第一次到小屋 - Autumn Country Fiesta@ YVES KITCHEN

BONNIE YVES 的小屋,經常響樓下經過,好奇怪響一幢咁0既舊樓,會有一家溫馨小屋....
今日終於走上去"到此一遊" , 因為:
1.小屋要搬家了~
2.今日報果醬班可以省下 $30 !!! XDDDD

於是帶埋一大堆BONNIE寫的書及洛神葵就出門去~到左小屋,好熱鬧~~ 有不同的小攤,果真好似一個小市集一樣~ 我仲見到早前南Y島待領養的小黑貓 LOUIS!佢跟主人一齊黎開檔~好可愛呀佢~~~~
我對唔食得0既野,關注力係少D .... 所以,D錢去哂蜜薯薯了結糖及 BONNIE0既手作果醬,小食,點心0個度....
當然有買果醬啦~ 今次買左綠茶抗氧化果醬(係BONNIE早前為JURLIQUE做的OEM) 士多啤梨+奇異果,另外一包3樽含玫瑰果醬的SET

我仲留響度睇左BONNIE0既 果醬DEMOSTRATION,學左好多野呢~
今次 Bonnie 做0既係 木瓜橙皮果醬,好好食,一D貓屎味都無的~~~

果醬0既組合,真係可以有千百種,你想得出都會有~~黎緊我會做一個百里香小紅莓醬~又可以參考下BONNIE0既書, 睇下有無新靈感了..... :)

煮乜Q - 自己做燒肉

食譜亦係跟 CKLIFE 做的~^^ 再次多謝CK無私分享 ~ ^^
星期五試左一次 , 唔係太得, 多得好友們咁鬼難食都KO左一大堆, 真係難為你地,下次再黎 ,我會整得好好架喇 ~~ 因為成功左喇 ~
第一次做,唔識又唔知,得好友們提醒,今日一早去街市買豬肉,再做一次.
CKLIFE 的食譜, 係分2次焗的,第一次應該係焗熟+入味, 第二次係焗脆豬皮.
我響中間改左一下:
個豬皮面無舖咁多鹽,上次好鹹...所以今次只係用左粗粒海鹽,係咁以洒左幾十粒就算.
第一次入爐焗熟 : 入爐前用豬插插好多次,焗50分鐘取出, 攤凍
第二次入爐開上火焗脆皮 : 入爐前用尖針再插多一輪, 確保豬皮位置夠乾身,200度上火焗40分鐘.
我晏晝要出街, 所以第一次及第二次焗, 中間隔左4粒鐘.
以前聲哥曾經教過我佢地行內人係點燒,當中有D道理我覺得有理據+有POINT,所以我又姑且一試~響焗皮之前再拮一輪.
出到黎個效果都可以呀~

托阿娘鴻福,肉檯事頭婆比左舊好野我~ 佢知我中意食軟骨, 所以起左呢件腩位比我.

老爺覺得OK, 個皮可以再焗耐D~

理論與實踐

早前我響天台0既植物度,搵到一隻響泥入面生存0既虫~幾肥美架~
最後當然比我殺左喇~因為有呢隻虫0既盤,植株都會半死/死哂~咁,唔使問阿貴,佢都唔慌係好野來~
當我貼左相響園藝館時,有D花友就話佢唔係害虫, 有D仲話佢係獨角仙幼虫 (嘩~我發達了~),然後,好多唔同資料/網頁等等去支持佢地所講0既野.
咁, 講真我又唔係太在意~因為係好係唔好, 自己知得喇~ 不過叫做通知下農友們,見到呢隻野時,自己決定點做喇~ 要講都講哂喇~
響尋日,本來話D虫係好野的人, 走出來澄清,話0個D係害虫來,言詞之間, 仲好似講到: 0拿我而家話比你知呀, 你搵到呢隻係害虫黎呀~ =__="
唉~一早都知喇,唔知0個個,好似係你地喎~
睇書睇相,人人都識,理論只係口講.
但要配合埋觀察,分析,再配合番所認定0既理論, 先至可以支持整件事實.
理論,分析,觀察, 缺一不可~否則整件事都會變成錯誤指引.....加上仲要響公開地方發佈,我個人就覺得有D不負責任.
不過,佢地都叫做負責任, 肯走番出來講番個事實,咁都叫亡羊補牢.

