Q花園 - 工程進度@黃金星期六26-7-2008

怕中暑而英年早逝,所以都係黃昏至開工.
今日只係用索帶固定哂所有直立0既架,上左 1/3 碼仔.因為貪心, 買大左尺寸.聽日要再買過.....v_v"""

另外 :
1. 計錯數,要想想點樣連埋架頂2片格仔架.
2. 有某幾塊木地板容易移位,唔死得人, 但想做得好d

不過都叫幾開心,因為d架整好哂,天台屋仔即時多左好多地方出黎 .

Q花園 - 工序備忘

材料 :
B&Q - 長黑索帶 , 木腳架3對
花墟繽紛 - 五金接合件 2 款各一包

工序 :
1. 用磚頭間開木地板及牆身,預留去水位及防積水,再將木地板向外伸展多 20CM
2. 用黑索帶將格仔架及腳固定在木地板上
3. 由下至上,用碼仔加固; 架頂用日本制的五金接合件(繽紛)
4. 做兩邊格仔架
5. 重覆 2及3 工序,加固兩邊格仔架
6. 開始做架頂,用黑索帶固定架頂2片格仔架
7. 用碼仔加固
8. 完工
考慮 :
1. 是否加松木架頂
2. 澆水系統
3. 黑網裝置
4. 日照時間
下一步 :
1. 花園LAYOUT
2. 掛牆半圓架

Q花園 - 原料篇 (4)

花園仔真係開工喇 ~ 進度比想像中快及順利 ! 真係好 !
戶外木腳 :




今日放工後到 B&Q ,買左四對共八隻戶外木腳,去座高燒杉木架. 一對木腳 @$38.00,係經處理的戶外木.尺寸0岩0岩好 ! 我想呢D戶外木架都有固定尺寸吧(厚35MM,高180 / 240MM , 闊90MM) 有戶外木坑紋地板墊底,加木腳座高,我一直擔心的水浸木問題就解決了.
見到B&Q都有杉木地板賣,尺寸是 45MM / 60MM ,比起我用50MM木地板,有少許出入.但B&Q地板底部去水比較差,差不多是貼著地面 .... 45MM 4塊只售 208.00 , 比起我在裝修街買的平了一大截,但底部去水就真的是差勁. 如果只是裝飾用,沒有去水問題,就真的是買得過.
五金接合件 :



在台灣書中看到的接合五金件,在花墟繽紛有售. 但很貴 :

L 碼,約3-4寸長,焗漆表面,2隻要 $30 (我在五金店買銀色不銹鋼的2寸L碼 , @$5.70 連4 粒不銹鋼螺絲.)


接合五金條 , 約6寸長 焗漆表面 ,3.5CM 闊,要 $63/2隻.( 呢一隻出面無見過)


但因為要用數量唔多,所以$93 都值得投資.
半圓椰衣吊盤 :
本來10蚊店都有,但近來實在少見. 昨日在花墟見到大大的一隻,@$28.00 ,在雅緻有售.

Q花園 - 有野睇喇 ~~~

先比少少睇住先 ~~ 已成功將四塊格仔板豎起及固定.


聽日會 :
1. 再改善一下去水(斜水)0既問題
2. 再到 B&Q 購買木腳三對 共6件, (每對@$38.00) ,完成接合兩側的格仔板.


3. 到花墟購買連結五金件 , 固定2組/4件的木格仔板
4. 將頂部2片格仔板接合.
5. 固定地下戶外木板塊

聽日有半日可以做野,如果解決到幾個技術性問題, 個花架成品應該可以面世喇 ~

裝修Q - tailor made 自家廚房 ( 收納篇)

