新屋進度 - 廚廁

廚房要延遲,因為西德版出錯, 所以櫃門未有貨, 會延到 11月底才有貨.

又 , 我堅持要我本來揀的顏色, 所以, 廚房暫時停工.

一面做一面改進 ~ 我忘了灶位是凹下去, 下面做抽屜會比較矮, 所以要量過大部份煲的高度 ( 6-8寸高) 要師傅更改抽屜高低.

廁所八八九九了 ~~~ 上圖係客廁 (黃) 下圖係主廁 (藍) ,其實我覺得黃磚係靚過藍磚的 ~

最後發現 , 呢間新屋可能會係七彩的 .....

廚房 - 白+綠+木色

廁所A - 黃 + 白磚

廁所B - 藍 + 白磚

廳 - 藍 + 綠

房 - 黃

傢俱 - 白 / 黑 / 木色

心水傢俱@IKEA

伸縮餐檯 , 可以由116cm 伸展至 166cm , 檯面比較闊 , 解決左大夥食飯時飛象過河0既問題, 所有菜餚可以集中放檯面 ~~ ( 心水為黑色餐檯 )





仿古木的雙人床, 4尺半 ~~~ 床頭位置可以解決橫樑壓頂問題, 另外因為兩邊位置不夠放床頭櫃 , 床頭活動位置就可以解決鬧鐘什物等等放置問題.

反省 (三)

我中意睇靚0既野. 好唔好彩, 響香港地 , 好多時 :

靚 = 貴 ,

但.....

貴 =/= 靚

熟識我0既好友都知, 我最愛廚具, 孖人, ALESSI , 餐具 , 砂煲冷撐, 家品 ...........

貴0既 , 得個睇字~~ 頂籠年尾去買一件黎比自己開心一下. 其他?行入店摸一下就樂不可支 ( 低能~)

至愛的夜冷店譚才記, 打從花園街正店關門後, 興緻大減 .........

星座說得沒錯 : 天秤女的品味絕不便宜 .

於是 ,好節墜的看充上了 $1500 一塊的磁磚 , 六千多塊的床單 , 八千多塊的吊燈 , 一萬八千塊的梳化 ........... 最後 , 狠狠地丟下所有看上眼的記憶, 轉戰平價貨 , 守株待兔地等大減價 , 然後扯著大夫衝鋒陷陣血拚當場 ......... ( 點解要扯著大夫咁 SWEET ?我糧尾嘛 ~要佢埋單耶 ~~)

SPOTLIGHT 入手 : 打折後 $34.90 ( 全木制時鐘 )

永安百周年入手 : 打折後連大香腸咕0辰 ( 扣 CASH MONEY 後 $492) 340針雅蘭之寶床上用品

阿娘講得對 : 無事出街少破財 ~

反省 (二)

我覺得我係幾老土下0既人, 好多新野我都唔係太接受到......
以下純為blog主0既主觀睇法, 各位切勿對號入座 ( 仲唔係老土怪???)
睇雜誌見新娘子攪到好爆,指甲長長 ( gel 了甲) 似樹妖姥姥, 所謂 image 唔再係純白無瑕新娘子,而係極爆的吸血疆屍驚情四百年造形 ~ 面無笑容只有自以為"酷"的冰冷面孔.
化妝再唔係修飾輪廓 , 七彩眼血盤大咀比目皆是 ( 你估你地係樂基兒麼 ?)
搭地鐵兩邊共坐12人, 有10個人響度玩 NDSL , 完全唔會理周圍發生乜野事 , 有老人家大肚婆小朋友由頭企到尾都一律當人地隱形.
我仍崇尚簡約服飾, 索瑪利的 MINI POLO + CARPRI , 可憐我的身形完全無福消受.
美式婚紗簡約剪裁 ,無 DETAIL 無水晶無珠片, 只靠布料及剪裁 ,配上一串珍珠鏈, 腮後一朵白玫瑰 ,就是我心目中的美新娘.
化妝仍係偏愛藍眼影, 買極都係藍色, 深藍粉藍紫藍藍眼線閃粉藍 .......... 唇膏用極都係 CLINIQUE LONG LAST LIPSTICK (#PINK CHOCOLATE) 其實都唔知買黎做乜 .......
今時今日我仍只愛積木機 , 玩不厭 ~

死雞撐飯蓋 : SIMPLE IS THE BEST ~~~~

反省 (一)

呢輪我好似同時代脫左節咁 :
股票 , 唔買唔玩唔炒.
NDS , 唔買唔玩 .
FACEBOOK , 少左上去 , 好多 APPLICATION 儲左好多 $$$ 響度, 可以好大手筆咁送野比人
少左睇人地0既 BLOG , 每日只睇素顏 及 萍果的 BLOG .....
無睇影評 , 個個都講緊梁生何 B 仔黑影 , 湯唯定係章子怡靚D , 唔使睇,淨係陶才子一講就兩星期已夠納悶 ~

咁我平時時間用黎做乜 ? 唔 ....... HEA 響度囉, 如星期六, 晏晝返左屋企, 放好洗好晚餐0既野煲落湯 , 就訓左響 OSIM 先生身上兩粒鐘 ~ 一起身又煮飯 , 煮完食完洗完 , 又倒在梳化上 .

好似有點頹 ~

但真係好 RELAX ~~ 唔使擔心任何野, 無野心掛掛 , 想點就點 , 話我無大志都好喇 ~~ 我覺得好舒服喎咁樣 ~~~

該煨囉 ~ 咁都比我撞正

今早返工時, 因為搭唔到小巴, 所以番入去拎番架車.
行到一半, 見到一隻大狗, 同兩隻細狗 , 急步響前面行過 .....
但 ......
這狗 ...未見過呀 ....
幹嗎這狗身形圓圓的 ? 野狗應該比較瘦的 ......
幹嗎這狗那麼大隻 ?????
幹嗎 .............
日光日白有野豬 ??????????


嚇死我了 ~~~~~
而家要做的 :
1. 通知鄰居出入要留心
2. 通知村長處理 ( 如通知野豬隊 / 漁護署 )
3. 通知陀地哥組織安全隊照顧出入村的老弱婦孺

頭痛三寶

我甚少病痛,頂哂籠廿幾日黎一次頭脹痛,雖不至於頭爆訓床 ,但都足以令我白白浪費左一日好假期 ~
我頭痛唔會食頭痛 / 止痛藥. 因為我知道唔係因為病毒/抱恙而致. 天然療方如下 :
1. 到空氣流通地方深呼吸3-5分鐘
2. 飲水 ~ 每隔15分鐘飲 200cc 水
3. 閉目養神 ( 在空氣流通地方 )

頭痛可以係好多問題0既病徵, 在我黎講, 唔夠水份 / 體內鹽份過多都係元兇 ,亦係因為體內電解質不平衡而引起, 本來寶礦力係一個良方, 但內裡糖份又容易令血醣大上大落 , 所以我寧願花多少少時間, 令身體自行調節.

看官下次如果都有頭痛, 又係因為水份吸收不足 / 味精或鹽份吸收過多 , 都可以試一下呢個方法.