Q 的書 ~

以前我買書, 好睇就會買~
小說漫畫類, 我唔睇的~因為都係虛構出來,睇黎無意思, 攪到自己虛虛浮浮, 唔睇好過睇~
傳記,一DD喇~~我唔想做名人,所以興趣都唔大~~
靈修類,覺得好就會睇會買,所以都有幾多雞湯響度~ :)唔多唔少對我都有幾多影響.
技術性0既, 好似養貓呀, 龍貓呀, 影相呀, 做陶瓷呀, 種花樣樣都有幾本. 某D階段學緊D乜野,就會去買書睇. 當中最多0既, 係食譜~
早期好濫下~ 見到靚封面就買~ 相片多過字0既就買~ 買左之後返到屋企,發現好多字眼我都唔知係乜來.....
提拉米蘇???? 奶油?????? 起司?????? =__="" ( 而家梗係知喇.....) 當年台灣文化無咁緊要,真係唔知佢UP乜.
於是就放左響度無理喇~
到中期,開始會買一D 特別小小0既食譜:果醬, 醃漬類, 日本菜 (夠清淡,我中意) X年前,響PAGE ONE 搜購到一大堆little cook book ~ 薄薄的一本, 字多過相, 但易明又易做,@$15/本, 買三送一, 於是差唔多成系列都比我買齊哂~唔少野都係靠呢堆書整出來~ 後來,呢堆小COOKBOOK 出左中文版, 感覺又難明左.... (有時有D英文你會明,轉左中文反而唔知係乜....)
到真係學識煮野時, 就開始只會買幾個人寫0既書~~~ 集中都係SHADOW KWAN, BONNIE YVES,江獻珠同梁許安璞呢幾位. SHADOW 0既點子特別多,食物造型好高貴好雅緻~BONNIE睇得出係好真誠好無私咁去寫佢0既書,我第一樽造0既果醬,就係跟佢0既"戀戀果醬" 造出來, 當時我至知道,真真正正0既果醬,係好好食,唔係一味死甜喪甜. 至於江獻珠前輩, 佢0既知識真係令我大開眼界,D野整得好唔好食,唔在於佢係貴定平,鹹魚青菜唔一定遜色過鮑參翅肚,要由食材根本著手,處理得好,才是成功的第一步.江前輩對食材的專注及堅持, 真係令我好佩服. ANNIE 早期響星島每個星期日都有大版專欄教煮食,佢對於食材處理及品質亦係好嚴緊,佢教0既菜好適合宴客之用,最緊要係對於西方菜式講解得好詳盡~對於我呢個潮州妹真係幫助好大呢~(在我黎講,西餐=碟頭飯(XDDDDDDDD )
以上幾位0既書,有一個共通點,所有資料都有"一理通百理明"0既特點. 有時,我覺得煮野唔係COPYCAT咁造一樣野出來,而係要改良+發揮 , 就番自己口味,去造自己中意0既味道/ 食法出來.
我好中意與同樣喜歡煮野食0既朋友傾計,大家響分享自己0既心得時,好多時會出現新點子,新靈感. 大家有問題時,一齊傾又可以想到數個唔同0既解決方法 ; 我好相信,人上有人,天外有天. 人地講唔講心得唔緊要,有交流有溝通,就會有新0既想法~人地話你知0既,未必係最好~ "最好0既"只係主觀0既最好,並唔係人地0既最好~
我自己覺得, 最好0既永遠唔會出現,世界上亦唔會有正宗唔正宗0既食譜, 咁樣至會有永遠探索的精神及動力.

