2010 秋播 - 新菜盤 及 種子

星期日,入左去元朗黃三興買左D種子,去藍地陳正記買左3隻新菜盤.


呢隻菜盤係園藝館農友好介紹, 質料好,用左2年都無老化/裂開0既徵狀,起初本來嫌佢大隻得滯.都只係冬天可以用來種生菜/ 沙律菜...後來學多左種其他菜, 加上已經決定天台用來種菜/瓜/果. 所以都係斥巨資去買多3隻返來用~~ 一隻呢D菜盤要120個大洋, 比起坊間其他花盤來得大及貴D. 但用左2年都係咁好質料,算係咁喇~

去黃三興買埋秋播最後要用0既種子~


其他0既種子, 我早響T&M 度買左~仲分享哂比一眾農友姊妹一齊種~~
有花皮蕃茄,心形迷你茄,JOLOKIA鬼椒,黑椒,各式(色)沙律生菜, 青瓜, squash , 七彩蘿蔔等.
入得元朗, 少唔得去小寶度, 響佢田度影到楊桃花的照片....

種乜Q - 2010秋播

因為上一年0既斷層,所以今年春播成績好差,乜野都收唔到,青瓜都無條.....
響五月時,農友小寶送我好多膠桶, 我就將佢地拎哂黎吽泥,將D用/種到削哂0既泥重新處理後,等秋天再重新出發.
響立秋之後,我落左好多種子 :
芥蘭頭,青瓜,SQUASH,蜜糖豆,蕃茄,苦瓜, 綠茄子 同埋各式本地/外國網購0既沙律生菜.
今年天氣唔多穩定,發芽都發得唔太理想: 唔係徒長就係長唔大. 不過後天可以補救, 睇住辦喇~~~
得農友及老師教路,下一批種子會響中秋之後下種 :
王帝菜,七彩蘿蔔,櫻桃蘿蔔,菜心等等.

黎緊又將會清多一隻花架喇~ 騰出來0既位會種瓜類,將佢地引上圍欄, 就可以唔需要搭棚.
為免自己大頭蝦,先響呢度MARK低乜野盤種乜野:
小長盤(吉): 芫茜,蔥, 韭菜
14寸圓盤: 芥蘭頭X4,蕃茄X4
12寸圓盤: 綠茄子X2
4尺長盤 (4): 青瓜 X2 , squash X1 ,苦瓜X 1 ,
2尺長盤 (4): 櫻桃蘿蔔X2 , 蜜糖豆X 2,
中長盤(2) : 紅菜頭X2
綠色深盤(2): 七彩蘿蔔X2
120CM 菜盤 (陳) (4) : 各式沙律菜
2尺長淺盤(吉)(6) : 王帝菜,菜心,蕃薯苗

天台菜園動工中

話說我屋企個天台, 比我舞到天花龍鳳.....
做人同做事一樣,未有明確目標,於是立立什什都堆響一齊,響入面尋方向, 尋出路.
期間有花開富貴的風光日子,亦有打風一地都係0既悲壯情景 ~~ 有報社來電話想採訪 , 嚇到我差唔多要響某FORUM取消戶口 .... 因為實在見唔得人( 大佬我影親相,都係MARCO咋... 幾時見過我成棵野正正經經影比你睇呀.....又無葉又禿又瘦..睇到都唔開胃)
終於攪左2年,乜都試過 , 最後定左方向 : 只做菜園.
立下心腸,響天台殺戮連連,騰出空間迎接新貨抵港 (正統來講,無新貨,只有一大堆買左未用過0既野.)
早2日,響天台動工,為左腰骨著想,準備做檯面式種植, 減低腰背負擔.
用料只係角鐵~~預期會做2個,若再有位置,會造多一隻. 花盤係農友們介紹0既,好好用+可以種到好多菜.


