友情心中照

由細到大 , 都慶幸響唔同階段有唔同0既知心朋友 , 亦好無奈咁, 響不同原因之下, 部份 BEST FRIEND 都變作陌路人.
是我的問題 ? 還是人家的問題 ?
我想 , 係緣盡了 ~ 是在分開時互數對錯麼 ? 我覺得不是喇 ~ 相識第一日我接受對方, 永遠都會接受, 人有優點缺點 , 接受人家優點, 缺點也得一拚接受. 而不是有一日大家不再是朋友, 就如數家珍般翻箱倒篋地來一個大批判. 再者 , 如斯人等 , 我只覺得當事人在粉飾自己 , 分散注意力而已 . 心中無鬼 , 無需要做那麼多小動作. 要走就走 , 就不能洒脫點麼 ?
在我來說 , 我實在是做不出來 , 說不出口, 寫不下手.
做朋友 , 著實也需要心甘命抵 ~
今年發生的事 , 令我對"知心朋友"呢一個 TERMS 起了一個新的定義. 我日後亦不會將朋友再定位為知心 / 不知心 , 朋友就是朋友 . 再者 , 我當人家是知己 , 人家當我是老幾 , 多沒趣 ~
朋友 P , 朋友 W :
大家的友情都心照喇 ~ 請不要因為我字典中無左知己呢兩隻字而惱我 ~ 好多野, 我地都心照不宣喇 ~
J 小姐 :
在今日無左你呢個朋友, 我不覺可惜, 只覺無奈. 人人都有自己的定位 , 大家率性而行是無問題的.
在貴 BLOG 中大大串所謂指控, 我無異議 ,因為我真係做過/講過呢D野. 我會大方承認事實. 不過是對是錯 , 輪不到外人 ( 亦即是你) 去批判 . 加上你知道是否事實的全部 , 我可以同你講係10%不到.
如果以你所知 , 而去判斷人家對與錯, 你太低估了事實及真相. 當日係你 "鼓勵" 我將唔開心野說出來 ,唔好屈響心入面 ; 演變成今日 "我不斷同你數奶奶及叔仔的不是" , 看來我是傻仔左 ~ 原來始作俑者係我自己 , 呢一下真係抵死 ~
另一樣野係, 我奶奶個花名, 係你改而唔係我改. 睇黎你奚落得我老公及夫家太多 , 忘記了 ~
至於我奶奶 , 佢響我結婚當日 , 聽到你響佢背後叫佢花名, 所以 , 佢一封紅紙都唔比你.
我想我最後要同你交待的 , 都是呢一D .

腦細發癲有感

因為太子爺大婚在即 , 所以肥腦細血醣不穩情況加劇 , 近來日日都響度鬧人.
佢鬧人0既話題離不開 :
1. 佢做腦細做得好委屈
2. 成公司無人做得夠佢好
3. 佢0既心路歷程好值得一而再 ,再而三地向我地論述多幾次 .

好明顯我腦細係一個好自我0既人 , 所有野有佢講無人講 . 佢認為係唔0岩既 , 就係唔0岩 . 佢認為0岩0既 , 就永遠都唔會有錯 . 我地作為員工 , 已經對佢近期0既演講採取無反應0既態度 . 不慍不火 , 問多我地2句我地就會哝哝哦哦 胡混過去 .

其實近來我都係對類似0既人同事 , 採取不聞不問0既態度 ; 嚴重D , 我會當佢透明 . 有好多野 , 明知係廢0既 , 就唔好同自己拉上關係 .
曾見過一句幾好0既野 :
要同叻過自己0既人做朋友 , 因為佢地會令你自慚形愧 , 激發你的上進心.
唔好同自怨自艾0既人做朋友 , 因為佢地會令你漸漸無哂人生目標 , 什至不懂自我反省 , 為免大家以後只係坐在一角怨天尤人 , 不如早走早著.

放假

老陳飛左去韓國 ~~
我又放假了 ~~
又可以一個人訓哂一張床了 ~~
又可以名正言順返阿媽度黐餐了 ~~
是日晚飯 : 金牛苑

公私兩忙

近日實在忙 ~ 舅父回港2-3星期 , 雖然很多時間都往內地跑 /到泰國旅行 , 但都是挺有壓力的. 因為阿娘會失驚無神叫我車出車入 ( 尤其是可愛阿姨鬧別扭時 )
公司內亦鬧哄哄 , 太子爺大婚日子將近 , 年尾生意又比較多 , 忙得透不過氣來 ( 當然我仍是準時六點鐘鬆人 ) 肥腦細血醣不穩經常發皮四 , 又因將會當新老爺而心慌意亂 ( 第一次跟未來新抱 "訓話" 差點令大好姻緣及小孫子灰飛煙滅 ) 我發現他近日不停演講的頻率有急速上升的趨勢 ~ 就想起每當仔女大喜日子將近時, 大部份父母多數會失常 ( okok , 失態會唔會好d ?) 什至能人所不能 , 講野做野錯哂咁 ........
所以 , 呢d日子真係要咬緊牙關咁過 , 忍多一輪喇 , 過左 12月7日會好好多架喇 ~~~

婚禮指定動作 - 小時候片段

好多新人都係播番自己細個 / 讀書 / 拍拖時0既照片 . 我同小羊生都有 ~
可能我地請客0既對象問題 , 大家0既反應同情緒都好高漲 ~ 我覺得愛錫我0既人真係好多.
我都有去過人家婚宴, 睇過人地呢d片段, 雖然係大同小異 , 都都覺得好窩心同溫馨 .
有一d好可愛0既兒時照片 , 當年拍照者可以捉到其神緒 , 算係好難得 ~~ 我同小羊生的照片 , 大部份都係大羊操刀 ~ 所以 , 響意義上又多左一重.