上星期, 我響大眾書局買左一本書,作者係何肖琼,何老師係烘焙界好出名0既老師, 我買左佢本書叫"烘焙教室". 書中內容好詳細,A4 SIZE 一共有220多頁, 1/5 係講解食材0既本質/構造及處理方法及工具介紹. 1/5 係講解基本功, 3/5 係食譜. 我覺得好好呀~~~ 雖然要成$188我都斥資買左黎睇~ 真係教到我好多野呢~~~

2010 秋播 - 沙律生菜

上年睇到不少農友種得好漂亮~~~ 沙律菜長得跟海底世界的珊瑚一樣漂亮~
然後..... 見到超市賣成天價才一小袋(小家鬼祟的一棵半棵....) 我呢D唔蝕底0既C拉馬上種喇~
尋日夜晚移苗~

煮乜Q - 秋葵食譜 (炒什菜?)

呢個菜係阿姨好耐之前教過我,今日煮過, 真係好好食 !
秋葵唔係人人都接受到, 尤其係就咁食,所以阿姨就教我將所有蔬果切粒,加煙肉一齊炒.....
完全食唔到滑潺潺感覺, 仲好香好清新呢~
煙肉酌量
紅洋蔥,各式西椒,蕃茄,秋葵,小粟米全部切粒



1.燒紅鑊, 放煙肉爆香
2.下紅洋蔥煮到半軟身
3.下秋葵粟米仔及蕃茄兜幾下(呢幾種要煮耐少少至會有益/熟)
4.下各式西椒,加蓋焗3分鐘
5.食得~
唔使下鹽(煙肉有鹽喇...)乜野調味都唔使落(好香架~)
今晚就係配檸檬焗三文魚喇 ~~

煮乜Q - 再講月餅 (自家小心得)

我做0既月餅,其實係2年前去二德惠學的~
餅皮好脆,話就話係"半島版本", 其實我覺得係2回事來. 我食過嘉麟樓同餅房2隻,D皮都係軟軟的~
餅皮份量如下:
牛油-50克 (室溫軟化,不可融化,否則焗好出來餅皮會易碎)
糖粉-30克 (不可用砂糖,打不勻會起黑斑,至少要用caster sugar,我就用icing sugar)
以上2樣,用打蛋機打成淡黃色霜狀

低筋粉- 72克
獅嘜吉士粉-8克
奶粉-12克
以上三種粉拌勻後過篩2次, 與牛油霜拌勻,

云呢拿油-1滴
蛋汁-12克
在拌勻粉+牛油霜時,加入蛋汁及云呢拿油.

當成粉糰後,檯面及雙手撒高筋粉,將粉糰分成8份.

餡料可包入任何味道, 當日學0既係奶黃餡. 240G 奶黃餡分8份,包入加酒焗過的蛋黃,搓成圓球狀.

用包湯圓手法將餅皮包實餡料,開口處向下

月餅模叉入去高筋粉中推幾下, 務求粉黐滿模片位置; 取出,在檯面上敲幾下,將多餘粉敲出來,以免影響餅面花紋.

將餅球用雙手修成高身,方便入模,然後將餅模把手向下按,聽到"得" 一聲,表示餅已離模.

將月餅模移向已舖紙的焗盤, 離盤面5-6CM (BASE ON 餅的高度, 我用5CM高的模), 垂直向下,推下手制,將餅推出.

掃上蛋汁及糖水,就可以入爐. 爐溫係220度上下火焗10分鐘,再轉170度上火焗8-10分鐘.

我就做左少少改動:
1. 唔掃面,咁個花會靚好多.
2. 轉170度時,順便響焗盤下加多個板隔火,以免太高溫餅皮急速膨脹而令月餅表面有裂痕
另一個作用係防止底部高溫令月餅又歪又塌 ( 底部太高溫會月餅底向外脹起變形)