櫃桶 :
要問師傅櫃桶承重量如何.通常都可以裝得幾重,問題在於師傅比一條乜野路軌你. 另外亦有很多人中意加上開關油壓裝置,減低聲浪及意外機會.我就覺得係個人喜好. 櫃桶大小都會有參考尺寸,所以之後到坊間的家品店,買到的小配件 / 收納分類膠盤,大部份都會合用. 我幾個廚櫃櫃桶裝的是 :
1. 餐具 ,廚具 ,利器
2. 保鮮袋,環保盒
3. 烘焙用品
4. 處理食材的金屬碟,金屬蒸架
5. 新買碗布,抹布,垃圾袋
6. 另有兩組長達兩尺半(75CM) 的大型半封閉櫃桶,放置所有不銹鋼煲及其他煮食器皿. 作半封閉是方便食具上的水氣得以散掉.
地櫃 :
分層對門櫃 :
1. 乾燥脫水食品,5kgs 膠米箱,麵食,罐頭,茶葉,飲品沖濟
<此櫃後方為向北的牆壁,溫差不大,可放食物>
2. 水槽下放置生鐵鑊 (其實是不太合適,奈何只有此櫃才有地方可安置大黑鑊) ,清潔用品,大型筲箕 ,膠制品
<水槽下櫃位比較潮濕,又接近去水渠有異味,故不宜放其他物品>
吊櫃 (我對吊櫃有恐懼,放的都是不太重的東西.) :
1. 廚房處理機及零件
<比較少用>
2. 湯包,脫水食材,季節性物品 (全盒/聖誕曲奇罐等等)
<廚櫃後是室內牆壁,溫差不大食材不易變壞,另有比較深入的櫃位,所以放置一些不常用的季節性物品>


3. 麵包機及用品,麵粉,工具等等
<常用,食材處理區及水槽就正正在下方>
4. 食具,酒杯,容器
<此櫃後面是向東的牆壁,有溫差故不宜放置食材>
5. 小電器如: 電磁爐/邊爐鍋/飛碟機/咖啡機/其他新買未開的小電器或用品
6. 方便即棄餐具,派對用品
<以上兩項久不久都會用,易找卻不易存取>

另設座地碗櫥一個,將杯碟碗都存在此櫃內.亦因為一早聲明是存重物之用,師傅用最好的木料,整個櫃未載物時重達百多磅. 因大量碗碟都會有咁上下重量,所以我一定唔會放吊櫃,亦省得爬高爬低取物時容易發生意外.

裝修Q - tailor made 自家廚房 (阿Q推介裝修街材料店)

裝修前,先到不同的廚櫃中心/傢俬店參考人家的做法/裝置.
廚房色調,用料 :
廚房空間通常都不會太大,所以色調都會偏向淺色,令感覺上光猛開揚闊落一點. 牆身及天花多用磁磚方便清理,天花亦有人會裝上鋁天花.因為清潔油垢不是易事,所以磁磚多為平滑表面. 若屬"無飯之家" ,不用考慮油垢清潔問題, 都可以考慮小花磚/立體裝飾磚/裝飾腰線.
但近來都有不少資料顯示,用小方磚去砌圖案愈來愈流行.因為花磚愈來愈貴,腰線又不太合潮流.
地面方面,要選擇防滑磚.防滑是有級數的,數字愈高,防滑能力愈高.但點防滑都好,表面一定要密度高/有COATING ,否則油鹽醬料掉到地上,會留下痕跡除不掉. 我廚房用的是鴛鴦磚(不平均色調), 防滑度忘記了(差不多最高),但因為密度不高/沒有COATING, 所以都有幾多污痕,但又因為是鴛鴦色,不細看都是看不出來.
裝修街入面有不同磁磚店,因為我的廚房並無重舖磚牆,所以無得提供資料,唯獨係廁所磁磚及廚房地磚,在 "高志時尚" 購入. 但師傅覺得此店會偏貴.近來我再去行裝修街為娘家裝修找磁磚, 發現一間叫"和昌"的店,有平亦有貴,比較多選擇.此兩間店都在旺角快富街地鐵站出口附近.

爐灶位置,抽氣設施 :
爐頭位置會偏離窗口,但不能太遠,以免抽油煙機氣喉佔用太多/長空間, 影響吊櫃收納容量.
好多時廚房都會同時設有抽油煙機及抽氣扇,但師傅提醒我 ,兩者不能同時開動,因為氣流太大/多,會打散油煙粒子,廚房好易+快會積聚油垢.
抽油煙機個人偏好"太平洋", 抽氣扇則覺得 KDK / PANASONIC 比較襟用及在市面流通.