兄弟姊妹緣

見好友萍果寫自己與弟弟的成長軼事, 我又想寫一下.
我自少與細佬無乜兩句,手也不會拖一下,好像是很疏離似的 .....
我們大家只相差一年,可能佢覺得拖阿姨好過拖我 ,至少有番一丁點兒的安全感. 我同佢同月同日不同年結婚,都係12月2日. 我早佢2年結婚~
小時候家人對我倆姊弟的評語是 :
家姐-騰雞,反應慢,讀書唔入腦,傻大姐,感情用事,粗心大意
細佬-反應快,醒目仔, 讀書叻(後來有一年留班,打殘左細佬)畫公仔叻,有心機
-__-""" 殘念 ~~~
同好多小朋友一樣,小時候都有過妒忌,不滿,認為父母偏心.長大以後思想成熟點之後,才發現並不如自己所想,只是 "人睇你好,你睇人地" 細佬響中五會考之後去左加國讀書,本來好好衣食0既佢,去到加國乜都要靠自己,一唔開心就寫信返來,喊到我阿娘死死下.當時細佬可以去加國時我覺得,佢乜都有,我乜都無,好唔開心.後來發現,佢同阿娘都好唔開心,好辛苦; 反而全家最無壓力最優閑0個個原來係我.
後來香港屋企同加國親人都遭逢巨變,我同細佬都各自響香港同加國為家人奔波,後來老父病重,急CALL細佬番黎準備為佢擔幡買水,細佬至返來香港.後來老父奇蹟地痊癒,細佬亦留響香港照顧家人.
第一次為細佬出頭 , 係響一個家族聚會之上,表姨席間問及細佬搵到野做未,細佬話搵緊,表姨就好心向席間一位朋友打探,希望有機會可以推薦一下姨甥仔,點知呢個當年響帝苑酒店當高層的朋友冷言冷語 : 0岩0岩畢業呀?講真機會就真係無乜,個個以為響外國讀過下書就以為返黎有好工....
我睇住細佬塊面黑哂,我亦覺得我面色好難睇,阿娘..... 為左面子,佢去左廁所. 我亦不示弱回番佢一句:我細佬讀工商管理,都唔中意做酒店,又要睇D無謂人面色,呢D工唔0岩佢. 講完之後,全場 DEAD AIR,直至阿娘響洗手間返黎,至有番D聲.呢個女人,後來有左身孕,期間被酒店用唔知咩理由炒左佢. ( OK ~~我認我係小家種, 我好心涼 ~ )
我結婚時,細佬都係行行企企,成日都唔見影.後來佢結婚,我以過來人身份,去同佢攪呢樣攪0個樣,其實作為家姐,我真係覺得係應份.結婚已經好頭痛 ,可以為佢分擔到,我都可以做. 本來乜野我都無預計,什至認為細佬一直都係不善詞令;當佢同老婆上台講野多謝人時,佢老婆有多謝我,我真係受寵若驚(其實我覺得我幫唔到佢D乜,因為我知佢老婆響籌備期間好多野唔開心),到細佬上台時,我仲驚: 佢成個專業司儀咁!! 仲學人攪爛GAG ,成場人響度笑. 多謝哂好多人之後 ,最後佢仲好隆重咁多謝我,嚇到我咩咁,然後好唔爭氣咁流哂馬尿.我唔係因為細佬多謝我而喊,而係真係感受到佢同我之間,雖然平時無乜兩句,但原來心入面好在意對方.
兄弟姊妹緣,就好似煮食送咁,一樣食材可能有好多種整法,每一種做法都係咁好食,整0既食0既都一樣窩心.
我同細佬 , 唔係濃味0既咖哩牛腩 / 茄汁牛腩 , 可能頂哂籠都只係清湯牛腩.但一路食,d 鮮味就一路"攻"出黎 ~~


唔好以為真係咁 sweet , 影相前細佬同老豆講好數 ~ 比家姐錫完一啖有一杯雪糕,兩啖有兩杯


影呢一張相前,細佬已經 ko哂 2杯雪糕 ~


第一次去澳門探公公 ,響葡京門口拍照留念~影完張相之後,我地兩個就向後跌左落草地度.

我的BLOG

真係自己發手痕所以寫.
我0既生活圈子唔大(結左婚就係咁上下) 亦唔係太多嗜好. 簡單一句 : 道行未夠.
最緊要係, 我自己覺得,我寫0既野都係好主觀, 好多時都係呻下,發下蹹瘋 , 可能同人地生活一D都唔配合,亦唔會人人都同意我0既睇法, 所以, 我只係比我0既朋友, 識得我0既人睇 , 比一D想知我近況0既人睇. 唔了解我0既人, 我寫0既野可能會引起人家不滿,引起罵戰, 是很煩惱乏味的事.
其他人睇,我唔介意,有緣0既自會遇到.(XANGA 閂門時我收到0既 EMAIL,可真是嚇了我一跳 !)
所以各位好友,你地可以自行判斷,話唔話比人地聽我條 LINK,作為好友, 我並不計較 ~

貓會唔會扮雞叫 ?

Crabtree & Evelyn 2007 Gift Catalogue

尋日收到喇 ~~~

^^

網路溝通文化

尋日比電車辣慶左 , 餘慶未了 ~ 再講下我對呢d文字尺牘上一d感受 .
講明係感受 , 即係好主觀 , 睇到0既人 , 唔好對號入座.
紅色字
由細到大 , 長輩老師都教導 , 紅色 , 絕不可以用響書信之上 , 因為紅色係唔禮貌0既表現, 對收信人係絕無尊重可言 , 亦反映左發信人有幾多修養 .
尊稱
如"你" 及 "您" , 絕對有分別 . 前者係普通用法, 後者 , 多數對方長輩 / 師長 / 有地位的人, 我地都會用到 "您" 呢個尊稱 .
另外, 上款及下款, 亦反映左發信及收信雙方響輩份上有所分別 ,以及發信人對收信人尊重程度
標點符號及分段
標點符號及分段可以令收信人簡單少少睇到信0既重點, 好多時 , 我都唔會睇字海 ......

因為書信係表現個人修養0既其中一環, 尤其響而家資訊咁發達, email , MSN 呢d太普遍 , 好多時代替左來來往往0既書信, 發件人0既表達 及 收件人0既理解 , 可以將一件事由好事變壞事 . 我上網左咁多年頭 , 網友0既修養真係驚為天人目不暇給 , 睇到d人由憐生愛 , 由愛變恨, 真係可以係一句說話前後數十分鐘 0既事.
我自己的感覺係 , 好多人認為響網路上大家唔識對方 , 就少了忌諱 , 無後顧之憂, 要點講就點講 , 唔需要負責 . 所以 , 問野可以唔使講唔該 , 反駁對方可以加兩句粗口 , 什至咒人全家都唔可以面不改容.

而家 , 人同人0既溝通已經唔同以前, 面對面 , 一句對一句. 如果 , 響呢一d細節野上面再 "簡化" 落去 , 人同人之間 , 會唔會愈黎愈疏離 ?

酒

我同阿娘阿婆太婆口味一樣, 大家都係中意飲甜0既酒.

以前細個見阿婆同阿娘, 真係一日一杯 "養命酒" , 陣味好香的 ~

GORDON GIN , 又係好香 ~ 有一次偷飲, 喉嚨像火燒一樣 ~

婆婆比過 "砵酒" 我飲, 因為婆婆都愛貓, 所以, 佢只會買貓嘜砵酒.

阿娘身體底子比較寒涼, 所以一入冬都會用糯米及酒餅, 釀糯米酒飲. 我未飲過, 有幸試過的契妹說好味非常.

日本梅酒 , 我會同阿娘爭飲.

紅酒攻入香港之後, 我只愛好友口中的提子汁 "玻玻璃" ~ 其他乜野靚酒我都唔識欣賞.

有一次試過表姨介紹的德國冰酒, 上左癮~ 買左一箱同表姨 SHARE 飲.
之後試過加拿大冰酒 , 太甜 , 封喉唔好飲 . 好友杯麵今次帶來BLUE NUN 冰酒, 清新可喜, 又成為我的至愛 ~

我唔係酒鬼, 但每一次同好友一齊品嘗, 我就明白咩叫醉翁之意不在酒喇 ~~~~

自助餐

( 攝自今年大夫生日 , 晚飯@洲際酒店 , 自助晚餐 )

我好中意食自助餐, 但近年都變得眼闊肚窄. 睇到好開心呀 ~~ 一食左幾舊野, 就有飽肚感覺~~ 唉 ~

以前細個去食自助餐, 人人都話我乖,食得多唔會蝕 ( 典型自助餐心態 , ALL YOU CAN EAT 嘛) 次次都食到肚痛 ( 好無謂 ) 因為自己響屋企食中式野多, 所以一食 "西餐" 就人出錢我出命.

印象中 , 格蘭酒店的 VIKING , 香港酒店 / 帝苑酒店0既 COFFEE SHOP, 會展 CONGRESS 係我最中意去食野地方.

近年, 會中意去食洲際 , 海逸 , 因為不太便宜, 所以都係大時大節至去食. 食得最狂係今年新年一二月期間 ,2個月內去食左4次洲際自助餐 . 因為親戚朋友有會員咭, 每2個人都只收一個人費用, 所以一眾親朋戚友響外地回港 , 大夫生日 , 舅父回港, 我地都去洲際度食.

