阿Q烹飪歷程

以前, 只食唔煮, 因為有個萬能阿娘, 成個九龍城都知佢整野好食. 中學時家政課, 我係整級中唯一唔合格女生~ (利害 !)
後來, 發覺唔識煮野幾大鑊下, 嫁唔嫁得出呢個固然之, 籌碼咁少點同出面人地爭 ? 分分鐘日後就算嫁得出,但個老公都要走出去搵湯飲就大鑊 .
血淚史開始~ (唔係我,係食我煮D野0個D人.....)
有一次, 學方太整炸蝦~ 阿娘好偉大,我考左車牌佢第一個試坐, 落車時腳都軟埋~ 我學煮野佢又黎支持我,最後食左一隻蝦, 然後之後1X年無再食過任何蝦.
煮野比當時男友食,傻下傻下用熱水開生粉~ 成碟野變左漿糊
乜都唔識學人煮龍蝦,唔知點解煮到一半,D 蝦肉縮水+有好大陣壓味 (好新鮮成隻無放尿就丟去煮,食唔死都偷笑...)
學人用乾粟米鬚煲湯, 成半斤乾貨丟落去煲....煲煲下成煲都係粟米鬚,黑炆炆似足苦茶,又CHEAP唔想浪費, 最後自己一個飲哂佢 , 然後病左成星期 ( 寒涼到爆, 又係食我唔死都偷笑~)
然後,收手唔煮. 變成睇人煮.
睇完人煮,返去學整,天資低IQ又低,通常要煮4-5次似似樣.
到咁上下,出去跟人上堂學.呢度試下,0個度又試下....希望可以集各家大成~
今時今日,幾味小菜都可以, 大茶飯就唔得喇,最叻叫人來我度打邊爐 , BBQ ~ 因為唔使煮~
最近學整蛋糕及家鄉野,只因為自己為食~~~~ 又唔想比咁多錢出去買, 所以去學一D基本蛋糕功,希望自己可以加加減減, 整自己中意0既野食出來~
而家少左返娘家食飯, 自己煮多左,仲可以包埋第二日早+午餐,我開始覺得自己似番個主(煮)婦~