我好記得 , 我擺酒當日 , 好多人都話我細個時好得意 , 馬上問我幾時會要小孩 , 小孩像我乜乜乜 , 小孩像老陳又物物物 . 因為我們請酒的對象都是由細睇到我地大的親朋戚友 , 合得來的同事 , 玩得來的友儕. 當然喇 , 仇口大的都不會來贈興喇 ~

呢d好多人都以為係指定動作 , 但其實唔中意 / 無興趣 / 賓客對象問題 , 都可以唔做.

說著說著 , 要回去看看我的兒時片段丟到那裡去了 , 要不放上來要了大家的命 ~~
XDDDDDDDDDDDDDDDDDDDDDDDDDDD

好文分享

睇到好友阿滿一篇幾深情0既 BLOG , 好有意思 !!
當中我覺得幾好0既節錄如下 :

對我黎講, 呢d古仔係高級程度人生課程,
唔知算唔算慶幸, 我冇遇過. 我知我一定唔曉得面對,
寧願讓關係破裂.............我係一個自私ge人, 我認為我ge感覺最緊要.
一唔妥, 我或者唔會走住, 二三四五六....十之內ge唔妥,
我絕對唔會再苦心經營, 寧願一走了之.

但每段關係, 又豈止十次之內ge唔妥丫~
所以我ge人生內每件事, do唔會好出力去造就成果.
但我知道, 當你遇到每種人生難題, 好似ok san咁,
你有出力去付出, 會面對問題, 肯承擔, 肯放低....
無論你&佢會有乜轉變, 結局如何, 以後又會變成點....種種各樣各樣,
你已對得住自己, 亦造就精彩美麗人生

其實人生入面有好多野, 係無 MODEL ANSWER , 可能大家窮一生精力, 都求唔到一個答案. 因為人生有好多階段 : 年少無知, 戇十十 ......甚至去到做左老薑人呀咁, 都有大量問題響心入面轉緊.
執著 , 就唔會接受不合心意的答案.
所以 , 一個開心人生係要放棄好多好多0既執著 , 甚至原則.
要付出, 會面對問題, 肯承擔 , 亦要肯放低 , 缺一不可.
我曾認識的某人, 只會要他人為他而付出 , 自己卻一點都不肯面對問題 , 肯放低卻不肯承擔. 出現問題後只會馬上消失 , 然後在一個半個月, 甚至一年後重提舊事 , 更要命的是他會曉以大義的走出來對你說 : 因為你性格有問題, 所以我讓你冷靜下來才回你的信 / 電郵 ...........
打鐵襯熱 , 今天的事今天做 ....... 無人不知喇 ~~ 逃避問題 , 最終只係令自己不斷失去身邊的人, 錯失身邊的事 , 溜走周遭的機會.

人生無完美 , 但絕對完全係可以 "心甘命抵" 的 ~

相由心生

尋日響街上見到一名"故"友 , 所謂故, 當然唔係已故, 只係大家不再是朋友而已.
以前見佢, 都係開心樣 , 面上有笑意 , 就算唔係有d咩好笑野令佢發笑, 但點都會係一個 happy face.
尋日見佢, 面色陰沉 ...... 陰霾滿佈 ....... 好想埋去問下佢 : 你無野嘛 ?
當然我無埋去問佢d乜喇 , 當日我同佢不再是朋友, 當中牽涉好多野 . 詳情是非黑白錯對都唔講喇, 好多時路係自己行出黎 , 乜野方向乜野形式走唔走得完 , 都係自己去揀. 作為朋友 , 當日大家一齊走一條路 , 遇上分叉路大家持不同意見 , 然後分道揚鏢 . 雖然路向唔同 , 但都唔想人地遇到不如意的事.
尋日見到0既 , 係同佢以前個樣好大分別 , 完全係變左另一個人咁. 五官仍無變 , 變0既係佢0既神態 , 陰霾之下眼神好 "自我保護" 下 ( 即係"起哂鋼" 喇 ~~) 我直覺上覺得 , 佢已經唔再係以前0既 xxx .
希望佢無乜事 , 只係我過敏喇 .....

食乜Q - SHAKEY'S PIZZA

與好友兩公婆一起晚飯 ~~ 兩對陳生陳太開飯去 ~~~
因為太肚餓喇 , 所以係咁食無影相 ~~
最後龍蝦比薩 ($198) 出場 , 不可不影 ~~~

另外叫0既仲有沙律 ($36) 小食拚盤 ($78) 燒排骨($88) 意粉三重奏 ( $98) 甜品拚盤($88) 另有加一 .

份量都係預四個人 , 好好食~~ 尤其係個 RIBS , JUICY 又多肉 , 預先為客人切開係最貼心0既安排 ~

劈乜Q - 2007 BEAUJOLAIS NOUVEAU

由 2003 年起, 我每年都會買 ~

意義重大 ~~ 係我結婚時婚宴用的紅酒, 名符其實0既 PARTY WINE ~~ 當晚我當佢係提子汁咁飲 ~

又一小玩意 - 絲帶

以前小時候返學, 阿娘會為我別上不同顏色的絲帶 , 後來上小學,不再畜長髮, 以後再沒用絲帶~

不追從何時開始, 不同的商店都會因美觀 / 招徠的原因,在售出的貨品上別上別緻的 / 主題顏色 的絲帶 .