廚櫃門選擇
有圓邊有方邊,圓邊會減低受傷機會,方邊因為有角,如吊櫃比較低又經常開關,都幾易中招"起樓".
另外開門把手都要預先跟師傅聲明,用"明抽"/"暗抽" / 把手/門底坑 都要預早聲明,因為不同把手在廚櫃門制作時,都要預留位置.地櫃把手可以選擇簡單的金屬明抽,平時可以作為掠乾毛巾的橫桿,毛巾有地方掛,就不用堆在一旁發臭發毛.
有經驗的師傅,多會為你考慮門開位方向 ,左右的櫃門開關時,會不會碰花/壞表面門板等等.如真的避免不了,可利用墊椅腳的軟身纖維貼作保護.
我的廚櫃是用暗抽,而角位需要師傅在安裝好後再用金屬銼修一修,因為角位是機器切割的,比較鋒利及界手.
在上海街的"設計易"五金店(小公園對面),有大量把手及五金配件.不只是廚房用,廁所浴室用品一應俱全.另外亦有比較西式/英式化的金屬+陶瓷手抽,生/熟鐵櫃把手,大門把手等等,我覺得是裝修街入面比較 FANCY 一點的店. 當然,價錢也會比出面的店貴少許.

五金組件,濾水器內芯及星盤
在上海街的偉發(小公園對面),有大量五金組件"小怪物組" 及星盤 (@$998 ~ @$2388) 選擇.此店取價公道,分店亦多 . 店員有禮貌及經常介紹平靚正產品給客人.店內貨品流動量大,返貨亦快 , 我在此店亦購入浴室五金用品(@$28 ~ @$138) / 玻璃儲物櫃 (@$288). 店內五金產品多為台灣出品,價格合理.
另有一間 '順利建材"亦屬大公司,多分店.家中使用的濾水器就在此店看到.

廚櫃收納
無論是櫃桶或層板櫃,我都會用一些小配件去增加存放空間,如 :
1. 可疊高的小膠盤 (存放陶瓷匙羹,小碟子,筷子架)
2. 升高了的腳架 (可盡情利用高空及展的空間而又不會阻礙存取.)
3. 小膠籃 ( 存放不易排列的包裝食材如湯包,海味等等)
以上物品可到宜家傢俬,萬豐家品,吉之島十蚊店等等搜購

裝修Q - tailor made 自家廚房 (三) 個人化廚房

選好料之後,就要規劃一下廚房的收納/煮食/電制位/垃圾桶的位置.
通常做開廚櫃的師傅都會有一貫的經驗尺寸跟從 , 如我用開的師傅會認為:
1. 地櫃檯面深度至少14寸
2. 地櫃高度要因人而異.吊櫃會比地櫃淺一點以防碰頭
3. 廚櫃後不建議密封,以免積聚濕氣
4. 廚櫃底部可充份利用空間,用作儲存罐裝飲品 / 罐頭食品之用,騰出空間及減低廚櫃的載重量.
5. 盡量減少角位/L位間格,以免得物無所用,放入去0既野十年都唔會拎番出黎.

雖說廚房是個人化地方,但對於師傅一大堆建議,我一樣照單全收.每次師傅問我 : 好唔好咁咁咁 / 得唔得咁咁咁改 ? 我都會話 : 你中意喇師傅~我唔識架~
除左 "用人莫疑,疑人莫用" 呢個概念之外,因為師傅做櫃經驗一定比我多,而且比師傅發揮,總好過多多制抓.作為客人,我會提出我想要0既野,要求師傅比意見,可唔可以做到, 有無不足地方,缺點會係乜野等等. 大家溝通之後,至會有結論, 至會有一個共識. 就算日後工程出現問題,師傅都會馬上同我溝通.
另一樣野係,我覺得唔好因為自己係老細,係比錢0既人,就要師傅100%依從自己0既做法. 通常有設計才華0既師傅都有點點藝術家脾氣 , 遇到不尊重自己才華的客人,好多師傅係唔會響客人/用家0既角度出發,只求快快趣完成工程就走人 ;如斯下來,得出的結果,一定不如人意.

