樂活Q - 果醬班@YVES KITCHEN

尋晚去左田園小屋上果醬班~跟BONNIE學做果醬.
接觸BONNIE 的果醬,大約係響2004-2005年左右, 我買左佢0既果醬書 "戀戀果醬",當時仲係對煮野唔多明解0既我,跟足佢方法+食譜+處理方式去做, 做左我生平第一樽果醬 : 公主玫瑰果醬.
買料都嚇死,淨係買莓都用左成200蚊 ! 不過, 做出來的果醬, 真係好好食!食左一啖,我馬上:
1. 有D想飛0既感覺
2. 想:我以前幾廿年食落肚0個D....究竟係乜野來架? 唔同味0既?????

然後,就做左士多啤梨醬....cranberry紅莓醬 ....另外都試過做黃雙如0既玫瑰果醬,不過佢食譜唔及BONNIE 般清晰及詳細,響好多步驟上我加入左BONNIE0既concept,最後都係成功左~
比起上課時間早15分鐘到達小屋,上次因為人多,所以無拍照~今次人少少,而且小屋快要搬了,我就拍下小屋數角.... (小屋的陳設我好中意呀....尤其係廚房頂那盞燈~ )




是夜做左兩款醬 :
奇異果士多啤梨醬




菠蘿橙皮醬


然後... BONNIE 及泰媽媽不停將唔同0既醬拎比我地食....玫瑰果醬,木瓜橙皮醬...泰媽媽辣醬...食到梳打餅都沒有了...同學仔把自己的白麵包都分享出來, 最後好客的泰媽媽,把米粉都開出來煮比我地食 !

期間BONNIE分享左不少造果醬的竅門,配搭及不同食材的處理方法.好得意...我覺得唔似上堂,似朋友傾計+分享多D~XDDDDDDDDDDDD
BONNIE 有一隻銅鍋,好漂亮! 好有granny's kitchen的味道,原來係出去搵人打造的~我一見隻鍋, 我就想用佢黎整焗雞飯...海鮮飯....好味~
離開小屋時已經差不多11點喇, 好期待新的小屋~ 再次多謝BONNIE 及泰媽媽的款待~ :)

煮乜Q - 再來柚子蜜 ( 改良+有薑版本)

星期日去左BONNIE 0既田園小屋, 睇完果醬 demostration 之後, 就明白點解之前0既柚子蜜會失敗左~
於是,尋日用餘下最後2隻柚子,再做一次.
材料: 柚子皮,糖,檸汁,日本柚子果汁, 薑絲,蜜糖

1. 柚子洗淨, 切左皮出來, 再切絲.
2. 糖同果皮/水果比例: 糖約為水果0既6成份量. 我用左沖繩0既粉黑糖,好貴...唔捨得....於是搭左一半冰糖碎落去..... 撈撈撈....
3. 柚子皮開始出水,就開爐小火開始煮(料太少怕燶...)
4. 煮煮下覺得佢好寡... 於是切左D薑絲落去.....
5. 見佢糖開始好杰,又加左D青檸汁落去(無檸檬得青檸,頂住先..),繼續煮....
6. 見D柚皮絲開始變色,熄火~
7. 放入容器,再加蜜糖落去撈.....



見到D色水+個樣開始似番街上買D柚子蜜了~不過我覺得可能會好似酸梅醬咁,`要放一段時間至會好食.

仆槌了

一早就收到阿娘打電話來, 早2日睇0既樓,阿娘尋日仆槌買左了.
響經紀幫忙游說下,業主減左30萬.都叫好過無呀~~
地點唔錯,有電梯有管理包車位.30年樓齡, 內街,新裝修,低層.3房2廁,廚房拍得住我屋企0個個,不過應該要改動一下.
阿娘又要搵迦南了~~ :)

又去報了烘焙課程

今次係報 COUP KITCHEN 11月0既課~
今次可以學的不多,唔係時間不對就係課程唔合心水.
摷左一大輪,決定去學黑朱古力蛋糕及拿破侖.
加埋十月0既柚子蛋糕及YVES KITCHEN 果醬班, 真係好忙下.
朋友笑我浪費金錢,我又覺得唔係.響早前上過0既卷蛋課及macaroon,發現去上課所學的不只是整蛋糕,而係仲要學手勢,知道食物處理方法,混合材料的常識 ....呢D係唔會響食譜度教你. 但一件成品成功與否, 真係與手勢及技術好好大關連.
上烘焙課時, 又要留意食譜有無錯,又要留意老師手勢,真係分一分神都睇少好多野, 唯有留心一點. 回家後,更加要試一試. 再調整好所有步驟, recall memory ,那學費才會付得甘心.
我好早之前去過二記學迷你月餅,學到0既係好皮毛.什至連個奶黃餡都係現成的. 唯一安慰是學到包月餅手勢.
但當我發現COUP有月餅課仲會教埋做奶黃餡時,所有月餅課都額滿了..... 唯有下一年的九月再去學.
雖然我知道配方如何,但....當中好多步驟都好矛盾.出來的味道是對了,但手感口感卻有不足.....所以我決定,無論如何下一年一定要去COUP學月餅.
我一直都好想學opera cake,不過以我的程度,都係學多幾樣野至講.
至於cake decoration,再後一點吧, 急不來~

