新一年新計劃~

繼續做好自己要做的事, 盡番自己本份.
不斷學習,不斷檢討~ 對人對事都係.
過去一年, 我終於令自己抹去好多不快,好多仇恨. 對於一D令我不快0既人及事,我只有寄與同情及祝福. 令自己人生路上增添仇恨, 實在係笨得可以. 人家錯, 卻將報應堆在自己身上,不是跟自己過不去,就一定是腦麻痺~~
上天要我去受到考驗, 我會全力面對, 否則對唔住人亦愧對自己~
關心阿Q 的好友們, 阿Q實在感激, 有您們一眾的關心祝福,阿Q無以為報.
日日夜夜咀咒阿Q的(XDDDD),我更多謝您地~因為您地0既存在,令我看多了人生黑暗面,更珍惜現在擁有的一切.亦慶幸一早看清您們的真面目,令我走得快好世界~ 感謝感謝~
愛我的,討厭我的, 阿Q都排名不分先後送上祝福~ :)

上海狂食之旅有感

上次到上海,除左好開心咁同好友過左幾日之外,仲對於食地方菜多左一番感受.
好多時大家都響度討論係唔係正宗正統0既時候,其實有無想過"正宗正統"何來?
正宗正統的地方菜, 真係食得落香港人的口嘛? (我叫你食正宗潮州野,你會想去死囉~~~)
正宗正統,我覺得都係因為時移勢易,地方文化有變,正宗傳統亦會偏離了原本. 在阿Q自己來說,我願意去試正宗傳統,但未必會欣賞,更唔一定會推介.......口味人人不同,更唔可以話人地0既唔好,自己0既係最好~
有朋友話: 你食0個D 都唔係正統上海菜.
Q覺得, 我從無講過我食0個D係正統上海/地方菜, 我只係話我去上海食左呢D野而已.
再問呢位朋友: 何謂正統呀? 我唔曉呀~~
朋友話: 醉蟹,肘子,馬蘭頭....呢D咪係囉, 我見你一樣都無食過.
Q 無語.
人人心中都有一套自家正宗傳統的定義.在阿Q來講,正宗傳統因人而異,原料正宗? 手勢正宗? 又抑或係造菜的人心態正宗?
響上海食0既野, 大部份都係好友推介,值得響上海食0既野.
我從無覺得要"食過某D野,至算得上係食過正宗地方菜"
只會覺得, "響呢度同阿XX食過呢D野, 不枉此生" :)

Q之生活

經過半年0既調節生活, 而家我可以:
返工
放工後一日至少有兩小時打理天台有機菜園 , 有一小時可以打理家務, 煮飯
(以前返娘家食飯反而無咁多時間剩出來, 真係奇怪.....)
一個月去參加2-3個cooking / cake course , 有一至兩次參加農友的活動
呢個月底,應該會有新相機入手,到時仲會去學攝影.
為左唔好變得太"宅" ,想保持心境年輕同身體健康, 黎緊仲會安排一星期去會所做2-3次GYM
邊度黎咁多時間?
我曾響某FORUM講:
無謂地方唔好去 (尖沙咀銅鑼灣商場 / 百貨公司呢D , 好耐無去了. )
無謂事情唔好做 (人活著就係為建造自己0既生活, 做D有價值0既野喇~ )
無謂野唔好去八 (人地0既野唔好理唔好操心 )
我0既生活可能係好平淡 , 但我好嚮往.

與友一席話 - 有關福傳 , 不喜勿看

版友仔 I 傳來 MSN , 唔知點樣就將話題扯去教徒身份上.
I問 : 你地天主教徒唔係唔使福傳架咩 ?
以前上堂試過有個基督教徒當面質疑導師同一個問題,攪到我毛管都棟埋.
其實 , 咪又係口誤同人為0既問題囉 ~
口頭上福傳,係神父0既責任而非教徒 .根據導師所言, 神父等等以口述形式福傳的,都受過專業指導,以免在言談之間令對方有所誤解 / 反感.天主教徒,主要係做好本份,響行為態度上"福傳".就係因為咁樣,令好多人以為天主教徒唔積極,什至出現人身攻擊 , 認為天主教做唔好福傳工作,愧作教徒.
咁多年以來,D人想踢我入會多的是,我一直都唔落嗒什至去到反感. 係因為響呢D所謂0既福傳當中, 我完全感覺唔到有任何宗教 / 神存在0既感覺, 只係聽到不停地 :
1. 你唔信死後會落地獄 ( 落囉 , 我成家都唔信,死左響下面咪可以住番響一齊囉 )
2. 你唔信有神 ? 你信0既, 你唔知0者( 我乜野感覺都無憑你一句就信有,你轉行去做寶藥黨喇不如 )
3. 你而家決志就會得救 (.............. 3 分鐘時間就可以決志? 食飯叫"食送"都無咁快喇 ~)