呢個藍色0既桶, 係農友送我0既堆肥桶,當時我知道有位農友要送我,真係好受寵若驚,因為好老實,我同呢位農友實在只見過數面,我響論壇上又唔係咩人,又無貢獻, 得人地送我呢D禮物,真係嚇左一跳. 於是拎左一盤風雨蘭同一大撮鷹爪蕃薯苗作交換~~


呢一箱,就係我吽左成3個月0既厭氧堆肥 ( 一開出來真係臭到冤....不過一陣就無左味了) 將會係秋播的大補帖~~~


種得不錯0既韮菜~~~ 準備大量種植呢~~


沖繩苦瓜, 我D泥處理得唔好,佢生得好削.已經再下種子,準備再種多一棵


生長中的節瓜, 有農友可以種到手臂咁長~~


希望可以響月底前完工~~

生活上的轉變

近半年迷上種植,為的是一份滿足感 .... 可能個人本身無乜用,無乜好野優點,所以唯有借助花花草草去填滿時間 , 靠花花草草收獲去認定自己的存在價值 .... 卦 ~
於是 .....近半年 :
1. 無出過去尖沙咀
2. 絕少行商場
3. 日日放工去行花墟
4. 星期六日留在天台 / 花園
5. 夜晚0既電視劇一套都無睇過.

其實種野都係要學,學問多的是.可以去到咩微元素,礦物比例酸鹼BLAHBLAHBLAH .....

都好0既 ~ 至少而家一星期襟$300出黎有排用~
朋友送贈的風雨蘭 ($0)

比較少見的鈴蘭 (@$138)

十蚊店的裝飾品 + 斑葉碧玉 (@$5.00)

今年買0既聖誕花,唯獨不喜大紅色 ~ (@$28-@$38 不等 ) 下圖中間有噴點效果的是新色系聖誕花 "畢加索"

Q 花園 - 唔三唔四的季尾檢討

不堪一提呀 ...... 無乜野收獲 . 因為無經驗, 所以 :
1. 唔識落肥料 , 乜野氮/磷/鉀都唔識 , D野唔係肥死 , 就係削到死 .
2. 唔識揀位種野 , 種出黎完全唔係路 .
3. 唔識分乜野叫直晒 / 見光. 卒之唔係晒死就係徒長
4. 唔識保護植物 , 一次打風就將所有心血廢哂; 仲未計虫害 ....
不過我唔會放棄架 ~ 會努力睇多D搵多D知多D !

無希望就無失望 ~ 早前版友仔送0既青瓜,響我比高人指導之後 , 結左成7-8條 BB 瓜~~
爬完文之後,就黎2米高0既蕃茄唔再長高, 開始結果也不掉花 !剪葉真係有用的 !
水尾的苦瓜, 在用對了肥料之後,也"谷"出一隻隻的小苦瓜, 雖然一定吃不了,但都是一種動力!
以上食得0既野, 都會係下一季春播的指定產品. 另一樣就係將今年斥資買的玫瑰,發揚光大 ,在食物產量不高的冬季,為Q花園過一個色彩斑爛的在冬天~

玫瑰 :

Q 花園 - 繁殖篇

唔少植物都開始有種子喇 ~
飛機草開左好多花,尋日採到0既枯果就有10粒,希望愈黎愈多.另外蔦蘿都收左一部份種子.


偶然發現0既陽傘花 (Holmskioldia sanguinea),剪左數枝出黎,會用唔同方法去繁殖,希望可以成功,再將佢發揚光大.



用園藝網0既方法去杆插玫瑰,進展唔錯呀 ~ 至少無黑腳 ~


什色西洋牽牛及野生藍牽牛下了種,希望可以收多一次種子.

Q 花園 - 近況

網友仔 CHRIS 送我0既馬齒牡丹, 開好多花好靚呀 ~


2星期前買0既聖誕椒 , 已經開始變色 ~ 好可愛 ~~ ^^


20日前買0既紫藍色玫瑰頭,因為天氣涼快又有好太陽,出左小花苞.



另外響一月時杆插成功0既黑紅色玫瑰花,因為落左開花肥,出左好多大花苞 !


日本青瓜又有果~~ 苦瓜都發現有2隻新果 !


紫羅勒快高長大呀 ~

Q 花園 - 大變身

因為季節唔同,再唔係種瓜果作物0既好時候,所以就要處理一下天台仔0既植物喇.

首先將就黎枯萎0既瓜籐拔走,騰出天台另一邊有太陽的空間,改種勒杜鵑及玫瑰花之用. 拔掉的瓜果騰剪碎後丟進堆肥箱內.