食乜Q - 金蘭花泰國菜館

其實呢間店,響1X年前我就去食過. 當時係比佢個糯米釀雞翼吸引到所以去食.
第二次去,已經係1X年後, 仲係新相識左個好朋友阿通菜,呢間亦係通菜0既飯堂來~~
呢間店開左好耐喇,價錢唔貴,什至可以叫做係平. 不收小費,貼士,你比左佢,佢追你到天腳底都會比番你.
食物方面,都係咁上下0既野,黃珍珍金寶等等有0既野,佢亦有.
星期六同好友VERA及IVAN 去辦完婚紗相0既事,就去左呢度食晚飯~
2位準新人食物方面有限制,所以我地都係挑D清淡少油菜式.
泰式柚子沙律,用泰國金柚做,醬汁只是少許魚露+青檸汁面洒檸檬葉絲,好清新~



炒菜2碟



明爐烏頭.
另有一碗湯跟上,湯材料有香茅,酸梅,南薑等


泰式燒雞

烤豬頸肉


菠蘿焗飯



埋單 $43X , 一人都係@$105 ~好抵食~

第一次到小屋 - Autumn Country Fiesta@ YVES KITCHEN

BONNIE YVES 的小屋,經常響樓下經過,好奇怪響一幢咁0既舊樓,會有一家溫馨小屋....
今日終於走上去"到此一遊" , 因為:
1.小屋要搬家了~
2.今日報果醬班可以省下 $30 !!! XDDDD

於是帶埋一大堆BONNIE寫的書及洛神葵就出門去~到左小屋,好熱鬧~~ 有不同的小攤,果真好似一個小市集一樣~ 我仲見到早前南Y島待領養的小黑貓 LOUIS!佢跟主人一齊黎開檔~好可愛呀佢~~~~
我對唔食得0既野,關注力係少D .... 所以,D錢去哂蜜薯薯了結糖及 BONNIE0既手作果醬,小食,點心0個度....
當然有買果醬啦~ 今次買左綠茶抗氧化果醬(係BONNIE早前為JURLIQUE做的OEM) 士多啤梨+奇異果,另外一包3樽含玫瑰果醬的SET

我仲留響度睇左BONNIE0既 果醬DEMOSTRATION,學左好多野呢~
今次 Bonnie 做0既係 木瓜橙皮果醬,好好食,一D貓屎味都無的~~~

果醬0既組合,真係可以有千百種,你想得出都會有~~黎緊我會做一個百里香小紅莓醬~又可以參考下BONNIE0既書, 睇下有無新靈感了..... :)

煮乜Q - 自己做燒肉

食譜亦係跟 CKLIFE 做的~^^ 再次多謝CK無私分享 ~ ^^
星期五試左一次 , 唔係太得, 多得好友們咁鬼難食都KO左一大堆, 真係難為你地,下次再黎 ,我會整得好好架喇 ~~ 因為成功左喇 ~
第一次做,唔識又唔知,得好友們提醒,今日一早去街市買豬肉,再做一次.
CKLIFE 的食譜, 係分2次焗的,第一次應該係焗熟+入味, 第二次係焗脆豬皮.
我響中間改左一下:
個豬皮面無舖咁多鹽,上次好鹹...所以今次只係用左粗粒海鹽,係咁以洒左幾十粒就算.
第一次入爐焗熟 : 入爐前用豬插插好多次,焗50分鐘取出, 攤凍
第二次入爐開上火焗脆皮 : 入爐前用尖針再插多一輪, 確保豬皮位置夠乾身,200度上火焗40分鐘.
我晏晝要出街, 所以第一次及第二次焗, 中間隔左4粒鐘.
以前聲哥曾經教過我佢地行內人係點燒,當中有D道理我覺得有理據+有POINT,所以我又姑且一試~響焗皮之前再拮一輪.
出到黎個效果都可以呀~

托阿娘鴻福,肉檯事頭婆比左舊好野我~ 佢知我中意食軟骨, 所以起左呢件腩位比我.

老爺覺得OK, 個皮可以再焗耐D~