自助餐我始終覺得係好野黎 , 只要適量咁食,唔好浪費 , 每樣都係淺嘗即止, 不失係一件美事~

筆桿子殺人文化 與 現代 msn 殺人事件

以前曾聽老豆講過 , 筆桿比刀槍更易令人死得徹底.
而家係電腦時代, 用筆桿的 ,好多都轉用手寫板 / 輸入法 . 又因為電郵 / MSN / SKYPE0既普遍, 好多唸尺牘時學到0既信箋文化 , 都被人忘得一乾二淨.
錯白字不用說了, 有時是無心之失. 但 , 內容語法所表現出來的語氣 , 卻是令人汗顏 , 什至動怒, 好想馬上用最快的方法 , 去到發信人/ 發訊息的人身邊打佢一身.
今日, 我在公司做到火紅火綠之際, 電車先生傳來一句 :
GIVE ME THE ORIGINAL BILL / RECEIPT OF DAD'S WOUND CLEANING !
整句野, 無打招呼無唔該 , 光是那一個感嘆號就令我無名火起.
" 而家咩事 ? 我欠左佢架 ? "
我話左佢知 , 所有野都係響佢屋企餐檯上0既膠袋度. 最後再比兩句野佢 :
PLEASE BE POLITE
DLS

首先 , 而家只係字面上的理解 : 有感嘆號 , 係加強語氣0既意思. 加埋無唔該無 please , 我感覺係好唔客氣0既一句說話 .
電車有電話唔而打比我 , 死都要用呢d msn 去同外間溝通 , 佢就要承擔因為自己有語病而引起0既所有誤會 / 不快 及 對方反擊 . 我用 DLS 已經比打佢一身好好多 .
再落黎 , 你可以話我新仇+舊恨 , This is not the first time !
另一方面, 佢同老爺住, 呢一D日常野, 係唔係要留心加上心 ? 而唔係問一個同佢唔同住0既人, 仲要唔該都無句 ? 我馬上同大夫投訴, 要佢問件電車發乜野神經, 我唔去佢公司打 X 佢, 純粹係太忙 , 而唔係比面任何人.
無錯 , 我鬧佢係完全唔會比面. 因為我相信, 出到出面佢用咁0既態度出去同外人講/做同樣0既野 , 佢0既收場會更慘烈.

進步

人人都會對自己有要求 , 耐唔中會為自己而上進一下 ~
年年人地都會問我生日願望 , 其實除左減肥就真係無乜 ..........
今年 , 我突發其想 , 將我0既願望中籤率攤分出黎 , 等家人及身邊朋友都可以願望成真 , 我又日日都可以聽到家人朋友0既好消息 , 咁會唔會開心d呢 ?
XDDDDDDDDDDDDDDDD

又老一歲囉 ~

(星期六好友們突擊與我慶祝時的照片 ~ 蛋糕是黑貓小姐遠道從 TERESA'S FESTIVAL 買來的芝士餅 ~~~ )

今日同平時一樣, 要食三餐飯 , 要返工 , 一樣著得好烏wear , 一樣係咁多野做 , 一樣咁吞泡 ~

所唔同0既, 係接到朋友們的祝福及問候說話 / 來電 / SMS .

夜晚同阿娘 , 細佬兩公婆響屋企打邊邊 ~

一樣的高興~

一樣的溫馨~

鳴謝 好友貧僧與我及我家積積拍照 ~~ ^^

梅乃宿白桃酒

咁多個地方0既水果我最愛日本0既水果 , 水晶梨 , 白桃 , 柚子

尤其係麼麼 ~~ 呢支響 德福0既 Jason 入手 , 特價$189

姐姐仲教左一個方法 : 將酒倒入冰模內造成冰粒, 加入有汽梳打水內, 一流 ~~~

蝶矢宇治茶梅酒

有一次響超市飲過好好飲 ~ 雖然我唔係太飲得綠茶, 但都覺得好難抗拒 ~~

呢一友響新世界 Needs 度購入, 特價$115 .

久旱逢甘霖 - 尖咀半天遊

今日同大夫出左去行街 ~ 好耐無去尖沙咀喇 , 所以襯大夫去尖東站拎信用咭禮物, 就響附近行左半日.
先上去towngas avenue 睇廚具 / 家品 , Alessi 我愛死了 ~~ 不過好貴耶~ 新出一套家品, 係由國家故宮博物館幫呢個系列作 hand - decorate , 好得意 ~~


copy from :
http://www.alessi.com/catalogo/oggetto/Mr.+Chin/kitchen+timer/2029/3877/
然後上左needs度行左一陣, 睇中左一支宇治茶梅酒 , 見都係 $115 , 買左一支, 加埋響星巴克0既消費,就可以拎到泊車優惠 ~

然後我地搭左幾蚊雞巴士去左海運,藍天白雲加上草間彌生0既大斑點南瓜,心情登時大喜不已 ~~~


行到累 , 就去左麻布茶房食個下午茶 ~ 係咁食, 食哂至記得無影相 .....




之後又行左 city super , log-on, gourmet kitchen , page-one , 行到天黑至返歸 ~~~

<<殯儀>> - 嘉出版

平生不作虧心事 ~ 所以我買左本返黎睇 ~
由七月初版到而家 , 已經係第三版 , 內容好正面 , 將業內人士的心態, 不為人知的一面清清楚楚同讀者顯示出黎 , 而且對白事忌諱亦好清楚咁去解釋比讀者聽.
後面有一版係封住0既 , 因為係一d遺體處理0既照片 , 佢提醒讀者響有心理準備之下至好開封黎睇 , 我覺得好貼心.

其實中國人對白事都抱有逃避的心態 , 唔係殺到埋身 , 都唔會去睇一眼,了解一下. 呢本書 , 我覺得係對業內人士一個尊重 , 佢地係響人0既最後日子時, 擔當左一個重要角色 , "生死榮哀" 都係靠佢地至可以令先人及在世者心理上得到平衡.

http://www.characters-books.com/books/tw/books/detail.jsp?bookid=323

重陽假期的一天

本來 PLAN 左一大堆節目同大夫+朋友,好好咁過呢一日. 但響星期四半夜電車叔仔一個 MSN MESSAGE 就將所有野改變哂 :
老爺響深圳跌親.
呢個 MSN MESSAGE 首先係嚇到我死死下, 老人家跌親,唔係小事呀 ....
再下來, 我對呢個電車叔仔,真係用左極0既容忍度及 EQ ,去問佢多D詳情. 最後,我在心中咒罵佢數十遍 , 點解會有咁0既人存在響世界上 ?

老爺跌到 ,係星期四早上0既事,佢到夜晚十一點至同我地講 ....
一開波, 就問我 : ARE U 2 FREE TOMORROW ? ( FREE 又點唔 FREE 又點 ? 唔 FREE 你唔使同阿哥講個老豆跌親 ?)
其他0既,我都唔想再提.老爺及 LULU , 最唔放心就係呢一個仔, 阿大夫,佢兩老就一早將大夫交左比我,亦好放心 . LULU 走之前同我講好哂數,老爺同大夫佢都唔擔心, 係擔心電車.
如果你問我 ,我會話 : 我唔擔心電車, 但好擔心同電車一齊住0既老爺.
咁樣好似 MAKE SCENCE D ~
尋日我地同老爺去洗傷口 ,去買食送同陪佢食飯 , 老爺一見電車就唉聲嘆氣. 我可以做0既, 就係做番人應做0既野 , 講番人應該講0既野. 去平衡番老爺0既心態. 老爺以為我地夜晚要同朋友打邊爐, 我地話取消左,同佢食飯 , 睇得出佢好開心.大夫仲同佢揀魚, 買左條烏頭,仲話叫我整潮州凍烏頭魚. (所以我成日話老爺對我幾好,成日以為我中意食家鄉野...煮飯時成日就我口味 )

有人話我 , 響公眾地方大唱夫家人0既不是, 唔該呢D外人收聲.

南宮夫人

今次係我搵人傾 .
多謝呢班開解我0既朋友,你地知道我唔係要聽 "中聽" 說話,唔係要人支持我0既睇法想法.
最緊要 ,係你地真真正正知我係一個乜野人 .

陰霾盡散

尋日我放低左一個包袱 , 半年以黎帶著佢做人 . 什至已經開始改變緊我做人原則.

睇清所有事 , 甩左之後 , 個人輕哂 !!

我老豆講得0岩 , 我睇人睇事 , 係唔會睇錯 !