再下來,將所有薄荷都轉用同一款式的花盤(方形花盤) 我現在有柳橙/朱古力/萍果/葡萄柚/萊母/香薄荷/綠薄荷, 希望有3-4月時可以在花墟/香薰園再找到新的薄荷.

早前從花墟入手的玫瑰花,也把花盤都轉成同一款式 (高身花盤)及換泥, 再放到有太陽的地方去.

上星期在花墟買的玫瑰花切花,我把枝幹都留下來,一部份沾上生根粉杆插,餘下的用生根粉開水浸3日後再杆插, 希望可以成功.

把堆肥箱都取出來翻一翻土 ,2個月前的堆肥都差不多半熟了,應該可以用在2009春播上.再把上星期在星巴克取來的咖啡渣取出,加上枯萎瓜籐及枯葉等再弄多了一箱堆肥.

拔走植物的花盤, 我會洗淨及日晒將花盤消毒,另將泥土取出及處理,然後用在春播之上.

冬天的Q花園,將會是香草及盤花為主. 再努力咪書,在2009春播時努力~

Q 花園 - 娘家有D乜

西貢娘家絕對係種植0既好地方~所以我將唔少響省城生得不太理想0既野都搬入黎呢度種 / 休養 / 培苗.

佛手瓜 ~
響省城實在唔適合種呢D大型蔓藤瓜果,所以就拎入黎,本想種落地,一想起十二月呢度張開工,即時打消念頭.種番響盤度.


刺芫荽 ~
係版友仔 CHRIS 送我0既小苗,屬越南香草的一種, 用黎驅蛇一流~~


小紅楓 ~
而家響省城實在仲係太熱,所以就拎入黎,響幾日適應期之後,尋晚落左少少葉肥.

Q 花園 - 碰碰香進展@29-10-2008

呢一盤係比蝸牛蹂躪過0既 , 色係淺左d , 但都幾壯下.


下星期, 會將佢地移去可愛0既蛋蛋花盤入面 ~~ ^^

Q花園 - 雪花木

@$10@花墟 , 好得意呀 !!!!!!!

換左盤之後, 靚哂 ~

Q 花園 - 薄荷家族

快高又長大 ~

連萍果薄荷都生得好好 ~



泥土配方 : 科學泥,沙,金沙,基肥(豐收一號)

Q 花園 - 碰碰香進展

又一次証明,種野好分地區同座向
前日同ok san 拎來的碰碰香, 一盤拎左返西貢 , 兩盤仔響省城. 好明顯地,西貢呢一盤 recover 得好快.
兩個地點都係放響露天通風地方,省城係東南(左手邊) 西貢係東北(右手邊)


響省城種蝴蝶蘭,死哂. 搬入黎西貢又翠綠又壯
好友 ta 姐拎黎托我照顧0既紅掌 , 個半月大左成個碼,而家仲係咁標花,足足有八個頭, 可以好意頭咁返屋企賀ta姐入伙.
柳橙薄荷入左黎,係咁標係咁標,仲走埋莖.
你叫我點捨得呢一度 ?

Q 花園 - 碰碰香

一直響園藝網見人家講起 ,樣子好可愛 ~ 跟倒手香是表兄弟 ~ XD
不同的是, 碰碰香是清新一點的柑橘水果味 , 沒有倒手香那一種霸道 ~
網友 OK SAN 把家中的碰碰香剪來送我 ~ 開心死 ~ 回了一大堆禮 ! (其實係想有人接收多一點盤栽令我可以迎接新貨抵港 ~ ) XDDDDDDDDDDDDDDDDDDDDDD

今日一早起身時,碰碰香經過整晚休息 , 好樣番好多 ~

Q 花園 - Hybrid Tea Rose ( purple )

昨日響花墟見到呢隻花苗剛到, 發現有呢一隻紫色玫瑰 ,二話不說就拎去比錢.
包裝盒上面有說明書 ,係比利時0既花苗 , 如何定植,要埋幾深,定植 / 修枝 / 開花季節都講得明明白白.




雖說是苗 , 根仍是老根.



晒左一日, 昨日仍是白色芽的部份開始標出葉片.