裝修Q - tailor made 自家廚房 (二) 用料篇

在用料方面,廚櫃多用防火板飾面.檯面(COUNTERTOP),五金組件亦有多種選擇.
廚櫃防火板
有多種選擇,比較出名的有西德板,德利板,富美家等等.師傅會把一本本的防火膠板樣本拿給你參考,有分面板及封條膠邊.廚櫃用的防火板多數會比較平面無坑紋,以便容易清潔及不易藏油垢. 如果心急一點/想多一點選擇,可以到旺角砵蘭街的 "益大" 木行打個轉,有大量的防火膠板樣本可以拿,記得取用後,向店家取咭片,以便知道自己在那裡取得的樣本.
阿Q點子: 有時只是一片小小的樣本,看不出效果來.可以到不同的廚櫃中心 (如中英廚櫃,用的是西德板)看過效果再去決定都未遲. 顏色方面都是見人見智,我比較喜歡簡單及清淡自然一點的顏色(米 / 白 / 黃 / 粉色), 阿Q的廚房就是COPY CAT 中英廚櫃的DEMO ~ :p


檯面 ( COUNTERTOP)
有多種選擇:
石面 :
雲石 , 麻石等等.比較平宜,麻石由$30 - $50/直尺,雲石由$68 - $88/直尺.比較硬及可受熱,但容易入色,配合英泥底+櫃框,可以在檯面斬野都無問題.因為是天然石的原因,顏色選擇不多.
合成石面 :
在合成料入面加入石英粒,尤如以前的水磨石般.硬度比合成料高,價錢亦比合成料低.旺角裝修街一帶石店,都是 $138 - $238/直尺. 顏色比較多+大膽. 比較漂亮的有富美家出品.
合成料 :
如 CORIAN (美國杜邦), STARON(韓國三星) , 下一等的有米蘭石,BITTO等等,因為是合成料,比較貴 @$498 - $XXXX 不等.因CORIAN是第一隻註冊專利的合成料,所以最貴,特價貨都要@$695/直尺 (聽說近年都無呢個價位). 硬度方面不如想像中硬,不受熱,會留痕.保養期內翻修打磨,都會好煩,打磨一次微粒會成星期都唔散.檯面愈長,愈易裂開 / 有裂痕.(簡單形容一下合成料的制造方法,就是把磨成粒狀的膠粉混合如白膠漿狀態的黏合劑,乾燥後就變成硬的一塊檯面)
阿Q點子 : 阿Q用的是"大花綠"雲石面(@$78/直尺),在所有檯面下都舖滿了水泥作打底,所以檯面可以斬雞斬骨都無問題.另一個用雲石的原因是,阿Q比較大心肝+騰雞,有時無用布就去拎爐頭上加熱中的煲,太熱就會即刻放低響檯面,用石面就比較 "安全",至少唔會有焦痕.

五金組件
裝修街的店有多種選擇,台灣/德國/馬來西亞/中國制造都有.德國貨好貴喇....台灣會屬中價貨,國貨呢就...愛國唔係而家黎愛囉.
廚櫃入面裝五金組件,其實唔會放多D野,相反係裝少左.只係有一D位裝左之後會比較易存取 (L 位,較深位置等等)簡單D講,其實我覺得唔係必需囉.
阿Q點子 : 阿Q只裝左一組五金件,就係裝響爐灶旁的小櫃內,存放醬料/油/調味品,將檯面空間用作處理食材之用.亦不會令調味品樽身/容器黏上油垢. 五金架係台灣貨"小怪物組", 約$700 (偉發五金潔具), 上下兩層,行雙軌,比較靜及穩定.



其他 :
磁磚阿Q都係用平價野/前業主0既磚,不見天位置,更加係用大陸平價磚.因為磁磚作用係阻擋濕氣,所以一定要用.
照明方面,吊櫃下可以裝T5小光管,在晚間處理食材 / 作夜燈都是好的選擇.廚房天花燈,就用了 PANASONIC 大餅燈 (@$495) 貪其方便清理及換光管.
爐頭前的牆壁,加裝了一塊沙鋼板,可抵受爐頭的高溫,亦方便清理. 不會因為日子久了磁磚受熱老化而出現龜裂.


星盤方面阿Q經好友提點後選用了孖星盤,但因為無考慮要洗中式大鐵鑊 , 所以而家洗鑊都唔係太方便.但都叫勉強可以喇 .
大夫亦在水盤位加裝了濾水器,家中所用的濾水器是金屬制品,美國制造, 大約要 $1100,替換芯都是廿多元,有活性碳成份的過濾芯就要 $45,2-3個月換一次. 近來發現坊間有台灣制造的金屬濾水器, 只要 $500-600左右. 我們都加裝在西貢村屋中試一下.