半個教徒

星期六上慕道班時,導師提及我早在四月已領受收錄禮,可算是一個教徒. 但我覺得,我一日未領洗, 一日都不是教徒. 所以 , 我極其量只可以算是半個教徒. 再者,很多教徒要做的事,我都未做,所以,我未當自己係一個合格0既教徒.
日常生活入面,我好少對外宣稱 :我係 xx 教徒. 因為我覺得,自己作為某宗教的信奉者,只要對自己及教會負責/交待.在日常生活上宣傳自己係教徒,教會有乜好,只會令人覺得煩厭.人地覺得好,唔係因為你口講,而係你0既行為思路舉止.
"你係教徒關我乜野事 ?" 係我聽得最多,無神論者對教徒面部所噴的屁 ~
上左慕道班成年以來,導師都係要求我地做好自己本份. 讓人家睇到一個有宗教信仰0既人,同無宗教信仰0既人有乜野分別.就如徐錦堯神父所講, 教會係希望我地做一個好人 ( 而唔係好0既教徒/勤力教徒). 祈禱/領聖體/修和等等呢一d習慣/聖事,有出個心去做就可以(當然,付諸行動才為之身體力行) . 因為,信仰唔係迫出黎. 一星期一次0既課, 導師唔會問 :有無祈禱,有無xx , 有無yy . 大家只係拎左過去一星期0既瑣事/ 感受出黎分享.當中, 無深奧0既聖經,無理論 ,甚至大家討論0既野, 都係無model answer . 人人感受唔同,如果夾硬去設一個答案比一個問題,咁同洗腦無分別. 導師借上課睇我地0既思路/反應/心態,再去確定, 我地是否適合領洗.所以一般黎講,由慕道至收錄再去到領洗,需要1年半至2年0既時間.當中亦有不接受慕道者領洗的例子.當事人樣樣做足, 什至帶來唔少新慕道者, 可算是好學生. 但,佢0既心態唔係正常,佢覺得行動上要配合教徒身份而已.佢唔係出個心黎做. 所以,見過神父後,教會唔接受佢0既領洗,要佢繼續慕道至心態改變為止.
班中有轉會的同學.他們轉到來天主教堂,表現得很雀躍.大部份的感受係 :
1.天主教會比較嚴緊及有系統,歸一.
2.重心靈多於行為.
3.有討論空間,無壓力
4.教友之間無小圈子,心態平衡
當中有一個我同大夫叫佢做"S 眉"的,本屬基督教X 道會,上課初期他對於天主教的"本色"很反對,每一件事佢都覺得好唔對,好唔0岩. 尤其對舊約入面0既事蹟表現尤其激動(點解要咁激?),一講聖母佢就黑面. 次次都要個老婆響側邊叫佢停.一年下來,佢0既S眉開始無左,個人開始識笑. 近期,仲開始參與討論. 呢一樣係我對天主教好佩服0既地方,我並非刻意分開天主教及基督教 ( 都係同一個老闆0者~ 當然亦有天主教徒轉會到基督教 )而係當你要改變一個人, 或者去引導一個人,唔只係口講,要身體力行,要以身作則,最緊要係,要關心及理解對方0既心路歷程, 事出必有因,死命去講去洗人地腦,唔 WORK 架喎 ~
另一個同學阿尤先生講得好好, 所有真心想信天主教0既人,都係自己行入黎, 而唔係比人挾入黎.
星期六去上課前,因為係聖母玫瑰月的原因,聖母山前有一眾信徒響度唸玫瑰經.我雖然未識點唸,又一路行緊去星巴克,但我響心入面,仍不停唸住聖母經.
凡事,出個心去做,總好過公式化交功課.

送上祝福

去左一個朋友0既 blog 度睇.覺得 "終極泰來" 真係好0岩.
朋友早年一個人帶住個小朋友 , 後來識到而家0既太太, 三人行好溫馨.難得係,佢太太好錫個小朋友, 現今好少好女仔,會將人地仔女視如己出. 唔話你知 , 你真係唔知原來後面有個咁傷心0既故仔.(其實我都唔知詳情.但朋友早年帶住小朋友參加我地0既大食會 /bbq, 我覺得雖然係唔齊全,但有一個咁錫佢0既爸爸,真係福氣黎)
身邊有好多朋友,都有唔同0既故仔,大家都係 "你睇我好,我睇你好" , 大家見面時,都係開開心心.但平時,大家都係為左頭家,為左家人去籌措,去努力. 希望一家人日後生活安安定定,都如願足矣.
有一d人好有錢,但親情淡泊,住千幾二千尺地方又如何 ? 每日就只好去行街買野狂shopping 去滿足空虛心靈, 屋企入面什物就多喇,不過想搵個人影睇下都無.
有一d人無乜錢,但一家人努努力力,有粥食粥,有飯食飯, 鹹魚青菜但心靈富足. 困難時候, 一家幾口咬實牙關,眼光亦放遠左,希望好日子快點來臨.
同事今日講起天水圍0既家庭慘劇, 認為女戶主個名0既並唔係咁差云云. 其實好老實, 有一d野,唔係一本通書就可以睇到老. 現實幾時都係咁殘酷,亦因為佢殘酷 , 所以,好多時現實都係有血有肉, 可以觸動到心靈. 當然, 咁樣跌左落黎真係好陰功, 對小朋友亦唔公平. 但比到一d好正面0既,血肉模糊0既現實我地知道 :
有好多野唔係必然.響我地好好景時,大魚大肉要乜買乜時,要想一下如果無左呢d野,咁我地會過0既係乜野生活 ? 靚0既美好0既正0既野,人人都想要.但再想深一層, 有無d乜野係比d物質係黎得緊要 ?
我響 lulu 走左之後,學識有野要講就要講:
樹欲靜而風不息,子欲養而親不在
有花堪折直需折,莫待無花空折枝
可以講而唔講,人地問起時就大條道理,只會令對方失望什至死心.

有時知道朋友有唔開心0既事/家中長輩抱恙,我都會響唔打擾人家情況下比個sms / msn 朋友.希望少少心意,可以令佢地正在下墜的心情盡快回復.
所以,阿Q響呢度都送上祝福,比身邊所有朋友及佢地0既家人,萬事都如意. 另外 :
朋友 AC, 好日子不遠矣~ 錢財無錯響香港地黎講係好緊要. 但要知道,你而家擁有0既,比起好多人都富有好多喇 ! 我亦相信好野唔會停 , 會一路有開心事 !
衷心祝福你同小朋友及太太生活愉快及身體健康. 有關你先前同我提及0既,我有消息就會馬上通知你 ! 姑勿論到時有無需要,當係一個後著都好呀 ~

舊的 blog

XANGA 那一邊好久無 UPDATE 喇 ~ 剛才去一躺 , 點解仲有人會去睇? 一日仲有成百幾個 FOOTPRINT ?

無出過街0既台詞

除左讀書時上過台做活動0既 MC 之外 , 最近一次上台講野,就係結婚時. 當時我響台上面係咁UP,無台詞的(熟我0既朋友都知,當時我根本就無想過要上台講野). 可幸最後都講左一D應講而又係人人都想聽0既野,無太過失禮. 最後因為好肚餓好想食野 , 所以草草收場 ~

過後我成日想番,如果比我再揀,我就唔會多謝人家喇,轉用另一種方式.

就係講 "對唔住" , 向唔同0既人 "道歉".

首先我要向老爺奶奶道歉.要適應及融入一個家庭唔係容易0既事,係我去入侵人地0既生活好,係人地去打擾我0既人生都好, 期間一定有大家唔開心0既時候. 我要為響呢一段時間入面, 為夫家0既人所帶黎0既麻煩及不安, 什至唔開心而講對唔住.

之後,我要對老豆媽子講對唔住. 咁多年要佢地掛心擔心, 實在係好虐待0既事.而家我做左人地老婆, 希望佢地可以放心,唔好再成日心掛掛. 我要為咁多年以黎,成日見家長,考試唔合格 同埋比人地記缺點 , 令到老豆媽子去見家長時比人奚落 , 大左出去做野識朋友令佢地擔心而講對唔住.

我要同一眾由細睇到我大0既親戚朋友講對唔住. 我好少會主動搵佢地,什至打個電話問候一下都無乜. 但每一次見面, 親戚長輩們都對我噓寒問暖, 而我就平時一個電話都懶得打. 響呢度,我又要講聲對唔住.

我又要向媽子0既一眾雀友講聲對唔住, 我呢個阿四成日都走出街,你地黎打牌時我無煲水斟茶 , 招呼不周之下真係唔好意思.

而家就輪到阿老闆同埋同事喇, 因為我0既私人事, 攪到響返工時候魂遊太虛 , 一百萬就打左十萬, 美金就打左港紙. 所以, 又要為我公私不分唔專心而引起0既錯誤, 而講聲對唔住.

最後就要同一班又熱心又無條件咁幫我0既朋友講對唔住,為左我同老陳0既私事,而令佢地走出走入,又勞心又勞身又勞力. 更加要多謝一眾經常開解我0既好朋友, 因為好多野唔係你地老馮要做. 你地出個心黎幫我 ,我可以為你地做0既真係無乜 .... 真係無以為報.

好似係咁上下喇 ?
又......好似有D似......遺言咁架 ?? ( OKOK ! 我百無禁忌0既 !!)

有時,各人家道謝, 人家都可能係預左. 但向人家道歉, 就唔係成日有咁0既機會.

