兄弟姊妹緣

見好友萍果寫自己與弟弟的成長軼事, 我又想寫一下.
我自少與細佬無乜兩句,手也不會拖一下,好像是很疏離似的 .....
我們大家只相差一年,可能佢覺得拖阿姨好過拖我 ,至少有番一丁點兒的安全感. 我同佢同月同日不同年結婚,都係12月2日. 我早佢2年結婚~
小時候家人對我倆姊弟的評語是 :
家姐-騰雞,反應慢,讀書唔入腦,傻大姐,感情用事,粗心大意
細佬-反應快,醒目仔, 讀書叻(後來有一年留班,打殘左細佬)畫公仔叻,有心機
-__-""" 殘念 ~~~
同好多小朋友一樣,小時候都有過妒忌,不滿,認為父母偏心.長大以後思想成熟點之後,才發現並不如自己所想,只是 "人睇你好,你睇人地" 細佬響中五會考之後去左加國讀書,本來好好衣食0既佢,去到加國乜都要靠自己,一唔開心就寫信返來,喊到我阿娘死死下.當時細佬可以去加國時我覺得,佢乜都有,我乜都無,好唔開心.後來發現,佢同阿娘都好唔開心,好辛苦; 反而全家最無壓力最優閑0個個原來係我.
後來香港屋企同加國親人都遭逢巨變,我同細佬都各自響香港同加國為家人奔波,後來老父病重,急CALL細佬番黎準備為佢擔幡買水,細佬至返來香港.後來老父奇蹟地痊癒,細佬亦留響香港照顧家人.
第一次為細佬出頭 , 係響一個家族聚會之上,表姨席間問及細佬搵到野做未,細佬話搵緊,表姨就好心向席間一位朋友打探,希望有機會可以推薦一下姨甥仔,點知呢個當年響帝苑酒店當高層的朋友冷言冷語 : 0岩0岩畢業呀?講真機會就真係無乜,個個以為響外國讀過下書就以為返黎有好工....
我睇住細佬塊面黑哂,我亦覺得我面色好難睇,阿娘..... 為左面子,佢去左廁所. 我亦不示弱回番佢一句:我細佬讀工商管理,都唔中意做酒店,又要睇D無謂人面色,呢D工唔0岩佢. 講完之後,全場 DEAD AIR,直至阿娘響洗手間返黎,至有番D聲.呢個女人,後來有左身孕,期間被酒店用唔知咩理由炒左佢. ( OK ~~我認我係小家種, 我好心涼 ~ )
我結婚時,細佬都係行行企企,成日都唔見影.後來佢結婚,我以過來人身份,去同佢攪呢樣攪0個樣,其實作為家姐,我真係覺得係應份.結婚已經好頭痛 ,可以為佢分擔到,我都可以做. 本來乜野我都無預計,什至認為細佬一直都係不善詞令;當佢同老婆上台講野多謝人時,佢老婆有多謝我,我真係受寵若驚(其實我覺得我幫唔到佢D乜,因為我知佢老婆響籌備期間好多野唔開心),到細佬上台時,我仲驚: 佢成個專業司儀咁!! 仲學人攪爛GAG ,成場人響度笑. 多謝哂好多人之後 ,最後佢仲好隆重咁多謝我,嚇到我咩咁,然後好唔爭氣咁流哂馬尿.我唔係因為細佬多謝我而喊,而係真係感受到佢同我之間,雖然平時無乜兩句,但原來心入面好在意對方.
兄弟姊妹緣,就好似煮食送咁,一樣食材可能有好多種整法,每一種做法都係咁好食,整0既食0既都一樣窩心.
我同細佬 , 唔係濃味0既咖哩牛腩 / 茄汁牛腩 , 可能頂哂籠都只係清湯牛腩.但一路食,d 鮮味就一路"攻"出黎 ~~


唔好以為真係咁 sweet , 影相前細佬同老豆講好數 ~ 比家姐錫完一啖有一杯雪糕,兩啖有兩杯


影呢一張相前,細佬已經 ko哂 2杯雪糕 ~


第一次去澳門探公公 ,響葡京門口拍照留念~影完張相之後,我地兩個就向後跌左落草地度.