裝修Q - tailor made 自家廚房 (一) 概念

好友B家中會裝修,B亦是愛好煮食的人,所以自然會對廚房要求高一點.問及Q當日裝修時廚房間格的種種,我都有少少心得可以分享一下 :
1.煮食習慣
要知自己煮食習慣係點,中式大火侯 , 定係西式清簡小食.呢樣會影響廚房用料及抽氣系統裝置.
2.廚房收納
要留意廚房座向,西斜及東南,對於櫃內物品/食物的存放絕對有影響. 另外衡量一下自己廚房有多少什物,從而去決定廚櫃的間格及位置 (如碗櫥,清潔用品,小電器等等,可選擇在非廚房範圍,騰出地方去編排廚房用品/食品的存放區.
3.留有餘地
有時某些大型家電(雪櫃/座地式焗爐)不要做到個位0岩0岩好,要預留多一點位置作散熱 ,或日後轉用較大一點的新品時,不會被固定了的位置而局限了選擇. 時下比較新的"陷"入式電器,需要留意散熱問題,在櫃中要做/預留散熱口.
4.一條龍
通常生熟食物處理地方會有異.所以,食材存放區/處理區 > 水盤位 > 爐頭 > 熟食處理區 就會順序而設立. 而此等區域所在位置的收納, 亦會順勢而安排,方便存取物品,節省時間.
5.巧用窗口位
通常窗口位會在水盤附近/前方.可利用流通空氣 / 陽光,把水盤附近濕氣/黴菌清除,減低濕氣對櫥櫃造成的損害. 在窗前處理食材 / 洗碗,不失為樂事. 曾有人在窗前安裝爐頭....結果是...唉 ~

在考慮一大堆問題之後,應該可以大約規劃到大約7成的廚房間格. 再下來,就可以考慮用料問題.

Q花園 - 原料篇 (3)

經過不停0既資料搜集,考慮成本效益同安全程度之後,最後決定在天台舖設戶外木地板, 代替紅磚腳座 / 木腳座.
走了裝修街一轉,在東達木業尋得坤甸戶外木地板,價錢是 @$110.00/塊 (50x50cm) , 一共需要 16 塊. 此等木地板可獨立移動,不需裝工,底部以木架升高方便去水.
坤甸木耐腐喜水,多用作龍舟船體,棚屋大樑,希望我無揀錯喇 .
上星期在五金店購入不銹鋼碼仔及螺絲 , 如果木地板趕及在星期尾送來,星期六日就可以開工喇 ~~^^

是日大工程 - 天台大執位

整新花架 ~ 草草搬新家 ~ XDDDDDDDDDDD
一個放室內 , 另一隻等出面整好時放響出面. 而家就暫時放住花盤先 ~



將香草搬左出去出面個架度 ~~
上面2層至係 ~~ 有 ROSEMARY , 紫蘇,薄荷,九層塔 , 甜椒 , 臭草 .



舊物再用 :
灰色膠鞋架係舊野,八年前 IKEA 買 ~ 而家用黎放花盤,下面有窿可以流走D水 / 放水盤載水.
重新安置哂重生/就死0既植物.



今日同老爺及大夫去左花墟 , 買左幾盤植物: 紫蘇,百里香,長春籐
其實自己都種左百里香,但因為無信心種得好,所以買定一盤黎鼓勵下自己~

裝修Q - 膠地板

一直以黎好中意 MOLLY 店入面0既裝潢,感覺好寧靜+優雅.
我睇中左佢地0既地板 , 係木紋膠地板黎 ~ 行上去感覺一D都唔膠 ~ 膠地板有紋有坑有木眼, 仲想點 ?

裝修 Q - 又係磁磚

再次同通菜去睇磁磚.
計過個成本唔平,所以愈睇愈平. 但唯一不變0既係,地下唔可以貪平用國貨,一定要意大利/西班牙磚, 因為日後維修牆身天花問題不大 , 但地下就好大工程 , 所以唯有將 BUDGET 放落地磚度. 牆身另外再想.