我亦不知從何時開始, 把這些絲帶都留起來 , 放進 CRABTREE 的 HATBOX 內.

當然, 很大部份都是蟹樹的絲帶 ~~

小玩意 - 圖案機

個名係我作0既 ~~ XDDDDDDDDDDDDDD

係早幾年響商場0既展銷會度買 ~~ 有好多圖案 , 我中意葉形0既野, 所以買左冬青,四葉草及楓葉 , 另買一個貓貓 , 又覺得可以為信封綑一個靚邊, 又買多兩隻做 BOLDER ~~

無題

昨日與朋友 W 見面 , 當然又是天南地北無所不吹 ~ ( 連蛇王都要商量一下公事, 我地算係對得起公司有餘 ~XDDDDDDDDDD)
我同佢相識於微時 , 可能係人夾人 ,又或者係脾性近 , 又或者佢係雙子座0既原因, 大家一直係好朋友 . 我地價值觀差不多 , 所以 , 對好多事0既睇法都好相近.
我地大家都無想過有一日會結 "到" 婚
我地曾經研究過老來一支弓時 , 點樣去搜集汽水罐及紙皮維生
我地甚至研究將汽水罐丟出去比車碌扁會唔會慳水慳力過自己去踏
我地大家識左男朋友, 就算對對方男友幾不滿都好, 都唔會出乜野聲
我地各自決定結婚時, 雖然心中擔心對方會否嫁錯郎, 但仍係唔會出聲
一直到今日 , 我同佢最似0既係 , 就係大家都唔會 "怨" , 我地接受自己一手一腳開出黎0既路 , 接受個天比我地0既任何考驗 , 對於不如意不開心0既事, 我地自己去化解而唔會訴諸他人 , 求諸鬼神.
佢認為我由開始結婚去到今時今日 , 係終極泰來 .
我亦認為佢由結婚到今時今日 , 係修成正果.
我想對於我自己 , 好0既可以話我忍得 , 唔好0既 , 可以話我深謀遠慮 . 對於某一D無意識咁攻擊我0既人, 我唔會對佢地馬上反擊 , 要等所有事實都無得返轉頭時, 我至會用一句說話 / 問題打殘佢 , 用我自己0既方法去令佢地心甘情願咁收聲 .
所以當日我選擇啞忍一D對我唔公平0既指責 , 為著就係數年後只係歷時一兩分鐘與老爺 +LULU的對話 . 值唔值 , 見人見智 . 我認為值, 就係值.
曾經話我背負太多 / 認為我被迫瘋左0既 人, 只係你地眼光太窄而已 . (唔好話我死撐/認叻 , 反正此數年經歷咁多野我仍死唔去 , 我絕對有本事去講呢D野卦 ~)

新屋少量傢俱

飯廳餐櫃 ~~~ 式樣參考 Laura Ashley 的傢俱 , 再加少少改動 ~

http://www.lauraashley.com/bin/venda?ex=co_disp-view&curpage=1&icat=fustorage&bsref=lauraashley&itemsperpage=99&isviewall=1&bklist=icat,3,,fustorage

電視櫃 ~~ 因為地方唔大, 所以做左一隻咁0既小櫃~ 後面開左窿比電線走上走落.

休息間的外圍 ~ osim 先生會放響入面, 所以上面開左窿, 比對住的冷氣機風口將冷氣吹進去.
客房中的衣櫃 ~~ 係我地而家用0既櫃的 3 倍 ~ 另外橫樑壓頂的問題都解決了~~~

斬雞小心得

有朋友問我點斬雞 .....其實.... 我都唔係太識...........成世人斬過 2-3隻雞咋 .
其實都係睇得阿羊太 / 婆婆斬得多 , 所以學到少少 :
1. 雞要凍, 乾身 . 一定唔可以熱, 會整到霉霉爛爛 .
2. 刀要利及重, 否則會容易有碎骨.
3. 落刀時用近刀柄位置落 , 力學上呢個位置係最用到力. 一刀一下就可以斬開 .
4. 斬雞位置表面要平穩 .
次序 :
1. 分屍 ~~ 將雞脾( 上及下脾) , 雞爪 , 頭頸 , 雞翼及軀體分開.
2. 將雞爪 , 雞頸先放在碟上, 作用是"墊高" 之後斬好的各個部份, 令整碟雞視覺上豐滿一D ~
3. 將雞翼一開三 , 在關節位落刀, 減低有碎骨機會 . 分開後, 又分兩邊放好在碟上
4. 將雞身分雞背及雞胸斬開.
5. 先斬雞背: 分開兩邊 , 斬件, 按次序分開放在雞爪/頸/翼上面
6. 後斬雞胸, 斬件後放在雞背中間
7. 最後斬雞脾 , 通常會斬開四件, 然後分放兩邊.
8. 有頭有尾 ~~ 將呢兩部份放番去頭同尾度.

又收手信

是日手信 : 中山某酒樓馳名鹽焗雞一隻

特色 : 走地鮮雞 , 鹽焗香味徘徊響車度久久不散


羊太響中山拎落黎時, 仲係暖0既 , 所以 , 響今晚又無擔好食0既情形之下, 返屋企之下即刻斬出黎食 !!!!!!


雞肚入面充塞住一大撮蔥 , 雞味好鮮好濃 ! 雞唔大隻, 所以一食就半隻 ~~

好味鹽焗雞來自中山 "南海漁村大酒樓"

雞唔大隻 , 有d似大頭雞 ~~ XDDDDDDDDDDDDDDDDDD

如果有伴碟炸蝦片就好喇 .........