我一直堅持,信唔信唔係在於人地講左d乜, 人講你就信呢d係"人為" ,有感受有感覺呢一d至係真實. 早前証道我都好堅持呢一樣野,我係自己行入去教堂,而唔係比人推入去 / 帶入去 / 夾入去. 上左堂咁耐 ,我可以睇清楚呢個宗教係乜野黎,適唔適合我,我亦唔需要因為上耐左堂就順其自然去信. 到最後關頭我仍有選擇權.
版友仔I好體諒,我作為一個教徒,我唔敢話我自己做成點,好唔好.但因為我0既原因,我老豆 "愛上"徐錦堯神父"....0既節目,聽多左道理 , 數位朋友仔開始去教堂坐下,聽彌撒 ,呢D都係我覺得好高興0既事. 我都無正面去同佢地同深入去傾任何宗教問題, 希望佢地自己去感受去體會呢一個宗教, 從而得到啟發,知道以後0既路點樣走.

又講掟蕉

( 以上照片經後期加工,鳴謝好友長長借出大作比我亂攪 )

坊間好多唔同0既反應, 我都係堅持 : 掟蕉有失議事廳尊嚴.
佢地0既解釋係 : 一早入會已經開宗明義, 旗幟鮮明 (要掟蕉?) 而且佢地有反映訴求0既"權利"(只有掟蕉至可以反映?)
即係話 .....
響超市買貴左野,我可以上長江李超人間房度掟蕉
老闆要我 OT 唔比 OT 錢 ,我可以去佢房入面掟蕉
我D存款響銀行 , 仲要我排一輪隊至可以拎到自己D錢, 我又可以對住 TELLER 掟蕉
我納左稅但政府話要100%回本比迷債苦主, 我地可以對住曾生 / 苦主們掟蕉
邊得黎咁多蕉比人掟呀......

真係國之將亡,必有妖孽.

最近做乜

睇戲囉 ~ 不過係幾悶0既戲,但 .....
見識到d無良心0既人,
見識到狼心狗肺0既人,
見識到不知所謂0既人,
見識到大話連篇0既人 (呢個位,我就明白咩叫做 "話人者是",心涼極了.)
見識到春虫虫到貼地0既人,

都...幾大開眼界架.
雖然同我無直接關係,但某幾個位,我真係想車幾巴埋呢d人塊面度,做到咁,真係唔知個醜字點寫.
都好0既 , 又比我練下個EQ .

又感恩

( 阿Q今早上班時在路上拍的照,只是野花一朵~送給各位好友)
今日與好友 VERA 談心想起以前剛認識時的種種, 至今大家都相識了差不多十年 (以後別說網上無真情呀~~)
每一個時期我都對朋友有唔同的感受,當香港經濟最低迷時,人人都遇到不同程度的難題. 但咬實牙關地人人都捱過去了.近年見朋友們都事事順境 (我眼見+覺得) ,我也真的很感恩.希望黎緊0既日子, 阿Q 的所有朋友都事事如意,心想事成.
朋友之間總要有緣份. 跟 VERA 說起時,腦中走出一個個的面孔,由十年前剛認識的一大堆朋友,好似比筲箕咁篩下篩下,只剩低我地呢一班一年仍會慣性地相聚幾次,無所不談的朋友. 緣份,絕對係好難得. 我也跟 VERA 說 : 有的時候盡量留住及珍惜,留不住的時候,也就不會後悔.(只是我個人想法, 也不是不重視朋友) 事實上,要走的留不住,要留的也趕不走.
近日公司發生的事,令我知道人的層次可以低得嚇人.今時今日,也沒有什麼可以令我動氣, 只要理解到, 有低層次的存在,才會有高質數的產生 ,氣就動不來 ; 再說,面對層次低的人及事,也要抱著同情心,去為對方背景想一想, 人也就不會動氣.
PS.以往我常提及,朋友為我做的事,我永遠都記得. 問題中心不是朋友們為阿Q作了什麼事,而在人人有煩惱的情況下仍不嫌煩地為阿Q著想及關心,才令我好生感動.這份福氣,阿Q真的是受不起.