回望

九七之後 , 身邊好多人同我自己都經歷左唔同0既打擊 / 沖擊 :
我一年之內轉左三份工, 每份工都因為老闆話 " 政府都瘦身 , 我地應該要去跟 " 再瘦落去,真係變左貧窮戶都似 , 所以一走了之.
響 2000年人人都努力希望趕上電腦時代 ( 其實係想知道咩係千年虫) , 我身邊三位至親都同時發現患上癌症 , 先係婆婆發現子宮頸癌, 我需要送佢返去加拿大 , 到步後 , 小舅父靜靜地告訴我大舅父當日早上已因肝癌過身 , 在加拿大的整整一個月 , 每一天都要應付情緒不穩的阿姨 , 與舅母夾計用最 "恰當" 的方式去話比阿姨知 , 又要瞞著婆婆公公 , 到大舅父後事辦好後 , 我阿娘馬上由美國趕來加拿大 , 再次照顧另一個癌症病人 , 因為我老豆仲響香港 , 所以 , 阿娘一到加拿大 , 我就喊住上機 返香港 . 返到香港 , 就輪到我老豆有癌病 , 我捉唔到老豆去睇醫生 , 於是阿娘又響加拿大飛返黎 , 照顧身邊第三個癌症病人 .......
由 1999至2001年 , 我覺得好辛苦 , 真係好辛苦. 我仲想緊 , 如果有四個病人 , 我同我阿娘可唔可以支持得住 ? 呢幾年 , 我地一家各散東西 , 我同細佬響加拿大 , 阿娘響米國 , 老豆響香港 , 身邊都係病人 , 心情大上大落, 工作不穩定 , 對前男友數十年感情亦好死心 , 家中陰霾重重 , 黑仔到連屋苑都要進行番修 , 所有窗戶都被封住整整兩個月 ........
人生有好多不如意,有人覺得一個至親走左已經好大件事 ,天要塌下來. 想不到至勁至鑊至甘0既陸續有來 , 負面情緒之下 , 變得心灰意冷 ,而忽視左人生的意義 ( 人生意義係乜 ? 我唔知架, 我只知 "走著瞧" )
好耐之前, 我老豆同我講 , 做人要 "居安思危" . 好景時就要儲起本錢, 劣境之下要咬實牙關. 千萬不可以有依賴的心態. 人要走的路 ,都是自己走出來. 下下要人幫什至借助於鬼神 , 最後只會落得一敗塗地 ( 呢一樣就係我地唔信任何宗教0既原因).
今日0既自己 ,相比起數年前, 什至數十年前,說話是少了, 做的事是多了. 對生活沒什麼要求,有點兒冷眼旁觀的感覺. 淡淡如水的生活 , 有時可能是沉悶了一點, 但 , 平和的心境卻不是話有就會有.
所以 , 我喜歡現在的我 ~

有早知 , 無乞衣 ~

人生有好多野真係無得返轉頭 . 近排0既感受特別深.

官晶華當日奪人丈夫, 做左短暫的勝利者 . 今日肥姐病重 , 陳年舊事給人挖出來. 要命的是, 肥姐地位不低 , 作為一個香港人的 ICON , 官的負面批評比起當日不倫戀曝光簡直不惶多讓 . 再下來 , 官與秋官生下的一對女兒 , 如何面對母親是一個第三者 , 當日不顧人家感受 , 破壞一個大好家庭 ?

LULU 去左環遊世界有一年, 佢離開前 ,有一日響病榻上同我訴說陳家與各親戚的恩怨情仇 . 有好多事 , 我都只係作為旁觀者 , 事不關己 , 對此等事也不上心 , 是對是錯, 我亦沒有權去批評 . 但如果可以返轉頭 , LULU 會唔會對親戚有另一套態度 ? 在病榻上 , 佢睇到聽到一D以前想都未想過0既真人及真事 , 佢可有想過 , 佢錯失左好多野 ? 但當時 , 佢連最基本可以做0既野都做唔到..........

近來執拾家中什物 ,睇到好多以前買落0既野 , 有好多都係不必要 , 我又想 , 如果無駛過呢一堆錢買過呢一堆野 , 我而家會唔會有多D積蓄 ? 睇到D舊相 , 故友舊友 , 如果當日某D事無發生過 , 今日的我好會係一個乜野人 ?

我而家響度學緊, 唔好有早知無乞衣 , 有好多野,要去珍惜.

新屋進度 - 廚房 , 梳化

廚房開始做櫃喇 ~~ 由地櫃開始 , 我想2星期左右會做好喇 ~~

呢一忽係叫師傅特別做 ~~ 右手邊2個係抽屜 , 左手邊數過黎第一個, 個較位+軌好實淨 , 你地又估下係d乜野 ? 下星期開估 ~~

另外亦去左confirm梳化0既花布 , 因為怕花布太花 , 所以先做一個條子款式. 花布待後再做.

慕道班精句

1. 暫且容許吧 ~
2. 唔好做九個人0既其中一個
3. 真心想信天主教0既人 , 多數係自己行入黎, 而唔係比人挾入黎.

我都是這樣長大的-生活篇

我覺得每一家人都有d特別0既習慣 / 習性.
如我屋企 ,大時大節送禮 , 以前會送好立克/阿華田 / 利賓納 ( 以前物質唔充裕嘛) 而家會送紅酒 , 海味 . 始終未送過糖 / 餅比人 ( 月餅例外 ) .
又 , 食飯都可能會因應家鄉 / 口味而家家唔同 . 我屋企做節一定有烏頭魚同蒸雞同埋炒麵線 . 次次做節無論乜野節都會有.
去到我地細個返學呢一瓣 , 又係有我地自家一套.
我地細個時 , 每人都有一隻小箱 , 入面有一個毛巾匣, 一個餅盒同一個小水壺. 我們幾個表兄弟姊妹一返幼稚園就會比人地拎多一件野 , 除左布書包之外就係呢一隻小箱. 每一日阿娘都會為我地準備小箱內0既所有野 , 今日可能係藍罐曲奇餅 (仲會用番佢個紙杯仔裝好) , 聽日可能係嘉頓雞片 , 後日係威化...... 毛巾仔日日都會換一條. 因為一來學校要查有無手巾仔 , 二來我地走到身水身汗 , 都要抹汗架 .
返到屋企 , 我地就要自己去執d野出黎 , 自己去倒左飲剩0既水 , 洗乾淨餅盒 , 將毛巾仔拎比阿媽洗 .
另外 , 我地自己又有一套餐具 , 聽講係當年舅父去 "美美" 度買0既日本進口貨 ( !!!!) 我地屋企深信 , 細路仔有自家一套餐具 , 以後就會好衣食 , 訓練細路仔自己食飯時都會無咁勞氣. 我記得0既 ....有杯喇, 碟喇 , 前菜碗 , 小湯碗 , 飯碗 , 筷子匙羹叉 , 成套仲會用一隻托盤裝住, 好架勢堂的 ...... 你要我食野, 通常都無乜難度0既. 但我表哥同我細佬 , 追佢走勻成間屋, 至會食到一啖飯 , 所以應該係唔關有無餐具事.
響我細個時, 我老豆一直灌輸一D思想比我 : 自己的事自己做. 自己問題自己想. 佢一直同我講, 我唔係屋企入面小公主, 屋企有飯食我有書讀 , 並唔係必然. 佢雖然作為父母 , 應該為子女安排一D好0既路. 但為左我地著想 , 佢唔想我地郁D就要搵人地幫手 , 所以有好多野, 我地要自己做. 因為有一日佢同阿娘老左, 我地要照顧番佢地轉頭 . 所以 , 佢要我地做一個獨立0既人.
到我要結婚, 我就明白佢0既苦心. 我遇到0既問題比一般人少, 問題係有, 但我可以自己 SETTLE DOWN . 而且響好多事上面 , 佢同阿娘係比 100% 信任及支持我. 就如婆媳問題 , 我從無同佢地呻 / 哭訴 . 夫妻問題 , 佢地感覺到我有唔妥, 但都唔會插手落黎 . 因為我只係同佢地提過 : 我揀0既老公 , 我就會自己一個去面對佢, 唔需要人地幫手. 我唔需要人地響我後面吶喊助威.

我真係好多謝我老豆媽子 ,由細到大 一直都比一D好正面0既野我睇 . 無佢地 , 我無今日 .

搬舊屋D野過黎 ~

又係一個大 PROJECT ~~
先搬煮野食0個一D , 因為.......... 我煮完就唔記得哂 ~

煮乜Q - 潮州麵線

由細到大都好中意食0既家鄉食品 ~~~ 佐料真係無乜,芹菜蒜仔豬肉芫茜等等 ~ 但一食落口就會想起以前太婆同婆婆0既廚房, 與阿爺一家廿幾口去拜山時阿娘0既大舖蓆 ~
乾身潮州麵線半斤 , 出水過冷河備用
豬肉切絲 ( 多用腩肉 ) 生粉豉油胡椒粉略醃
乾水芽菜約半斤
芹菜芫茜大量
肉湯2湯殼
另 特別鳴謝 羊家大少奶落手示範 ~~~( 成日問我影唔影到佢個樣 ....=__="""")
制法 :
爆香豬肉 , 鏟起備用

爆香芹菜芽菜芫茜至6-7成熟後鏟起備用

落油燒紅鑊 , 放入麵線 , 兜炒及分散開麵線, 期間可用鑊鏟"閂"開麵線以方便炒散.

