ?

Crabtree & Evelyn 2008 聖誕禮品目錄

又係放血的時候 ~~
今年價格比上年下調左 2 成左右, 可能係市道+人心惶惶問題,所以以往0既 $895 禮品無哂,最貴都係$695,比多個七折 VIP , 唔使$500就有一份又大方又得體又靚0既禮物.
聽日去行下收下新料先~ 好耐無入過蟹樹喇 ~~~ ^^

又係水晶梨

發現阿娘個雪櫃入面有隻大水晶梨!!!! 比起我之前送比佢0既 ....
我好自卑呀0下羊太 !!!

一年咁快又中秋

真係 .... 快活不知時日過囉 ~~
又到中秋喇 ,不過今年中秋極不爽, 熱到黐肺!!! 天台仔一滴風都無 ! 早知唔BBQ就咁大食會算喇 ~
今年學整月餅,於是買定料響迎月夜整月餅食~~ 整左一底比好友們品嘗後,我打比阿娘,睇下佢係唔係響舅公度打牌,於是做埋快遞 , 將一盤沙律同另一底奶皇月餅送埋上門比佢地當宵夜.
老爺0既工人阿思都有黎 bbq ~~ 仲幫我手做月餅呀~~ ^^

新鮮出爐0既奶皇月餅 , 真係好好味 !!



( 以上照片 , 鳴謝好友大R !)

下年目標 : 自制奶皇餡 ! ^^

迎接新貨抵港

登登登 ~~~~~ 燒烤爐是也 ~~~~~
走遍新界香港九龍 , 終於無心插柳咁買到隻爐~~ 仲係響我從無想過0既Indigo買.
是次買到0既係一件 mark down product. 50% OFF , 一隻圓形0既有蓋大爐烤爐,盤底深,無咁易燒焦野~ 原價要成 $8xx , 而家4xx 就買到,全隻黑色,鋼水比市面普通紅色金屬更重身及實淨. 其實店內仍有其他選擇,有一隻氣體爐,大大座有側檯面板 + 轆 + 蓋,才$900,以市價黎講真係超值.但一想到氣體罐儲存問題,我就放棄了~
因為聚會人數問題,我地會再買多一隻長方形爐,亦即係平時用開呢一隻.用黎做串燒極正~
另外要去海港訂凍肉,去買炭/汽水/什食等等~~


** 相片後補 **

再母親節

今日正日,阿娘為怕同襯家們爭 / 撞日子,通常都會好識做地唔會搵我地.
但我同大夫出去茶記食 bunch 時,就撞正阿娘0既一大班好友~原來佢地都約左阿娘打牌,不過未夠鐘,佢地去食d野行下街~ 於是我打電話比阿娘,叫佢今晚打完牌黎我度食飯 ~
我食完野,上左屋企搵阿娘,阿娘好開心地 show 個手袋比我睇,佢好開心呀~另外阿姨都為佢揀左一隻celine手袋.個花都係 classic signature logo print, 阿娘用開0個d款.
下午同大夫出左去砵蘭街睇裝修料,睇下係乜野價位. 因為西貢舊屋0既漏水問題愈黎愈緊要,所以都要的起心肝整好佢.大約會響年底,乾燥一點的日子才開工.睇完料就返九龍城買菜; 是日媽媽節,所有野都貴左又唔靚....好辛苦咁買到條細鱗同一斤芥蘭仔,咁就無左成80蚊 ..... 另外買左d燒味加料,買左阿娘中意食0既提子同山竹, 才打道回府.

今年母親節,係我第一年煮野比佢食0既母親節呀~

母親節

我家對於慶祝母親節, 都是好隨意.因為本來每一日都是母親節,所以,那用專程在五月第二個星期日來慶祝 ?
話雖如此, 乜都唔做, 為娘的始終有點戚戚然~~人家問起,很難交待 (即係晒命耶) ~~~
於是,星期四放工後,一行數人就開車入元朗食泰菜 ~
細佬及弟婦介紹,元朗劇院側的 mint 薄荷葉泰菜.
我地拎左支紅酒去,因為細佬之前幫襯過,免左開瓶費~5個人 $768埋單~
所有食物上都有韭菜花及薄荷葉裝飾.


泰式蝦刺身 _ 新鮮好食 ~~~ 金寶0既行埋一邊~


芥蘭苗 - 用豆醬炒 , 好正 ~~


春卷 - 幾得意 ~ 味道好 ~~ 加入檸檬葉絲, 有驚喜, 一定要即食~


串燒


柚子沙律 - 好多菜太生 ,唔0岩我口味.我比較中意九龍城金蘭花0既柚子沙律.