舅父洗塵宴

舅父第一餐洗塵宴 ~~ 地點係中環某私房菜~~
是日仲有auntie Louisa 0既父母, uncle Jacob 0既細佬妹等等 ~~一行16人 ~食左八道菜 :

高麗蝦

蟹王扒竹笙

紅燒翅

倉魚兩吃

鮑片海參

炸子雞

生炒糯米飯

紅豆泥

樣樣都好好味 ~~~ 廚子係崩牙成徒弟, 紅豆泥及糯米飯更加係招牌貨, 不可不試.

d咩娥姐呢d , 真係要行埋一邊 ~~~ 至少呢度係真材實料 ~~

呢度同聲哥又係2個 style ~不過一分錢一分貨 .....

是日係舅公請客 ~~~~ 多謝劉生!!!!! XDDDDDDDDDDDDDDDDDDDDD

舅父又返來了 ~~~~

響 Winnipeg 0既舅父返左黎香港 , 我地理所當然要去做機場快線 ~~

舅父帶番黎0既手信唔多 , 佢比多左錢去寄一箱急凍野番黎, 有3大袋急凍鮑魚同六大包野生煙三文魚 ~~ 另外大量朱古力及果仁 ~~~

舅父送左一包煙三文魚 , 2包sundried 無花果 ( 我最喜!!!!! 好耐至捨得食一粒 !!!!) 一合夏威夷果仁朱古力比我 ~~~

多謝舅父 !!!!!

一包有半條 preslide 巨形三文魚 ~~~ 都唔知點食......

急凍墨西哥鮑魚 , 一隻有一成人手掌般大

心虛

今日見識左兩種心虛0既人.
一個係同事 , 一個係管理公司 .
同事方面, 仍係受個 short short 地0既 router 折磨緊, 再加埋我 , 佢地想去睇下個市升/跌成點都無辦法. 最後忍左一粒鐘 , 就黎中午結數 , 頂唔順又同我講 : 唔抆條線 , xx 部機印唔到野.
我覺得佢心虛0既係, 印唔到野 , 咪去抆囉~ 而家我唔係去收埋個 router , 佢地成個抆左去都得. 而且我只係打工, 任何野我都係無話事權. xx身為老板娘其身不正 , 連抆條線都唔敢光明正大0既, 唔係心虛係乜野 ?
最後, 我都係回佢地一句 , 要做正經野咪抆囉 ~ 使乜問我?

管理公司方面, 我地比佢0既 dead line 係 16/11/2007. 佢今日就打電話黎喇 .
打左兩次, 我都係唔聽. 然後, 我再回佢電話 . 問佢地搵我做乜. 條粉皮經理唯唯諾諾 , 話收到封信云云 , 響佢想入正題時, 我一輪咀咁講 :
阿粉生 , 呢d野你搵番陳生, 封信係佢出比你唔係我 . 而且, 我上次同你講得清清楚楚, 響你地0既誠信破產成咁, 唔該你都係比番白紙黑字0既回覆比我地. 唔好以後又同我否定呢樣否定0個樣. 口講無憑 , 你都係跟番封信0既要求去做.
然後條粉皮又問我拎大夫電話 , 我唔比佢 , 反問番佢 : 我地當日申請要裝修, 好似查家宅咁填十九萬份表, 你有架 ~~
連業權都可以亂認0既, 我就咁同你 settle , 咪好便宜你 ?

嘔一口烏氣

終於可以執到去 tray 上面0既野.
今日我未停過手, 除左食飯時行左出去之外, 一直做到未停過. 開始打到單, 追到船期 , 出到email 問客野, 真真正正開始做到要做0既野.
今日班人收歛左 , 至少一個早上, 唔會好似響股票行開工咁. 由11點開始又上唔到網 , 我唔郁呀~~ 上唔到咪上唔到囉 , 做乜0者 ? 家下會死咩? 到十二點半, 我至抆一抆條 cable .
我去完食飯返黎 , 全部人都齊哂響度, 又好似股票行咁嘈. 我唔理佢地咁多,做番自己野.
一早同 janice 鬧 , 本來都無咁慶 , 佢話個 router 本來有問題呢一下我慶 : 你地成日響度上股票/銀行網 reload reload 又 reload , 根本公司 bb 0既 band width唔係比你地咁用 , 所以咪 hang 哂囉 ~~ 一切都係你地自作自受 , 你地做乜我唔理 ,因為唔關我事 , 但而家影響埋我做公事野, 你地無資格反駁我囉 .
再講 , 我做緊公司野, 你地做緊私人野, 大家有幾多籌碼 , 心知肚明喇 !
如果認為一個印花 , 一包餅, 可以為你地d仆街態度粉飾一下0既 , 死左條心喇, 係我小氣又好, 係我心胸窄又好 , 你地自私時我都係為自己 , 有何不可 ?
如果我咁易無事 , 我就唔係 Winnie .

好脾氣。壞脾氣

以前讀過好友A的一篇網誌, 大意係話 , 係唔係個人平時乜都無所謂 , 好脾氣D就要比人恰, 恰完都唔可以出聲 : 你發脾氣 係因為你小氣 .

今早同事知尋日有野衰左 , 唯唯諾諾同我講左一堆野, 佢唔講我無咁嬲 , 講完我仲慶.