睇左好多間,尋日響最後睇0既一間磁磚店睇到一隻仿古磚,意大利磚,@$12.80/ 1ftx1ft , 係暫時睇到最平0既入口地磚 ! 以間屋0既尺數黎講,不足$6000 就可以買哂地磚料 ( 尚未計 discount )

意大利仿古地磚@友暉有限公司 @$12.80/塊 (13"X13")

另外廚房廚所0既磚, 除左地磚可能要貴少少之外,牆身可能係紙皮石瓦仔.不見光0既廚房櫃後瓦仔,幾蚊一塊就 ok .
心目中的廁所,會係水藍色



心目中的廚房, 會係黃+ 鴨蛋綠


上面呢兩隻紙皮石,真係一念天堂一念地獄~~ 一隻係$5/SQ.FT , 另一隻係 $32/SQ.FT


上面呢一隻磚 , 我本來已經好中意,但奈何搵唔到其他磚去襯 .......

至於閣仔,都已敲定係工字鐵架(支撐)+石膏板(防蛀)+膠地板(輕身). 喜愛木紋磚0既我,終於一圓心願,可以用到代用品 :
木 紋 膠 地 板 !!!!(XDDDDDDDDDD)
因為閣仔承重量問題,所以唔可以用太重0既料. 我響 MOLLY 店入面睇到0既地板 , 我以為係木地板, 原來係膠地板來的 !!! 像真度好高呀!!! 有不規則木紋,有坑紋有手感 ,仲有木眼(!!!!) 佢比木地板好0既地方就係 : 唔會有木板地咁嘈 + 有木板互相磨擦的支支聲.
木紋膠地板尺寸就如木地板, 6"X36" , 一平方尺約 $15 ~ $22.5 ( 資料 FROM 盈都裝飾牆紙公司),因為閣仔地方有限,所以材料花費都是$3000以內.

呢個星期日,可能會同阿娘去行一次,確定下D料. 再下來,就係睇潔具 + 磁盤 + 浴缸

有關花園用品價錢比較

我去過 B&Q ,花墟 , 海怡工貿 及 做帳篷用品公司夾過貨. 當然係花墟溫馨無限係最平喇~ 其他地方都有,但價錢較貴 .
B&Q :
有大量建材+戶外傢俬賣 , 但傢俬方面質數不及海怡工貿0既入口貨(MADE IN ITALY / SPAIN ). 戶外木用品亦有,但無折頭,溫馨無限0既六五折就殺哂喇 ~ 噱頭都有0既 : 代客鋸切木材, $5 / 塊, 中意 DIY 0既會方便好多.

海怡工貿 :
入口野多,雖然可能都係 MADE IN CHINA ( 如 RUBBERMAID) 但質數真係有辦你睇.戶外傢俬質數好,硬淨不易變形,價錢係紅A / 新海洋0既2-3倍.
有一間賣牛頭燒烤爐0既店, 佢0既地方係水晶膠石春地, 正到呢.....

帳篷公司 :
戶外傢俬係新海洋/紅A, BBQ 爐亦比出面貴.

有一荀盤就係西貢0既什貨店,店名唔記得喇...位置響普通道屈銀紙對面馬路口,一睇就見. 佢有好多野賣,燒烤爐真係唔貴 !! 我已有心水~~~ ^^

花墟另一收獲

落左單, 未有貨.
得網友笨哥指點, 今日去左訂貨, 準備下個月開工,建設我地0既天台小花園~~~
用料都係響花墟0既 "溫馨無限" 購入 :
1. 碳化杉木格仔網 ( 180 x 90cm) @$398.00 , 一共要九塊
2. 碳化杉木花架 ( 59 x 47 x 110cm) @$368.00 , 要左兩隻
3. 3尺長花盤 ( 90 x 34 x 27cm ) @$128.00 , 要左四隻 (呢一隻盤係全花墟最平 !!! 店員話賣埋呢d貨就唔會再入貨 )

總數過左 $3000 可以有六五折,折左之後$31xx , 我地訂左七月初送貨. 響呢個期間我地仲要做定準備工夫 :
1. 雖說木格網係戶外用,但底部不能長期座立於地面上,風吹雨打之後無得幾多年貨仔. 所以睇左書之後,我地決定要做定 "腳座" . 用英泥+磚 / 英泥倒模 做定腳座, 將木格網架高,離開地面.
2. 到五金店購買 1" ~ 1.5"碼仔 , 作用拚合格仔網的主角 ; 另一樣就係狗臂架,將高聳的花棚固定及拉緊 ( 根據 ikea 傢俬的指引,凡高過一米的傢俱都要有防塌裝置)
3. 到夜冷店尋寶,尋找合花園用的裝飾品 ( 大埔係首選 !!)