中國食品又毒害人

究竟呢d人幾時至會醒 ? 而家終於害到自己0既下一代.
我一直唔買唔用中國食品就係咁解, 無可能發生0既野,都會響中國制品/食品入面出現 : 假雞蛋 ,毒牛奶.... 呢d一直被認為係營養豐富0既食物,經一經中國人的手,就變成毒物 .
以前屋企一直用開的珠江橋牌調味品,梅林牌罐頭,中國粉絲,米粉等等, 全部都棄用多年, 轉用李錦記,淘大或日本調味品 ,外國入口罐頭,台灣米粉等等.雖然其他品牌不能擔保一定無問題,但有質量監管至少會比較安心一點.付多一點去買安心,都是值得 ; 若然真的要中招 ,也心甘命底.
最近另一個習慣是在吉之島旗下的十蚊店購買日本制的食品 / 調味品.按容量大少當然是貴了一點.但 :
1. 容量少,二人家庭不用吃太久,不用過期.
2. 大部份食品都經日本厚生省檢証過,質量會多一點信心.當然,要出問題要回收的,至少會比政府的反應快.
3. 不少食品原產地都是日本,因中國加工品問題而衍生的毒物事件相對會少一點
4. 店家會不停轉賣其他工廠的同類產品,因長時間食問題食品食得過量而影響健康的機會會降低.

經濟又將會倒退 ?

油價下跌 , 但電油又唔減價.
金價上揚 , 但我唔捨得賣左D金佢.
傻仔們一直以為是中國奧運影響升跌,井底蛙呀~~
米國次按風暴 ,其實早在2年前已經開始出問題. 米國佬控制全球經濟著實是事實.問題是,唔貪就唔會貧.金融風暴最需要貪心的人去墊屍底,今日雷曼兄弟真的要關門的話,只是幫米國佬卸掉一個不想負擔的包袱.明天又會有"新"的雷曼兄弟上場.

以上0既野,影響我唔多. 其實我最想0既係:
經濟跌,物價都要跌,咁我煮餐飯都會平D.

皈依的前前後後

在領洗前及後, 我都經歷過同樣的事 ,但心情絕對是兩樣.
同是教友的,可能會比較明白我的心態 / 心路歷程. 但對於一些無神論者來說,他們怎都不會明白我的想法. 我不可以對這些朋友說 : 是神 / 天主 / 耶蘇幫左我云云 ......

當然,我的想法,又可能會跟別的教友不一樣.我比較現實,喜歡實在而有事實跟據的事情. 近半年來,我所覺得的是,無論人家對你做了什麼壞事都好,千萬別要以其人之道還自其人之身.人家作這樣的事,一定有其"原因" :性格使然 / 立心不良 / 無心之失. 但有一樣事是絕對的 : 作了什麼事,一定要付上代價. 然而就像中國有句說話 : 若然未見,只是時辰未到. 在徐錦堯神父不少演說中,聖經故事 / 道理,是跟佛家 / 儒家及不少中國傳統思想沒兩樣. 中國人愛說 "報應", 在我來說就為之"代價". 報應二字,總有點狠毒意味....