將炒豬肉 / 菜時產生0既肉 / 菜汁加入麵線中繼續炒

大約炒了4-5分鐘 , 加入豬肉及肉湯再炒 , 炒約2-3分鐘, 加入芽菜芹菜等不停翻動

至麵線及材料兜勻後 , 可上碟

無題

尋晚想起之前一大堆野, 好唔開心, 真係好唔開心. 今朝起身 , 都仲有少少不能釋懷. 我就係咁衰架喇 .
另一方面 , 一眾好友唔好誤會 , 如果我曾經做過你地0既中間人 , 而今日我地仲係朋友0既, 我尋日講0既野並不合用於你地身上. 有好多事, 都係我自己自願去做, 係好係醜我自己會一力承擔 , 我亦唔會事後埋怨任何人 ( 又要做又要怨 , 好無種的 ) , 我應承得你地去做 , 我就無悔無怨. .
我只係對一D有事鍾無豔無事夏迎春 , 又要你去做 ( 佢自己又唔去做) 又要批評你做得唔好 ( 佢亦唔見得做得好 ) 0既人發兩炮而已 . 再者 , 我唔介意身邊朋友係D乜野人 , 但對一D不分黑白是非 , 本末倒置0既人極其抗拒 , 一兩句戲言就判左人地死罪 . 我雖說是半個天主教徒 , 天主教要我地原諒他人 , 響呢D野上面 , 我做唔到. 因為我係一個普通人而已 , 我尚有喜怒哀樂 , 我尚有自己一套原則 , 我尚未被人洗腦 . 話我鑽牛角又好 , 話我死心眼都好 , 有一D野 , 我一世都會記得 . 曾有人話我背負太多 , 但佢唔知我而家背負0既野, 唔少係由佢而起 .
可能會有人話 : 你咁睇唔開 , 你辛苦咋喎.
係呀 , 我係睇唔開 , 咁點呀 ? 人生梗有不足架喇 ~ 耐唔中呻一下 , 唔得架 ?

唔做中唔做保唔做媒人三代好

好友貓在敝版內提及好人唔易做 . 作為中間人為好朋友說項勸交 , 最後出來的結果卻令人心傷.
曾幾何時, 我都經常做左中間人, 左右逄源 , 為朋友解圍 , 為男女朋友說項 , 最後卻令自己好辛苦 . 辛苦不在過程 , 而在結果. 但我亦唔可以同外人講 , 因為涉及人家私穩. 有一次忍不住向好友傾訴, 最後換來的是被所謂的 "好友" 定為 "亂爆人家私隱" , 自此之後, 我覺得世上無知心真朋友 , 真係無. 尤其係會耐心去聽自己講野0既朋友, 真係無. ( 各好友不用心傷, 你們仍我的最好朋友, 因為我唔捨得將自己0既難題比你地去分擔. ) 亦響呢一次之後, 我決定唔會去理人家的事. 因為我受唔起第二次打擊. 至於當時所謂的好友, 我亦即時遠離 , 係佢對我無信心好 , 定係我對佢失望都好, 我唔想再有第二次比人加上其他罪名.
當時我覺得自己好戇居, 以為人地係 best friend, 所以就將一d唔可以隨便同人講0既野, 去同呢d best friend 講 , 希望有個聆聽者可以比到d意見我 , 最後出來, 原來人家唔係太重視雙方之間的友情, 仲響過左一大段時間之後 , 才將 "罪名" 一一宣判 , 根本乜都無得返轉頭.
所以, 中間人並唔好做. 而且大部份都係打完齋唔要和尚的 . 好0既唔關你事 , 衰0既你要揹哂上身.
如果自己係屬於 "計較" 0既人 , 呢一樣野一定唔好做.
唔係太計較0既, 都唔好做. 因為代價非常的大 .
唔計較0既 , 你會比當事人更傷.

布藝店推介 - 奧渼布藝有限公司

響以前0既 blog 度都推介過 ~ 之前係入去混吉問野吹水. 今次, 我地訂造左張梳化 , 響遲d 一d 比較頭痕0既問題解決左之後, 會響呢一間店度造埋窗簾.

造窗簾我只去過花園街做,但經驗十分唔好 ( 我已經係有朋友介紹帶埋我去.) 唔準時交貨之餘, 報價時仲係好平, 一比左訂之後, 條數會大左成2-3倍 ! 令人失哂預算. 問番佢轉頭, 舖頭只會話 : 你揀d布貴呀嘛 .....blahblahblah.....
其實做窗簾有分平摺/密摺之分, 所用布量亦會相差2-3倍 , 店舖跟你報價時, 是用平摺用量計 ( 拉埋簾時, 布是平又無摺的) , 當落訂後, 店舖就會用密摺 ( 拉埋簾時有摺,立體感之餘亦用多好多布 ) 黎計數. 報價時, 店舖報比我係 $1200 , 到埋單時, 變成 $3380 .
另外唔好以為上樓店會平 , 我響花園街問過一間, 佢報比我0既價, 比 ornaments 報0既仲要貴差不多一百蚊 ( 同樣的英式花布 ) , 仲未包窗簾軌 ! 單是布價 已相差了五十元 ~ 所以樓上店不一定平宜 !
我極討厭大陸貨, 我阿娘響深圳造的簾, 又縮水又唔對尺寸, 細佬房的羅馬簾更加拉到唔上唔落 ..... 所以我無野好講.

響九龍城有一種文化好得意 : 做開幫襯開就不理好醜平貴, 一路幫襯落去, 所以好多九龍城店舖都唔憂做, 又貴態度又唔好 . 有一個阿伯響聯合道擺檔裝百葉簾 , 貴到無倫....... 但一路都有好多上年紀0既人去幫襯......... 我響 ornaments 拎到0既價錢 , 可以造到四堂百葉簾, 阿伯就只可以造到2幅, 足足貴左一倍.

我跟大夫訂造的正是這一張梳化 (但不是曲尺 ), 而且背靠位置也加高了少許 , 沒有了曲尺 , 改成為6尺半長梳化 , 用的是比較硬的填充料 , 轉為木腳 . 正是 : 我要 A款 + B 腳 + C 墊料 + D顏色 +........... , 集各家大成 , 我最滿意就係呢一D咁彈性的安排.

鳴謝 : 照片由BLOG 主 TIFFANY 借出 .

http://pianomiffy.mysinablog.com/index.php?op=ViewArticle&articleId=520106

店內都是由兩小口打理 , 當日幫我們度尺是先生 , 次次同我吹水又好好傾的是太太 , 從外表看什都看不出是老闆呀 ~~
如果 ornaments 兩小口夫妻檔可以一直以呢一種咁 friendly 0既態度待客 , 呢一間店一定前途無限 .

P.S 我們家的陳積積 , 跟老闆娘的貓像樣到不得了 , 我們都認為兩家的貓可能是失散了的兄弟姊妹 !!!

奧渼布藝有限公司
tel : 2383 3712
九龍城聯合道 50 號 地下

xx 狂熱者

好怕d人 , 為左自己中意0既野, 六親不認 , 唔體諒人都算 , 仲要自以為 " 仲張正義" 而對他人張牙舞爪.
某d話自己愛貓狗0既 , 唔去體諒人地懷孕心情 , 仲一炮火去轟人地要放棄寵物0既準父母. 什至咀咒人家生出黎0既小朋友有缺憾. ( 呢d係有愛心0既人0既所為咩 ? 心腸太毒辣喇 )
某d宗教信徒 , 不理人家感受, 死命去要人家入教 . 人地唔入唔聽 , 就話人地一定落地獄 . ( 比你 up 2 咀就入教0既 , 他日比人 up 多咀 , 都可以離教而去架喎 ~ 呢d比黑社會更無義氣可言 )

做乜都好 , 永遠都要好似打網球咁 , 企響中間 , 至可以接到前面任何一方打來的球. 企死響一邊 , 只係不停錯失 / 損失機會 .
中庸之道 , 永遠都會令你睇到最多0既野.

好男人

好男人定義 ...... 人人唔同 , 由阿千億新抱口中講0既好男人 , 同我口0既好男人 , 其實都好主觀架~
我口中0既好男人 , 安全感係首要 ~ 唔係打得撼得0個 , 係心靈上0既安全感. 之但係 , 安全感又可以分好多類 ......