有新進展,阿Q會再 UPDATE ~~ ^^

花墟收獲 @ 14-6-2008

兩樣都係響繽紛買0既 ( 講真,好貴 ! 比起網友 ok san 昨夜提供0既荀野,實在無得比!! 奈何呢2樣野只有佢有得賣..... )

草莓罐 ( @$165.00):
想用黎種香草 !!!!
不過未摸清各種香草0既種植環境之前,都係唔好種住 ~~~ ^^
呢種素燒陶砵仲有1/2半邊大0既平背掛牆款式,但....好重喎 ! 仲掛牆 ? 多一半都係 $165 !


花架 (@$480.00) :
本來之前都睇左幾次, 睇唔上眼嫌佢唔穩陣冗冗貢.



佢而家後面加左個大交叉,成個扎實哂 !!! 真係不得不佩服日本仔0既心思,用左力學原理,係咁以2條鐵 ,修一邊螺絲就令隻花架穩穩陣陣 !
呢一邊修左蝴蝶螺絲

另一邊只係一個勾, 另一邊0既螺絲修實左,呢一邊自然會碼實 !


原來牌子係 日本仔0既 IRIS , 佢D塑膠櫃桶好硬淨唔變形,出名襟用~ 希望花架都一樣喇 ~


買滿 $500 有九折.
但我都係響度肉痛緊 ........

新 PROJECT - 天台花園仔

而家就係咁喇,一D美感都無, 加上天台出面乜野都無,又向東南,所以大部份植物都入左室內.


我而家要爭取響老爺郁手之前, 做左我地想做0既野先.
1. 去溫馨無限買格仔網做花棚,將2隻醜到無倫0既窗遮住先


2. 添置3尺花盤,用作種值有機瓜菜
3. 向花墟0既華景購買大型植物,因為比較過佢0既植物種類多及便宜,而且有送貨服務.
4. 添置合適花架 , 室內用碳化杉木 , 室外用塑膠 , 將植物分類放好
5. 添置特色花盤 ( 如草莓陶罐 ) , 開始裝飾天台小花園

裝修Q - 磁磚

好同事通菜小姐家中有水浸意外,所以要裝修,於是兩條友放工之後走左去旺角裝修街 (砵蘭街) 走左一轉.
是次我地先睇磁磚類 ~ 自上次睇左 $1500一塊0既磚之後,我唔敢再入去 CASA88 睇野,但有通菜壯膽,所以又走左入去.
今次, 睇中左地磚 (-__-""")
好似唔係好貴咁, 但只可以用響面積唔大0既廚房 (一響大地方就好貴喇 ...)
地磚@CASA88 , $28-168 ,鴛鴦色 + 4種尺碼


另外就睇中左平價少少0既石仔地,想做企缸之用.
黑白石春地@恆華號 @65.00 / 平方尺


呢個花好想做響飯廳做一個裝飾牆.令間屋更有 COUNTRY FEEL
不規則石仔花仿古磚@恆華號 $13.00/ 13X13"

裝修Q - 磁磚

因為西貢舊居要重修,所以又要去裝修街度睇一下,拎番D UPDATE 資料.
最中意就係睇磁磚 ~ 因為磁磚係影響到間屋整個感覺最重要一環. 響裝修街出現左好多新店 , 走入其中一間,睇到一D幾歐州復古0既磚.

呢隻一副 1ft x 1 ft 0既石仔磚 , 有d似歐洲0既石仔路咁,心水係用黎做廁所牆 high light :


呢一隻係光身+令面0既馬賽克, 好似一d瓷器咁,因為鴛鴦色, 所以用黎做 highlight 亦唔錯 , 心水係用黎整廚房 :


呢一隻都係有鴛鴦色0既磚 , 另有作 high light 點綴用0既花磚, 呢個如果配合到, 想用黎裝修飯廳 :