所以,今次事件,我無像上一次般的反應,什至說都沒有說一句給大夫聽.到了第二天,才跟好友A說說笑笑地交待整件事的過程. 再下來數天,我心情也沒有兩樣,也沒有心跳不安,更沒有情緒低落. 一星期過去了,我還覺得要多謝2位兩老闆 :
小的把我召進去問話, 令我可以交待清楚我對他倆兄弟分家/權力鬥爭根本沒興趣,他實在是看得這公司層次太高了. 給人家祝我長命百歲,我可真是無福消受. 我也沒有惱小老闆說出這話,因為佢要祝長命百歲的人,是說三道四的人,我無說三道四,所以根本無需介懷. 星期六打雷了,我也是照出門口走上街中.
最要緊的是,佢好清楚咁解釋左 "包底" 點解 ~ 春虫虫如我, 受教了~ (我聽左人地講好多年,都唔知點解)
大的不哼一句,令我可以清清楚楚說出我心中2句說話. 旁人可能覺得此二人不作聲是不應該 , 但我實在多謝他倆呀~~ 要是他們出聲,我可沒有那麼盡興 ~

我不能說,我領洗之後就可以如此轄達.但信仰著實可以令我在事情的另一端,另一角度再想. 我一直覺得很多人都將宗教"神話化", 令人覺得難以接受,難以解釋.但經過不少事之後,感覺上信仰只會令人清醒,重新思索事情的根本,檢討自己之後,再將是非黑白分得清清楚楚.

無禮電郵 (二)

其實呢個電郵令我反感的不只係有無表明身份 / 自我介紹的問題, 最大問題反而係內容及發電郵者的心理質素.
大約係話某已退休的老師某年某月某日在學校範圍內被人惡意破壞, 發電郵者將重點放在 :
1. 老師的二手車是跟校長買的,暗示他倆關係好 / 老師可能擦校長鞋
2. 老師的教學態度太嚴令學生難受所以車子遭殃被人破壞.
3. 校長+老師查不到是誰做的破壞,因為仇口多所以查唔到.

睇完之後,我覺得呢個人唔係想撩交嗌 ,就一定係白痴 :
1. 呢d二手車買賣事件發生時我已畢業超過十年, 同我講做乜?
2. 當年老師買二手車係因為太太誕下新生兒,需要一部車子方便出入. 新車比較費不化算,而且家中多了嬰兒支出也不少.
3. 老師教學態度如何, 跟學生蓄意的刑事毀壞拉不上關係. 老師只係 "我要做好呢份工" ,而學生則係幼稚及任性, 為左自己一己之私而去傷害/破壞他人財物.
4. 係唔係仇口,要睇下邊一方面出問題. 校長方面,我不與置評,因為我畢業時佢都未做校長. 至於老師,則係公認有理想及肯與學生溝通交流的好老師.我記得我們一班同學,但凡有婚嫁嬰兒滿月等喜事,呢一位老師一定係座上客. 佢唔係自己黎,係我地邀請佢黎 ~ 當年校園中風雨飄搖,我們所敬重的老師,寥寥可數.

而家0既人,明辦是非黑白的能力低至此, 怪不得傳媒早前曾說 : 香港己死.

花架進見太上皇~~

昨日邀老爺及電車叔仔到家中來參觀天台花架仔.
都預左無好說話聽架喇 ~~~ 其實又唔係要佢地讚(人人睇法唔同嘛),但由開始到結尾,呢兩位仁兄0既反應,就正好解釋左點解佢地無乜朋友,無乜人同佢地來往.
一開始 ....
"d架唔係咁整架,要 xxxx yyyyy zzzzzz...."
"哦" (等你黎整就蚊訓喇...)
"呢d瓜, 種黎無用架...blahblahblah......"
"哦" (有收成時唔好同我拎)
"呢d盤,出面成日都有人丟出黎 ....)
"哦" (你真係好彩,成日見到,我一次都無見過.)
"呢d花(蟹蘭)唔值得種喇,買黎side錢"
"哦" (又唔係用你錢買,$15/盤又唔使點打理,你估好似你d蘭花頭咁呀...)
"呢d 木地板無鬼用架,呃錢架 "
"哦" (買黎就梗係有用喇,樓下好似焗爐咁,唔用d野遮下點掂呀...)
"個架整響呢d都無乜用,無風架呢個位~"
"哦" (話口未完,東南風一吹,阿老爺頭頂0個幾條毛毛即時企哂起身飄飄下...)
"d苗唔係咁樣種架...要用保鮮紙包實唔好理佢 blahblahblah....."
"哦" (........)