我慶到係要對佢講粗口 , 最後同佢講 , 如果router 壞 , 咪比錢叫人黎整囉 ,抆乜野 ? 我做唔哂d野 , 係唔係佢地同我做 ? 佢答得幾口爽 : 如果係 PO CONTRACT 呢D我可以幫下手.....

問題係 : 我要做0既 , 唔係呢D囉 , 除左太子爺同我 , 無人識做. 要教你地響邊度搵 catalogue , 我想仲會辛苦過自己做.

是日大脾氣

我好少響公司發脾氣, 真係好少,因為返工係求財唔係求氣. 我頂哂籠係唔出聲, 但不至於鬧人 .
呢一輪 , 我真係慶到爆燈.
為乜 ? 全民皆股囉 ~
公司有五個人 :
一個 ceo , 一星期可能返一日,呢輪忙結婚野 , 更加無話可說
一個會計 , 一個so call 老闆娘 , 一個同老闆租張檯開新公司0既舊職員.
最後一個係我.
呢一輪股票市場大起大落, 在我黎講無乜特別, 因為我唔買呢d野. 不過對於其他人, 就非常吸引. 於是, 呢一輪響公司度, 每分每秒都係聽到d數字:
升左幾多毫子
跌左幾多點
入左幾多手

呢d唔關我事0既野,都唔值得我留意. 令我嬲0既係, 佢地咁攪法, 已經開始影響到我做野.
我一直自嘲我只係個打什, 我乜野都做. 於是, 一個人做兩個人0既野, 日日做到仆哂街. 我做0既野, 就係 shipping 加埋出口報價+接單 . 我每日坐響電腦前面, 出email . MSN同船公司對單打 bl 出 s/o . 網路暢通對我黎講, 係好緊要.

好喇, 我而家都算喇, 3:45 - 4:15 盡量避免用上網. 咁我上 server 拎野做野都要架, 佢地得閒0者, 我唔係嘛 . 今日 , 就響我做到火紅火綠之時, 班友認為上唔到網 , 抆左一條Cable然後又插番 . 於是 , 我部 printer 響度印緊野, 就係咁炒起左. 成部無哂反應.
我嬲, 唔係因為炒起左部 printer .
我嬲, 亦唔係因為佢地攪到我做唔到野.
我嬲, 係因為佢地d仆街態度, 令我差D忍唔住要打L 7 佢地 .
A小姐 - 話抆就抆 , 我問佢, 對NETWORK 有無影響 , 佢晦氣咁話 : 梗係有喇 !
(你憑乜野對我侮氣呀? 你估我唔知有無影響咩 ? 我要你自己講出黎咋 !!)
B先生 - 又係話抆就抆 , 最仆街0既係, 佢問我 : 抆唔抆得呀 ? 唏都唔使問架喇 ! 然後照抆可也.
(你上唔到網係個網頁JAM左, 我一直出入EMAIL 都無問題, 你唔L 使問咪唔好出聲囉 !我從來都無認為你係啞架 ! )

係唔係我唔買股票 , 所以響少數服從多數0既情況下, 我乜野聲都唔出得 ?
係唔係佢地搵錢好 L 大件事, 我返工點都收到人工, 所以 , 我係可以不理0個件 ?

如果看官中有呢三件入面是但一件 , 我要話你知, 大家有計傾一件事 , 公私要分明, 我亦唔會 ON L 狗咁去同肥佬告狀 . 食得鹹魚抵得渴 , 你地阻住我做野我亦唔會再比面你地 , 有乜野後果, 你地預左要自己去承擔 .

是日迷思 - 表達與理解

今日接到張單 ~ 本來好開心, 睇清楚個內容 ....... 咦~~ 唔同哂架 ?
上星期與呢個客傾左成星期, 改 terms 改價錢 ......... 大家響電郵度協商哂之後, 今日比我地0既訂單 , d條款又返回原位 . everything back to the begining
好唔客氣地 , 將大家之前協商好的條款, 與阿貴客0既訂單條款都 c&p 出來, 讓客戶好好地睇清楚 . 未等客回覆我就出門做野 , 費事為左d九唔搭八0既人浪費我時間.
好怕d人 , 突然轉 channel , 又或者答非所問.
我自問表達能力唔係話好好 , 但都會細節重點都交待好給對方, 大家才有交流, 才有商議餘地. 否則最後都只會係得個桔 .
以前試過與某人表達我對某d事0既感受, 點知對方顧左右而言他, 我努力左成粒鐘, 對方都係迥避問題, 唔肯正面回應. 畫公仔出哂腸 ( 都唔止出哂, 係甩哂 ..... ) , 最後, 我放棄 ( 對 , 佢成功了~~ . 到早兩日, 我才知道 , 原來做物業管理的人 , 遊花園轉話題避問題是強頂 ~ )
尋日阿姨打電話來, 如轟炸機轟我一大輪之後收了線 ........ 電話的兩方, 各有各講 , 我有我問佢有佢鬧人 .......... 其實件事我亦唔係當事人...... 最後我係O 哂咀咁收線的 . 收線之後, 諗左一大輪 : 點解D人想脾氣搵人發洩都會搵我 ? 好咩我 ?

對於呢類性格0既人 , 我只係寄與同情, 我唔會問佢地 : WHY ME
問左又如何 ? 又遊多一次花園 ?

阿 Q 要發功 ?

今天慕道班課題 : 今天天氣如何 ? 感覺如何 ?
今天是新舊人再合拚上課的日子 ~~ 今日大家分享感受 ~ 暢所欲言.