唔知咩鴨 - ......賣相 .....好似條頸打左結咁.....我唔喜鴨, 食少少 OK 喇 ~~


咖喱蟹伴油酥餅 - 普通喇 ~~ 不過不失



蝦醬炒飯 - 賣相精細 + 有心思, 青木瓜絲帶起成個炒飯0既鮮味 ~


放在飯頂的是炸魔鬼魚邊, 即係炒魚皮~~香口得有點像以前戲院門前的煨魷魚 ~~



飯後走過去食 b仔涼粉~~阿娘狂喜話抵食~~ @$57.00 / 兜, 5個人食完仲要打包~~


最後,一個 coach 手袋為羊太2008年母親節劃上了句號 ~~
( 相片取自 coach 網頁 )

今年復活節的節目

有教堂

有聖洗 "盤" XDDDDDDDDDDDDDDDDD

更有殺人於無形0既肥爆鮮奶油豬仔包!!!!

大年初一

眨下眼又年初一,時間過得好快呀.....
同往時一樣,一早就鼠去羊太度同佢地一齊去舅公度拜年,然後去阿姨度.今年阿姨更準備左開年飯同我地一齊食.有好好食0既陳皮瘦肉粥(呢個粥真係天下美味!!!又學到野 !! 有時,煮野食唔一定要貴料0既~~)鹹雞一隻,脆皮燒肉一大件,阿姨私房齋 (嘩呢個齋,未食過真係囉囉攣呀~)
食左八成飽, 就去老爺度又食開年飯....好彩響阿姨度打左底0者 ~~
之後就去姨婆度拜年,同以前一樣,好開心好好玩呀~~~ 表舅父表姨丈等等笑到嘩嘩聲,過年應該係咁開心架嘛 ~~
可惜0既就係芳表姨抱恙,未能親口多謝又食又拎0既紅豆糕 !!! 在此希望表姨快D好番~~身體健康就是財富呀~~

入伙及過年前準備

多謝羊太幫我買雞及整鮮竹卷,作為入伙招呼朋友之用~~
今日爭取每一分鐘,去做大大小小事情.
一早去左剪頭髮,修眉修甲,要執執個樣至得.
期間窗廉公司打電話黎, 話可以上竇口度安裝, 好準時呀~~ ^^
返左公司做左一輪野,然後出左去九龍灣入埋單.
再出花墟買花,心水係日本海棠. 另外終於見番日本雪柳,買左兩扎,另加三支鮮紅朱頂蘭. 響另一間新店睇中左一盤日本海棠,陰功個盤仲貴過花 .... 今年一共用左400蚊響年花度.
坐左的士返新竇口,然後又趕去九龍城搵羊太,同佢一齊買野拎野返屋企.
然後又去街市潮發買入伙/團年用0既野,買全盒0既糖,買桔仔,買沐浴露洗頭水等等.再比羊生羊太各一個電話,點到我響九龍城度行左三個圈.....
拎哂d野上去之後,見到大夫黎左,我又拎番d野上車度,順便去十蚊店換野及買野.
再落去樓下0既奇華,要求姐姐用車仔為我地推十幾盒0既禮盒上去停車場.
上番羊太度,可以食飯喇~~ 咋咋林食完, 老陳去 megabox 拎番d野,我就留響屋企同羊太整隻雞同鮮竹卷.然後一齊去新竇口度執野.今日pccw及窗簾公司黎安裝,唔多唔少會鑽孔/剪電線,所以又要清理一下.
響潮發買0既野,又要處理左至可以入雪櫃,當然以我d身手,好快攪掂 ~~ 再將所有紙箱搬上天台房仔. 老陳安裝埋個電視, d野就差唔多大功告成 ( 如果唔開d櫃,係無問題0既 ~~)
聽日,要一早要出去,去惠康買埋野,再上去執野.希望2點幾可以好好地招呼好友喇 ~~

食乜Q - 23/12邊邊@HOME

同大夫響屋企打個簡邊~~~ ( 簡???? XDDDDDDDDD)
真係幾簡單,得三樣野 : 日本蟹腳 ,牛肉粒, 菜
一邊係蟹鍋湯底加京蔥 , 一邊係家樂牌濃湯寶.

日本急凍蟹腳 ~~ 呢度有一磅半左右.

肥牛粒 ! 無野好講 !! 愈食愈咀尖,真係唔知點算 !!!!

食乜Q - 23/12@TOWNGAS AVENUE

大夫於一星期前訂位,在23-12/2007 食一頓聖誕午餐~
頭盤 : 煙火雞沙律配金巴利汁 / 車打芝士焗原隻帶子(2隻)


我比左一件火雞大夫,大夫比隻帶子我,變左咁.....

湯 : 野菌忌廉湯

主菜 : 香煎原條龍利魚伴帶子配香檳牛油汁 / 炒馬利拉蜆扁麵配白酒忌廉汁
無龍利魚,轉左做 SEA BRASS

我比左D魚大夫,大夫個扁麵就變左咁.....
變身前 :

變身後 :

甜品 : 焗木瓜金寶配云呢拿意式雪糕
木瓜無左貓屎味 !!!!

節日曲奇配咖啡或茶
曲奇好硬 .....

餐包得一個狂喜餐包0既我極不爽 ~~


@$178/位 ,用匯豐銀行信用咭 / TOWNGAS AVENUE MEMBER CARD 會有九折.