即係呢,我又唔係唔中意佢講批評我做0既,因為人人眼光唔同,我中意未必佢又中意. 但我只係覺得,如果我係咁樣同人地對答,我諗我真係會無哂朋友.有時唔係要假面假仁假義,而係客氣說話少不了,講左人地會安心0既,又唔係影響d咩大事0既,我覺得一講無妨囉.
阿老爺成日話,電車唔識講野,成日得失人; 其實,所有習慣,電車都係響阿老爺度學黎.
至於阿老爺0既批評,我收哂,不過唔會信.事關之前已比佢老點數十次,經典如 :
斬左木瓜樹個頭佢會生得多d ( 最後係乜都無得生 )
煮果醬落菠蘿汁代替糖 ( 最後係失敗 + 水汪汪 + 無防腐作用發哂毛)
次次中招賴哂野之後我同佢講番, 佢就嘟嘟咀擰擰頭聳聳肩無奈咁話: 哎呀~唔知架~人地講架咋~
嘿 !!!!!!!!!!!

不過咁,佢都有一個好好0既建議 : 將瓜盤移向牆邊,用竹將瓜籐引上金屬欄杆,以欄杆作瓜棚之用.瓜類屬一/半年生植物,籐蔓不會木化,唔會有大影響. 此舉亦令我可以慳大一筆.

點都好~我仍係為我0既花架而自豪~

一點一滴

近來某超市的廣告,打出了溫情牌,天真無邪小女孩及刻苦加班好爸爸.
今日在此超市閒逛 ,超市的廣播也同樣打著溫情牌 , 詳細的聽不到,反而聽到幾句 :
就係呢一角幾毫 ,無阿媽當日0既慳檢,我一定無我今日擁有0既野.
當然,我唔信呢間超市D野會平得過出面.
反而想起以前我對父母的點點批評 :
小學時,覺得父母不顧我感受 ,要我拎著國貨書包上學比人笑.
中學時,覺得父母有好多野可以為我做而唔做 ( 嘩~~ 老馮到呢....).
出來做事後,覺得父母唔理我生死.....

到而家,我好認同廣告中呢幾句.

享受生活

以前經常跟朋友談心, 不外是提及生活上種種 , 感覺上是 : 過生活
自畢業後出社會做事,一直是營營役役 : 起床,梳洗,上班,食午飯,繼續上班,下班 ,回家/出外消遣. 轉工麼 ? 除了在2000左右經濟極差時,要個多月才找得合意工作外,每一次轉工,都是今日在A公司離職,明日就要到B公司上班 , 沒有斷過.
一直沒有想過 ,生活是可以享受的.
在四月份時, 曾有廿多天不理世事的"宅女"生活 , 感覺真的好. 當然喇, 沒有收入,很多事很多嗜好 , 都要重新考慮才成 , 再不可以任性. 但我卻真真正正知道 , 生活是可以享受的 :
1. 早上起床, 食一個水果, 飲杯水 , 倒頭再睡 (XDDDDDDDDDD)
2. 研究食譜 , 加入自己新點子,弄個五不像怪味東西出來自虐.
3. 到花墟店子裡鑽 , 跟店家的貓玩上老半天
4. 陪老豆媽子 , 跟他們躲在家中東扯西扯.....
5. 自家制麵包 , 焗蛋糕
在這廿多天之前,腦袋實實的 (唔係實在,係實哂轉唔到想唔到野) ,記憶力大跌,什麼都記不起來......
後來跟朋友談起,才驚覺自己當時就像一條拉到盡哂0既橡皮筋 ,再沒有餘位再拉, 一定要休息才成. 於是 , 在重新投入工作時, 我堅持 :
1. 就算帶午餐盒,食完都要到外面走走. 不要留在寫字樓內
2. 把公司鎖匙與家中鎖匙分開放, 太重了.

投入工作後,對於其他人及事, 我都持不管不理態度 , 因為本身工作量已經很嚇人,再要理 / 八卦人家的事, 豈不是百上加斤 ?
身邊不少朋友在工作及生活上都有不同程度的轉變, 衷心祝福希望我的一眾好友,每一天都可以享受生活 , 享受人生.

QUALITY OF LIFE

偶然一次與朋友談心,提及 QUALITY OF LIFE.
生活有好多種, "質數" 卻有天淵之別.
生活質數, 並不在於金錢 / 花費多少.
今日,我們吃鮑參翅肚 , 覺得很飽足;
明日,我在街邊食左一碗碗仔翅一串魚蛋, 都一樣可以覺得很高興滿足.