每一天我都為自己打造一個晴天. 因為如果我不是晴天 , 大夫就會變成陰天.
我自己打造的晴天, 我心甘命底.
半年以來, 我不再執著於某d感覺, 某d睇法. 今時今日要辣慶阿Q , 閣下需要有更大的能耐才成. 背負包袱不是易事 , 要卸下就更難. 尤其在一個月前, 我知道一些事實一些人的真面孔之後, 令我對自己更加有信心, 我知道自己有多少籌碼 , 有多少資本, 去令自己活得比人好 ~
今天遇上一件事 , 令我知道自己並不如一些自以為是的人所想 ......
今日新屋收到管理公司兩封警告信, 於是我馬上打電話到管理公司去 , 找一名經理了解一下.
此經理先不說肚子有多少墨水 , 先說態度. 在我來說 ,是唯唯諾諾 , 之前交手 , 此人的語氣答案一點都不堅定.
因為我對法例不熟悉 , 亦沒有大廈公契在手 , 所以 , 我只就之前我們修葺天台時 , 管理公司的答案去與此人對質.
好喇 , 此人一直迥避我的問題 , 只是一直跟我說一堆沒有根據沒有理據的空言白話 , 最後竟然否定之前對天台業權的確認 , 還夠膽死叫我將分體冷氣機的散熱器放在屋內 !!!!
比著以前, 我一定會氣炸了肺, 擲電話了事 . 然後想一輪之後認為自己太過份 , 冤枉了好人.
今日, 我無擲電話 , 只是一直迫對方答我問題 ( 我對於不停迥避問題中心的人實在感到煩悶) , 最後我跟對方說 :
X 先生, 如果我有錯, 我一定承認及改錯. 但好明顯你而家對自己0既所作所為一言一語並不負責任. 你的誠信既然如此低劣 , 我亦唔會再與你有任何口頭上協議 . 日後 , 我將用以律師信及白紙黑字與貴管理公司聯絡.
此人馬上說要為我查一下公契, HOLD住我條線叫我等.
我等 ? 傻喇 ,等一個大話精覆我 ? 唔好玩喇, 佢HOLD我線之後我馬上收線, 一直到而家佢都未打過電話黎 .
回到家後我同大夫查看一下公契 ......
好笑喇 ~ 好玩喇 ~
我就慢慢同佢玩, 然後一下打沉佢.

我的相對論

( Copy from : http://www.alessi.com/catalogo/oggetto/Mr.+&+Mrs.+Chin/salt+and+pepper+set/2030/3880/)
一樣米養百樣人 , 從細開始 , 我就是不會討人歡喜那類可人兒.
我開口會咬著舌, 永遠響唔適當時候講/做唔適當0既野 ;
我不會說開心笑話 , 與我一起人的人乾納悶 ;
我頭腦轉得慢 , 給人家拿來開玩笑也懵然不知 ;
讀書時給同學排擠, 因為我有一個當訓導主任的親戚.
上了中學 , 風頭份子永遠不是我 , 因為我沒有追上潮流 , 不漂亮 , 男人頭 .
當然有暗戀高班學長喇 , 不過 , 又是得個暗字 ~
出社會做事 , 我永遠要付出比人家多一倍 , 甚至三四倍努力 , 才可以得到想要的東西 . 我不是太蠢, 因為我不懂得討老闆歡心.
所以 , 我一開始就知道自己不是一個可愛的人. 但 .......
縱使人家不喜歡我 , 我外婆還是把我帶出帶入, 把我留在她的廚房禁地 , 到處告訴人家 : 這是我最錫的孫女 , 她最像我.
縱使同學們不喜歡我 , 心儀的學長心有所屬 , 我仍有很多與我稱兄道弟的異性朋友
縱使我的工作沒啥進步 / 突破 , 但老闆仍要求在他出差時, 由我代理他的工作 .

天主教認為 : 每一個人都是罪人 , 天主教是罪人的教會. 可見人人都有不足的地方 , 世事亦是豈會盡如人意 .但人及事都是相向的 , 有黑就有白 , 有甜就有苦 . 我有一個嗜好, 就喜歡儲 / 捜集 鹽及胡椒瓶套裝 . 因為我覺得人生好多事 , 都是相向, 相對 , 相輔 , 相承. 調味品瓶可以代表不同的人生 , 雙向的角度 .

Happy Spicy 套裝調味品瓶 by Stefano Giovannoni for A di Alessi

( For more reference at http://www.alessi.com/catalogo/oggetto/Happy+Spices/container+++shaker+for+spices,+in+leaf,+fragment,+grain+or+in+powder/1086/3626/)

看罷小貓藍藍近況有感

"可愛小貓貓腿遭人齊口砍斷" 近日在各寵物版 / 講場鬧得熱哄哄 , 說真的 , 我一篇都無看過. 因為我受不了.
今日 , 看到藍藍真面目 , 藍藍大眼睛 ( 是面太小了吧....) 沒多少披毛 , 傻呆呆的表情. 腿上套了手術後的保護襪子 . 暫托人的blog 連日報告了小貓情況 , 訪客 / 路過的人都有留言. 當中一篇 , 我看後感受很深.
訪客寫得反調 , 字裡行間充滿問號 ( 不是火藥 )
樓主回文得體 , 不慍不火同時表達了自家感覺看法 , 亦理解訪客的心情.
最要緊的是 , 雙方都是討論 , 論事不論人.