我試過憂心前男友唔知去左邊 ( 當然係怕佢去滾 ) , 憂心唔知身邊人個腦諗緊乜野 , 憂心另一半心中有不快我都唔知........ 所以 , 我嫁得佢0既 , 就係因為佢唔會令我憂心.

再上一個 advance d 0既層次 , 如果個男人愛自己家庭 / 家人 , 識得煮野 .... 咁又再升多一班 , 算係不遑多讓啦 ~~ 愛己愛人 , 呢d情操得來不易 , 加埋識煮野 , 其實某程度上代表呢個男人都沉醉響家庭生活入面 , 呢d男人 , 去邊度搵呀 ?

其實 , 交異性 / 同性朋友都好 , 投契係第一步 , 之後 , 雙方0既優點係有待大家去發掘 , 雙方0既缺點 , 亦有待雙方去接納 , 有時候 , 雙方交往係唔需要有火花 . 有火花 , 就代表會有熄滅0既一日 , 無火花細水長流 , 至係雙方建立感情0既根基 .

想要轟一聲驚天地泣鬼神0既 , 呢d叫激情 , 什至可以變成係慘情 .
平平淡淡 , 大家相處得平平靜靜 , 可以分享心中情0既 , 我覺得至可以長久囉 ~

講左咁耐 , 你明唔明0者 ? :p

我的寶貝

廚具呀 , 煲呀 , 餐具呀 , 聖誕節裝飾品呀 , 呢d都係我的寶貝.

我唔係太識煮野 , 不過我深信工欲善其事, 必先利其器 . 一隻質料好的鍋子, 一把好的萬用刀, 都可以用上數十個年頭.

我可能未知道一眾朋友0既飲食口味 , 但我想美麗而合適的餐具會令客人窩心 , 覺得受到重視.

我未係一個合格0既教徒, 但我覺得中國人農曆新年 , 與西方聖誕節不遑多讓, 都是溫馨的日子.

最近都在搜集生鐵鍋子的用法 , 煮食需知. 因為買了 le creuset 的牛扒煎鍋 ~ 每一個月出糧的日子, 都掏出銀兩買下一兩件孖人 / DAISY 的廚具 / 餐具.

昨日經過 spotlight , 見到一隻鄉土味很重的鐘 , 打折後才四十四塊錢有找, 馬上買下來 ~ 作為新居的廚房時計 ~~

裝修有感

唔係話睇左d咩磚有感想 , 亦唔係話同阿師傅相處有乜感想.

搭唔到線
攪裝修 , 同攪結婚有好多相同地方 . 就係溝通問題.
一開始老爺話買左樓 , 想我地搬出黎大家住得近少少 , 我地就開始有好多野諗. 一下子太多野想 , 腦袋轉不靈 , 人就燥火得多. 再加上要用另一個角度去同大夫溝通 , 我就頭爆 ~~
為左一張對我黎講作用唔大0既梳妝台 , 又炒一大鑊 . 又一証明老爺同大夫一定係兩仔爺.
再下來 , 老爺為左佢0既堅持 , 將個廁所卜左又砌 , 砌完又卜......
口上說 : 你地住你地自己話事.
行動上 : 無理由無0既 ! 廁所一定有 xxx , 有 yyy . 酒店都有喇 ~ ( 當然 , 佢有可能唔記得左呢度係住家 , 唔係酒店. )
而家 ? 我學識冷眼旁觀 + 君子報仇十年未晚 ~


公私分明
一開始 , 我搵左好朋友黎比少少意見 , 但大夫0既惡劣態度令我無地自容 , 可幸朋友都係明事理人 , 之後乜都唔理當無睇過講過 ; 自此之後 , 我決定唔犧牲私人感情落去呢一d野度. 老爺響唔同時候查問 / 揶揄 / 要求好朋友為我地設計 , 我都無再表態 . 因為我唔想無左個朋友. 當然 , 當中發生乜野事 , 我無向人地提及.
要人設計 ? 比 $$ 喇 ~~ No Free Lunch ~
收左錢 , 都未必會硬食.
無收錢仲要睇面色 ? 唔係嘛 ?


過得人過得自己
呢間屋0既由買屋到裝修, 係由老爺包底 . 呢個亦係四年前 , 雙方家長會面時 , 由老爺奶奶親口向我父母作出的承諾 . 雖說用料係由得我地去挑 , 但我都會盡量慳錢 . 無需要0既就唔會去做 / 買 .

1. 廚房如果櫃框尚是實淨完好 , 換櫃門就可以 , 櫃身保留 , 牆身及地板配回 / 補回同樣的磁磚就可以. 將錢留在做好水電工程上.
之後發現, 廚房原來已經被白蟻蛀左一大半 , 一些吊櫃框只係被兩邊牆 / 橫樑夾住 , 唔放野無問題, 一放重物就會跌落黎 ; 另外磁磚已經係數十年的貨色 , 配不回 ; 最後 , 整個廚房由頭到尾都要重新做過哂 .

2. 因為是頂樓關係 , 天花頂橫樑極多 , 而且因屋內沒有主力牆 , 整間屋以屋框橫樑及角柱位支撐 , 所以問題也比人家多. 只是想想如何避免 "橫樑壓頂" 都想死咁滯 ..... 本來很大的空間 , 因樓底問題 , 都變得很矮. 本來我就不想做太多木工 / 假天花, 但而家唔做都唔得.

3. 廁所我本來就好求其 + 簡單 , 但因為老爺新點子如斯澎湃 , 我都唔可以同佢客氣 , 叫師傅配番之前我嫌貴的 BOLDER , 將廁所的視覺效果拉長拉高一點.

一直以黎 , 我都無想過因為係人地比錢就可以搏老命豪裝 . 我只係覺得 , 住得舒適就可以 . 可能係無要求 , 自然就少左失望 . 有好多野係自己行過黎敲門 , 而唔係去死抓爛留 .... 有好多野我自己都過唔到自己關口 , 點可以肆無忌憚要人地老馮比自己 ?

如果一開頭 , 我就話所有野要新又要靚 ,堅持要用 $1500 一塊的磚 , 我今日可能已經跌左落萬丈深淵.

多個問題 , 定係少左個問題 ?

一樣米養百樣人
十隻手指有長短
家家有本難唸經

我成日覺得 , 世上有好多事有好多組合 , 唔同人有唔同故事. 你覺得0岩0既人地未必同意 ; 你覺得不合情理但人地又可以欣然接受 , 當中並唔係邊一方錯 , 只係大家角度環境同需要唔同而已 . 大家會為對方0既論點 / POINT 去出發 / 著想時 , 就知道大家都無錯 , 亦唔會有交嗌.

譬如 , 我覺得結婚唔使高調 / 浮誇 , 最重要0既係婚後生活同相處 ; 但朋友A覺得一世人一次 , 想大家開心一下 / 夫家親屬繁衍 / 獨生子女只此一次 / 鄉下文化唔同 , 所以要大排筵席大宴親朋 . 咁 ....
我唔可以認為朋友A係奢侈 , 而朋友A亦唔可以認為我寒酸.

引伸到我最近0既煩惱上 ( 想起會有火 , 但我仍食得訓得) , 老爺堅持新屋 :
一定要有2個廁所 , 一定要有企缸 , 個 POINT 係 : 係廁所都有 , 酒店都有 .
姑勿論係0岩唔係 , 接唔接受 , 我都由得佢整 ~ 現實係最實在 , 最公正. 出到黎0既野係好 , 就係好. 唔好 , 就係唔好. 佢個 POINT 係唔係 POINT , 人人定位唔同. 佢話好話0岩, 佢比錢 , 佢話事.
對左佢地咁耐 , 我都學識接受. 因為多舊野響度唔會死人塌樓. 就算唔係老爺比錢 , 佢話要整 , 我都會整. 出左個結果係好定唔好 , 大家心中有數.

我唔係安慰自己 , 而係我一直擔心貓廁所放響邊0既問題, 而家迎刃而解 . 另一方面 , 我都叫大夫同師傅唔好咁認真去睇呢一個企缸 ~~~ 企缸唔一定要企個人響入面.

所以, 世事係無絕對.

美容品試用預告 - CAUDALIE

CAUDALIE VINO PERFECT RADIANCE SERUM

http://www.caudalie-usa.com/site/page/pg389-de181-pr2045-pn_VINOPERFECT_Radiance_Serum.html

今早第一日試用, 水狀 , 在洗面及toner 後使用 . 無乜香味 , 好快吸收 . 有少許黏立感覺, 但響整個護膚程序完成後就無乜問題.