以前, 曾沉醉在物質生活中好一段時間, 我想 , 如果當年花的錢留下來, 今日可能我可以真的退休 , 做我的快樂村姑去 ~~ 以前, 覺得很多事都不如意, 家庭 , 感情生活都如是.... 於是把開心快樂建築在消費之上. 什至演變成病態. "連根拔玻璃水果事件" 是病態的高峰期. ( 保留私隱, 恕不詳述) 但, 我唔開心.

九七年後, 經濟大倒退 , 整個社會及 港人都在適應新的政府 , 新的政策, 然後陸續有來的打擊 , 把私人,家庭生活及工作都弄得一團糟. 我亦要重新現實地去面對當前的問題. 捱過幾年後, 一切回復平靜 , 雖然自身 / 經濟環境比之前差了 , 但我的心態及心靈上, 卻是大豐收. 我感受到家人朋友的關心, 及有問題時, 一家人一齊解決問題是很重要的.

我個人覺得 , 生活質數是與 "滿足" 去掛勾, 心靈上滿足, 才是真正的快樂. 滿足於現狀, 比起期望有富裕的生活, 來得無壓力,亦來得自然. 在有宗教信仰之後, 多左一種心態 "感恩" . 對於生活中的得失, 持正面的態度去面對及解決,總比怨懟及埋怨好.

今日的環境 , 開始回復到九七前的水平. 但我卻遠比當年開心. 可能是經過艱苦吧, 平淡無浪的生活令我特別珍惜.

十年前, 我覺得自己有車有寵物有高薪無家庭負擔而高興.

今日 , 我為自己有生活目標家人齊全及滿足而高興.

天災人禍

近來實在是太多意外...
1/5 西貢大車禍, 十八人死亡
緬甸雨災
四川地震
還有無數家庭慘劇,支解案 ....

老豆曾有名言: 居安思危.
天災人禍避不了,唯有在日常生活中令自己的遺憾減到最少.以免有一日死亡就在眉睫,只可眼巴巴地乾睜眼,死不甘心. 在結婚時,我有想過自己有什麼遺憾,遺憾只有一個, 就是不能讓婆婆親自呷一口茶.
今天我再想, 都只是這一樣.
我自我慶幸,很多事都可以放開,同自己方法去令自己好過.以前很多事,過不了就是過不了,日子久了,很辛苦. 過不了又如何?日子難過還需過, 每一日太陽都會升起,月亮星辰都會隱藏在地球的另一邊 ,每一天都要面對現實.於是,我變成了 :
忘記應該忘記的,記住應該記住的
不關事的人和事,都不要放上心. 我見不少活生生例子,每一天早上帶著包袱出門,夜晚帶著比早上重一倍的包袱回家.每一天面上都寫著怨懟,苦惱.在我來說, 實在是荒謬到不得了.我想我爸媽把我帶來這世界,不是要我來拿包袱吧 ?
看過 lulu , Irene 活生生例子,我更知道人一生說長不長,說短亦不短.但鑽牛角足以毀了一生,不放不放仍需放, 有一天要走了,萬般帶不走,揹了好久的負擔也是帶不走......那....這麼多年,不是白揹了麼 ?

比面派對 - 婚宴

其實之前都寫過少少有關自己0既睇法.
可能我朋友不多, 婚宴也去得不多.但都是高興事嘛,加上是朋友,我都會好投入.我好喜歡看人家的成長片段 , 先別說關事不關事 , 無以前就沒有現在 . 人生大事,少不了生老病死,大喜日子,看看人家如何成長,也是窩心.
我想作為客人,應該把問號放在為什麼新人們挑什麼照片,有什麼意義之上. 而不是批評人家好看不好看,是不是晒命等等.作為主人家,應當有主家的風範;作為客人,亦應有客人的風度.
如果無心去人家婚宴,就唔好去.
如果只想炫耀自己婚宴, 亦唔好麻煩人家.
其實好怕人家將婚宴變成比面派對.那....親情友情那裡去了?
不是朋友,就不要監人乃後要人付人情給你補貼酒席 .與人家不熟, 就大方說句不去多謝邀請.
又要去又要鬧, 又要收又要嫌,說穿了,就是私心太重.