人有反思 , 絕對是令自己性格宏觀進化的必要因素. 反思自己不足 , 欣賞他人長處 , 好歹都可以為自己對人待事開辟到一個新的角度 . 有一些事 , 可能到世界滅亡前都唔會有答案 , 閣下不滿意之時 , 他人何嘗不是充滿疑惑 ? 一個意見不合 , 吵起來又如何 ? 可以改變事情 , 改變結果嘛 ?
樓主說得好 :
我們不是南丁格爾, 不是馬丁路德, 不是德蘭修女。在命運之書裡面, 我們也不過是推進故事發展的幾粒字仔。
( 摘自 : http://szekiu.mysinablog.com/index.php?op=ViewArticle&articleId=845661 )
當自己認為自己好偉大 , 拯救了 / 將會拯救一條生命 , 在不同地方大擂大鼓地集合一眾同道中人去為一條生命作出貢獻時 , 大家都反思一下 . 在自己心甘情願下去做某事 , 閣下又點去睇一d持反調的意見 ? 是否就可以以偏蓋全 , 沒殺人家就是無血性 , 無同情心 ? 救了一條生命 , 就是功德無量 ?
世上值得大家思考的事多的是 , 最要緊的是 , 在藍藍事件上 , 大家可以學到宏觀一點的做人態度及價值觀 . 而並非去爭議救定唔救 , 邊個好心 , 邊個狠心 .

堅持

一個人成世流流長 , 一定有好多堅持, 唔同階段有唔同0既堅持 .
以前讀書時0既堅持 : 唔穿耳,唔著高跟鞋,唔打寫字樓工,唔會戴 con ~
十年後 , 做足哂 ~~
同前男友拍拖時堅持唔做跟得女友, 比自由空間對方,有自己0既消閒方式 , 唔好成日黐住男友 .
十年之後, 樣樣做足.
以前為某d事, 同老豆企硬左五年 , 堅持佢唔講對唔住 , 我唔會認佢 . 最後佢有癌症 , 比阿娘罵我冷血. 響佢日子無多之下, 我選擇同佢破冰. 至於真相, 我至今仍未知道.
點解會無哂堅持 ? 因為現實並不在自己掌握之中. 所以,我向現實低頭, 改變自己想法去遷就現實 , 去令自己好過, 去令整件事更為自己 / 人家接受. 係唔係無骨氣 ? 骨氣幾錢斤 ? 感覺又係幾錢一斤 ? 有一d野走左 , 幾有骨氣幾有堅持都好 , 最終都係人一個.
人, 會崩潰架~
對於自己0既堅持, 我並唔係一面倒. 世界除左我之外, 尚有其他人, 尚有其他感覺 , 想法. 一廂情願去堅持某一d信念 , 過左火 , 就變成不顧他人生死 , 變成自私 , 變成固執. 我唔想咁, 所以, 我願意跌一舖.
而家0既堅持, 係寧人負我, 我不負人. 我要理直氣壯, 多於向人搖尾乞憐 .
另一個堅持, 就係食早餐時0既麵包唔可以放響雞蛋上面 , 唔可以整穿個雞蛋 ~

開心星期六

星期六慕道班不用上課 , 於是晚上約了好友打邊爐, 下午就約左好友顏先生取東西及到 oliver's 騙酒飲.
本來想去 LE CREUSET 看看二折貨, 點知上到去雲咸街, 條龍令我血拼的熱情馬上冷卻下來 , 於是馬上走到太子行去, WINDOW SHOP 及 OLIVER'S 試酒, 是日所試的意大利酒 , 兩紅一白一汽, 飲完之後, WING 了五分鐘 ~
太子行好行的店多的是 : INDIGO , PAN HANDLER , ALESSI , OLIVER'S , 尚有大量的家品店, 東西漂亮到不得了 ~~~~ 當然 , 我一毛錢都無花到 , 連在 ALESSI 見到 Mr.+Chin 系列 及 貓碗, 我都可以狠下心腸空手而回 ~~~
太子大廈行完了 , 乘兩塊錢電車到灣仔, 把年頭在屯門商場找人為陳積積畫的水墨畫拿到銳鷹去裱 , 銳鷹是我在結婚時找到的店子, 把在羅浮宮拍的大油畫照拿給這店子裱, 老實到不得了 , 一分一毫用料底板厚薄就交待得清清楚楚 , 本來在婚紗店給人宰了二千八百塊的貨色, 銳鷹李小姐只收我三百八十八塊 !! 我還問了畫架加鏡的價錢 , 皇后大道東要收過二千塊的 , 李小姐報上七百塊 ~
晚上跟好友M 及 好友B 一齊在家打邊爐, 牛肉好吃到不得了 ~~~
是夜娛賓的是陳積積 ~~ 大家好很開心, 陳積積除外 ~~~
XDDDDDDDDDDDDDDDDDDDD