網頁上說是去斑 / 預防黑色素 / 斑 /懷孕時出現的色素沉澱等等 , 另外又可提升皮膚彈性及底層結構 . 呢2個月就試下用呢一隻新野 , 睇下係唔係有效 ~

護膚品報告 - 資生堂 Revital basic step用後3個月報告

四月中皮膚測試屬中性偏乾 , 額頭極乾 , 缺油缺水 , 皮膚暗啞, 角質層厚死皮多. (轉用其洗面膏 + refining mask )

五月至七月期間, 與其他護膚品配合使用, 每日程序中洗面 + 健膚水 + moisturizer + 緊膚水 整套使用. 日夜霜用其他牌子 , 每星期皆使用refining mask / eye mask .

八月初皮膚測試 , 皮膚水份大量提升, 透明感及彈性合乎理想. 唯油份不足 , 新陳代謝處水平之下.

八月及九月期間, 加入Revital 緊膚按摩霜. 一星期一次按摩 .

十月份皮膚測試皮膚水份理想, 透明感及彈性亦有提升, 但油份不足及新陳代謝仍未有改善. 皮膚顧問建議多作按摩 , 另因天氣及濕度有所轉變 , 故建議轉用較滋潤的潤膚霜.

以我用量計 :

洗面膏由五月買到而家, 用左7成左右.

LOTION (健膚水) 及 CONDITIONER (緊膚水) 八月初用到而家 ,用左2/3

MOISTURIZER ( 乳液) 只係用左 1/3

REFINING MASK 五月到而家, 差唔多用哂. ( 一星期一次 )

三日假期

好忙 ~~ 真係好忙 ~ 好在上星期同老爺食左2日飯 , 所以星期六日唔使陪佢.
星期六
星期六放左工 , 同大夫去左沙田宜家傢俬店 , 碰上想買的床有減價 , 有一件陳列品由原價 $2990 , 折了 50% , 才 $1495 , 見沒什麼大問題 , 二話不說馬上付款 ~ 約星期一取貨 ~~ 跟同事要了相熟司機的電話 , 在星期一才去取貨. 然後回家休息一會 , 再過海到金鐘食 TRIPLE O'S 然後就到天主教座堂上課去.
我們班入面 , 原來又有人轉會來了 ~~轉會原因都不離 "那碼子回事" , 見到 YORKIE & NANCY 笑臉 , 就知道脫苦海有多重要 ~~ 他們知道 ANN & THOMAS 都是同一原因轉會 , 開心到呢 ~ 所以我經常認為 , 只會做表面功夫的 , 是留不住人家的心. 心死之後 , 只係選擇離開.
另外 , ALAN 下星期接受收錄禮了 ~~ 我們都會去看 , 大夫更會為他拍照 ~~ 收錄禮後 , 我們會送他跟 APPLE 到聲哥處晚飯 , 因為當晚是ALAN父親大壽呀 ~~
班中另一對夫婦 , JEROMY 跟 STEPHANIE 問我是不是都會接受收錄禮 , 我說我上一次四月時已經收錄了 , 他倆說想再了解深一點才接受 , 伍執事都很讚成 , 認為最要緊的是心甘情願 , 作為教會, 有一眾懂得深思熟慮的教友 ,也是教會的福氣 .
星期日
今日一早 , 我就比隔離0既裝修佬嚇醒 ...... 我訓到好熟 , 突然幾下嘭嘭聲 , 我成個扎起然後雙手推住度牆係咁問大夫 : 咩事呀咩事呀 ,度牆做乜呀 ??????丟呀 ............. 隔離響度 DUP 牆 !!!! 可能聽到我尖叫 , 佢地無再 DUP ......... 但我真係成個醒哂 !!!!
然後 , 我同大夫出左新世紀 , 去美心搵位同羊太飲茶 ~~~ 可能係長假期 , 無乜人 , 拎左票就有位 ~~ 飲完之後同羊太去左做 SKINTEST , 行左一陣就去太子道睇下裝修整成點 . 因為老爺好澎湃0既新點子 , 廁所又無左一忽牆 ...... 連整好左0既磚都卜哂 .......
羊太睇到個廚房好中意 ~~ 地下都舖好哂 ~~ 去水煤氣電制燈位全都做好 , 而家只欠櫃ONLY~~
之後 , 我地約左好友食晚飯 ~ 因為第二日又唔使返工 + 好傾, 呢一餐飯食得好愜意 ~~
星期一
好頹0既一日 ~~~~
一早約左司機去沙田宜家取貨 , 於是又一早爬起身 ( 真係節墜....) 去左九龍城食早餐 , 就入去沙田 , 攪一大輪 , 十一點幾返屋企 , 一撻響沙發, 又訓過 ~~ 一起身已經係三點半 ~ 飲左D湯 , 食埋個茄汁牛腩撈丁 , 就出街去 ~~
我地去左樂富行左一陣, 就返去老爺度食飯 ~~ 食完睇完煙花 , 我地就走喇 ~~ 今晚好好彩 , 佢無提裝修D野 ~~~~ XDDDDDDDDDDDDD

物質與心靈

前者有形 , 後者無形
前者有 $ 可解決 , 後者有十萬九千七都無用
前者可以好表面 , 後者騙不了人 ,
前者可以於數秒成事 , 後者要日積月累
前者多數附有交換條款 , 後者可以不問回報
總結咁多項分別 , 後者唔係話有就會有 , 最緊要 , 仲係自己知唔知呢樣野有幾重要.

以前, 我經過好豐富0既物質生活, 日常生活都係最中意最好0既野. 其後2年唔開心經歷之後, 發現最長久0既, 一定係心靈上富足 , 自己0既想法 , 有無知足的心 , 有無感恩的心 ( 講明先 , 感恩並非宗教愛好者 / 信徒專利 ) .
以前覺得開心 , 係因為覺得自己 : 有車有竉物無家庭負擔有一份好工耐唔中去連根拔 / 去旅行狂買野.
而家覺得開心 , 係因為覺得自己 : 有親人有父母有另一半 , 有生活目標 , 有值得自己去自豪的事 ,呢個世界仲有好多野比我去經歷.
好多人以為我結左婚之後 , 乜野都唔在乎 : 唔打扮唔扮靚唔去街唔約朋友 . 其實 , 我只係對多左屋企人 ( 星期六日要平分比雙方父母, 老爺又會比我父母緊要一點 , 因為LULU不在) , 錢 都用在3頭家入面 , 化妝品 / 衫褲鞋襪有就可以 ,唔需要跟潮流 / 即季款式 .
基本上 , 我現在0既享受 , 的確比未婚 / 早些年頭來得貧乏一D , 但我實際上係開心左好多 . 以前, 曾有人同我呻 , 婚後生活多不如意 , 另一半幾唔識諗 , $$ 又有多緊. 但當時我聽了之後 , 我好生奇怪 , 為何自己無想過自己都有呢一方面問題 ? 點解我唔覺得苦? 點解我唔會搵人地呻 ? 我的事算是小兒科嘛 ? 最後 , 什至比人冠上壓力大 , 所以不懂得呻 / 收收埋埋 ......... 幾乎要去找心理醫生.
最後 , 我自己都想通左 , 我唔係壓力大 , 亦唔係收收埋埋 ( 我個人 , 係收唔埋 , 否則都唔會出現上老爺家拍檯大鬧 LULU 呢D事 ) 我只係方向轉左 , 雖不至差到 : "第二日可以看到太陽 " 咁悲觀 . 但心靈上0既富足 , 真係足以令我生活上其他不如意事煙消雲散 .
我心靈上的富足 , 來自親人及父母的肯定及認同 , 佢地係由細睇到我大0既人 , 佢地最了解我 . 佢地0既肯定及認同至係最公平. 朋友點睇我 ? 我唔太著意. 因為 , 真正瞭解我0既朋友 , 只得一兩位 , 再者 , 不好的經驗之後, 我不再與朋友 "深交" , "君子之交淡如水" 係好0岩 , 響大家雙方心理上造成壓力 , 無謂呀 ~~
另一方面 , 我討厭爭辯 , 喜歡以行動 / 時間去証明一切. 我承認自己好主觀 , 但我亦會聽取人家意見 , 尊重及感謝他人對我的批評 . 亦因為咁 , 我經常比到 "唔聽人講" 0既印象人地 .....
人人都有自己的故事 , 對我過度擔心的朋友請放心 , 我真係無乜事喎 ~ 在我黎講 , 最差0既時間已經過左好耐 , 我亦唔係收收埋埋 , 因為我唔會積壓問題 , 所以無得收 ~ 至於我老公 , 我揀得佢做另一半 , 我當然有我的能耐 . 我唔會又要嫁又要呻 , 如果係咁 , 我就唔係你地所認識0既阿 Q ~