奇蹟

今日慕道班其中一個話題 , 係奇蹟.
響宗教角度,有神蹟與奇蹟之分. 神蹟,係由無變有,突發的, 對我地黎講,係無乜野意義.奇蹟,可能會發生響任何人身上.正所謂,"世事無絕對".
我一向討厭任何宗教將所有事神蹟/奇蹟化,將一樣野化身到無所不能,叮噹一樣.更怕人家將某些事當作奇蹟什至神蹟化,沒殺了其他人及事 (如坐飛機被upgrade都當係奇蹟一樣....=__="")
個人來說,係唔係奇蹟,好個人及主觀呀~~當自己鑽左牛角尖,而事情只係順水推舟而得出一個結果,你突然從牛角尖中開竅, 都可以當成為一個奇蹟. 奇蹟 , 我覺得只係一個感覺,而呢一種感覺,可以催化當事人去反思去檢討,令自己去明白,事情有好多個可能性,有好多角度.鑽牛角好易令人離開正路,走向極端.
不少好友都聽過我老豆以"人民科學" 去分析五餅二魚的故事,無論著眼點在神蹟,定係事實. 最終,令人知道分享及施比受更有福的道理, 才是呢一個故仔的終極目標. 係五個餅定係五十個餅, 幾多個人食, 還重要嗎 ?
當懷有一個感恩的心,去面對所有人及事,就會有奇蹟.

Q 推介 - 家是什麼一回事

家是怎麼一回事？ (粵) 2CD
分 類 : CD
作 者 : 關俊棠神父
出 版 社 : 塔冷通心靈書舍、信仰生活互動坊
價 錢 : $50.00

http://www.catholiccentre.org.hk/cbook.asp?lKey=2637&bSearchResult=true

今日上堂時聽到呢一隻CD,用極其生活化,通俗化的閒談形式,一針見血地指出現今夫婦間相處的問題 ,從婚姻生活再引伸到父母子女, 同事 , 朋友間的相處, "修道" 並非為教友專利, 面對不公平對待 / 恩將仇報 / 壓力 , 人應該如何自處 / 他處 ? 人與人之間 ,並非一面倒是黑 / 白.在灰色地帶中應如何面對他人他事. 站在對方立場想/考慮,是很重要的一環. 家庭成員,朋友之間,同事共處,呢一樣野都唔可以忽略.

我聽左之後,真係叮左幾聲.因為神父所表達的,都是極現實極到肉的解決方法.在我來講,真係即時開竅,最緊要係,內容中宗教意識並不濃厚. 我甚至覺得 : 神父你好鬼馬呀0下~~~ 內容真係抵死咄核~~
徐錦堯神父 "立體人生觀" 之外 , 阿Q 另一誠意推介.

是日迷思 - $30煮一餐飯

睇到廣告,我又想試下 ..... 如 :
DAY 1
$10魚尾 煮 酸梅
$10豬肉碎 + $5娃娃菜滾湯 + $5魚蛋
共用 : $30

DAY 2
$10 豬扒煮 $3(1隻)薯仔
$3蕃茄(2隻)+ $10肉碎煮湯
$4 半斤菜心
共用 : $30

DAY 3
$4蕃茄 + $10牛肉
$5佛手瓜煮$5肉絲
$5.5粟米湯+ $1蛋
共用 : $30.50

DAY 4
$3節瓜 滾 $10魚尾連湯
$6 炒通菜
共用 : $19

DAY 5
$8肉碎 煮 $8靈芝菇
$5 蒜茸炒大白菜
$5粟米仔鬚煲$15豬骨
共用 : $41

DAY 6
$8 燒豬骨 + $5花生 煲豬骨粥
$10 油炸鬼
共用 : $23

DAY 7
比我去阿娘度黐下餐喇 陰功 ~~

6日下來,共用左 $173.50 , 平均一日用 $29 左右 .
實際真係得唔得呢 ? 又無生果又無甜品.....
米又貴左咁多 .....

PS. 第二日訓醒覺,有新點子:
炒飯,雞翼......