女人開車

我成世人覺得最本事0既, 係一次過 , 學左 24 個鐘之後 ,考到個棍波車牌~~
可能成世無乜叻事做過 , 做到件有d男人都做唔到0既事, 就巴屎閉咁 ........
不過 , 都要自己中意開車, 至會有心機去考牌 . 細個坐老豆阿娘開車, 都會聽到架車扯到噓噓聲咁, 到就黎要斷氣 , 就會變聲, 震緊0既車身都會定番哂. 到真係自己去學車時 , 就知道 : 車震 , 即係要轉波喇 ~~ XDDDDDDDDDDD
考到牌之後, 炒過兩次車, 一次 TOTAL LOSS ( 其實唔係好爛,而係整番都SIDE氣 ~) 之後, 就變得好小心,好多野都唔係老馮就去做.
不過 , 隻左手唔生性,讀書時打排球0既後遺症, 不停轉波令舊患時好時壞, 醫生勸告之後,轉開自動波.
自動波......... 我真係覺得好傻仔 ( 識開棍波車0既,都知道不停去轉波 / HEEL&TOE / 拖波是十分之有型的一件事 ~~ 唔係化 ???? 唔係為有型 , 做乜響香港地開棍波 ??? 塞車你就知死 !!! ) 不過 , 無辦法 ~
開住架車響路上 , 人地一見係女人 , 係咪都 CUT 你線 ( 雙白都照 CUT) , 響號催你 ( 紅黃燈咋....) 經過你側邊仲要啤下你 ...... 所以 , 我都有一套自己0既開車方式 :
1. 個頭唔好郁, 唔好因為人地想 CUT 你線就去望佢 , 一望佢,佢就會馬上 CUT 你線 . 當然, 我係指知道周邊交通情況至可以咁做. D 男人 , 見你無反應, 佢地唔敢搏 ~
2. 我唔中意有車跟我尾 , 好大壓力 . 所以行慢線多. 其實 , 慢線好多時係快過快線 .
3. 響停車場度我多數搵一D獨家村位置黎泊 , 如兩碌柱中間 . 咁可以有限度防止到比人地架車碰到.

試過有一次開細佬架司力架GT4同朋友去食飯, 出九龍時比人撩, 撩我0既係架三菱 FTO ......... 唔係唔夠人抽 , 而係架 FTO 個男人著實樣衰, 面無三兩肉屬命薄之相 , 同佢鍊車好似危險左D , 加上我架車上面有個設計師+船運界巨子+公關界紅人 , 點可以咁搏 ? 所以作為一個負責任0既司機 , 我唔同佢鬥快 , 轉為同佢鬥慢, 由開緊八十, 跌到五十 , 最後用四十響條路度"躝" 住行 ~ 人地邊頂得住 , 玩玩下嬲喎 , 唔要玩喇喎 , 噓一聲就標左去~ 但一路到今日 , 我都仍覺得好好玩 ~~
所以 , 好男不與女鬥 , 係0岩架 ~~~

混醬

我食野會食得好淡口, 煮野成日唔記得落鹽,不過因為多數係鮮貨,所以無調味都叫可以接受.

我亦好少會點醬油 / 加味道 . 不過唔中意還唔中意 , 總有一D心頭好 ~~~

日本柚子醋 - 狂喜 ~ 我連食牛扒都係落佢 ~

鎮江香醋 - 我用黎點蟹 / 魚

美極鮮醬油 - 點白烚雞蛋

日式 SHABU SHABU 酸汁 - 一次邊爐有本事 KO 一整支 ~

另外, 我都會做一D特別0既醬 :

鮮檸汁+蒜茸+糖+少許鹽 - 同白切雞一齊食好鮮味

魚露+香茅碎+紅椒碎+檸檬汁 - 配燒豬頸肉

鹽水+白醋+芫茜蔥碎+紅椒碎 - 配潮州炸豆腐

豆醬 + 薑蓉 - 配潮州凍魚

豉油+冰糖+芫茜蔥碎 + 辣椒碎 - 點貝殼類海鮮

記得再補充 ~~

又有喜事

太子爺要結婚喇 ~
我做0既呢一間公司係家族生意,兩兄弟係老闆 , 阿哥0既仔 及 阿弟0既老婆都係響入面做.
咁老闆家有喜事 , 當然係好開心 ~ 但因為某d原因, 要響30日內籌備婚禮, 唔係容易0既事. 公司入面我同太子爺都叫幾好傾 , 我又結左婚,所以太子爺就順理成章黎問我某d野0既詳情.
其實我結左婚咁耐,有好多野唔太 update , 但一d要留意0既地方, 我都會傾巢而出 , 排山倒海咁去話比人地聽. 偏偏公司入面心胸窄0既人 , 意見無乜,但就咩都要 "gut" . 第一次太子爺問我野, 我發現有一線冷光響遠處 "飛" 緊過黎 ~ 方向正正就係阿細老闆個老婆.
傾完喇 , 太子爺返埋位喇 , 人地老婆就中埋去係咁講係咁講 , 講完一大輪 , 就走黎我度問我同太子爺講乜 , 我話係咁以話個婚禮流程比佢聽 ,細節我唔理亦唔識 .......然後 ,人地老婆就話喇 :
我地新會人乜乜乜乜乜乜 BLAHBLAHBLAHBLAH .......
我馬上就插句野叉實佢把口 :
我理得你地點整呀 , 我係潮州人, 你地係新會人 , 關我乜事呀 ? 你地自己一家人閂埋門攪掂佢囉 ~~ 呢d野唔好問我 . 我淨係話到你地知 , 我當日係點嫁架者 ~ 其他野我唔理0既 ~

我自己係過來人,當然明白到通鄉村各處例,加上我又唔係精於此道 , 呢d野當然唔會出聲. 人地老婆響大伯再婚時攪到咁核突 + 小家種 , 我死都記得喇 ~ 而家到大伯個仔結婚 , 佢又想重施故技喇 ~ 一見太子爺問人地野, 就生怕自己地位不保比人搶風頭 .....講真, 人地老婆嫁左成廿年 , d野又唔 update , 平時做人做事又無厘大方 , 最緊要係 , 而家唔係佢個仔結婚 , 係人地個仔結婚嘛 ~ 要拿主意要點做 , 排到尾都未到佢出聲.

好人係可以做 , 但都要有分寸 , 識分輕重囉 ~ 負擔唔起後果0既野 , 少碰為妙.